1. Nyi yí nyi Yehowa dro le egbɛ mɛɔ?

 EGBƐƆ, Mawu dro enyi mɔ woadra Fyɔɖuxu eŋɛnywi lɔ le xexe lɔ pleŋ mɛ. (Mk. 13:10; 1 Tim. 2:3, 4) Yehowa dɔ yí edɔ cɛ nyi yí ele veviɖe ni keke esɔ Eviɛ vevi lɔ mɔ yi le kpɔ edɔ cɛ ji. Mìatɛnŋ akando ji mɔ ci enyi Yesu yí kpɔkpɔ kunuɖeɖedɔ lɔ jiɔ, áwɛ keke anyi wawa shigbe lé Yehowa ji do nɛ, gbɔxwe yí vɔvɔnu lɔ ava.—Mt. 24:14.

2. Nyi mìakpɔ le nyɔta cɛ mɛɔ?

² Le nyɔta cɛ mɛɔ, mìakpɔ lé Yesu zanzan “hwashi egbejinɔtɔ koɖo ŋɖɛnyatɔ” ci eɖo yí enana gbɔngbɔnmɛŋɖuɖu yi dokplɔtɔwo yí gbewakɔ toto so kunuɖeɖedɔ ci han wodewa kpɔ le agbetɔwo xolɔlɔ mɛ o. (Mt. 24:45, NWT) Mìagbekpɔ enu ci mìwo ɖekaɖeka awa yí anɔ godu nɔ Yesu koɖo hwashi egbejinɔtɔ lɔ.

3. Acɛ ci yí wona Yesuɔ?

³ Yesu yí kplɔkplɔ mì le kunuɖeɖedɔ lɔ wawa mɛ. Lé mìwɛ yí kando jiɔ? Gbɔxwe Yesu ayi jeŋkwi mɛɔ, édo go koɖo yi dokplɔtɔ egbejinɔtɔ ɖekawo le Galile to ji. Énu nɔ wo mɔ: “Ŋsɛn pleŋ yí wo sɔ na Ŋ le jeŋkwi mɛ koɖo le nyigban ji.” Do jeshi enyɔ ci enu kplɔɛdo kaka, émɔ: “Nɔ́ é le ahan ɔ, mì yì yí a ɖo dɔkplaviwo le jukɔnwo pleŋ mɛ.” (Mt. 28:18, 19) Eyi taɖo kunuɖeɖedɔ lɔ ji kpɔkpɔ le acɛ ci yí wona Yesu mɛ hɛnnɛ.

4. Nyi yí taɖo mìatɛnŋ akando ji mɔ Yesu kpɔtɔ kpɔkpɔ kunuɖeɖedɔ lɔ ji keke va je egbɛɔ?

 ⁴ Yesu nu mɔ woawa kunuɖeɖe koɖo nukplaviwowawadɔ lɔ “le jukɔnwo pleŋ mɛ,” égbenu nɔ yi dokplɔtɔ lɔwo mɔ, “Na nɔ̀ koɖo mí tɛgbɛɛ, keke a nanɔ hwecinu yí xexe cɛ a va vɔ.” (Mt. 28:20) Enyɔ cɛwo dasɛ petii mɔ, keke va je egbɛɔ, Yesu kpɔtɔ kpɔkpɔ kunuɖeɖedɔ lɔ ji.

5. Sɔ to nyi wawa mɛ yí mìna yí enyɔnuɖɛ ci yí le Ehajiji Wema 110:3 mɛ vavamɛɔ?

⁵ Yesu devɔnkɔ mɔ le xexe cɛ vɔvɔnuɔ, wodakpɔ amɛ sugbɔ nɔ edɔ lɔ wawa o. Énya mɔ enyɔ ci ehakpatɔ lɔ nu avajɔ; ehakpatɔ lɔ nu mɔ: “Ao mɛwo a sɔ wowoɖekiwo jo vofamɛtɔ hwecinu è bɔ ao hwakɔn doju.” (Eha. 110:3) Nɔ èdradra Fyɔɖuxu ŋɛnywi lɔɔ, edasɛ mɔ èkpeɛdo Yesu Kristo koɖo hwashi egbejinɔtɔ lɔ nu, yí gbena yí enyɔnuɖɛ cɛ vavamɛ. Edɔ lɔ yikɔ ŋkɔ nywiɖe, vɔ cukaɖawo dedɛn o.

