1. Ci ɖajɛvi ɖeka se nuxu ɖeka ci woxo le takpekpegan ɖeka mɛ le exwe 1935 mɛ ɖe, nyi yí jɔ do jiɔ?

ÐAJƐVI ɖeka wa ӡinӡindoshimɛ le exwe 1926 mɛ hwenu eɖo exwe 18. Yi jilawo nyi Bibla Nukplaviwo, wowo yí wovayɔnɔ gbɛ mɔ Yehowa Kunuɖetɔwo. Eviŋsuvi amɛtɔn koɖo evinyɔnuvi amɛve yí le wo shi, wohɛn wo nɔ woasɛn Yehowa yí asran Yesu Kristo. Shigbe lé Bibla Nukplaviwo pleŋ wɛni hwenɔnu nɛɔ, ɖajɛvi lɔ ɖunɔ kpɔnnɔ lɔ yí nunɔ vɛn lɔ le Axwetɔ Fiɛfi Ŋɖuɖu lɔ ji xweshiaxwe. Vɔ yi mɔkpɔkpɔ trɔ ci ese nuxu vevi ɖeka ci nyɔta yí nyi “Agbetɔ sugbɔ sugbɔ.” J. F. Rutherford yí xo nuxu lɔ le exwe 1935 mɛ le takpekpegan ci wowa le Washington, D.C. États-Unis. Enyɔ ci wonu le takpekpegan lɔ mɛɔ?

2. Enyɔnɔnwi dojijɔnamɛ ci yí le nɔviŋsu Rutherford nuxu lɔ mɛɔ?

² Le nuxu lɔ mɛɔ, nɔviŋsu Rutherford dre mɛ ciwo yí nyi “agbetɔ sugbɔ sugbɔ” ciwo nu Enyɔdasɛ 7:9 xo nuxu so. Keke vaɖo hwenɔnuɔ, wobui mɔ gbɛbɔbɔ cɛ nyi akpaxwe amɛvetɔ ci yí ayi jeŋkwimɛ, vɔ denɔ gbeji sɔ koɖo amɛshiaminɔwo o. Nɔviŋsu Rutherford zan Enuŋwlɛŋwlɛ lɔwo sɔ ɖe mɛ mɔ wodecan agbetɔ sugbɔsugbɔ lɔwo nɔ woayi jeŋkwimɛ o, vɔ wonyi Kristo lɛngbɔ bu ciwo * yí aci agbe le “efunkpekpe gangan” lɔ  mɛ yí anɔ agbe tɛgbɛɛ le nyigban ji. (Enyɔ. 7:14) Yesu ɖo gbe mɔ: “Ŋ ɖo lɛngbɔ bu ciwo yí de so ekpa cɛ mɛ o. É je mɔ na hɛn wowo can va. Wowo can a se Anyi gbemɛ. Wo trɔsun lɛngbɔ ha ɖeka ci yí ɖo lɛngbɔkplɔtɔ ɖeka.” (Ӡan 10:16) “Lɛngbɔ bu” lɔwo le dumɛ nɔ Yehowa Kunuɖetɔ egbejinɔtɔ ciwo yí kpɔkɔ mɔ nɔ agbe tɛgbɛɛ nɔnɔ le Paradiso mɛ le nyigban ji. (Mt. 25:31-33, 46) Mína mìakpɔ lé Bibla mɛ nyɔnɔnwi cɛ gɔnmɛsese trɔ Yehowa sɛntɔ sugbɔ gbe do, nɔviŋsu lɔ ci yí ɖo exwe 18 can le wo mɛ.—Eha. 97:11; Elo. 4:18.

3-4. Le exwe 1935 takpekpegan lɔ mɛ ɖe, nyi amɛ kotokun nɛniɖe vado jeshi so wowo mɔkpɔkpɔ nuɔ, yí nyi yí taɖoɔ?

³ Hwenu dojijɔnamɛ ɖeka le takpekpegan lɔ mɛ yí nyi hwenu nuxuxotɔ lɔ nu nɔ enyɔsetɔwo mɔ: “Ŋɖe kuku, mɛ ciwo yí kpɔkɔ mɔ nɔ agbe tɛgbɛɛ nɔnɔ le nyigban ji le so je te.” Nɔviŋsu ɖeka ci yí kpɔ nu lɔ tɔxu nu mɔ le enyɔsetɔ 20 000 han ciwo yí va mɛɔ, mɛ ciwo so je te wu mamamɛ. Eyi nɔviŋsu Rutherford nu mɔ: “Míkpɔ ɖa! Agbetɔ sugbɔsugbɔ lɔwo ke!” Eyi wodo jijɔ xwa gangan ɖeka. Mɛ ciwo yí so je te do jeshi mɔ wodecan yewo nɔ yewoayi nɔ agbe le jeŋkwimɛ o. Wonya mɔ wodesɔ Mawu gbɔngbɔn lɔ shi ami nɔ yewo o. Yi ŋkegbu le takpekpegan lɔ mɛɔ, Kunuɖetɔ yoyu 840 wa ӡinӡindoshimɛ yí sugbɔtɔ nyi lɛngbɔ buwo.

