Wojiŋ le St. Paul le Minnesota, États Unis le exwe 1954 mɛ. Anyi jilawo denyi dɔkunɔwo o, kpɔ wodenyi wamɛnɔwo hɛnnɛ o. Mìyinɔ Katoliki. Enyɛ yí nyi amɛvetɔ nɔ evi amatɔn ciwo woji. Katoliki suklu yí ŋyi le vihwɛ mɛ yí nyi fada sumɔvi. Vɔ, ŋdejeshi enu sugbɔ le Bibla mɛ o. Ŋnya mɔ Mawu ɖeka li yí nyi enuwo pleŋ Watɔ vɔ ŋdekando Katoliki ji mɔ yeakpedo ŋnu nɔ masin o.

Le exwe ŋkɔtɔ ci ŋwakɔ le William Mitchell suklu ci wokplanɔ esewo leɔ, asu koɖo ashi Yehowa Kunuɖetɔ ɖekawo va anyi xomɛ. Ci wokpɔ mɔ ŋle enuwo nyakɔɔ, wosɔ jijɔ nu nɔŋ mɔ yewoayi atrɔva. Ci wotrɔvaɔ, ŋbiɔ enyɔ amɛve wo se: “Nyi yí taɖo enuwo nyɔkɔ nɔ amɛvɔnwo wu amɛnywiwoɔ?” koɖo “Lé agbetɔ awɛ akpɔ jijɔ ŋtɔŋtɔɔ?” Wonaŋ wema ci yí nyi Nyateƒe, Si Kplɔa Ame Yia Agbe Mavɔ Mee koɖo Ŋɔŋlɔ Kɔkɔeawo Xexe Yeye Gɔmeɖeɖe. Wema cɛwo koɖo ve ɖo akpa makpafan. Ŋlɔn nɔ woakpla Bibla koɖoŋ hɛnnɛ. Eyi ŋvamɔŋje enu sugbɔ mɛ. Ejɔ ji nɔŋ sugbɔ ci ŋse mɔ Mawu Fyɔɖuxu  lɔ yí avakpa cɛ do nyigban lɔ ji. Ŋdo jeshi mɔ agbetɔwo cɛkpakpa dekpe ŋɖe ji o yí dɔ vevisese koɖo efunkpekpe ɖɔ xexe lɔ mɛ.

Ŋsɔ nyɛɖeki na Yehowa le tɔtɔmɛ nɔ exwe 1982, yi goduɔ, ŋwa ʒinʒindoshimɛ le takpekpegan ci nyɔta yí nyi “Fyɔɖuxu nyɔnɔnwi lɔ” ci wowa le exɔ gangan ɖeka mɛ le St. Paul juganmɛ. Ŋgbetrɔyi St. Paul jugan lɔ mɛ le kwɛshila ci yí kplɔɛdo mɛ keŋ wa esedɔwatɔwo dodokpɔ ɖeka. Le tɔtɔmɛ nɔ octobre wleciɔ, wonu mɔ nyɛŋɖu ji yí trɔ avoka.

Le takpekpegan “Fyɔɖuxu nyɔnɔnwi lɔ” mɛɔ, ŋdo go Mike Richardson ci yí wanɔ dɔ le Betɛli Brooklyn tɔ. Énu nɔŋ mɔ woɖo dɔwaxu ɖeka ci yí akpɔnɔ esenyɔwo gbɔ do alɔjedɔwaxugan lɔ. Eyi efyɔxwejikpɔtɔ Etiopi tɔ lɔ nyɔ ciwo yí le Edɔwawawo 8:36 mɛ va susumɛ nɔŋ yí ŋbiɔ nyɛɖeki se mɔ, ‘Nyi yí xe mɔ nɔŋ yí ŋdado alɔ wema mɛ yí awa dɔ le Esedɔwaxu cɛɔ?’ Eyi taɖo ŋdo alɔ wema mɛ mɔ nasumɔ le Betɛli.

