1-2. Nyi yí taɖo Yehowa hun emɔ nɔ mì yí mìvanyi yí xomumɛtɔwoɔ, yí lé ewɛ doɔ?

YEHOWA yɔ mì nɔ mìavanɔ yi xomu ci yí nyi yi sɛntɔwo mɛ. Mɔnukpɔkpɔ gangan ɖeka yí nyi cɛ! Mɛ ciwo yí le mìwo xomu lɔ mɛ sɔ wowoɖekiwo na Mawu yí xɔ Eviɛ tafɛn vɔnsa lɔ ji se. Mìwo xomu lɔ kpɔnɔ jijɔ. Mìsekɔ vivi nɔ agbe lɔ kakacɛ yí gbekpɔkɔ jijɔ, ɖo mìkpɔkɔ emɔ mɔ mìavanɔ agbe mavɔ, etɛnŋ nyi le jeŋkwimɛ alo Paradiso mɛ le nyigban ji.

² Yehowa wa vɔnsa gangan ɖeka ci yí hun emɔ nɔ mì yí mìvanyi yi xomumɛtɔwo, ɖo élɔn mì sugbɔ. (Ʒan 3:16) “Wo xwle [mì] eho vevi.” (1 Kor. 6:20) Yehowa to tafɛn lɔ ji yí na mìatɛnŋ aɖo ekacaca sɛnŋ koɖi. Enyi bubu nɔ mì mɔ, mìyɔnɔ Amɛ gangantɔ le xexe lɔ mɛ mɔ mìwo Da. Shigbe lé mìkpɔɛ le nyɔta ci yí vayi mɛ nɛɔ, Yehowa yí nyi Eda nywitɔ.

3. Enyɔ ciwo yí mìatɛnŋ abiɔ mìwoɖekiwo seɔ? (Kpɔ dakavi ci yí nyi “ Yehowa nya mɔ nyɛŋlia?”)

³ Shigbe Bibla ŋwlɛntɔ ɖeka nɛɔ, mìatɛnŋ abiɔ mìwoɖekiwo se mɔ: “Nyi yí na tɛnŋ na [Yehowa] ɔ? Tɔhonɔ na ŋ enushanu ci yí le ŋ shi.” (Eha. 116:12) Ðoŋci lɔ yí nyi mɔ, mìdatɛnŋ acu fɛn nɔ mìwo Da ci yí le jeŋkwimɛ kpɔ o. Vɔ lɔnlɔn ci eɖo nɔ mì na mìluin. Apotru Ʒan ŋwlɛn mɔ: “Mì lwin, ɖo É lɔn mì do ŋkɔ.” (1 Ʒan 4:19) Emɔ ciwo ji mìato adasɛ mɔ mìlɔn mìwo Da ci yí le jeŋkwimɛɔ?

4. Sɔ koɖo Ʒaki 4:8 ɖe, nyi yí taɖo mìɖo atekpɔ yí ate gogo Yehowaɔ?

⁴ Yehowa ji mɔ mìwo le te gogo ye yí akannɔ seŋ koɖo ye. (Hlɛn Ʒaki 4:8.) Édo ŋsɛn mì mɔ mìwo le “donɔ egbe ɖaɖa tɛgbɛɛ” yí yiŋtɔ ɖonɔ to mì hweɖekpokpuinu. (Rɔm. 12:12) Dexa alo kpo keke aɖo to mì aglo o. Mìɖonɔ to yi nɔ mìhlɛnnɔ yi Nyɔ, Bibla koɖo wema ciwo yí kpenɔdo mì nu mìmɔnɔŋje mɛ. Mìgbeɖonɔ to yi nɔ mìɖo to nywiɖe le Kristotɔwo bɔbɔwo mɛ. Shigbe lé seŋkankan nywiwo na ɖeviwo tenɔ gogo wowo jilawo nɛɔ, seŋkankan koɖo Yehowa gashiagamɛ na mìtenɔ gogui.