⁴ Le nuxu lɔ goduɔ, ɖajɛvi ci nyɔ mìnu vayi koɖo amɛ kotokun nɛniɖe buwo mi kpɔnnɔ lɔ ɖuɖu koɖo vɛn lɔ nunu le Axwetɔ Fiɛfi Ŋɖuɖu lɔ ji. Shigbe lé amɛ sugbɔ se le wowoɖekiwo mɛ nɛɔ, nɔviŋsu ɖeka nu mɔ: “Eŋwiɖoɖo ci wowa le exwe 1935 mɛ yí nyi kpɛtɛkpɛtɛ ci ŋɖu kpɔwɛŋɖuɖu lɔwo, ɖo ŋnya mɔ Yehowa desɔ yi gbɔngbɔn lɔ canŋ nɔ manɔ agbe le jeŋkwimɛ o. Vɔ agbe tɛgbɛɛ nɔnɔ le nyigban ji mɔkpɔkpɔ yí le ŋshi yí nawa dɔ nɔ nyigban lɔ atrɔ paradiso.” (Rɔm. 8:16, 17; 2 Kor. 1:21, 22) So hwenɔnuɔ, agbetɔ sugbɔsugbɔ lɔwo vasukɔgbɔ doji yí wakɔ dɔ koɖo amɛshiaminɔ kpɛtɛwo * alɔlealɔmɛ.

5. Lé Yehowa kpɔnɔ mɛ ciwo yí mi kpɔwɛŋɖuɖu lɔwo ɖuɖu le Eŋwiɖoɖo lɔ ji doɔ?

⁵ Lé Yehowa kpɔnɔ mɛ ciwo yí mi kpɔwɛŋɖuɖu lɔwo ɖuɖu le Eŋwiɖoɖo ciwo wowa le exwe 1935 goduɔ? Yí lé ekpɔnɔ Kunuɖetɔ waӡinӡindoshimɛ ɖe ci yí ɖunɔ kpɔwɛŋɖuɖu lɔwo veviɖe le Eŋwiɖoɖo lɔ ji le egbɛmɛ, vɔ yí vakpɔɛ mɔ wodeshi ami nɔ ye nyaoɔ? (1 Kor. 11:28) Mɛɖewo ɖunɔ kpɔwɛŋɖuɖu lɔwo, ɖo wodemɔŋje wowo mɔkpɔkpɔ mɛ o. Vɔ nɔ wovalɔn do ji mɔ yewowa afɛn, yí mi kpɔwɛŋɖuɖu lɔwo ɖuɖu, yí kpɔtɔ sɛnkɔ Yehowa le egbejinɔnɔ mɛɔ, kankandoji li mɔ Yehowa axɔ wo do lɛngbɔ bu lɔwo mɛ. Ci wodegbeɖunɔ kpɔnnɔ lɔ yí nunɔ vɛn lɔ can ɔ, wokpɔtɔ vanɔ Eŋwiɖoɖo lɔ, ɖo enu ci Yehowa koɖo Yesu wa nɔ wo jeŋ nɔ wo sugbɔ.

