NYƆNU amɛve ɖekawo zɔnkɔ doju le Baguio juganmɛ, le Philippines. Wokpɔ kunuɖeɖe kekevi ɖeka, vɔ wodeyi gbɔ o. Eyi nɔvinyɔnu Helen ci yí le kekevi lɔ gbɔ ko nukui do wo nyaa. Nyɔnu lɔwo kpɔtɔ le wowo mɔ yí yikɔ, vɔ lé Helen ko nukui koɖo vividodoamɛnu wa dɔ do wo ji.

Yi godu ci nyɔnu lɔwo ɖo hun vayikɔɔ, wokpɔ jw.org ci wotre do Fyɔɖuxuxɔ ɖeka nu. Eyi woɖo ŋwi mɔ yewokpɔ wemakui cɛ hanwo le kekevi lɔ ji gbɛsa. Wo koɖo ve ɖyi le hun lɔ mɛ keŋ vayi kpɔ bɔbɔ gamɛ vovovo ci woŋwlɛ do agbo lɔ ji, nɔ hamɛ ciwo yí zannɔ Fyɔɖuxuxɔ lɔ.

Nyɔnu lɔwo koɖo ve va bɔbɔ ci wowa kplɔɛdo. Vɔ ci woɖo Fyɔɖuxuxɔ lɔ mɛ ɖe, mi wodo goɔ? Helen yɔ! Eyi woɖo ŋwi zeɖeka mɔ eyi ko nukui nyaa do yewo vayi. Helen nu mɔ: “Ci wozɔn vaŋ gbɔɔ, ŋvɔn hwɛɖeka. Ðo ŋbui mɔ taŋfuin ŋwa ŋɖe koɖo wo yɔ.” Vɔ nyɔnu lɔwo ɖe mɛ nɔ Helen mɔ yewokpɔɛ vayi le kekevi lɔ gbɔ.

Nyɔnu lɔwo se vivi nɔ bɔbɔ lɔ koɖo ehadodo koɖo nɔviwo yí ele shigbe mɔ wowo xomumɛtɔwo gbɔ wole hannɛ. Ci wokpɔ mɛbuwo tɔ Fyɔɖuxuxɔ lɔ mɛ kplɔkplɔ le bɔbɔ lɔ goduɔ, wobiɔ se mɔ yewoatɛnŋ akpedo wo nu dru ma. So hwenɔnuɔ, nyɔnu ɖeka so le Philippines ju lɔ mɛ, vɔ xlɔtɔ tɔ bɔbɔ lɔwo yiyi yí tɔ Bibla kplakpla. Nyi yí taɖoɔ? Nukui ci woko di yɔ!