Ci ŋvatrɔ Yehowa Kunuɖetɔɔ, dekpe nɔ anyi jilawo o. Danyɛ biɔ ŋse mɔ nɔ nyɛŋwa avokadɔ lɔ le Betɛli ɖe, nyi nakpɔ le mɛ ma. Ŋdre mɛ ni mɔ lɔnlɔn faa dɔ yí ŋjikɔ awa le nɔ. Ŋnu ni mɔ akpomɛ ho nyɛkuin ɖeka yí naxɔnɔ wleci ɖeshiaɖe, shigbe Betɛlixomumɛtɔ kpɛtɛwo nɛ.

Ŋwakɔ dɔ le kojoɖoxu ɖeka sa, eyi taɖo ŋdeyi Betɛli kaaka o. Vɔ ci ŋɖegbɔ dɔ lɔɔ, ŋtɔ Betɛli sumɔsumɔdɔ lɔ ji le Brooklyn, New York le exwe 1984 mɛ. Wosɔŋ ɖaɖa Esedɔwaxu. Ekpla ci ŋxɔ hwecinu ŋwakɔ dɔ le kojoɖoxu sa draŋ do ɖɛ nɔ enu ciwo yí gbɔgbɔ.

Woxwle Stanley xɔ ci yí le Jersey juganmɛ le novembre 1983 mɛ. Nɔviwo biɔ gbe efyɔhawo mɔ yewoadra enu ciwo yí dahɛn le exɔ lɔ mɛ do. Ci nɔviwo do go koɖo woɔ, woɖe mɛ nɔ wo mɔ yewojikɔ atrɔ Stanley xɔ lɔ nɔ anyi Yehowa Kunuɖetɔwo takpekpexɔ. Ecɛ hɛn cukaɖa vɛ. Fini axwewo le ɖekɛ yí ese ɖe mɔ le Jersey juganmɛ mɔ woacu sɛnsɛnxɔ do. Vɔ afisaxu yí Stanley xɔ lɔ le, eyi taɖo efyɔhawo gbe mɔ yewodana gbe nɔviwo nɔ woadra exɔ lɔ do o. Nɔviwo gbetrɔ biɔ gbe zevetɔ yí wogbe.

Le kwɛshila ŋkɔtɔ ci ŋwa le Betɛli mɛɔ, habɔbɔ lɔ hɛn enyɔ lɔ yi kojoɖoxu ci yí le jugan lɔ mɛ. Dejinjin yɛ o yí ŋkpla lé wokpɔnɔ  enyɔ ŋtɔ́ hanwo gbɔ do hwecinu ŋwa dɔ na nɔ exwe ve le kojoɖoxu ci yí le St. Paul, Minnesota. Kojoɖotɔ ɖeka le mì mɛ yí nu mɔ, sasaɔ, enu vovovowo yí wowanɔ le Stanley xɔ lɔ mɛ. Le kpɔwɛ mɛ, wowanɔ fimuwo le mɛ yí ehajitɔwo va xonɔ nu le nɔ. Vɔ nyi yí taɖo ese daɖe mɔ yí woasɛn Mawu le nɔɔ? Eyi kojoɖoxu lɔ trɔ kpɔ enyɔ lɔ gbɔ keŋ mɔ Jersey jugan lɔ dedo bubu acɛ ci mìɖo yí asɛn Mawu le vofamɛ nu o. Kojoɖoxu lɔ nu nɔ jumɛgawo mɔ wo le ɖe mɔ nɔ woadra exɔ lɔ do. So hwenɔnu yí ŋkpɔ lé Yehowa to Esedɔwaxu ci yí le Betɛli ji keŋ cukɔ shi nɔ yi habɔbɔ lɔ yí yi dɔwo yikɔ ŋkɔ. Eji jɔŋ sugbɔ mɔ ŋkpe ashi do edɔ cɛ nu.