5. Lé mìawɛ ana mìwo gbedodoɖawo anyɔ dojiɔ?

⁵ Bu tamɛ kpɔ so enyɔ ciwo yí ènunɔ nɔ Yehowa le gbedodoɖa mɛ nu. Yehowa ji mɔ mìwo le nu mìwo jimɛnyɔwo nɔ ye le gbedodoɖa mɛ. (Eha. 62:8) Mìɖo abiɔ mìwoɖekiwo se mɔ: ‘Anyi gbedodoɖawo vale shigbe lɛta ci wotrɔ yí ŋwlɛnkɔ zeneniɖe kpoŋ a alo wonyi jimɛnyɔ ciwo yí wowa ɖaŋ ŋwlɛn?’ Kankandojitɔɔ, èlɔn Yehowa sugbɔ yí ji mɔ yeana ekacaca ci yí le ye koɖo yɛ gblamɛ akpɔtɔ asɛnŋ. Gbɔxwe àwɛ ahan ɔ, èɖo akannɔ seŋ koɖi gashiagamɛ. Nu ao nyɔ veviwo ni. Xo nuxu so ao jijɔkpɔkpɔ koɖo ao vevisesewo nu ni. Kando ji mɔ yeatɛnŋ anu nɔ akpedo ye nu.

6. Nyi mìɖo awa keŋ atenɔ gogo mìwo Da ci yí le jeŋkwimɛ dojiɔ?

⁶ Gbɔxwe mìate gogo mìwo Da ci yí le jeŋkwimɛɔ, mìɖo adonɔ akpe ni hweɖekpokpuinu. Mìlɔn do enyɔ ci ehakpatɔ ɖeka nu ji. Éŋwlɛn mɔ: “[Yehowa] mìwo Mawu, E wa enu nyakpɔkpɔ sugbɔ! É ɖo totomɛ nywiwo nɔ mì. Amɛ ɖe da tɛnŋ ŋwlɛ wo pleŋ o. Na xo nuxu sugbɔ so enu hɔnnɔ ciwo yí wo da tɛnŋ hlɛn nu.” (Eha. 40:5) Mìdedonɔ jeshi mɔ Yehowa nuwo nyɔ enyi evɔ o, vɔ mìto mìwo nuxuxoxo koɖo mìwo nuwanawo ji yí donɔ akpe ni. Ecɛ na mìto akpo nɔ amɛ sugbɔ le egbɛmɛ. Ðo enu ciwo pleŋ Mawu wa dejenɔŋ nɔ amɛ sugbɔtɔ le xexeɛ mɛ gbɛ o. Enu ɖeka ci yí dasɛ mɔ mìle “ŋkeke vɔvɔwo mɛ” yí nyi mɔ amɛwo nyi akpemadotɔwo. (2 Tim. 3:1, 2) Mìdaji mɔ mìawa nu ahan gbeɖe o!

7. Nyi Yehowa ji mɔ mìwo le waɔ, yí nyi yí taɖoɔ?

⁷ Jilawo dejinɔ mɔ yewo viwo awanɔ vu o, vɔ wojinɔ mɔ wo le wa xlɔ. Ahanke Yehowa jikɔ mɔ ye sɛntɔwo pleŋ le wa xlɔ nɛ. Le nyɔnɔnwi mɛɔ, lɔnlɔn ci mìɖo nɔ mìwonɔnɔwo yí danasɛ mɔ mìnyi Kristotɔ adodwiwo. (Ʒan 13:35) Mìlɔn do enyɔ ci ehakpatɔ ɖeka nu ji, éŋwlɛn mɔ: “Ooo, lé e nyɔ do, yí je acɔ do, hwecinu nɔvinɔwo tɛnŋ nɔ̀ anyinɔnɔ doju yí xoca nyɔnɔnwitɔ!” (Eha. 133:1) Nɔ mìlɔn mìwo nɔviŋsu koɖo nɔvinyɔnuwoɔ, mìdadasɛ nɔ Yehowa mɔ mìluin. (1 Ʒan 4:20) Jijɔ gangan enyi nɔ mì mɔ mìnyi xomumɛtɔ nɔ nɔviŋsu koɖo nɔvinyɔnu ciwo yí ‘wanɔ xomɛvu nɔ wowonɔnɔwo yí senɔ vevi do wowonɔnɔwo nu’!​—Efe. 4:32, NWT.

8. Sɔ koɖo 1 Ʒan 5:3 ɖe, susu ŋkɔtɔ ci yí taɖo mìsenɔ tonu nɔ Yehowaɔ?

⁸ Yehowa ji mɔ ɖeviwo le ɖo to wowo jilawo, ahanke eji mɔ mìwo le ɖo to ye nɛ. (Efe. 6:1) Mìɖo ase tonu ni, ɖo eyi nyi mìwo Watɔ ci yí na mìle agbe yí egbenya ŋɖɛ wu jilawo pleŋ. Vɔ susu ŋkɔtɔ ci yí taɖo mìsenɔ tonu nɔ Yehowa yí nyi mɔ  mìluin. (Hlɛn 1 Ʒan 5:3.) Susu sugbɔ li ciwo yí taɖo mìɖo ase tonu nɔ Yehowa, gan deʒinnɔ mì ji mɔ mìwo le setonu nɔ ye o. Yehowa na amɛɖekishinɔnɔblɔɖe mì, eyi taɖo nɔ lɔnlɔn na mìsɔ gbeta mɔ mìase tonu niɔ, ejɔnɔ ji ni.

