1-2. (a) Nyi yí taɖo egbɔnnɔnu nɔ amɛ sugbɔ le egbɛ mɛ mɔ woakando mɛ ciwo yí le acɛtɔxuwo jiɔ? (b) Nyi mìakpɔ le nyɔta cɛ mɛɔ?

 EGBƆNNƆNU nɔ amɛ sugbɔ le egbɛ mɛ mɔ woakando mɛɖe ci yí le acɛtɔxu ji. Ðo wokpɔ mɔ acɛkpatɔwo koɖo esedɔwatɔwo donɔ hotɔnɔwo koɖo amɛganganwo ji, vɔ yí trɔ tanɔfu wamɛnɔwo. Bibla wa ɖaŋ nui nywiɖe ci emɔ: “Agbetɔ kpa acɛ do agbetɔ ji nɔ evwin yitɔ.” (Ŋun. 8:9, NWT) To vo nɔ yɛɔ, sɛnsɛnŋkɔnɔtɔ ɖewo wanɔ enudakpuwo, ci yí wɛ mɔ mɛɖewo mi kankando Mawu ji. Eyi taɖo nɔ mìkplakpla Bibla koɖo mɛɖeɔ, ele mɔ mìakpedo nu nɔ akando Yehowa koɖo mɛ ciwo yí Eɖo agbanleamɛjitɔxuwo le nyigban lɔ ji.

² Vɔ de Bibla nukplaviwo ɖekɛ yí ɖo akannɔdo Yehowa koɖo yi habɔbɔ lɔ ji o. Mɛ ciwo yí le nyɔnɔnwi lɔ mɛ so xwe nɛniɖe can ɖo akpɔtɔ akannɔdo ji mɔ, lé Yehowa wanɔ nuwo do yí nyi nywitɔ. Hweɖewonuɔ, ŋɖe tɛnŋ vajɔ yí ado lé mìkando Yehowa ji kpɔ. Le nyɔta cɛ mɛɔ, mìakpɔ enu amɛtɔn ciwo yí atɛnŋ ado mìwo xɔse kpɔ: (1) nɔ mìhlɛnkɔ enujɔjɔ ɖewo le Bibla mɛ, (2) nɔ Yehowa habɔbɔ lɔ na mì mɔdasɛnamɛ ɖe, koɖo (3) nɔ cukaɖawo va mì ji le sɔ mɛ.

3. Lé Bibla mɛ xolɔlɔ ɖewo tɛnŋ do kankandoji ci mìɖo do Yehowa nu kpɔ doɔ?

 ³ Nɔ mìhlɛnkɔ Mawu Nyɔ lɔɔ, etɛnŋ vajɔ mɔ lé Yehowa wa nu do mɛɖewo nu alo yi gbeta ɖewo tɛnŋ kpaca mì.  Le kpɔwɛ mɛ, le Amɛ Hlɛnhlɛn wema mɛɔ, mìhlɛn mɔ Yehowa mɔ wo le wu Izraɛlivi ɖeka ci yí fɔkɔ nake le Sabatigbe. Vɔ exwe sanŋdi nɛniɖe godu le Samiɛli wema amɛvetɔ lɔ mɛɔ, mìkpɔ mɔ Davidi wa hashi yí gbewu amɛ xu ji, gan Yehowa sɔ ke yɛ. (Amh. 15:32, 35; 2 Sam. 12:9, 13) Mìtɛnŋ biɔ se mɔ, ‘Nyi yí taɖo Davidi wa hashi yí gbewu amɛ gan Yehowa sɔ ki, vɔ yí mɛbu fɔ nake gbali yí eso eku kojo nɔ yɛɔ?’ Nɔ mìaɖo nyɔbiɔse cɛ ŋciɔ, mìakpɔ enu amɛtɔn ciwo mìdeɖo aŋlɔbe nɔ mìhlɛnkɔ Bibla o.