6. Nyi Yesu dɔ mawudɔlawo mɔ wo le waɔ?

⁶ Nɔ mìtrɔ gbeje nyɔ ci Enyɔdasɛ eta 7 nu so Kristotɔ amɛshiaminɔwo koɖo lɛngbɔ bu lɔwo mɛ tɔ ciwo yí nyi agbetɔ  sugbɔsugbɔ lɔwo nuɔ, ado ŋsɛn mì, ɖo dajinjin o, efunkpekpe gangan lɔ akpan. Yesu dɔ mawudɔlawo mɔ wo le kpɔtɔ ale gugu yaxoxo amɛnɛ lɔwo ɖɛ. Wodeɖo agan ayaxoxo lɔwo yí woaxo ɖaɖa nyigban ji keke aɖo hwenu woatre nu nɔ Kristotɔ amɛshiaminɔwo o, yi gɔnmɛ nyi mɔ Yehowa ada shi do wo ji mɔ wonɔ gbeji. (Enyɔ. 7:1-4) Ci Kristo nɔviɛ amɛshiaminɔwo nɔ gbejiɔ, fɛncu ci woaxɔ yí nyi mɔ woanyi efyɔwo koɖo avɔnsatɔwo koɖi le jeŋkwimɛ. (Enyɔ. 20:6) Yehowa, Yesu koɖo mawudɔlawo akpɔ jijɔ sugbɔ hwenu woakpɔ amɛshiaminɔ 144 000 lɔwo axɔkɔ wowo jeŋkwimɛ fɛncu.

7. Le Enyɔdasɛ 7:9, 10 mɛ ɖe, miwo yí Ӡan kpɔ le ŋtegan mɛɔ, yí nyi wowakɔɔ? (Kpɔ foto ci yí le akpa lɔ ji.)

⁷ Ci Ӡan kpɔ efyɔ koɖo avɔnsatɔ 144 000 lɔwo ɖegbɔɔ, ékpɔ enudojijɔnamɛ ɖeka, eyi nyi “agbetɔ sugbɔ sugbɔ” ciwo yí ci agbe le Harmagedɔn mɛ. Gbɛbɔbɔ cɛ to akpo nɔ ŋkɔtɔ, ɖo egangan wu yí wodenya hlɛnhlɛnmɛ ni o. (Hlɛn Enyɔdasɛ 7:9, 10.) Wodo “awu ɣi hundo afɔcimɛ;” ecɛ dasɛ mɔ wodeɖe mɔ Satana xexe lɔ “xoɖyi” wo o, yí wokpɔtɔ nɔ gbeji nɔ Mawu koɖo Kristo. (Ӡaki 1:27) Wodokɔ axwa mɔ, enu ci Yehowa koɖo Yesu ci yí nyi Mawu Lɛngbɔvi wa yí dɔ yewokpɔ hwlɛngan. Gbesɔ kpe niɔ, wolé bayawo do alɔ mɛ, ci yí dasɛ mɔ wosɔ jijɔ lɔn do ji mɔ, Yesu nyi Efyɔ ci Yehowa sɔ.—Sɔ sɔ koɖo Ӡan 12:12, 13.

8. Nyɔ ci Enyɔdasɛ 7:11, 12 nu nɔ mì so Yehowa xomu ci yí le jeŋkwimɛ nuɔ?

⁸ Hlɛn Enyɔdasɛ 7:11, 12. Ci mɛ ciwo yí le jeŋkwimɛ kpɔ agbetɔ sugbɔsugbɔ lɔwo ɖe, lé wowa nu doɔ? Ӡan kpɔ mɔ Yehowa xomu ci yí le jeŋkwimɛ kpɔ jijɔ sugbɔ yí kanfu Mawu ci wokpɔ agbetɔ sugbɔsugbɔ lɔwo. Yehowa xomu ci yí le jeŋkwimɛ akpɔ jijɔ nɔ wokpɔ ŋtegan lɔ vamɛ hwenu agbetɔ sugbɔsugbɔ lɔwo aci agbe le efunkpekpe gangan lɔ mɛ.

9. Sɔ koɖo Enyɔdasɛ 7:13-15 ɖe, nyi yí agbetɔ sugbɔsugbɔ lɔwo wakɔ le kakacɛ mɛɔ?

⁹ Hlɛn Enyɔdasɛ 7:13-15. Ӡan ŋwlɛ mɔ agbetɔ sugbɔsugbɔ lɔwo “nya wowo wu koɖo Lɛngbɔvi hùn.” Yi gɔnmɛ nyi mɔ woɖo ayexadohwɛnamɛnu mɛmi yí nyi amɛjɔjɔɛ le ŋkɔ nɔ Yehowa. (Ezai 1:18) Wosɔ wowoɖekiwo na Mawu yí nyi Kristotɔ waӡinӡindoshimɛ ciwo yí ɖo xɔse sɛnŋ do Yesu vɔnsa lɔ nu yí gbenyi xlɔ koɖo Yehowa. (Ӡan 3:36; 1 Piɛ 3:21) Eyi taɖo woje yí le te le Mawu fyɔӡinkpin lɔ ŋkɔ yí “sɛnnɔ Mawu, kede koɖo ezan” le gbɔngbɔnmɛ gbedoxɔ lɔ kpaxwe ci yí le nyigban ji mɛ. Le kakacɛ mɛɔ, wowakɔ akpaxwe gangantɔ nɔ Fyɔɖuxu lɔ dradra koɖo nukplaviwowawadɔ lɔ koɖo ezolelanmɛ, ɖo wosɔ Mawu Fyɔɖuxu lɔ ɖo texwe ŋkɔtɔ nɔ wowo nuwo.—Mt. 6:33; 24:14; 28:19, 20.

