1-2. (a) Hwenu yí mìɖonɔ ŋwi mìwo mɛ vevi ɖe ci yí ku kpɔɔ? (b) Nyi yí Yesu ɖo ɖɛ le ezan ci yí do ŋkɔ nɔ yi ku mɛɔ?

 NƆ MÌWO mɛ veviwo ku yí egbejinjin ɖeeɖe can ɔ, mìkpɔtɔ ɖonɔ ŋwi wo. Taŋtaŋ mìɖonɔ ŋwi wo le azan ci gbe woku ji.

² Mìbɔnɔ xweshiaxwe doju koɖo amɛ miliɔn nɛniɖe le xexeɛ pleŋ mɛ yí sɔ ɖonɔ ŋwi mìwo mɛ vevi ɖeka ku: eyi nyi Yesu Kristo. (1 Piɛ 1:8) Mìbɔnɔ yí ɖonɔ ŋwi mɛ ci yí sɔ yi gbe cu fɛn do ta nɔ mì keŋ ahwlɛn mì le nuvɔn koɖo eku shi. (Mt. 20:28) Le nyɔnɔnwi mɛɔ, Yesu ji mɔ ye dokplɔtɔwo le ɖonɔ ŋwi ye ku lɔ. Le zan ci yí do ŋkɔ nɔ yi ku mɛɔ, éɖo fiɛfiŋɖuɖu vevi ɖeka ɖɛ keŋ nu nɔ yi dokplɔtɔwo mɔ: “Mí wa[nɔ] ecɛ a sɔ ɖoŋwi Ŋ.”—Luiki 22:19.

3. Nyiwo mìakpɔ le nyɔta cɛ mɛɔ?

³ Le mɛ ciwo yí yinɔ Eŋwiɖoɖo Kristo ku lɔ tɔxu mɛɔ, amɛ kankin ɖewo yí kpɔkɔ emɔ mɔ yewoayi nɔ agbe le jeŋkwi mɛ. Vɔ amɛ miliɔn nɛniɖe ciwo yí kpɔkpɔ emɔ mɔ yewoanɔ agbe le nyigban ji can vanɔ. Le nyɔta cɛ mɛɔ, mìakpɔ susu ciwo yí taɖo hata amɛve cɛwo jinɔ veviɖe xweshiaxwe mɔ yewoayi Eŋwiɖoɖo lɔ dandandan. Mìatɔɛ ji koɖo susu ɖewo ciwo yí taɖo amɛshiaminɔwo degɔnnɔ o.

4. Nyi yí taɖo amɛshiaminɔwo ɖunɔ kpɔnnɔ lɔ yí gbenunɔ vɛn lɔ le Eŋwiɖoɖo lɔ jiɔ?

⁴ Xweshiaxweɔ, amɛshiaminɔwo yinɔ Eŋwiɖoɖo lɔ yí ɖunɔ kpɔnnɔ lɔ yí gbenunɔ vɛn lɔ. Nyi yí taɖo esɔgbe mɔ woaɖu kpɔwɛŋɖuɖu cɛwoɔ? Mìakpɔ enu ci yí jɔ le ezan kpɛtɛ ci Yesu sɔ nɔ nyigban ji mɛ keŋ akpɔ ɖoŋci lɔ. Ci woɖu Paki lɔ ɖegbɔɔ, Yesu sɔ ŋɖuɖu ɖeka wana sɔ ɖo te, eyi woyɔnɔ mɔ Axwetɔ Fiɛfiŋɖuɖu. Ésɔ kpɔnnɔ koɖo vɛn jo nɔ apotru egbejinɔtɔ 11 yitɔ lɔwo yí nu nɔ wo mɔ wo le ɖu kpɔnnɔ lɔ yí anu vɛn lɔ. Yesu xo nuxu nɔ wo so enublabla amɛve nu: enublabla yoyu lɔ koɖo Fyɔɖuxu nublabla lɔ. * (Luiki 22:19, 20, 28-30) Enublabla cɛwo ana yí apotru lɔwo koɖo amɛ kankin buwo atɛnŋ avanyi efyɔwo koɖo avɔnsatɔwo le jeŋkwi mɛ. (Enyɔ. 5:10; 14:1) Amɛshiaminɔ ciwo yí le enublabla amɛve cɛwo mɛ yí kpɔtɔ le nyigban ji ɖekɛwo yí aɖu kpɔnnɔ lɔ yí agbenu vɛn lɔ le Eŋwiɖoɖo lɔ ji.

