LE Bibla mɛ Blemanyigbannuwo Ðoxu ɖeka le Ӡerusalɛmuɔ, wokpɔ enu ɖeka ci woŋwlɛ do ekpe ji le gblamɛ nɔ exwe 700-600 D.Y. Yɔdu ɖeka mɛ yí wokpɔ ekpe kankan cɛ le, le fini yí dejinjin le Xebrɔn gbɔ le Izraɛli o. Enu ci woŋwlɛ do kpe lɔ ji ke: “Yahweh Sabaot le sɛn kpɛn nɔ Hagaf ci yí nyi Hagav viɛ.” Lé enuŋwlɛŋwlɛ cɛ ɖo kpe Bibla mɛ nyɔwo ji doɔ? Enuŋwlɛŋwlɛ lɔ dasɛ mɔ, wojeshi Mawu ŋkɔ Yehowa ci woŋwlɛ koɖo Ebregbe xoxui wemakui YHWH ɖɛ nywiɖe le Bibla hwenuwo yí gbezinni gbeshiagbe. Wokpɔ enuŋwlɛŋwlɛ buwo le ekpeyɔduwo mɛ ciwo yí gbedasɛ mɔ, amɛwo sɔ ekpeduwo wanɔ bexu koɖo bɔbɔtɔxuwo hwenɔnu. Woŋwlɛnɔ Mawu ŋkɔ koɖo agbetɔwo ŋkɔ ciwo mɛ yí Mawu ŋkɔ wemakui ɖewo nɔnɔ do ekpedu lɔwo nu le xomɛ.

Ci Axwenɔ Rachel Nabulsi ci yí nyi enukplamɛtɔ le Winivɛshite Géorgie tɔ xokɔ nuxu so blemanuŋwlɛŋwɛ cɛwo nuɔ, énu mɔ: “De gbali yí wemakui ciwo yí nyi YHWH zenɔ blaŋblaŋ ahan le blemanuŋwlɛŋwlɛ lɔwo mɛ o. . . . Kpeɖojiwo koɖo blemanuŋwlɛŋwlɛ lɔwo dasɛ mɔ YHWH nyi amɛ vevi le agbemɛ nɔ Izraɛli koɖo Ӡudatɔwo. Ecɛ ɖo kpe yi ji mɔ, Ebregbe wemakui YHWH yí wosɔ ŋwlɛ Mawu ŋkɔ lɔ do Bibla mɛ yí eze le mɛ kotokun nɛniɖe. Blaŋblaŋ ɔ, Mawu ŋkɔ nɔnɔ ŋkɔ ciwo yí wonanɔ amɛwo mɛ hwenɔnu.

Enyɔgbe “Yahweh Sabaot” ci woŋwlɛ do ekpe kankan lɔ ji gɔnmɛ yí nyi “Yehowa ahwakɔnwo tɔ.” Eyi taɖo, ewa mɔ denyi Mawu ŋkɔ lɔ ɖekɛ yí wozannɔ le Bibla hwenuwo o, vɔ wogbezannɔ nyɔgbe “Yehowa ahwakɔnwo tɔ” lɔ blaŋblaŋ hɛnnɛ. Ecɛ gbeɖo kpe yi ji mɔ, de gbali yí enyɔgbe “Yehowa ahwakɔnwo tɔ” ze le Bibla mɛ ahan donu 283 blebu le Ebre Nuŋwlɛŋwlɛ lɔwo mɛ o, eyi sugbɔtɔ ze le enu ciwo yí Ezai, Ӡeremi koɖo Zakari ŋwlɛ mɛ.