4. Lé Gɔnmɛjeje 18:20, 21 koɖo 2 Ese Wema 10:17 do ŋsɛn kankandoji ci mìɖo do Yehowa kojoɖoɖo jɔjɔɛwo ji doɔ?

⁴ De gashiagamɛ yí Bibla nunɔ enyɔwo pleŋ kudo enujɔjɔ ɖe nu o. Le kpɔwɛ mɛ, mìnya mɔ Davidi se vevi do nuvɔn ci ewa nu yí trɔ ji mɛ. (Eha. 51:2-4) Vɔ ŋsu ci yí fɔ nake le Sabatigbe yɛ ɖe, ése vevi do enu ci ewa nua? Éda le Yehowa se buwo ji vayia? Wokanxli alo gbe nyɔ ni vayi gbɔxwe egbe mɔ yedasea? Bibla denu nyɔ ɖe so nu o. Vɔ mìatɛnŋ akando enyɔ cɛ ji: Yehowa “nyi Mawu-jɔjɔɛ.” (2 Ese. 32:4) Yehowa dekpɔnɔ do womɔwomɔ, enyɔbudoamɛnu alo nubuɖe nu yí awa afɛn aɖo kojo shigbe lé agbetɔwo wɛni le kojoɖoɖonyɔwo mɛ nɛ o; vɔ enu ciwo pleŋ yí jɔ yí ekpɔ sɔ ɖonɔ kojo. (Hlɛn Gɔnmɛjeje 18:20, 21; 2 Ese Wema 10:17.) Nɔ mìkplakɔ nu so Yehowa koɖo ese yitɔwo nu dojiɔ, mìgbekannɔdo kojoɖoɖo yitɔwo ji sɔwu. Nɔ mìhlɛn enujɔjɔ ɖe le Bibla mɛ, yí mìɖo biɔse ɖewo ciwo mìdekpɔ ɖoŋci nɔ kakacɛ can ɔ, enu sugbɔ ciwo mìnya so Mawu nu na mìakando ji mɔ “enushanu ci [E] wa nyɔ.”—Eha. 145:17.

5. Lé nuvɔnmɛ ci mìnyi kpɔnɔ ŋsɛn do lé mìɖonɔ kojo do jiɔ? (Kpɔ dakavi ci yí nyi “ Nuvɔnmɛ ci mìnyi na mìwa fɛn ɖonɔ kojo.”)

⁵ Nuvɔnmɛ ci mìnyi na mìwa fɛn ɖonɔ kojo. Mawu wa mì do yi nɔnɔmɛ nu, eyi taɖo mìjinɔ mɔ wo le wanɔ nu do agbetɔwo nu nywiɖe. (Gɔnm. 1:26) Ci enyi ahan can ɔ, nuvɔnmɛ ci mìnyi na mìwa fɛn ɖonɔ kojo, nɔ mìbu mɔ mìnya nyɔ lɔwo pleŋ can. Le kpɔwɛ mɛ, èɖo ŋwi lé Ʒonasi wa nu do ci Yehowa mɔ yeasɔ nu  ke Ninivutɔwoa? (Ʒonasi 3:10–4:1) Bu tamɛ kpɔ so enywi ci yí to so mɛ hwenu Yehowa ku ŋshishi nɔ wo nu. Wohwlɛn Ninivutɔ ciwo yí wu 120 000 gbe gan! Edasɛ mɔ Ʒonasi yí wa afɛn ɖo kojo amowo, denyi Yehowa yɔ o.