5. Nyi amɛshiaminɔwo kpɔkɔ mɔ nɔɔ?

⁵ Susu bu ci yí taɖo amɛshiaminɔwo jinɔ veviɖe mɔ yewoayi Eŋwiɖoɖo lɔ yí nyi mɔ: wana cɛ na yí wogbebunɔ tamɛ kpɔ veviɖe so wowo mɔkpɔkpɔ lɔ nu. Yehowa sɔ emɔkpɔkpɔ dojijɔnamɛ vevi cɛ ɖo ŋkɔ nɔ wo: woayi jeŋkwi mɛ yí axɔ makumakunyinyi keŋ aɖu fyɔ koɖo Yesu Kristo ci wofɔn so ku. Ci yí gbewu ŋnɔɔ, amɛ 144 000 cɛwo akpɔ Yehowa Mawu ŋmɛŋmɛ! (1 Kor. 15:51-53; 1 Ʒan 3:2) Amɛshiaminɔ cɛwo kando ji pleŋpleŋ mɔ woyɔ yewo nɔ jeŋkwi mɛ yiyi. Vɔ woɖo akpɔtɔ anɔ gbeji keke je wowo kugbe gbɔxwe atɛnŋ ayi jeŋkwi mɛ. (2 Tim. 4:7, 8) Eji jɔnɔ wo sugbɔ nɔ wobukɔ tamɛ kpɔ so jeŋkwi mɛ mɔkpɔkpɔ wowotɔ lɔ nu. (Titu 2:13) Vɔ “lɛngbɔ bu” mɛ tɔ wowo ɖe? (Ʒan 10:16) Susu ɖewo ciwo yí taɖo woyinɔ Eŋwiɖoɖo lɔɔ?

6. Nyi yí taɖo lɛngbɔ bu mɛ tɔwo yinɔ Eŋwiɖoɖo lɔ xweshiaxweɔ?

⁶ Nɔ lɛngbɔ bu mɛ tɔwo yi Eŋwiɖoɖo lɔɔ, wodeɖunɔ kpɔnnɔ lɔ alo nunɔ vɛn lɔ o, gan ejɔnɔ ji nɔ wo mɔ yewoayi. Exwe 1938 mɛ yí nyi ŋkɔtɔ ci woyɔ mɛ ciwo yí kpɔkɔ emɔ mɔ yewoanɔ agbe le nyigban ji mɔ wo le va Eŋwiɖoɖo lɔ. Jutakpɔxɔ 1^er mars 1938 nu mɔ: “Esɔgbe mɔ lɛngbɔ bu mɛ tɔwo ava bɔbɔ cɛ keŋ anɔ wana lɔ tɔxu. . . . Eɖo anyi jijɔ hwenu nɔ wowo can hɛnnɛ.” Shigbe lé eji jɔnɔ mɛ ciwo yí woyɔ va alɔlele tɔxu ɖe nɛɔ, ahanke eji jɔnɔ lɛngbɔ bu mɛ tɔwo mɔ yewoanɔ Eŋwiɖoɖo lɔ tɔxu nɛ.