6. Cukaɖa ɖeka ci yí Fyɔɖuxu ŋɛnywidratɔwo dokɔ go egbɛɔ?

⁶ Yumɛcici nyi cukaɖa ɖeka ci Fyɔɖuxu ŋɛnywidratɔwo donɔ go. Xɔsegbetɔwo, sɛnsɛnŋkɔnɔtɔwo koɖo politikiwatɔwo kan ŋsuwo nɔ amɛwo so mìwo dɔ lɔ nu. Nɔ mìwo xomumɛtɔwo, amɛnyanyiwo koɖo mìwo dɔmɛkpenawo se ŋsunyɔ cɛwo yí kando wo jiɔ, woʒinnɔ mì ji mɔ mìwo le mi Yehowa sɛnsɛn yí aɖo te kunuɖeɖedɔ lɔ. Le eju ɖewo mɛɔ, mìwo ketɔnɔwo donɔ vɔnvɔn nɔ mìwo nɔviŋsu koɖo nɔvinyɔnuwo, xonɔ wo yí lénɔ wo do gakpa mɛ ŋtɔkpu. Vɔ wowo nuwana lɔwo dekpaca mì o. Ðo Yesu nu ɖɛ mɔ: “Amɛwo pleŋ a le eke mí, ɖo mí kando Ŋ ji.” (Mt. 24:9) Ci amɛwo wakɔ enu cɛwo koɖo mìɔ, edasɛ mɔ mìwo nu jɔkɔ ji nɔ Yehowa. (Mt. 5:11, 12) Legba yí le godu nɔ yumɛcici lɔ. Vɔ Satana denyi ŋɖe le ŋkɔ nɔ Yesu o. Ci Yesu le godu nɔ edɔ lɔɔ, mìsun ji yí dradra eŋɛnywi lɔ nɔ amɛwo le ejukɔnwo pleŋ mɛ. Mìakpɔ kpeɖoji ɖewo.

7. Nyi yí na èkando ji mɔ Enyɔdasɛ 14:6, 7 vakɔmɛ le egbɛ mɛɔ?

⁷ Cukaɖa bu ci mìdonɔ go le kunuɖeɖedɔ lɔ mɛ yí nyi mɔ, mìkpɔnɔ amɛ sugbɔ ciwo yí donɔ gbe vovovo ciwo mìdese o. Le ŋtegan ci Yesu dasɛ nɔ Ʒan mɛɔ, énu ɖɛ mɔ le mìwo hwenuɔ, mìaɖu cukaɖa ŋtɔ́ ji le eŋɛnywidradradɔ lɔ mɛ. (Hlɛn Enyɔdasɛ 14:6, 7.) Lé mìɖukɔ ji doɔ? Mìwanɔ ci ji mìkpe nɔ amɛ sugbɔ ase Fyɔɖuxu ŋɛdu lɔ. Le xexeɛ pleŋ mɛ gbɛɔ, amɛwo atɛnŋ ahlɛn mìwo Bibla nukplawemawo le jw.org ji, ɖo wowa wo do egbe ciwo yí wu 1000 mɛ! Se vivi nɔ agbe lɔ sɔyi mavɔ! wema yí nyi dɔwanu vevitɔ ci yí mìzanzan gbɛ le enukplaviwowawadɔ lɔ mɛ. Eyi taɖo Edɔjikpɔha lɔ na gbe mɔ wo le ɖe gɔnmɛ ni do egbe ciwo yí wu 700 mɛ! Wowa videowo nɔ tokunɔwo yí gbewa wemawo do brayi mɛ nɔ ŋkuvitɔnnɔwo, nɔ wowo can akpɔ gbɔngbɔnmɛŋɖuɖu lɔ aɖunɔ. Mìkpɔkpɔ yí Bibla mɛ nyɔnuɖɛwo vakɔmɛ. Amɛwo “so egbewo pleŋ mɛ le jukɔnwo mɛ” yí kplakpla “egbe mɛmi” ci yí nyi Bibla mɛ nyɔnɔnwi lɔ. (Zak. 8:23, NWT; Zef. 3:9, NWT) Ci enyi Yesu yí kplɔkplɔ mìɔ, mìtɛnŋ sun ji yí wakɔ enu cɛwo pleŋ.