6. Nyi yí taɖo denyi dandandan mɔ Yehowa adrenɔ enu ci yí taɖo esɔ gbeta ɖe mɛ nɔ mìɔ?

⁶ Deʒan mɔ Yehowa adre enu ci yí taɖo esɔ gbeta ɖe mɛ nɔ mɛɖe o. Nyɔnɔnwi enyi mɔ Yehowa ɖe emɔ nɔ yi sɛntɔwo le blema yí wonu lé wokpɔ gbeta ci esɔ do alo nu wowo susu do enu ci eji mɔ yeawa nu. (Gɔnm. 18:25; Ʒonasi 4:2, 3) Hweɖewonuɔ, éɖe enu ci yí taɖo esɔ gbeta ɖe mɛ. (Ʒonasi 4:10, 11) Ele ahan gan, denyi dandandan yí Yehowa adre enu ci yí taɖo esɔ gbeta ɖe mɛ o. Eyi wa mì, taɖo deʒan mɔ ákpɔ mìwo susu gbɔxwe awa ŋɖe alo ana mì kɔnŋta so enu ci ewa nu o.—Ezai 40:13, 14; 55:9.

7. Nyi wawa yí atɛnŋ agbɔnnu nɔ mìɔ, yí nyi yí taɖoɔ?

⁷ Kankandoji li mɔ mìnya mɔ Yehowa wanɔ nuwo do jɔjɔɛ ji gashiagamɛ. Vɔ cukaɖa lɔ nyi mɔ, kankando mɛ ciwo yí eɖo agbanleamɛjitɔxuwo ji tɛnŋ gbɔnnu nɔ mì. Mìtɛnŋ biɔ se mɔ mɛ ciwo yí le agbanleamɛjitɔxuwo le Yehowa habɔbɔ lɔ mɛ wanɔ nuwo do Yehowa tɔ jia, alo wokplɔnɔ wowoŋtɔwo susu do. Taŋfuin mɛɖewo biɔ nyɔ cɛ wowoɖekiwo se le blema. Mìagbetrɔva kpɔwɛ ciwo nu mìxo nuxu so le  mamamɛ 3 ji. Taŋfuin mɛ ci yí gbe wawa do Sabati se lɔ ji mɛwo tɛnŋ biɔ wowoɖekiwo se mɔ, Moizi biɔ nyɔ Yehowa se gbɔxwe yí so ku kojo nɔ yewo mɛ lɔ nyao ma. Ahanke Uri Hititɔ xlɔ ɖe ci yí nya mɔ Davidi wa hashi koɖo Uri ashiɛ tɛnŋ nu mɔ, ci Davidi nyi efyɔ taɖo ezan yi ŋsɛn keŋ yí shi nɔ etodɔndɔn ci eje nɔ. Yehowa kando mɛ ciwo yí esɔ yí wokplɔkɔ yi habɔbɔ lɔ koɖo hamɛ lɔwo ji. Eyi taɖo nɔ mìdekando mɛ cɛwo jiɔ, anyi mìdekando Yehowa ŋtɔ ji o.

8. Lé enyɔ ci wonu do Edɔwawawo 16:4, 5 mɛ sɔgbe koɖo lé enuwo yikɔ do le hamɛwo mɛ gbɛ doɔ?

⁸ Egbɛɔ, Yehowa kplɔkɔ yi habɔbɔ lɔ kpaxwe ci yí le nyigban ji to “hwashi egbejinɔtɔ koɖo ŋɖɛnyatɔ lɔ” ji. (Mt. 24:45, NWT) Hwashi cɛ kpɔkpɔ Mawu mɛwo ji le xexe lɔ pleŋ mɛ, yí nanɔ mɔdasɛnamɛwo hamɛmɛshinshinwo shigbe lé edɔjikpɔha ci yí ni le exwe sanŋdi ŋkɔtɔ mɛ wɛ vayi nɛ. (Hlɛn Edɔwawawo 16:4, 5.) Hamɛmɛshinshinwo can tenɔkpɔ yí wanɔ do mɔdasɛnamɛ lɔwo ji le hamɛ lɔwo mɛ. Nɔ mìwanɔ do mɔdasɛnamɛ ciwo habɔbɔ lɔ koɖo hamɛmɛshinshinwo nanɔ jiɔ, anyi mìkando Yehowa ji mɔ lé ewakɔ nuwo do yí nyi nywitɔ.