Nɔviwo wa edɔ sugbɔ yí dra exɔ lɔ do. Eyi dewa exwe ɖeka o, wona kunuɖewema Gilead sukluvi exɔ 79 tɔ le takpekpexɔ lɔ mɛ le Jersey jugan lɔ mɛ le 8 septembre 1985 mɛ. Ejɔ ji nɔŋ mɔ ŋwa edɔ nɔ Yehowa le esedɔwaxu lɔ. Ŋkpɔ jijɔ le Betɛli sɔwu hwenu ŋwanɔ avokadɔ le xexeɛ mɛ sa. Vɔ ŋdenya mɔ edɔ buwo gbele te kpɔŋ le esɔmɛ yí nawa nɔ Yehowa le kojoɖonyɔwo mɛ o.

Le exwe 1980-wo mɛɔ, dotowo dedonɔ bubu acɛ ci Kunuɖetɔ ciwo yí shin ɖo yí agbe mɔ yewodado ehun nu o. Taŋtaŋ ɔ, kojoɖotɔwo nunɔ sa mɔ nyɔnu funɔwo deɖo acɛ agbe ehun dodo o. Kojoɖotɔ lɔwo susu yí nyi mɔ, nɔ wodedo ehun nɔ nyɔnu lɔɔ, áku yí evi lɔ atrɔ enɔmali.

Ci nɔvinyɔnu Denise Nicoleau ji evi ɖegbɔ le 29 décembre 1988 mɛɔ, ehun hwedi sugbɔ. Yi gbe jikɔ aɖo afɔku mɛ, eyi taɖo doto lɔ mɔ yɛ le ɖe mɔ nɔ woado ehun ni. Nɔvinyɔnu Nicoleau gbe. Yi ŋkegbuɔ, dotoxwe lɔ biɔ gbe kojoɖotɔ ɖeka keŋ ado ehun lɔ ni. Kojoɖotɔ lɔ debiɔ nyɔ ɖe nɔvinyɔnu Nicoleau alo asuɔ se keŋ akpɔ wowo susu gbɔxwe yí na gbe mɔ wo le do ehun lɔ o. Éna gbe dotoxwe lɔ mɔ wo le dui ni kpoŋ.

Eyi le xɔsuzangbe 30 décembre ɔ, doto lɔwo do ehun lɔ nɔ nɔvinyɔnu Nicoleau koɖo akpasɛnsin, ci asuɔ koɖo yi xomumɛtɔ bu ciwo yí le gbɔ gbekɔ sɛnsinɖe can. Gbenɔgbe le fiɛfi ŋtɔ́ mɛɔ, wolé nɔvinyɔnu lɔ xomumɛtɔ sugbɔ koɖo hamɛmɛshinshin ɖeka alo amɛve do gakpamɛ ɖo wotrɔdo nɔvinyɔnu Nicoleau baci yí gbekɔ mɔ wodado ehun ni o. Yi ŋkegbuɔ, enyɔjɔjɔdɔwatɔwo xo nuxu so enyɔ lɔ nu le wema, tele koɖo radio mɛ le New York juganmɛ.

Tɛnigbe nyidin ɔ, ŋxo nuxu koɖo Milton Mollen ci yí nyi ga le kojoɖoxu gangantɔ lɔ. Ŋdre enyɔ lɔwo mɛ ni yí ɖe mɛ ni mɔ kojoɖotɔ lɔ debiɔ nyɔ ɖe se gbɔxwe yí na gbe  mɔ wo le do ehun lɔ o. Mollen mɔ nyɛ le va kpɔ ye le bilo mɛ le fiɛfimɛ, nɔ yewoagbeje ese ciwo yí woatɛnŋ azan asɔ kpɔ enyɔ lɔ gbɔ mɛ. Ci fiɛfi lɔ va ɖoɔ, nyɛ koɖo nɔviŋsu Philip Brumley ci yí nyi mìwo dɔwaxu jikpɔtɔ yi gbɔ. Kojoɖotɔ lɔ yɔ avoka ci yí na gbe dotoxwe lɔ can va bɔbɔ lɔ. Mìdɔn nyɔ sugbɔ. Evaje fiɖeka yí nɔviŋsu Brumley ŋwlɛ nu ɖaɖaŋ do wema ji mɔ, “egbe le yi gɔnmɛ nɔ eo.” Nukplamu nywi yí enaŋ hwenɔnu, ɖo ŋgbekɔ sɛnsinɖe mɔ avoka dotoxwe lɔ tɔ nyɔ dejɔ ɖeeɖe o.