9-10. Nyi yí taɖo ele veviɖe mɔ mìajeshi Mawu sewo keŋ awanɔ do wo jiɔ?

⁹ Jilawo jinɔ mɔ yewo viwo le nɔ vofamɛ. Eyi taɖo wodonɔ agbenɔnɔ se ciwo yí aglɔn ta nɔ wowo viwo. Nɔ ɖevi lɔwo wanɔ do emɔdasɛnamɛ lɔwo jiɔ, wodadasɛ mɔ yewokando yewo jilawo ji yí gbebukɔ wo. Ahanke ele veviɖe sugbɔ mɔ mìajeshi mìwo Da ci yí le jeŋkwimɛ sewo keŋ awanɔ do wo ji nɛ. Nɔ mìwɛni ahan ɔ, mìadasɛ nɔ Yehowa mɔ mìluin yí gbebuikɔ. Ecɛ ana mìwoŋtɔwo akpɔ nyɔnawo. (Ezai 48:17, 18) Vɔ mɛ ciwo yí gbe Yehowa koɖo yi sewoɔ, wowoŋtɔwo vakpɔnɔ lɔzu lɔwo le vɔvɔnu.​—Gal. 6:7, 8.

¹⁰ Nɔ mìnɔ agbe yí esɔ koɖo lé Yehowa ji doɔ, mìaglɔn ta nɔ mìwoɖekiwo le ŋcilanmɛ, seselelanmɛ koɖo gbɔngbɔnmɛ. Yehowa nya enu ci yí nyɔ nɔ mì. Nɔvinyɔnu Aurora ci yí le Etats Unis nu mɔ: “Ŋnya mɔ hweɖekpokpuinu ci mìɖo to Yehowaɔ, mìwo gbemɛ nyɔnɔ doji.” Ahanke enyi nɔ mìwo can nɛ. Nyɔna ciwo yí èkpɔ ci èwa do Yehowa mɔdasɛnamɛ nywi lɔwo jiɔ?

11. Lé gbedodoɖa kpenɔdo mì nu doɔ?

¹¹ Gbedodoɖa kpenɔdo mì nu yí mìsenɔ tonu, nɔ yi wawa gbɔnkɔnu can. Hweɖewonuɔ,  egbɔnnɔnu mɔ mìase tonu nɔ Yehowa, ɖo nuvɔnmɛwo mìnyi. Vɔ mìɖo aje agbla sɛnsinɖe yí aɖu edro vwinwo ji. Ehakpatɔ lɔ do klo nɔ Mawu mɔ: “Do ŋsɛn anyi gbɔngbɔn yí a le gbesɔsɔ yí a na bubu Eo.” (Eha. 51:12) Denise ci yí nyi gbeshiagbe mɔɖetɔ nu mɔ: “Nɔ wawa do Yehowa sewo ji gbɔnnu nɔŋ ɔ, ŋdonɔ gbe ɖaɖa yí biɔnɔ ŋsɛn ci nasɔ wa enunywi.” Mìatɛnŋ akando ji mɔ, Yehowa aɖo gbedodoɖa cɛ hanciwo ŋci.​—Luiki 11:9-13.

12. Sɔ koɖo Efezitɔwo 5:1 ɖe, nyi mìɖo awaɔ?

¹² Hlɛn Efezitɔwo 5:1. Ci mìnyi Yehowa “vi lɔnlɔntɔwoɔ,” mìwanɔ enu ci ji mìasun keŋ asrin. Mìsranɔ yi nɔnɔmɛwo nɔ mìlɔn amɛwo, wanɔ xomɛvu nɔ wo yí sɔ enu kenɔ wo. Nɔ mɛ ciwo yí dejeshi Mawu, kpɔ mìwo gbenɔnɔ nywiwoɔ, atɛnŋ ana woakpla enu so Mawu nu doji. (1 Piɛ 2:12) Jila Kristotɔwo ɖo atekpɔ awanɔ nu do wowo viwo nu shigbe lé Yehowa wanɔ nu do wowoŋtɔwo nu nɛ. Nɔ wowɛni ahan ɔ, wowo viwo atɛnŋ aji mɔ yewoanyi exlɔ koɖo mìwo Da amɛlɔntɔ lɔ.