10. Nyi ji agbetɔ sugbɔsugbɔ lɔwo akandoɔ, yí gbeɖu ci yí woakpɔ yí avamɛɔ?

¹⁰ Agbetɔ sugbɔsugbɔ ciwo yí ato so efunkpekpe gangan lɔ mɛ akando ji mɔ Mawu akpɔtɔ alenɔ bu nɔ yewo, ɖo “Mawu ci yí le Yi fyɔ ӡinkpin ji a cɔn wo ji.” Gbeɖu ci lɛngbɔ bu lɔwo le te kpɔ veviɖe avamɛ, eyi nyi: “Mawu a cucu ɖashi keŋkeŋ le ŋkuviwo ji nɔ wo. Eku, enulolo, avinfanfan, alo vevisese da gbe li o.”—Enyɔ. 21:3, 4.

11-12. (a) Shigbe lé wonui le Enyɔdasɛ 7:16, 17 mɛ nɛ ɖe, shicu ciwo yí le te kpɔ agbetɔ sugbɔsugbɔ lɔwoɔ? (b) Nyi lɛngbɔ bu lɔwo atɛnŋ awa le Eŋwiɖoɖo lɔ jiɔ, yí nyi yí taɖoɔ?

 ¹¹ Hlɛn Enyɔdasɛ 7:16, 17. Le kakacɛ mɛɔ, eho mali alo ahwa ciwo yí jɔjɔ na mɔ Yehowa sɛntɔ ɖewo le shive. Wolé ebuwo do gakpamɛ do wowo xɔse ŋci. Ele ahan gan, agbetɔ sugbɔsugbɔ lɔwo kpɔkɔ jijɔ, ɖo wonya mɔ nɔ yewoci agbe le xexe vwin cɛ gugu mɛɔ, ŋcilanmɛŋɖuɖu koɖo gbɔngbɔnmɛŋɖuɖu sugbɔ aɖɔ yewo shi tɛgbɛɛ. Hwenu Yehowa agukɔ Satana xexe vwin cɛɔ, áglɔn ta nɔ agbetɔ sugbɔsugbɔ lɔwo so yi dɔmɛzi “zozu” ci asɔ kɔɖo jukɔnwo ji mɛ. Nɔ efunkpekpe gangan lɔ vɔɔ, Yesu akplɔ mɛ cɛ ciwo yí ci agbe le nyigban ji yi “gumɛshi ci yí nanɔ agbe [mavɔ] gbɔ.” Bui kpɔ: Mɔkpɔkpɔ vevi ɖeka yí le agbetɔ sugbɔsugbɔ lɔwo shi. Le amɛ miliya nɛniɖe ciwo yí nɔ agbe kpɔ mɛɔ, wowo yí nyi mɛ ciwo yí datɛnŋ aku kpɔ gbeɖe o!—Ӡan 11:26.

¹² Mɔkpɔkpɔ dojijɔnamɛ yí le lɛngbɔ bu lɔwo shi, eyi taɖo wodonɔ akpe nɔ Yehowa koɖo Yesu! Ci wodecan wo mɔ woayi jeŋkwimɛ can ɔ, wole veviɖe nɔ Yehowa yí elɔn wo shigbe lé elɔn amɛshiaminɔwo nɛ. Gbɛbɔbɔ lɔwo koɖo ve mɛ tɔwo atɛnŋ akanfu Mawu koɖo Kristo. Emɔ ɖeka ci ji wowɛni le yí nyi mɔ wovanɔ Axwetɔ Fiɛfi Ŋɖuɖu lɔ.

13-14. Nyi yí taɖo mɛshiamɛ ɖo ava Eŋwiɖoɖo Kristo ku lɔɔ?