Le gaxoxo ɖeka goduɔ, kojoɖotɔ Mollen nu mɔ yewoatrɔva enyɔ lɔ ji ŋkegbu. Eyi anyi ŋkɔtɔ ci yewoasɔ do atɛ lɔ ji. Ci mìjikɔ asoɔ, Mollen nu mɔ avoka dotoxwe lɔ tɔ ɖo “edɔ gbɔnnu ɖeka yí awa sɔ.” Ecɛ dasɛ mɔ dejikɔ anɔ fafɛɖe nɔ avoka dotoxwe lɔ tɔ mɔ yɛahwlɛn ta nɔ dotoxwe lɔ mɔ yi nyɔ jɔ o. Eyi ŋdo jeshi mɔ Yehowa na kankandoji mì mɔ mìaɖu ji le enyɔ cɛ mɛ. Ewa dɔ do ŋji sugbɔ mɔ Yehowa zankɔ mì nɔ yi dro anyi wawa.

Mìnɔ zan ji yí ji enyɔ ciwo yí mìanu yi ŋkegbu nywiɖe. Kojoɖoxu lɔ sɔ Betɛli Brooklyn tɔ gbɔ. Eyi taɖo sugbɔtɔ le mɛ ciwo yí wakɔ dɔ le Esedɔwaxu Betɛli tɔ mɛ, zɔn afɔ yi kojoɖoxu lɔ. Ci kojoɖotɔ amɛnɛ lɔwo se mìwo nyɔwo ɖegbɔɔ, womɔ wodeɖo acɛ yí ado ehun lɔ sa o. Kojoɖoxu gangantɔ lɔ nu mɔ nɔvinyɔnu Nicoleau nyɔ jɔ. Wogbemɔ nɔ mɛɖe gbe gan yí wodo ehun ni akpasɛnsintɔɔ, woda le ese ji.

Dejinjin o yí kojoɖoxu gangantɔ ci yí le New York can nu mɔ nɔvinyɔnu Nicoleau ɖo acɛ yí agbe mɔ wodado ehun nɔ ye o. Ecɛ yí nyi ŋkɔtɔ le gbeta amɛnɛ ciwo kojoɖoxu ganganwo sɔ le États Unis kudo ehundodo nyɔwo nu. Mɔnukpɔkpɔ enyi nɔŋ mɔ ŋwa ɖe le mɛ. (Kpɔ dakavi ci yí nyi “ Ejiɖuɖu ciwo mìkpɔ le kojoɖoxu gangantɔ lɔ.”) Nyɛ koɖo kojoɖotɔ buwo wa dɔ le Betɛli, hwecinu woxokɔ nuxu so mɛ ci yí ɖo acɛ yí akpɔ ɖeviwo ji, nɔnɔgbegbe koɖo ese ciwo yí kudo nyigban koɖo exɔcucu nyɔwo nu.

Ci ŋdo go koɖo Dawn ci yí avanyi ashinyɛɔ, yɛ koɖo mɛ ci eɖe sa gbe nɔnɔ yí evi amɛtɔn ci kɔ ni. Ényi edɔsɛnsinwatɔ yí gbenyi emɔɖetɔ. Agbemɛ defa di o, vɔ éɖui  gligaan yí sumɔkɔ Yehowa. Ecɛ wa dɔ do ŋji sugbɔ. Le exwe 1992 mɛɔ, mìyi takpekpegan ci nyɔta yí nyi “Klɛnklɛn mɛwo” le New York juganmɛ, eyi ŋbiɛ se mɔ mìatɛnŋ azɔn ma. Le exwe ci yí kplɔɛdo mɛɔ, mìlé alɔ. Dawn nyi nyɔnu ci yí sɔ Yehowa sɛnsɛn ɖonɔ texwe ŋkɔtɔ le agbemɛ yí gbedonɔ jijɔ nɔ amɛ. Enunana enyi so Yehowa gbɔ nɔŋ. Le nyɔnɔnwi mɛ, so hwecinu mìɖe nɔnɔɔ, Dawn wa enunywi sugbɔ nɔŋ.—Elo. 31:12.