8. Nyi yí na mìkpɔkpɔ nyɔnawo so mìwo kunuɖeɖedɔ lɔ mɛ ahan ɔ?

⁸ Amɛ ciwo yí wu 8 000 000 yí so eju 240 mɛ yí le Yehowa habɔbɔ lɔ mɛ gbɛ. Yí le exwe ɖeshiaɖe mɛɔ, agbetɔ kotokun amɛve han wanɔ ʒinʒindoshimɛ! Vɔ enu ci yí gbele veviɖe sɔwu egbɔsusu ŋtɔ́ yí nyi mɔ enukplavi yoyu cɛwo tekpɔ yí ɖo  Kristotɔwo nɔnɔmɛ nywiwo. Wotɔ “agbe yoyu” nɔnɔ. (Kol. 3:8-10) Amɛ sugbɔ mi gbɔdɔndɔn masɔkoɖosenuwo wawa yí mi tamɛ sɛnsɛn, wodegbe klannɔ amɛwo do akpo o, yí ejumɛvinyinyi gbɔngbɔn degbele wo mɛ o. Enyɔnuɖɛ ci yí le Ezai 2:4 mɛ yí vakɔmɛ; ɖo wodegbekplakɔ ahwa wawa o. Nɔ mìje agbla veviɖe yí dokɔ amɛnyinyi yoyu lɔɔ, mìakpedo mɛbuwo nu woava Mawu habɔbɔ lɔ mɛ, ecɛ agbedasɛ mɔ mìkplɔkɔ mìwo Xwetɔ Kristo Yesu ci yí kpɔkpɔ edɔ lɔ ji do. (Ʒan 13:35; 1 Piɛ 2:12) Nyi yí na mìsun ji yí wakɔ enu cɛwoɔ? Mìsun ji yí wakɔ wo, ɖo Yesu kpekɔdo mì nu.

9. Sɔ koɖo Matie 24:45-47 ɖe, nyi yí Yesu mɔ yɛavajɔ le ŋkeke lɔwo vɔvɔnuɔ?

⁹ Hlɛn Matie 24:45-47 le NWT mɛ. Yesu nu ɖɛ mɔ le ŋkeke lɔwo vɔvɔnuɔ, yeacan “hwashi egbejinɔtɔ koɖo ŋɖɛnyatɔ” ɖeka nɔ ananɔ gbɔngbɔnmɛŋɖuɖu amɛwo. Eyi taɖo mìatɛnŋ akpɔkpɔ emɔ mɔ hwashi lɔ ale edɔ ji veviɖe le mìwo hwenu gbɛ. Yí ahan pɛɛ ele nɛ. Mìwo Kplɔtɔ Yesu zankɔ ŋsu amɛshiaminɔwo gbɛbɔbɔ hwɛhwɛ ɖeka yí sɔ nakɔ gbɔngbɔnmɛŋɖuɖu Mawu mɛwo koɖo eɖesɔlejitɔwo “le gamɛ nywitɔ ji.” Ŋsu cɛwo deɖunɔ axwetɔ do mɛbuwo xɔse ji o. (2 Kor. 1:24) Ðo, womɔŋje mɛ nywiɖe mɔ Yesu Kristo yí nyi “ahwakɔnga” nɔ Mawu mɛwo.—Ezai 55:4.