¹³ Blaŋblaŋ ɔ, nɔ wosɔ agbetɔ 1 000 ciwo yí vanɔ Eŋwiɖoɖo do teɔ, mɛ ciwo yí ɖunɔ kpɔnnɔ lɔ yí nunɔ vɛn lɔ deyinɔ amɛ kuɖeka o. Edasɛ mɔ nɔ wosɔ hamɛ amadɛn ɔ, kuɖeka mɛ yí amɛ ɖunɔ kpɔwɛŋɖuɖu lɔwo le. Eyi taɖo mìnya mɔ nyigban ji mɔkpɔkpɔ yí le amɛ sugbɔtɔ ciwo yí vanɔ Eŋwiɖoɖo lɔ shi. Vɔ nyi yí taɖo wogbevanɔ Axwetɔ Fiɛfi Ŋɖuɖu lɔɔ? Wovanɔ shigbe lé amɛwo vanɔ wowo xlɔwo lɔlele tɔxu hannɛ. Exlɔwo vanɔ alɔlele tɔxu yí sɔ danasɛ mɔ yewolɔn asu koɖo ashi yoyu lɔwo yí le godu nɔ wo. Ahanke lɛngbɔ bu lɔwo mɛ tɔwo vanɔ Eŋwiɖoɖo lɔ, ɖo woji mɔ yewoadasɛ mɔ yewolɔn Kristo koɖo  amɛshiaminɔwo yí le godu nɔ wo. Wogbevanɔ keŋ asɔ dasɛ mɔ Yesu vɔnsa ci yí hun mɔ nɔ yewo yí yewoavanɔ agbe tɛgbɛɛ le nyigban ji jeŋ nɔ yewo.

¹⁴ Susu vevi bu ci yí taɖo lɛngbɔ bu lɔwo vanɔ Eŋwiɖoɖo lɔ yí nyi mɔ yewoawa do Yesu se ji. Ŋkɔtɔ ci Yesu ɖo Axwetɔ Fiɛfi ŋɖuɖu koɖo apotru egbejinɔtɔwoɔ, enu nɔ wo mɔ: “Mí ɖui nɛnɛ a sɔ ɖonɔŋwi Ŋ.” (1 Kor. 11:23-26) Eyi taɖo lɛngbɔ bu lɔwo kpɔtɔ vanɔ Eŋwiɖoɖo lɔ koɖo amɛshiaminɔ ciwo yí kpɔtɔ le nyigban ji. Gbesɔ kpe niɔ, lɛngbɔ bu lɔwo yɔnɔ amɛshiamɛ nɔ woava Eŋwiɖoɖo lɔ koɖo wo.

15. Nyi mìatɛnŋ awa asɔ kanfu Mawu koɖo Kristo le Eŋwiɖoɖo lɔ jiɔ?

¹⁵ Le Eŋwiɖoɖo lɔ jiɔ, emɔ hunnɔ nɔ mì yí mìkannɔfu Mawu koɖo Kristo to hajiji koɖo gbedodoɖa ji. Nuxu ci woaxo le exwe cɛ mɛ yí nyi “Enu ci Mawu koɖo Yesu wa le jeŋ nɔ eo!” Akpedo mì nu mìadonɔ akpe nɔ Yehowa koɖo Kristo sugbɔ doji. Nɔ wosɔ kpɔwɛŋɖuɖu lɔwo vayikɔɔ, mìatɛnŋ abu tamɛ kpɔ so enu ciwo wole dumɛ nɔ nu; wowo yí nyi Yesu gbaza koɖo yi hun. Mìaɖo ŋwi lɔnlɔn ci Yehowa ɖo nɔ mì yí lɔn Eviɛ ku do ta nɔ mì nɔ mìatɛnŋ akpɔ agbe. (Mt. 20:28) Mɛɖekpokpui ci yí lɔn mìwo Da ci yí le jeŋkwimɛ koɖo Eviɛ alɔn mɔ yeava Eŋwiɖoɖo lɔ.

16. Emɔ ciwo ji yí amɛshiaminɔwo koɖo lɛngbɔ bu lɔwo nyi enuɖekɛwo leɔ?

¹⁶ Le emɔ ɖewo jiɔ, amɛshiaminɔwo koɖo lɛngbɔ buwo nyi enuɖekɛwo. Lé Yehowa lɔn amɛshiaminɔwo doɔ, ahanke elɔn lɛngbɔ buwo nɛ. Gbɛbɔbɔ lɔwo koɖo ve le veviɖe ni. Ðo eho kuɖeka yí esɔ xwle wo pleŋ, eyi nyi Eviɛ vevi lɔ gbe. Enu ci yí to akpo le gbɛbɔbɔ lɔwo koɖo ve nu yí nyi mɔ wowo mɔkpɔkpɔwo denyi ɖekɛ o. Gbɛbɔbɔ lɔwo koɖo ve ɖo akpɔtɔ anɔ gbeji nɔ Mawu koɖo Kristo. (Eha. 31:23) Gbeɖo ŋwi mɔ, Mawu gbɔngbɔn lɔ dawa dɔ le mɛɖe ji wu mɛɖe o. Ecɛ dasɛ mɔ gbɔngbɔn kɔkɔɛ ci yí ӡan mɛɖekamɛɖeka yí Yehowa nini.