Hwecinu mìɖe nɔnɔɔ, evi amɛtɔn lɔwo ɖo exwe 11, 13 koɖo 16. Ŋji mɔ nanyi eda nywi nɔ wo eyi taɖo ŋhlɛn enushianu ci woŋwlɛ do mìwo wemawo mɛ so lé woawɛ anyi eda nywi nɔ nyɔnu ci woɖe viwo. Mìdo go cukaɖawo vɔ eji jɔŋ mɔ ɖeviɛwo vasɔŋ wa wowo xlɔ vevi koɖo eda ci wolɔn. Mìɖe mɔ yí ɖeviɛwo kplɔnɔ wowo xlɔwo va axomɛ. Ecɛ na mìwo xomɛ ɖɔnɔ koɖo ɖeviwo.

Le exwe 2013 mɛɔ, nyɛ koɖo Dawn va yi ci Wisconsin keŋ akpedo dalɔ koɖo nɔlɔ ciwo yí ku nyɔxo nu. Ekpacaŋ mɔ wodeɖo te anyi dɔ le Betɛli o. Ŋnyi lɔnlɔn faa dɔwatɔ yí kpenɔdo habɔbɔ lɔ nu le esenyɔwo mɛ hweɖewonu.

Le septembre 2018 mɛɔ, ŋdo jeshi mɔ ŋɖo aklɛnnɔ hlomɛ gbɔxwe axo nuxu. Anyi doto gbejeŋ kpɔ vɔ dekpɔ enu ci gbɔ edɔ̀ lɔ so o. Doto bu dɔŋ ɖaɖa doto ci yí kpɔnɔ ahlɔnkanwo gbɔ. Le janvier 2019 mɛɔ, doto lɔ mɔ edɔ̀ ɖeka ci yí debɔ ahan yí ŋle yí taŋfuin edɔ̀ lɔ avakpɔ ŋsɛn do anyi lanmɛ pleŋ ji.

Ŋkeke amɛtɔn godu ci ŋwakɔ kanmɛtete ci yí jɔnɔ ji nɔŋ ɔ, ŋjuin yí anyi ɖushi lɔ fici. Ŋtɔ kanmɛtete cɛ wawa yɛɔ, desɔ o. Yí ŋbi le yi wawa mɛ. Vɔ ci ŋjuin ɔ, ŋvado jeshi mɔ anyi kanwo tɔ kuku. Lé edɔ̀ lɔ ɖe blɛ sun ŋji do kpacaŋ sugbɔ. Egbɔnnu gbɔxwe naxo nuxu, ahwan alo ami ŋɖuɖu.

Ejɔ ji nɔŋ sugbɔ ci mɔnukpɔkpɔ hun nɔŋ yí ŋzan kojoɖoɖodɔ ci ŋkpla yí sɔ kpedo Yehowa habɔbɔ lɔ nu. Ejɔ ji nɔŋ hɛnnɛ mɔ ŋtɛnŋ ŋwlɛ wema sugbɔ ciwo yí doto, kojoɖotɔ koɖo avokawo azan. Ŋgbena nuxuwo le eju sugbɔ mɛ le nyigban lɔ pleŋ ji yí sɔ dasɛ mɔ Yehowa sɛntɔwo ɖo acɛ yí agbe ehundodo le edɔ̀dada nyɔwo mɛ. Vɔ sɔ koɖo enyɔ ci wonu le Luiki 17:10 mɛɔ, natɛnŋ amɔ: ‘Edɔwavi gbali yí ŋnyi. Ŋwa enu ci ŋɖo awa.’