10. Le wema ciwo yí wodasɛ le foto lɔ ji mɛ ɖe, ci ɔkpla yí vatɔ Yehowa sɛnsɛn ɔ?

¹⁰ So exwe 1919 mɛɔ, hwashi egbejinɔtɔ lɔ wa wema hamɛhamɛwo. Wema cɛwo kpedo ejinywitɔwo nu yí wokpla nyɔnɔnwi ci yí le Mawu Nyɔ lɔ mɛ. Le exwe 1921 mɛɔ, hwashi lɔ wa wema ci yí nyi La Harpe de Dieu, yí asɔ kpedo  eɖesɔlejitɔwo nu nɔ woajeshi Bibla gɔnmɛjeje nukplakplawo. Ci hwenu lɔwo vayikɔɔ, wogbewa wema cɛ tɔ han buwo. Wema ci yí kpedo eɔ nu yí ɔvajeshi mìwo Da ci yí le jeŋkwi mɛ yí gbeluin ɔ? “Que Dieu soit trouvé véridique” yí èkplaa, alo Nyateƒe, Si Kplɔa Ame Yia Agbe Mavɔ Mee, yí èkpla alo oo, Ate Ŋu Anɔ Agbe Tegbee le Paradiso me le Anyigba Dzi yɔ alo Sidzedze si Kplɔa Ame Yia Agbe Mavɔ Me, abi Nuka Tututue Nye Biblia ƒe Nufiafia? alo Nyi yí Bibla kpla mìɔ? yí èkpla, alo wema yoyutɔ ci yí nyi, Se vivi nɔ agbe lɔ sɔyi mavɔ! yí èkplakplaa? Wowa wema cɛwo nɔ mìazan wo asɔ kpla nu amɛwo yí wova do gamɛ ciwo ji mìʒan wo le.

11. Nyi yí taɖo eʒan mɔ mì pleŋ aɖunɔ gbɔngbɔnmɛŋɖuɖu lɔɔ?

¹¹ De amɛyoyuwo ɖekɛ yí ʒan gbɔngbɔnmɛŋɖuɖu sɛnŋwo o. Mì pleŋ yí ʒan gbɔngbɔnmɛŋɖuɖu sɛnŋwo. Apotru Pɔlu ŋwlɛ mɔ: “Ŋɖuɖu sɛnŋ lɔ li nɔ amɛ ciwo yí shin le gbɔngbɔn mɛ.” Pɔlu gbenu kpi mɔ, ŋɖuɖu sɛnŋ lɔ akpedo wo nu woanya “evototo ci yí le gblamɛ nɔ enywi koɖo evwin.” (Ebre. 5:14) Wawa do agbenywinɔnɔse Yehowa tɔwo ji dele fafɛɖe le egbɛ mɛ o, ɖo agbedɔndɔnnɔnɔ vabɔ le xexe lɔ mɛ. Vɔ Yesu wɛ keke mìatɛnŋ akpɔ gbɔngbɔnmɛŋɖuɖu ciwo yí ado ŋsɛn mì. Mìxɔnɔ emɔdasɛnamɛwo so Mawu Nyɔ, Bibla mɛ. Yesu to hwashi egbejinɔtɔ lɔ ji yí eɖanɔ gbɔngbɔnmɛŋɖuɖu lɔ yí gbemini nɔ amɛwo.