7. Nyi yí taɖo lɛngbɔ bu mɛ tɔwo jinɔ veviɖe mɔ yewoase Eŋwiɖoɖo nuxu lɔɔ?

⁷ Lɛngbɔ bu mɛ tɔwo can bunɔ tamɛ kpɔ so wowo mɔkpɔkpɔ lɔ nu. Wojinɔ veviɖe mɔ yewoase Eŋwiɖoɖo nuxu lɔ, ɖo wonunɔ enu ci Kristo koɖo amɛ 144 000 ciwo yí aɖu fyɔ koɖi awa nɔ egbejinɔtɔwo le Exwe Kotokun ɖeka Cɛkpakpa lɔ hwenu le nuxu cɛ mɛ. Efyɔ Yesu Kristo anɔ ŋkɔ nɔ jeŋkwi mɛ fyɔ cɛwo yí woatrɔ nyigban lɔ anyi paradiso yí agbekpedo tonusetɔwo nu woanyi amɛkpekpewo. Eji jɔnɔ amɛ miliɔn nɛniɖe ciwo yí va Eŋwiɖoɖo lɔ nɔ wobubuɔ lé enyɔnuɖɛ ciwo yí le Bibla mɛ avamɛ do kpɔ  le susu mɛ. Enyɔnuɖɛ cɛ ɖewo le Ezai 35:5, 6; 65:21-23; koɖo Enyɔdasɛ 21:3, 4 mɛ. Nɔ wokpɔkɔ wowoɖekiwo koɖo wowo mɛ veviwo le xexe yoyu lɔ mɛ le susu mɛɔ, edonɔ ŋsɛn mɔkpɔkpɔ wowotɔ koɖo gbeta ci wosɔ mɔ yewodami Yehowa sɛnsɛn gbeɖe o.—Mt. 24:13; Gal. 6:9.

8. Susu bu ci yí taɖo lɛngbɔ bu mɛ tɔwo yinɔ Eŋwiɖoɖo lɔɔ?

⁸ Kpɔ susu bu ci yí taɖo lɛngbɔ bu mɛ tɔwo yinɔ Eŋwiɖoɖo lɔ. Woyinɔ keŋ asɔ dasɛ mɔ yewolɔn amɛshiaminɔwo yí gbele godu nɔ wo. Mawu Nyɔ lɔ nu ɖɛ mɔ amɛshiaminɔwo koɖo mɛ ciwo yí anɔ agbe le nyigban ji awa dɔ alɔlealɔmɛ. Lé woawɛ doɔ? Mìakpɔ kpɔwɛ ɖewo.

9. Nyi yí enyɔnuɖɛ ci yí le Zakari 8:23 mɛ nu so lé lɛngbɔ bu mɛ tɔwo kpɔnɔ amɛshiaminɔwo doɔ?

⁹ Hlɛn Zakari 8:23 NWT. Enyɔnuɖɛ cɛ zan kpɔwɛnyɔnunu wadɔdoamɛji ɖeka yí sɔ dre lé lɛngbɔ bu mɛ tɔwo akpɔnɔ wowo nɔviŋsu koɖo nɔvinyɔnu amɛshiaminɔwo do. Gbɛbɔbɔ ɖekɛ lɔ yí wozan enyɔgbe “Ʒuifu ɖeka” koɖo “mí” nɔ, wowo yí nyi amɛshiaminɔ ciwo yí kpɔtɔ le nyigban ji. (Rɔm. 2:28, 29) “Agbetɔ amɛwo’’ ciwo yí “aso egbewo pleŋ mɛ le jukɔnwo mɛ,” le dumɛ nɔ lɛngbɔ bu mɛ tɔwo. ‘Wolé awutoga nɔ Ʒuifu ɖeka,’ yi gɔnmɛ yí nyi mɔ wobɔdo amɛshiaminɔwo nu yí sɛnkɔ Mawu doju le sɛnsɛn kɔkɔɛ lɔ mɛ. Eyi taɖo esɔgbe mɔ lɛngbɔ bu mɛ tɔwo anɔ Eŋwiɖoɖo lɔ tɔxu keŋ asɔ dasɛ mɔ yewole ju koɖo amɛshiaminɔwo.