9. Hwenu yí atɛnŋ agbɔnnu nɔ mì mɔ mìalɔn do gbeta ciwo hamɛmɛshinshinwo sɔ jiɔ, yí nyi yí taɖoɔ?

⁹ Hweɖowonuɔ, etɛnŋ gbɔnnu mɔ mìalɔn do gbeta ciwo hamɛmɛshinshinwo sɔkɔ ji. Le kpɔwɛ mɛ, exwe ɖewo vayi yɛɔ, wowa trɔtrɔ so hamɛ koɖo ekán sugbɔ nu. Hamɛmɛshinshinwo sɔ eŋɛnywidratɔ ɖewo ɖaɖa hamɛ buwo mɛ koɖo susu mɔ woazan Fyɔɖuxuxɔwo nywiɖe. Nɔ wosɔ mì ɖaɖa eha bu mɛɔ, etɛnŋ gbɔnnu mɔ mìaso gbeɖe mìwo xlɔwo koɖo mìwo xomumɛtɔwo ɖɛ. Yehowa yí nu nɔ hamɛmɛshinshin lɔwo, hamɛ ci mɛ woasɔ eŋɛnywidratɔ ɖekaɖeka ɖaɖaa? Oo. Eyi taɖo etɛnŋ gbɔnnu  nɔ mì mɔ mìawa do emɔdasɛnamɛ lɔ ji. Vɔ Yehowa kando hamɛmɛshinshinwo ji mɔ woasɔ gbeta nywiwo, mìwo can mìɖo akando wo ji. *

10. Sɔ koɖo Ebretɔwo 13:17 ɖe, nyi yí taɖo mìawanɔ nu alɔlealɔmɛ koɖo hamɛmɛshinshinwoɔ?

¹⁰ Nyi yí taɖo mìɖo alɔnnɔ do hamɛmɛshinshinwo gbetasɔsɔwo ji, nɔ wodesɔgbe koɖo lé mìwo ji do can ɔ? Ðo nɔ mìwɛ ahan ɔ, mìana fafa akpɔtɔ anɔ Mawu jukɔn lɔ mɛ. (Efe. 4:2, 3) Hamɛwo yinɔ ŋkɔ nɔ amɛshiamɛ sɔ yiɖeki hwɛ keŋ wanɔ do gbeta ciwo hamɛmɛshinshinwoha lɔ sɔ ji. (Hlɛn Ebretɔwo 13:17.) Gbesɔwu ŋnɔɔ, mìadasɛ mɔ mìkando Yehowa ji nɔ mìwakɔ nu alɔlealɔmɛ koɖo mɛ ciwo ji ekando mɔ woale be nɔ mì.—Edɔ. 20:28.

11. Nyi yí atɛnŋ akpedo mì nu mìalɔn awanɔ do hamɛmɛshinshinwo gbetasɔsɔwo jiɔ?

¹¹ Nɔ mìɖo ŋwi mɔ hamɛmɛshinshinwo biɔnɔ gbɔngbɔn kɔkɔɛ nɔ woxokɔ nuxu so hamɛ lɔ nyɔwo nuɔ, ado ŋsɛn mì mìalɔn awa do wowo mɔdasɛnamɛwo ji. Wogbejinɔ Bibla gɔnmɛɖosewo nywiɖe yí zɔnnɔ do emɔdasɛnamɛ ciwo Yehowa habɔbɔ lɔ na wo ji. Wojinɔ veviɖe mɔ yewo nu le jɔ ji nɔ Yehowa yí gbejinɔ mɔ yewoale bu nɔ yi jukɔn lɔ nywiɖe. Ŋsu egbejinɔtɔ cɛwo nya nywiɖe mɔ yewoana kɔnŋta Mawu so lé yewowakɔ yewo dɔ lɔ do. (1 Piɛ 5:2, 3) Bu nyɔ cɛ kpɔ: Le xexe cɛ ci gbaza, sɛnsɛn koɖo ejunyɔwo na ema mɛɔ, Yehowa mɛwo sɛnkɔ Mawu adodwitɔ lɔ do ɖekɛ le fafa mɛ. Nɔ Yehowa decukɔ shi do yi habɔbɔ lɔ jiɔ, datɛnŋ anyi ahan o!