12. Shigbe Yesu nɛ ɖe, lé mìkpɔnɔ Mawu ŋkɔ lɔ doɔ?

¹² Shigbe Yesu nɛɔ, mìdonɔ bubu Mawu ŋkɔ lɔ nu shigbe lé eje do nɛ. (Ʒan 17:6, 26) Le kpɔwɛ mɛ, le exwe 1931 mɛɔ, mìsɔ ŋkɔ ci yí nyi Yehowa Kunuɖetɔwo, Bibla mɛ yí ŋkɔ lɔ so. Sɔ to ecɛ wawa mɛɔ,  mìdadasɛ lé Mawu ŋkɔ lɔ le veviɖe do nɔ mì yí gbejijiɛ mɔ amɛwo ajeshi mì ɖɛ mɔ mìwo Da ci yí le jeŋkwi mɛ ŋkɔ lɔ le mì nu. (Ezai 43:10-12) Eyi so octobre nɔ exwe ŋtɔ́ɔ, wotɔ ŋkɔ lɔ ŋwlɛŋwlɛ do wema cɛ ci yí nyi Jutakpɔxɔ ji. Gbesɔ kpe niɔ, Xexe Yeye Gɔmɛɖeɖe Bibla lɔ gbetrɔ sɔ Mawu ŋkɔ lɔ ɖo finiwo eɖo anɔ le Mawu Nyɔ lɔ mɛ. Vɔ cɔci ciwo yí mɔ yewonyi Kristotɔwo ɖe Mawu ŋkɔ Yehowa lɔ so wowo Bibla gɔnmɛɖeɖe sugbɔtɔ mɛ!

13. Nyi yí na èkando ji mɔ Yesu zankɔ “hwashi egbejinɔtɔ koɖo ŋɖɛnyatɔ” lɔ le egbɛ mɛɔ? (Ʒan 6:68)

¹³ Yesu to hwashi egbejinɔtɔ koɖo ŋɖɛnyatɔ lɔ ji yí ɖo habɔbɔ vevi ɖeka do nyigban lɔ ji nɔ sɛnsɛn adodwitɔ lɔ atɛnŋ ani. Lé èkpɔnɔ habɔbɔ ŋtɔ́ doɔ? Nɔ èmɔ yɛaɖo enyɔ lɔ ŋciɔ, taŋfuin ètɛnŋ ɖo ŋwi enyɔ ci apotru Piɛ nu nɔ Yesu, émɔ: “Axwetɔ, mi gbɔ mì a yì ɔ? È ɖo agbe mavɔmavɔ nyɔwo.” (Ʒan 6:68) Fini yí mìwo ɖekaɖeka ale gbɛ nɔ mìdejeshi Yehowa habɔbɔ lɔ ɖɛ saɔ? Kristo tokɔ habɔbɔ cɛ ji yí wakɔ enu ɖeshiaɖe, nɔ mìakpɔ enu ciwo mìʒan keŋ anɔ nywiɖe le gbɔngbɔn mɛ. Égbenakɔ kpla mì nɔ mìabi doji le kunuɖeɖedɔ lɔ wawa mɛ. Gbesɔwu ŋnɔɔ, ékpekɔdo mì nu nɔ ‘mìatrɔ agbetɔ yoyu,’ nɔ mìwo nu atɛnŋ akpe nɔ Yehowa.—Efe. 4:24.

14. Ci mìle Yehowa habɔbɔ lɔ mɛ ɖe, nyɔna ciwo yí mìkpɔ so hwenu yí COVID-19 dɔ̀bamɛ lɔ toɔ?

¹⁴ Yesu nanɔ emɔdasɛnamɛwo le hwenu sɛnŋwo mɛ. So hwecinu COVID-19 toɔ, mìkpɔkɔ nyɔnawo so emɔdasɛnamɛ ciwo yí enanɔ mɛ. Amɛ sugbɔ dan ta nɔ wowoɖekiwo le xexe lɔ mɛ yí wodenya enu ci woawa o, vɔ Yesu yɛ wɛ keke  mìxɔ emɔdasɛnamɛ ciwo yí akpedo mì nu mìanɔ nywiɖe. Wodo ŋsɛn mì mɔ mìwo le sɔ enu cɔnnɔ ŋɔci yí anɔnɔ azɔge nɔ amɛwo nɔ mìle amɛwo mɛ. Wodo ŋsɛn hamɛmɛshinshinwo mɔ wo le kpɔtɔ ayɔnɔ mɛ ciwo pleŋ yí le hamɛ lɔ mɛ kpɔ keŋ akpɔ mɔ wole nywiɖe le lanmɛ koɖo gbɔngbɔn mɛ ma. (Ezai 32:1, 2) Mìgbexɔnɔ emɔdasɛnamɛ koɖo ŋsɛndoamuwo le Edɔjikpɔha nyɔtakankan ciwo yí wowanɔ mɛ.

