Kankandojitɔɔ, Yehowa ji mɔ amɛ amɛve ciwo yí lé alɔ akpɔ jijɔ yí anyi xlɔ bakpomadɔnwo sɔyi mavɔ. (Mt. 19:4-6) Nɔ èji mɔ yeaɖe asu alo aɖe nyɔnu ɖe, lé àwɛ akpɔ amɛnywi ci àlé alɔ koɖoɔ? Ci Yehowa nyi mìwo Watɔɔ, énya enu ci mìɖo awa gbɔxwe atɛnŋ akpɔ jijɔ le alɔlele mɛ. Eyi taɖo nɔ èwa do gɔnmɛɖose ciwo ena mì jiɔ, àkpɔ jijɔ ŋtɔŋtɔ. Na mìakpɔ gɔnmɛɖose ɖewo le wo mɛ.

Ŋkɔtɔ, mìɖo ajeshi enu cɛ le mìwoɖekiwo nu: “Agbetɔ ji nyi amɛbletɔ wu enuwo pleŋ yí wodatɛnŋ ada edɔ̀ ni o.” (Ʒer. 17:9, NWT) Nɔ amɛ amɛve ciwo yí ji mɔ yewoalé alɔ tɔ wowonɔnɔwo jijiɔ, seselelanmɛ ci woɖo nɔ wowonɔnɔwo tɛnŋ ɖe blɛ sɛnŋ. Nɔ ele ahan ɔ, agbɔnnu gbɔxwe woasɔ gbeta nywiwo. Nɔ seselelanmɛ ɖekɛ ji wo amɛve lɔwo nɔ te do mɔ yewoalé alɔɔ, woavaɖo cukaɖa mɛ le yiyimɛ. (Elo. 28:26) Eyi taɖo nunya dele mɛ mɔ wo amɛve lɔwo atɔ seselelanmɛ sɛnŋsɛnŋ ɖoɖo nɔ nɔnɔ alo aɖo gbe nɔ nɔnɔ le tɔtɔmɛ gbɔxwe avajeshi wowonɔnɔwo ɖɛ o.

Elododo Wema 22:3 nu mɔ: “Ŋununyatɔwo kpɔ cukaɖa gbɔgbɔ yí ze ni. Vɔ, amɛ sukunu watɔwo yì zɔn trelele yì cukaɖa lɔ mɛ, yí kpefun sɔkudo nu.” Afɔku ci yí atɛnŋ anɔ mɛ ci woaɖe jiji le Ɛntɛnɛti ji mɛɔ? Ewa ŋshishi mɔ mɛɖewo do go mɛ ci wodejeshi ɖɛ le Ɛntɛnɛti ji yí tɔ zɔnzɔn koɖi, yi godu gbɔxwe wovado jeshi mɔ mɛ lɔ ble yewo do mɛ. Gbesɔ kpe niɔ, awoxotɔwo trɔnɔ wowo ŋkɔwo le Ɛntɛnɛti ji yí able amɛ manyaɖewo keŋ afi ho le wo shi. Hweɖewonuɔ, awoxotɔ ŋtɔ́wo nunɔ mɔ Kunuɖetɔwo yewonyi.

Mìagbekpɔ afɔku bu ci yí le mɛ. Siti ciwo ji wojinɔ mɛ ci woaɖe le ɖewo ɖonɔ ɔdinatɛɛ toto ci yí sɔnɔ ŋsu ɖe koɖo nyɔnu ɖe mɔ woaɖe wowonɔnɔwo dru. Vɔ kpeɖoji ɖekɛ deli ci yí dasɛ mɔ mɔnu ŋtɔ́wo zanzan akpa amɛ o. De ŋɖɛnyanya enyi mɔ woakando ɔdinatɛɛ toto ci agbetɔ wa ji keŋ asɔ gbeta mɔ woalé alɔ koɖo mɛɖe yí mɛ lɔ anyi amɛnywi o. Ɔdinatɛɛ toto datɛnŋ asɔ koɖo Bibla gɔnmɛɖosewo gbeɖe o.—Elo. 1:7; 3:5-7.

Gɔnmɛɖose ɖeka le Elododo Wema 14:15 mɛ yí nu mɔ: “Sukunuwatɔ a kando enyɔ ɖekpokpwi ci yí é se ji. Vɔ, ŋununyatɔ do ʒinxo yí butamɛ so enushanu nu.” Gbɔxwe àkando ji mɔ mɛɖe anyi asu alo ashi nywi nɔ  yeɔ, èɖo ajeshi ɖɛ nywiɖe. Vɔ ecɛ wawa atɛnŋ agbɔnnu nɔ mído go le Ɛntɛnɛti ji. Nɔ mísɔnɔ míwo fotowo ɖaɖa nɔnɔ, xonɔ nuxu so míwoɖekiwo nu yí zan gamɛ sugbɔ sɔ ŋwlɛnɔ nu ɖaɖa nɔnɔ can ɖe, àtɛnŋ anu mɔ yejeshi ɖɛ teŋ a? Mɛɖewo bui sa mɔ yewokpɔ yewo lɔnlɔntɔ le Ɛntɛnɛti ji, vɔ hwenu wovado go ŋmɛŋmɛɔ, enu ci wokpɔ le mɛ lɔ nu ɖe fun nɔ wo.