12. Nyiwo hamɛmɛshinshinwo ɖo awa gbɔxwe anya nɔ mɛɖe trɔ ji mɛɔ?

¹² Yehowa sɔ edɔ vevi ɖeka nɔ hamɛmɛshinshinwo mɔ wo le na hamɛ lɔ anɔ mɛmiɖe. Nɔ Kristotɔ ɖe wa nuvɔn gangan ɖeɔ, Yehowa biɔ so hamɛmɛshinshinwo shi mɔ woakpɔɛ mɔ yɛje akpɔtɔ anɔ hamɛ lɔ mɛ ma. Nɔ wokpɔkɔ nyɔ lɔ gbɔɔ, woɖo akpɔ mɔ mɛ lɔ trɔ ji mɛ ma. Étɛnŋ mɔ yetrɔ ji mɛ, vɔ enu ci ewa lɔ ve ni nyaoa? Éɖui gligaan mɔ yedagbewa nuvɔn lɔ kea? Nɔ enyi hadodo vwinwo yí kplɔɛ do nuvɔn lɔ mɛ ɖe, éle gbesɔsɔ yí ami eha dodo koɖo woa? Nɔ hamɛmɛshinshinwo kpɔkɔ nyɔ lɔ gbɔɔ, wodonɔ gbe ɖaɖa, wanɔ numɛkuku le Bibla mɛ yí gbekpɔnɔ lé nuvɔnwatɔ lɔ ŋtɔ kpɔkɔ enu ci ewa do. Ŋtɔ́wo xloŋ wowanɔ gbɔxwe anya nɔ nuvɔnwatɔ lɔ akpɔtɔ anɔ hamɛ lɔ mɛ ma. Hweɖewonuɔ, wokpɔɛni mɔ woɖo aɖe nuvɔnwatɔ lɔ ti.—1 Kor. 5:11-13.

13. Nyi yí atɛnŋ ajɔ nɔ mɛ ci yí woɖe ti nyi mìwo xlɔ alo mìwo xomumɛtɔ ɖeɔ?

¹³ Nyi yí atɛnŋ ado kankandoji ci mìɖo do hamɛmɛshinshinwo nu kpɔɔ? Nɔ mɛ ci woɖe ti denyi mìwo xlɔ alo mìwo xomumɛtɔɔ, mìtɛnŋ ɖeblɛ yí alɔn do gbeta ci hammɛshinshinwo sɔ ji. Vɔ sɔɛ mɔ, mɛ ci woɖe ti nyi mìwo xlɔ vevi ɖeka. Mìtɛnŋ bu mɔ hamɛmɛshinshinwo deji dui kpɔ nɔ nyɔ lɔ nywiɖe o, alo mìtɛnŋ tɔ mìwoɖekiwo biɔbiɔ se mɔ woɖo kojo lɔ shigbe lé Yehowa jikɔ do ma. Nyi yí atɛnŋ akpedo mì nu mìaɖo susu nywi do gbeta ci wosɔ nuɔ?

