Oo, Bibla alo exolɔlɔ ɖekɛ dedasɛ mɔ enu cɛ hanci ɖe jɔ o.

Lé woɖe kpukpui cɛ mɛ do le Bibla sugbɔ mɛ na mɛɖewo bui mɔ wowa ӡinӡindoshimɛ nɔ amɛwo do nu nɔ mɛkukuwo le Pɔlu hwenu. Le kpɔwɛ mɛ, Ajagbe Bibla MAWU NYƆ nu mɔ: “Nɔ́ wo de fɔn amɛkukuwo do te gbeɖe ɔ, nyi yí taɖo wo ӡin amɛwo do eshi mɛ do amɛkukuwo tamɛ ɔ?”

Vɔ do jeshi nyɔ ci Bibla wemanyatɔ amɛve ɖekawo nu. Mɛgan Gregory Lockwood nu mɔ kpeɖoji ɖe dele Bibla mɛ alo exolɔlɔ mɛ yí dasɛ mɔ mɛɖe wa ӡinӡindoshimɛ do nu nɔ mɛkuku ɖe o. Ahanke Nukplamɛtɔ Gordon D. Fee ŋwlɛ mɔ: “Exolɔlɔ ɖe alo Bibla kpaxwe ɖe dexo nuxu so ӡinӡindoshimɛ cɛ yɛ nu kpɔ o. Wodenui do fiɖe nɔ Nublabla Yoyu lɔ o yí ŋɖekɛ dedasɛ mɔ Kristotɔ ŋkɔtɔwo wa enu cɛ kpɔ alo cɔci ciwo yí woɖo le apotru lɔwo ku godu wɛ ahan kpɔ o.”

Bibla nu mɔ Yesu nu nɔ dokplɔtɔwo mɔ: “Mí yì yí a ɖo [nukplaviwo] le jukɔnwo pleŋ mɛ. Mí do wo eshi mɛ . . . Mí kpla enu wo nɔ wo a wanɔ do enu ciwo pleŋ yí Ŋ dɔnɔ mí ji.” (Mt. 28:19, 20) Gbɔxwe mɛɖe atɛnŋ atrɔ nukplavi waӡinӡindoshimɛɔ, éɖo akpla nu so Yehowa koɖo Eviɛ nu, áxɔ wo ji se yí ásenɔ tonu nɔ wo. Mɛ ci yí ku yí le yɔdu mɛ datɛnŋ awa enu cɛwo o, yí Kristotɔ ɖe ci yí le agbe datɛnŋ awɛ do nu ni o.—Ŋun. 9:5, 10; Ӡan 4:1; 1 Kor. 1:14-16.

Ecɛyɛ ɖe, nyɔ ci yí Pɔlu nukɔ teŋ ɔ?

Korɛntitɔ ɖewo nu mɔ mɛkukuwo dafɔn so ku o. (1 Kor. 15:12) Pɔlu dasɛ nɔ wo mɔ ŋsu yí wokan. Lé ewɛ doɔ? Étɛ gbe do ji mɔ ‘yekpannɔŋkɔ eku ŋkeŋke.’ Gan ékpɔtɔ le agbe. Ci edonɔ go afɔkuwo ŋkeŋke can ɔ, ékando ji mɔ nɔ yekuɔ, woafɔn ye yi jeŋkwimɛ shigbe Yesu nɛ.—1 Kor. 15:30-32, 42-44, NWT.

Korɛntitɔwo ɖo amɔŋje mɛ mɔ ci yewonyi Kristotɔ amɛshiaminɔwoɔ, yewoadonɔ go nɔnɔmɛ sɛnŋwo ŋkeŋke yí aku gbɔxwe woafɔn yewo. Eyi taɖo ci wosɔ wo “xoca koɖo Kristo Yesu hwecinu wo do [wo] eshimɛɔ,” edasɛ mɔ wosɔ wo “xoca koɖo Yi ku le [wowo] shimɛ ɖoɖomɛ.” (Rɔm. 6:3) Edasɛ mɔ shigbe Yesu nɛɔ, woato nɔnɔmɛ sɛnŋwo mɛ yí aku gbɔxwe woafɔn wo yi jeŋkwimɛ.

Ci Yesu wa ӡinӡindoshimɛ exwe amɛve koɖo ŋɖe vayiɔ, énu nɔ yi apotru amɛve ɖekawo mɔ: “Míanu kɔnkpu ci ŋjikɔ anu yí awa ӡinӡindoshimɛ ci ŋjikɔ awa.” (Maki 10:38, 39, NWT) Yesu nyɔ lɔ gɔnmɛ yí nyi mɔ egbeji ci yenɔkɔ nɔ Mawu ana yeaku. Pɔlu ŋwlɛ mɔ amɛshiaminɔwo “ɖo a kpefun shigbe le Kristo kpefun do ɛnɛ, yí [a] xɔ kanfukanfu shigbe le Kristo xɔ kanfukanfu do ɛnɛ.” (Rɔm. 8:16, 17; 2 Kor. 4:17) Eyi taɖo wowo can, woɖo aku yí woafɔn wo nɔ woanɔ agbe le jeŋkwimɛ.

Susu cɛ yí taɖo woatɛnŋ aɖe Pɔlu nyɔ lɔ gɔnmɛ nywiɖe ahan mɔ: “Nɔ denyi ahan yɔ ɖe, nyi yí mɛ ciwo yí wowakɔ ӡinӡindoshimɛ nɔ nɔ woaku awaɔ? Nɔ nyɔnɔnwi enyi mɔ wodafɔn amɛkukuwo ɖeeɖe ɖe, nyi yí taɖo wowakɔ ӡinӡindoshimɛ nɔ wo koɖo tajinu cɛɔ?”