10. Lé Yehowa wɛ yí enyɔnuɖɛ ci yí le Ezekiɛli 37:15-19, 24, 25 mɛ vamɛɔ?

¹⁰ Hlɛn Ezekiɛli 37:15-19, 24, 25. Yehowa wɛ yí enyɔnuɖɛ cɛ vamɛ, ɖo éna amɛshiaminɔwo koɖo lɛngbɔ bu mɛ tɔwo wakɔ dɔ doju alɔlealɔmɛ. Enyɔnuɖɛ lɔ xo nuxu so aci amɛve nu. Mɛ ciwo yí kpɔkɔ mɔ nɔ jeŋkwi mɛ yiyi yí le dumɛ nɔ aci “Ʒuda” tɔ, (akɔta ci mɛ yí wosɔ Izraɛli fyɔwo le), yí mɛ ciwo yí anɔ agbe le nyigban ji le dumɛ nɔ aci “Efraimu” tɔ. * Yehowa asɔ gbɛbɔbɔ amɛve cɛwo xoca nɔ woanyi ‘aci kuɖeka.’ Yi gɔnmɛ yí nyi mɔ woasɛn Mawu doju le Efyɔ kuɖeka ci yí nyi Yesu Kristo cɛkpakpa gɔnmɛ. Xweshiaxweɔ, amɛshiaminɔwo koɖo lɛngbɔ bu mɛ tɔwo dewanɔ Eŋwiɖoɖo lɔ akpoakpo o, vɔ wowɛni doju shigbe “lɛngbɔ ha ɖeka” ci yí ɖo “lɛngbɔkplɔtɔ ɖeka” nɛ.—Ʒan 10:16.

11. Emɔ ɖeka ci ji “lɛngbɔ” ciwo nyɔ wonu le Matie 25:31-36, 40 mɛ dokɔ alɔ Kristo nɔviɛwo leɔ?

¹¹ Hlɛn Matie 25:31-36, 40. “Lɛngbɔ” ciwo nu Yesu xo nuxu so le labalu cɛ mɛ le dumɛ nɔ amɛjɔjɔɛ ciwo yí li le ŋkeke lɔwo vɔvɔnu yí kpɔkɔ emɔ mɔ yewoanɔ agbe le nyigban ji, wowo ke yí gbenyi lɛngbɔ bu lɔwo. Ŋkɔŋkɔtɔɔ, wodokɔ alɔ Kristo nɔviɛ amɛshiaminɔ ciwo yí kpɔtɔ le nyigban ji yí wowakɔ edɔ gangan ci yí le kɔ nɔ wo: eyi nyi kunuɖeɖe koɖo nukplaviwowawadɔ lɔ.—Mt. 24:14; 28:19, 20.

12-13. Emɔ bu ciwo ji yí lɛngbɔ mɛ tɔwo donɔ alɔ Kristo nɔviɛwo leɔ?

¹² Kwɛshila ɖewo doŋkɔ nɔ Eŋwiɖoɖo lɔɔ, lɛngbɔ bu lɔwo yɔnɔ amowo nɔ Eŋwiɖoɖo lɔ keŋ sɔ donɔ alɔ Kristo nɔviɛwo xweshiaxwe. (Kpɔ dakavi ci yí nyi “ Èdradra do ɖɛ nɔ Eŋwiɖoɖo lɔa?”) Wowɛni keke enushianu sɔnɔgbe nɔ Eŋwiɖoɖo lɔ, nɔ mɛɖe dele wowo hamɛ  lɔ mɛ yí aɖu kpɔwɛŋɖuɖu lɔwo can. Eji jɔnɔ wo mɔ yewoado alɔ Kristo nɔviɛwo le emɔ ŋtɔ́wo ji. Wonya mɔ Yesu kpɔkɔ enu ciwo yí yewowakɔ nɔ nɔviɛ amɛshiaminɔwo mɔ eye yí yewowɛkɔ nɔ.—Mt. 25:37-40.

¹³ Nɔ jeŋkwi mɛ alo nyigban ji mɔkpɔkpɔ yí le mì shi can ɖe, susu bu ciwo yí taɖo mì pleŋ yinɔ Eŋwiɖoɖo lɔɔ?