14. Nyi yí atɛnŋ akpedo mì nu nɔ hamɛmɛshinshinwo sɔ gbeta mɔ yewoaɖe mìwo xlɔ alo mìwo mɛ vevi ɖe ti le hamɛ lɔ mɛɔ?

¹⁴ Mìɖo aɖo ŋwi mɔ amɛɖeɖeti le hamɛ lɔ mɛ so Yehowa gbɔ, yí ewanɔ nywi nɔ  hamɛ lɔ, nuvɔnwatɔ lɔ can atɛnŋ akpɔ nyɔna so mɛ. Nɔ wotashi nuvɔnwatɔ matrɔjimɛ lɔ do hamɛ lɔ mɛɔ, atɛnŋ akpɔ ŋsɛn vwin do mɛbuwo ji. (Gal. 5:9) Gbesɔ kpe niɔ, danya mɔ nuvɔn gangan enyi yewa o, yí daji mɔ yeatrɔ susu keŋ adra enuwo do keŋ nɔ ye koɖo Yehowa gblamɛ anyɔ o. (Ŋun. 8:11) Mìatɛnŋ akando ji mɔ hamɛmɛshinshinwo dɛni kpɔ nywiɖe gbɔxwe amɔ woaɖe mɛɖe ti le hamɛ lɔ mɛ. Shigbe kojoɖotɔ ciwo yí ni le blema Izraɛli nɛɔ, wonya mɔ ‘denyi agbetɔ yí yewowakɔ kojoɖoɖodɔ lɔ nɔ o, vɔ Yehowa yí yewowɛkɔ nɔ.’—2 Kronika 19:6, 7, NWT.

15. Nyi yí taɖo mìɖo akando emɔdasɛnamɛ ci Yehowa nakɔ mì vyɛ ji wu saɔ?

¹⁵ Xexe vwin cɛ gogokɔ vɔvɔnu, eyi taɖo mìɖo akando Yehowa ji vyɛ sɔwu sa mɔ lé ewakɔ nuwo do yí nyi nywitɔ. Nyi yí taɖoɔ? Ðo le efunkpekpe gangan lɔ mɛɔ, wotɛnŋ na emɔdasɛnamɛ ci mɛ mìdamɔŋje o, ci mìakpɔ mɔ yidesɔgbe o, alo wodasɛnŋ awa do ji o. Mìnya mɔ Yehowa daxo nuxu nɔ mì so jeŋkwi mɛ tiin o. Vɔ taŋfuin ana mɔdasɛnamɛ mì to mɛ ciwo esɔ ɖo ŋkɔ nɔ dɔ lɔ ji. Denyi hwenɔnu yí mìatɔ enu xoxo kpɔ yí amɔ, ‘Yehowa gbɔ yí mɔdasɛnamɛ cɛ so nyaoa, alo wowoŋtɔwo susu wonukɔ nɔ mì?’ Àkando Yehowa koɖo yi habɔbɔ lɔ ji le hwenu ŋtɔ́ mɛa? Lé èkpɔnɔ emɔdasɛnamɛ ciwo mɛ ciwo yí le agbanleamɛjitɔxuwo nanɔ kakayɛ yí adasɛ lé àvawa nu do. Nɔ èkando mɔdasɛnamɛ ciwo mìxɔkɔ gbɛ ji yí wanɔ do wo ji kabaɔ, taŋfuin ahan yí àvawa nu do le efunkpekpe gangan lɔ hwenu nɛ.—Luiki 16:10.

16. Nyi yí ado kankandoji ci mìɖo do Yehowa kojoɖoɖowo nu kpɔ le sɔ mɛɔ?

¹⁶ Mìɖo agbebu tamɛ kpɔ nywiɖe so lé mìawa nu do hwenu Yehowa aɖokɔ kojo nɔ xexe vwin cɛ. Mìkpɔkpɔ emɔ mɔ mɛ ciwo yí desɛnkɔ Yehowa o, ciwo mɛ mìwo mɛ vevi ciwo yí denyi Yehowa Kunuɖetɔ can le sugbɔtɔ avaxɔ nyɔnɔnwi lɔ gbɔxwe vɔvɔnu lɔ aɖo. Vɔ Yehowa yí asɔ gbeta kpɛtɛkpɛtɛ so wo nu le Harmagedɔn hwenu to Yesu ji. (Mt. 25:31-33; 2 Tɛs. 1:7-9) Denyi mìwo yí anu mɛ ciwo Yehowa aku ŋshishi nɔ alo mɛ ciwo yí agu si o. (Mt. 25:34, 41, 46) Mìatɛnŋ akando kojoɖoɖo Yehowa tɔwo jia, alo mìami sinsin ɖo mìdelɔn do yi gbetasɔsɔwo jia? Eze petii mɔ evyɛ yí mìado ŋsɛn kankandoji ci mìɖo do Yehowa nu keŋ atɛnŋ avakando ji le sɔ mɛ pleŋpleŋ.