15. Emɔdasɛnamɛ ciwo mìxɔ so bɔbɔwo koɖo kunuɖeɖedɔ lɔ wawa nu le COVID-19 dɔ̀vɔn lɔ hwenuɔ, yí nyi yí to so mɛɔ?

¹⁵ Mìgbexɔ mɔdasɛnamɛwo so lé mìawanɔ bɔbɔwo koɖo kunuɖeɖedɔ lɔ do le COVID dɔ̀bamɛ lɔ hwenu. Zeɖekakakaɔ, mìtɔ hamɛ bɔbɔwo, takpekpewo koɖo takpekpeganwo wawa toto videokacaca ji. Yí nɛnɛkeɔ, mìtɔ kunu ɖeɖe nɔ amɛwo sɔ to wemaŋwlɛŋwlɛ koɖo telefonu ji. Yehowa cu shi do mìwo gblajeje lɔwo ji. Alɔjedɔwaxu sugbɔ nu mɔ, eŋɛnywidratɔwo hlɛnhlɛnmɛ vasukɔgbɔ doji. Le nyɔnɔnwi mɛɔ, enu ciwo mɛ mìto le gaxoxo cɛ mɛ do ŋsɛn amɛ sugbɔ.—Kpɔ dakavi ci yí nyi, “ Yehowa cu shi do mìwo kunuɖeɖedɔ lɔ ji.”

16. Nyi ji mìkandoɔ?

¹⁶ Etɛnŋ wakɔ nɔ mɛɖewo mɔ habɔbɔ lɔ yɛ gbewɛkɔ ɖoɖu le dɔ̀bamɛ nyɔ lɔ mɛ. Vɔ nɔ hwenuwo vayikɔɔ, wovakpɔnɔ mɔ mɔdasɛnamɛ lɔwo sɔgbe. (Mt. 11:19) Eyi ci mìbu tamɛ kpɔ so lé Yesu kplɔkɔ yi mɛwo do koɖo lɔnlɔn le edɔ̀bamɛ lɔ hwenuɔ, ena mìkando ji mɔ, nɔ esɔ mɛ gbevale do ɖe can ɔ, Yehowa koɖo Eviɛ lɔnlɔntɔ lɔ dagbe mì ɖɛ gbeɖe o.—Hlɛn Ebretɔwo 13:5, 6.

17. Ci èkplɔ Yesu do ɖe, lé ewakɔ nɔ eoɔ?

¹⁷ Eji jɔkɔ mì sugbɔ mɔ Yesu yí nyi mìwo Kplɔtɔ. Ci mìso akɔta koɖo eju vovowo mɛ yí gbedokɔ egbe vovowo can ɔ, mìdema le habɔbɔ lɔ mɛ o. Mìɖukɔ nu nywiɖe le gbɔngbɔn mɛ yí gbexɔ dɔwanu ciwo yí akpedo mì nu mìawa kunuɖeɖedɔ lɔ nywiɖe. Enu ciwo mìkpla kpedo mɛɖekaɖeka nu yí edo amɛnyinyi yoyu lɔ, mìgbekpla lé mìatɛnŋ alɔnnɔ mìwonɔnɔwo do. Susu sugbɔ li ciwo yí taɖo mìɖo akpɔnɔ jijɔ mɔ Yesu yí nyi mìwo Kplɔtɔ!