14. Lé Yehowa koɖo Yesu dasɛ mɔ yewolɔn mì sugbɔ doɔ?

¹⁴ Lɔnlɔn ci Yehowa koɖo Yesu ɖo nɔ mì jeŋ nɔ mì. Yehowa dasɛ le emɔ sugbɔ ji mɔ yelɔn mì, vɔ ɖekatɔ yɛ wugan wu kpɛtɛwo pleŋ. Mìwo Mawu dasɛ lɔnlɔn gangan ci eɖo nɔ mì ci esɔ Eviɛ vevi lɔ ɖaɖa yí evakpe fun yí ku do ta nɔ mì. (Ʒan 3:16) Mìnya mɔ Yesu can lɔn mì sugbɔ, ɖo élɔn faa yí sɔ yi gbe na do ta nɔ mì. (Ʒan 15:13) Mìdatɛnŋ acu fɛn nɔ Yehowa koɖo Yesu nɔ lɔnlɔn ci woɖo nɔ mì keke asun yi tɔxu gbeɖe o. Gan mìatɛnŋ adasɛ enujeŋnamɛ mìwotɔ to lé mìnɔnɔ agbe ŋkeŋke ji. (Kol. 3:15) Eyi taɖo mìyinɔ Eŋwiɖoɖo lɔ keŋ asɔ ɖo ŋwi lɔnlɔn ci woɖo nɔ mì yí agbesɔ dasɛ mɔ mìwo can mìlɔn wo hɛnnɛ.

15. Nyi yí taɖo tafɛn nunana lɔ ve nɔ amɛshiaminɔwo koɖo lɛngbɔ bu lɔwo sugbɔ ahan ɔ?

¹⁵ Tafɛn nunana lɔ jeŋ nɔ mì sugbɔ. (Mt. 20:28) Tafɛn lɔ ve nɔ amɛshiaminɔwo sugbɔ, ɖo eyi na woatɛnŋ ayi jeŋkwi mɛ. Xɔse ci woɖo do Kristo vɔnsa lɔ nu yí wɛ mɔ Yehowa yɔ wo mɔ amɛjɔjɔɛwo yí gbexɔ wo yí wonyi eviɛwo. (Rɔm. 5:1; 8:15-17, 23) Tafɛn lɔ jeŋ nɔ lɛngbɔ bu lɔwo hɛnnɛ. Xɔse ci woɖo do Kristo vɔnsa lɔ nu yí dɔ wonyi amɛmɛmiwo le ŋmɛ nɔ Mawu yí tɛnŋ sɔnɔ sɛnsɛn kɔkɔɛ nini, wogbekpɔkɔ emɔ mɔ woahwlɛn yewo gan le “efunkpekpe gangan lɔ mɛ.” (Enyɔ. 7:13-15) Amɛshiaminɔwo koɖo lɛngbɔ bu lɔwo yinɔ Eŋwiɖoɖo lɔ xweshiaxwe keŋ sɔ danasɛ mɔ tafɛn lɔ jeŋ nɔ yewo.

16. Susu bu ci yí taɖo mìyinɔ Eŋwiɖoɖo lɔɔ?

¹⁶ Susu bu ci yí taɖo mìyinɔ Eŋwiɖoɖo lɔ yí nyi mɔ mìji mɔ mìase tonu nɔ Yesu. Nɔ jeŋkwi mɛ alo nyigban ji mɔkpɔkpɔ yí le mì shi can ɔ, mìji mɔ mìawa do ese ci Yesu do fiɛfi ci esɔ Eŋwiɖoɖo toto lɔ da ɖɛ ji. Énu mɔ: “Mí [wanɔ cɛ] a sɔ ɖonɔŋwi Ŋ.”—1 Kor. 11:23, 24.

17. Lé Eŋwiɖoɖo lɔ kpenɔdo mì nu mìtenɔ gogo Yehowa doji doɔ?

¹⁷ Mìtenɔ gogo Yehowa doji. (Ʒaki 4:8) Shigbe lé mìkpɔɛ nɛɔ, Eŋwiɖoɖo lɔ yiyi dɔ mìbunɔ tamɛ kpɔ so mɔkpɔkpɔ ci Yehowa na mì koɖo lɔnlɔn gangan ci eɖo nɔ mì nu. (Ʒer. 29:11; 1 Ʒan 4:8-10) Nɔ mìbukɔ tamɛ kpɔ so mìwo mɔkpɔkpɔ lɔ ci nu kankandoji le koɖo lɔnlɔn mavɔ ci Yehowa ɖo nɔ mì nuɔ, lɔnlɔn ci mìɖo nɔ Yehowa sɛnnɔŋ doji yí mìwo koɖo yɛ gbevavenɔ sɔwu.—Rɔm. 8:38, 39.