 ¹⁷ Kpɔɛ le susu mɛ yí akpɔ lé awa do nɔ mì le xexe yoyu lɔ mɛ hwenu kojoɖoɖo Yehowa tɔwo ahɛn enunywiwo vɛ nɔ mì ɖa. Ŋsusɛnsɛn dagbeli o, ajɔdotɔ amɛtafudotɔwo koɖo acɛkpatɔ ciwo yí do vevisese nɔ agbetɔwo dagbeli hɛnnɛ o. Mìdagbese dɔ̀lele, nyɔxokuku alo ku nyɔ ɖekɛ o. Woacu Satana koɖo gbɔngbɔnvɔnwo do kpu na nɔ xwe kotokun ɖeka. Enubaɖa ciwo pleŋ wowo gufɔnfɔn lɔ hɛn vɛ avɔ sesese. (Enyɔ. 20:2, 3) Eji ajɔ mì keke mɔ mìkando ji mɔ enujɔjɔɛ yí Yehowa wanɔ tɛgbɛɛ!

18. Nyiwo mìatɛnŋ akpla so Izraɛliviwo nuwana ci woŋwlɛ do Amɛ Hlɛnhlɛn 11:4-6 koɖo 21:5 mɛɔ?

¹⁸ Le xexe yoyu lɔ mɛ ɖe, ŋɖewo atɛnŋ ado kankandoji ci mìɖo do Yehowa nu mɔ yeawa enujɔjɔɛ kpɔa? Kpɔ enu ci yí jɔ ci wohwlɛn Izraɛliviwo gan so hwashigbemɛ le Eʒipti ɖa. Dejinjin o, mɛɖewo tɔ enyɔ toto le wo mɛ mɔ yewodegbekpɔ enuɖuɖu vivi ciwo yewoɖunɔ sa le Eʒipti aɖu o, wovatɔ mana ci Yehowa na wo kpɔkpɔ do nugbali ji. (Hlɛn Amɛ Hlɛnhlɛn 11:4-6; 21:5.) Enu cɛ han atɛnŋ ajɔ do mì ji le efunkpekpe gangan lɔ godua? Mìdenya edɔ gangan ciwo mìawa keke viviviɔ, nyigban lɔ atrɔ paradiso o. Taŋfuin edɔ lɔwo tɛnŋ sugbɔ yí ɖowo tɛnŋ gbɔnnu wawa. Ecɛ adɔ mìavakpɔ nyɔ anu so lé Yehowa wakɔ nuwo do le hwenɔnua? Mìkando ŋɖeka ji, eyi nyi mɔ: Nɔ enu ciwo Yehowa nakɔ mì kakayɛ jeŋ nɔ mìɔ, mìavadakpe do enu ciwo avana mì hwenɔnu ŋci.

19. Dre enu ci mìkpla le nyɔta cɛ mɛ le kleŋ mɛ.

¹⁹ Lé Yehowa wanɔ nuwo do yí nyi nywitɔ. Ele mɔ mìakando enyɔ cɛ ji. Mìɖo agbekando mɛ ciwo ji Yehowa kando mɔ woawa do ye mɔdasɛnamɛwo ji. Ŋgbeŋlɔbe enyɔ ci Yehowa nu to enyɔnuɖɛtɔ Ezai ji o. Émɔ: “Míwo ŋsɛn yí anyi mɔ míanɔ kpuu yí aɖoŋ do ŋnu.”—Ezai 30:15, NWT.