17. Nyi amɛshiaminɔ kpɛtɛwo kpɔkɔ mɔ nɔɔ?

¹⁷ Wodejinɔ Kristotɔ amɛshiaminɔwo koɖo jeŋkwimɛ mɔkpɔkpɔ o. Mawu ŋtɔ yí sɔ donɔ jimɛ nɔ wo. Wobunɔ tamɛ kpɔ so wowo mɔkpɔkpɔ lɔ nu, donɔ gbe ɖaɖa so nu yí nɔnɔ te kpɔɛ veviɖe mɔ yewoaxɔ jeŋkwimɛ fɛncu lɔ. Wodenya le wowo gbɔngbɔnmɛ gbaza anɔ do le jeŋkwimɛ o. (Fili. 3:20, 21; 1 Ӡan 3:2)  Ele ahan gan, wokpɔkɔ mɔ mɔ yewoavakpɔ Yehowa, Yesu, mawudɔlawo koɖo amɛshiaminɔ kpɛtɛwo yí anɔ koɖo wo le jeŋkwimɛ Fyɔɖuxu lɔ mɛ.

18. Nyi lɛngbɔ bu lɔwo kpɔkɔ mɔ nɔɔ?

¹⁸ Lɛngbɔ bu lɔwo kpɔkɔ mɔ nɔ agbe tɛgbɛɛ nɔnɔ le nyigban ji, shigbe lé edronɔ agbetɔwo pleŋ nɛ. (Ŋun. 3:11) Wokpɔkɔ mɔ nɔ hwenu woawa dɔ keke nyigban lɔ pleŋ atrɔ paradiso. Wole te kpɔ ŋkeke ci ji woatɛnŋ acu wowo xɔwo, ado nuwo do bojiwo, yí ahɛn wowo viwo le lanmɛsɛn blebu mɛ. (Ezai 65:21-23) Wokpɔkɔ mɔ nɔ hwenu woaɖyi sa to nyigban lɔ pleŋ ji, ayi etowo ji, avesuwo mɛ koɖo axutuwo keŋ akpla nu so Yehowa nuwawa sugbɔ lɔwo nu. Vevitɔ lɔ yí nyi mɔ wokpɔkɔ jijɔ, ɖo wonya mɔ exlɔnyinyi ci yí le yewo koɖo Yehowa gblamɛ akpɔtɔ asɛnkɔŋ doji tɛgbɛɛ.

19. Emɔ ci yí Eŋwiɖoɖo lɔ hun nɔ mɛɖekamɛɖeka le mì mɛɔ, yí hwenu woawɛ kɔcɛɔ?

¹⁹ Yehowa na mɔkpɔkpɔ nywi ɖeka yi sɛntɔ ɖeshiaɖe ci yí sɔ yiɖeki ni. (Ӡer. 29:11) Eŋwiɖoɖo Kristo ku lɔ hun emɔ gangan ɖeka nɔ amɛshiaminɔwo koɖo lɛngbɔ bu lɔwo nɔ woakanfu Mawu koɖo Kristo do enu ci wowa nɔ mì nɔ mìatɛnŋ anɔ agbe mavɔ ŋci. Eŋwiɖoɖo lɔ yí nyi bɔbɔ vevitɔ nɔ Kristotɔ adodwiwo xweshiaxwe. Woawɛ le eweyixɔ godu le Zozangbe 27 mars 2021. Kɔcɛɔ, amɛ sugbɔ ciwo yí le vovo tɔxuwo atɛnŋ ava bɔbɔ vevi cɛ. Wocikɔ yumɛ nɔ mɛɖewo, gan wojikɔ ava. Mɛɖewo jikɔ awɛ le gakpamɛ. Hwenu Yehowa, Yesu, mawudɔlawo koɖo amɛshiaminɔ ciwo yí wofɔn so ku akpɔkɔ wana cɛɔ, le vamɛ mɔ hamɛ alo gbɛbɔbɔ ɖeshiaɖe koɖo mɛɖekamɛɖeka awa Eŋwiɖoɖo lɔ nywiɖe!