Yehowa nu nɔ Izraɛliviwo mɔ woɖo anyi jukɔn ci yí le kɔkɔɛɖe. Énu nyɔ ɖeka nɔ wo keŋ asɔ kpedo wo nu woanɔ mɛmiɖe. Énu nɔ wo mɔ: “Mí ŋgbe yì a kaka ŋsukankan xolɔlɔwo do amɛ kpɛtɛwo nu o. Mí ŋgbe wa enu ɖekpokpwi ci yí a sɔ agbe míwo kpenatɔ sɔ xu afɔku mɛ o. Ŋ nyi [Yehowa.]”—1 Ese. 19:2, 16.

Enyɔgbe “ŋgbe wa enu ɖekpokpwi” ɖe Ebre nyɔ ci wonu le tɔtɔmɛ lɔ gɔnmɛ nywiɖe. Vɔ lé mìasi mɛ doɔ? Ʒuifuwo wema ɖeka ci yí xo nuxu so Ese Wema ŋkɔtɔ nu nu mɔ: “Akpaxwe cɛ nɔ kpukpui lɔ . . . gɔnmɛ sese gbɔnnu, ɖo egbɔnnu mɔ woanya nyɔ ci Ebre nyɔgbe cɛwo ci gɔnmɛ woɖe tiin mɔ ‘ŋgbesɔ enuɔ gbɔ sugbɔ o’ nyi teŋ.”

Wemanyatɔ ɖewo mɔ nyɔ cɛwo ca ka koɖo kpukpui 15 tɔ ci yí nu mɔ: “Mí ɖo a le jɔjɔɛɖe le kojoɖoɖo mɛ. Mí de ɖo a nɔ̀ wamɛnɔ ji o, yí mí de ɖo anɔ amɛ kpɛkpin ji o. Mí ɖo a le jɔjɔɛɖe hwecinu mí ɖo kojo nɔ míwo kpena.” (1 Ese. 19:15) Eyi taɖo le lɛɔ, ese ci wodo le kpukpui 16 tɔ mɛ mɔ ‘woŋgbewa enu ɖekpokpui’ do amɛkpena nu, dasɛ mɔ Mawu mɛwo deɖo awa enumajɔmajɔ do wowo kpenawo nu le kojonyɔwo, ajɔnyɔwo, xomunyɔwo mɛ yí atafu wo nɔ wowoŋtɔwo leɖuɖu o. Nyɔnɔnwi enyi mɔ, mìdeɖo awa enu cɛwo o, vɔ mìatɛnŋ agbese nyɔ cɛ ciwo yí le kpukpui 16 tɔ lɔ mɛ nywiɖe sɔwu do emɔ bu ji.

Kpɔ nyɔ ciwo yí le tɔtɔmɛ nɔ kpukpui 16 tɔ ɖa. Mawu nu nɔ yi mɛwo mɔ wodeɖo akaka ŋsukankannyɔwo do amɛ nu o. Ðo ŋwi mɔ de amɛnyɔnunu ɖekɛ yí ŋsukankannyɔwo nunu do amɛ nu nyi o, etɛnŋ hɛn cukaɖawo vɛ hɛnnɛ. (Elo. 10:19; Ŋun. 10:12-14; 1 Tim. 5:11-15; Ʒaki 3:6) Blaŋblaŋ ɔ, xa mɛɖe xa yí nunɔ ŋsunyɔwo do mɛɖe nu keŋ asɔ xoɖyi yi. Étɛnŋ kan ŋsu mɔ yele tɔxu gbɔxwe mɛleli wa ŋcɛ alo nu nyɔ cɛ, nɔ ecɛ adɔ woawu mɛ lɔ can. Ðo ŋwi mɔ ŋsu wokan do nu nɔ Naboti, yí ecɛ dɔ woxo kpe yi do ŋɖemajɔ ji yí eku. (1 Efy. 21:8-13) Ɛɛ, mɛ ci yí kankan ŋsu do nu nɔ amɛ, tɛnŋ sɔ yi kpena gbe do afɔku mɛ shigbe lé akpaxwe evetɔ nɔ 1 Ese Wema 19:16 nui nɛ.

Gbesɔ kpe niɔ, mɛɖe tɛnŋ xaxa yi kpena, ecɛ yí adɔ akan ŋsu do nu ni. 1 Ʒan 3:15 nu mɔ: “Amɛ ɖekpokpwi ci yí gbé eŋwa nɔ nɔviɛ ɔ, é nyi amɛwutɔ, yí mí nya mɔ agbe mavɔ de le amɛwutɔ ɖe mɛ o.” Sɔ ta niɔ, ci Mawu nu nyɔ ciwo yí le kpukpui 16 tɔ mɛ ɖegbɔɔ, énu kpi mɔ “mí de ɖo a xa míwo nɔviwo do eji mɛ o.”—1 Ese. 19:17.

Eyi taɖo, nukplamu sɛnŋ ɖeka le ese vevi ci yí le 1 Ese Wema 19:16 mɛ nɔ Kristotɔwo. Mìdeɖo anunɔ nyɔvɔnwo alo akannɔ ŋsu do nu nɔ mɛɖe gbeɖe o. Nɔ mìanuiɔ, nɔ mɛɖe nu dekpekɔ nɔ mì o alo ŋbya dɔ yí ‘mìwa enu ɖekpokpwi’ yí kankan ŋsu do nu niɔ, ecɛ tɛnŋ dasɛ mɔ mìle ke amɛ lɔ. Kristotɔwo ɖo agbe jijɔ dɔndɔn ŋtɔ́ keŋkeŋ.—Mt. 12:36, 37.