18. Nyi yí tamɛbubukpɔ so Yesu kpɔwɛ nu dɔ yí mìjinɔ mɔ mìawaɔ?

¹⁸ Mìji mɔ mìawa Yesu tɔ han. (1 Piɛ 2:21) Ŋkeke ɖewo doŋkɔ nɔ Eŋwiɖoɖo lɔɔ, mìhlɛnnɔ Bibla mɛ xolɔlɔ ciwo yí xo nuxu so kwɛshila kpɛtɛ ci Yesu wa le nyigban ji nu, koɖo ciwo yí xo nuxu so yi ku koɖo fɔnfɔnsoku yitɔ nu, mìgbebunɔ tamɛ kpɔ so wo nu. Eyi, nuxu ci mìsenɔ fiɛfi le Eŋwiɖoɖo lɔ ɖonɔ ŋwi lɔnlɔn Yesu tɔ nɔ mì. (Efe. 5:2; 1 Ʒan 3:16) Nɔ mìhlɛn nu  so amɛɖekisɔsɔsavɔn kpɔwɛ Yesu tɔ nu yí bu tamɛ kpɔ so nuɔ, mìjinɔ mɔ mì “a zɔnnɔ shigbe lé Yesu zɔn do ɛnɛ.”—1 Ʒan 2:6.

19. Lé mìatɛnŋ akpɔtɔ anɔ Mawu lɔnlɔn lɔ mɛ doɔ?

¹⁹ Mìɖui mɔ mìakpɔtɔ anɔ Mawu lɔnlɔn mɛ. (Ʒuda 20, 21) Nɔ mìwakɔ ci ji mìkpe keŋ senɔ tonu nɔ Mawu, nanɔ yi ŋkɔ lɔ nɔnɔ mɛmiɖe yí gbewanɔ nu nɔ eji ajɔɛɔ, anyi mìkpɔtɔ le Mawu lɔnlɔn lɔ mɛ. (Elo. 27:11; Mt. 6:9; 1 Ʒan 5:3) Eŋwiɖoɖo wana lɔ dɔ mìgbeɖuini mɔ mìwo gbenɔnɔ adanasɛ nɔ Yehowa mɔ, ‘mìji mɔ mìanɔ yi lɔnlɔn lɔ mɛ tɛgbɛɛ!’

20. Susu nywi ciwo yí taɖo mìyinɔ Eŋwiɖoɖo lɔɔ?

²⁰ Nɔ jeŋkwi mɛ alo nyigban ji mɔkpɔkpɔ yí le mì shi can ɔ, susu nywiwo li ciwo yí taɖo mìyinɔ Eŋwiɖoɖo lɔ. Xweshiaxwe nɔ mìbɔ doju le azan ŋtɔ́ jiɔ, mìɖonɔ ŋwi mìwo mɛ vevi ɖeka ci mìlɔn ku ji, eyi nyi Yesu Kristo. Ci yí wugan ŋnɔwo pleŋ yí nyi mɔ, mìɖonɔ ŋwi lɔnlɔn nuwana gangan ci Yehowa wa nɔ mì: ésɔ Eviɛ na yí eku do ta nɔ mì. Exwe cɛ mɛɔ, mìawa Eŋwiɖoɖo lɔ le xɔsuzangbe 15 avril 2022. Mìlɔn Yehowa koɖo Eviɛ, eyi taɖo le Eŋwiɖoɖo Yesu ku zan lɔ jiɔ, enu ci yí anyi enuvevitɔ nɔ mì yí anyi mɔ, mìayi wana lɔ tɔxu.