13. Nyi yí mìɖo awa keŋ anyi edɔngbetɔwoɔ?

¹³ Ðeviwo sɔ wowo dawo yinɔ go yí xonɔ nuxu so wo nu koɖo jijɔ. Ahanke mìsɔ mìwo Da, Yehowa ci yí le jeŋkwimɛ yinɔ go yí jinɔ mɔ amɛwo le jeshi ɖɛ nɛ. Mìsenɔ le mìwo ji mɛ shigbe Efyɔ Davidi hannɛ, éŋwlɛn mɔ: “Anyi kla yigo so [Yehowa] nu.” (Eha. 34:2) Vɔ nɔ ŋkpɛn  wanɔ mì ɖe, lé mìawɛ anyi edɔngbetɔɔ? Yehowa akpɔ jijɔ nɔ mìxonɔ nuxu so nu. Gbesɔ kpe niɔ, mɛ ciwo mìkpla nu koɖo akpɔ nyɔna so mɛ hɛnnɛ. Nɔ mìsɔ susu ɖo enyɔ cɛ jiɔ, mìanyi edɔngbetɔwo. Yehowa ana edɔngbegbe ci yí ʒan mì. Ékpedo nɔviwo nu le exwe sanŋdi ŋkɔtɔ mɛ yí wonyi edɔngbetɔwo; ákpedo mìwo nu hɛnnɛ.​—1 Tɛs. 2:2.

14. Susu ɖewo ci yí taɖo ele veviɖe mɔ mìadranɔ eŋɛnywi lɔɔ?

¹⁴ Yehowa detranɔ amɛ mɛ o. Eyi taɖo nɔ mìlɔn mɛ ciwo yí deso eju ɖekɛ mɛ koɖo mìɔ, eji jɔɛni. (Edɔ. 10:34, 35) Emɔ nywi ɖeka ci ji mìato yí alɔn mɛbuwo yí nyi mɔ, mìadra eŋɛnywi lɔ nɔ wo. (Mt. 28:19, 20) Nyi yí atɛnŋ ato so mɛɔ? Mɛ ciwo yí ɖonɔ to mì atɛnŋ atrɔ wowo gbenɔnɔwo le kakacɛ mɛ yí akpɔkɔ emɔ mɔ yewoavanɔ agbe tɛgbɛɛ le paradiso mɛ.​—1 Tim. 4:16.

15-16. Susu ciwo yí taɖo mìkpɔnɔ jijɔɔ?

¹⁵ Yehowa nyi Eda ci yí lɔnnɔ amɛ, eyi taɖo eji mɔ ye xomu akpɔnɔ jijɔ. (Ezai. 65:14) Nɔ mìdokɔ go cukaɖawo can ɔ, susu sugbɔ li ci yí taɖo mìatɛnŋ akpɔ jijɔ le kakacɛ mɛ. Le kpɔwɛ mɛ, mìkando ji mɔ mìwo Da ci yí le jeŋkwimɛ lɔn mì sugbɔ. Mìmɔŋje Mawu Nyɔ, Bibla mɛ nywiɖe. (Ʒer. 15:16) Mìle xomu vevi ɖeka mɛ yí xomumɛtɔ lɔwo pleŋ lɔn Yehowa koɖo yi sewo yí gbelɔn wowonɔnɔwo.​—Eha. 106:4, 5.

¹⁶ Mìatɛnŋ akpɔtɔ akpɔnɔ jijɔ, ɖo mìkando ji mɔ agbe lɔ avanyɔ doji le esɔmɛ. Mìnya mɔ le majinjinɖe mɛɔ, Yehowa aɖe amɛvwinwo pleŋ si yí ato yi Fyɔɖuxu lɔ ji yí ana nyigban lɔ pleŋ atrɔ paradiso. Mìgbekpɔkɔ emɔ veviɖe mɔ woavafɔn mɛ ciwo yí ku nɔ woawa ɖeka koɖo wowo mɛ veviwo. (Ʒan 5:28, 29) Jijɔ manumanu yí anyi hwenɔnu! Yí vevitɔ lɔɔ, mìkando ji mɔ mɛɖekpokpui ci yí le jeŋkwimɛ koɖo nyigban ji abu mìwo Da amɛlɔntɔ lɔ yí akanfui yí asin shigbe lé eje do nɛ.