Ehakpatɔ lɔ nu mɔ: “Ŋdedonɔ ha koɖo amɛbletɔwo o, yí ŋzenɔ nɔ mɛ ciwo yí wlanɔ mɛ ciŋmɛ wonyi.” (Eha. 26:4, NWT) Amɛ sugbɔ kpɔɛ mɔ ŋsukankan nɔ amowo le Ɛntɛnɛti ji so amɛɖeki nu mɔ yenyi amɛnywi denyina o. Wotɛnŋ sɔ wowo nɔnɔmɛ dɔndɔnwo wla alo wodanu mɛ ciŋmɛ wonyi teŋ nɔ woŋwlɛkɔ nu ɖaɖa amowo le Ɛntɛnɛti ji o. Nɔ mɛɖewo nu mɔ yewonyi Yehowa Kunuɖetɔwo can ɖe, wonyi Kristotɔ waʒinʒindoshimɛwo nyaoa? Woshin le gbɔngbɔnmɛa? Wonyi exlɔ bakpomadɔn koɖo Yehowaa? Wodonɔ bubu wo nu le wowo hamɛwo mɛa? Alo taŋfuin woɖonɔ kpɔwɛ dɔndɔnwo alo nyi “gbɛbɔbɔ vwinwoa”? (1 Kor. 15:33; 2 Tim. 2:20, 21) Sɔ koɖo Bibla gɔnmɛɖosewo ɖe, wovo alé alɔ yí nyɔ ɖe dakudo wo nua? Eʒan mɔ àkpɔ ɖoŋci nɔ nyɔbiɔse cɛwo. Vɔ nɔ dexo nuxu koɖo Kunuɖetɔ bu ciwo yí jeshi mɛ lɔ ɖɛ nywiɖeɔ, atɛnŋ agbɔnnu mɔ àkpɔ ɖoŋci lɔwo. (Elo. 15:22) Le nyɔnɔnwi mɛɔ, Yehowa sɛntɔ egbejinɔtɔ ɖe dabui kpɔ gbeɖe mɔ yeaɖe jimaxɔsetɔ yí ‘asɔ yiɖeki xoca koɖi’ o.—2 Kor. 6:14; 1 Kor. 7:39.

Mìkpɔɛ mɔ afɔku le mɛ ci woaɖe jiji le Ɛntɛnɛti ji mɛ, vɔ emɔ nywi buwo li ciwo ji àto yí ajeshi mɛɖe ɖɛ nywiɖe keŋ avalé alɔ koɖi. Fini àtɛnŋ ado go mɛ ci yí avanyi asu nywi alo ashi nywi nɔ eo leɔ? Nɔ mɔɖeɖe li yí woabɔ le jugbajaɔ, mìatɛnŋ ajeshi amowo ɖɛ nɔ mìyinɔ hamɛ bɔbɔwo, ekán lɔ mɛ takpekpewo, takpekpeganwo koɖo bɔbɔ buwo.

Nɔ mɔɖeɖe deli yí woabɔ doju le jugbaja, shigbe COVID-19 hwenu hannɛɔ, mìzannɔ telefonu koɖo ɔdinatɛɛwo sɔ wanɔ hamɛ bɔbɔwo. Le bɔbɔ lɔwo mɛɔ, emɔ hunnɔ nɔ mì yí mìjenɔshi Kunuɖetɔ trɛnnɔ buwo. Àtɛnŋ akpɔ lé woxokɔ nuxu alo ɖokɔ nyɔ ŋci yí sɔ dadasɛ wowo xɔse do le bɔbɔwo. (1 Tim. 6:11, 12) Gbesɔ kpe niɔ, míatɛnŋ axo nuxu koɖo míwonɔnɔwo le bɔbɔ lɔ kpakpa hwenu. Nɔ èzan Ɛntɛnɛti yí bɔ koɖo Kunuɖetɔ buwoɔ, àtɛnŋ akpɔ lé mɛ lɔ wanɔ nu ɖaɖa mɛbuwo gbɔ do yí ecɛ adasɛ mɛ ciŋmɛ enyi teŋ nɔ eo. (1 Piɛ 3:4) Nɔ hwenuwo vayikɔ yí míjekɔshi míwonɔnɔwo ɖɛɔ, míatɛnŋ anya nɔ míɖo tajinu ɖekɛŋmɛ yí atɛnŋ aɖe míwonɔnɔwo yí anyɔ.

Nɔ trɛnnɔwo wa do Bibla gɔnmɛɖosewo ji hwenu wojijiɛ mɛ ci woaɖeɔ, kankandoji li mɔ, woakpɔ jijɔ le alɔlele mɛ. Yí nyɔ ci yí le Elododo cɛ mɛ avamɛ nɔ wo, emɔ: “Nɔ́ è kpɔ nyɔnu [alo asu nywi] ɔ, è kpɔ enu nywi. É dasɛ mɔ [Yehowa] kpɔ jijɔ koɖo eo.”—Elo. 18:22.