Mawunyɔkpukpui cɛwo yɔ nɔnɔmɛ amashiɖekɛ mɔ: ‘Gbɔngbɔn Kɔkwɛ kusɛnsɛn nyi lɔnlɔn, jijɔkpɔkpɔ, fafa, jigbɔnɖɛxɔxɔ, xomɛvuwawa, enunywiwawa, xɔse, xomɛfafa, koɖo amɛɖekijiɖuɖu.’ Vɔ denyi nɔnɔmɛ cɛwo ɖekɛ Mawu gbɔngbɔn kɔkɔɛ lɔ atɛnŋ akpedo mì nu mìaɖo o.

Do jeshi nyɔ ci apotru Pɔlu ŋwlɛ le kpukpui ciwo yí doŋkɔ mɛ. Éŋwlɛ mɔ: “Enuvɔn ciwo yí mìwo gbaza wanɔ . . . ke: mateliwawa, makɔmakɔnyinyi, adɛn vwin wuwu, vojusɛnsɛn, azenuwawa, amɛxaxa, hanyahanyadodo, ŋɔku, dɔmɛzi sugbɔ dodo, amɛɖekɛtɔjiji, emɔdotoamɛmɛ, habɔbɔmama, amɛnuve-amɛnu, ahanumu, azanɖuɖu vwintɔwo, koɖo a wa enu ciwo yí le shigbe enu ciwo yí ŋ dre yɛ ɛnɛ.” (Gal. 5:19-21) Mìkpɔ mɔ Pɔlu nu le vɔvɔnu nɔ yi nyɔwo mɔ: “Koɖo a wa enu ciwo yí le shigbe enu ciwo yí ŋ dre yɛ ɛnɛ.” Ecɛ dasɛ mɔ deyɔ ‘enuvɔn ciwo pleŋ yí mìwo gbaza wanɔ,’ shigbe ciwo yí le Kolosetɔwo 3:5 mɛ nɛ o. Ahanke ci eyɔ nɔnɔmɛ nywi amashiɖekɛ lɔwo ɖegbɔɔ, émɔ: “Ese ɖe de li yí gbé enu hunnɔwo o.” Eyi taɖo denyi nɔnɔmɛ nywi ciwo pleŋ gbɔngbɔn kɔkɔɛ lɔ atɛnŋ akpedo mì nu mìaɖo yí Pɔlu yɔ o.

Nɔ mìsɔ gbɔngbɔn lɔ kusɛnsɛn sɔ koɖo klɛnklɛn kusɛnsɛn ci nu eŋwlɛ nu so yí sɔ ɖaɖa Efezi hamɛ lɔɔ, mìamɔŋje enyɔ lɔ mɛ. Énu mɔ: “Klɛnklɛn lɔ kusɛnsɛn yí nyi enunywiwawa koɖo enujɔjɔɛwawa koɖo nyɔnɔnwi ɖekpokpui.” (Efe. 5: 8, 9, NWT) Ɛɛ, “enunywiwawa koɖo enujɔjɔɛwawa koɖo nyɔnɔnwi” nyi “klɛnklɛn lɔ kusɛnsɛn” kpaxwe ɖe, gan yí gbenyi “Gbɔngbɔn Kɔkwɛ kusɛnsɛn” kpaxwe ɖe.

Ahanke nɔ mìsɔ gbɔngbɔn lɔ kusɛnsɛn sɔ koɖo nɔnɔmɛ ciwo Pɔlu do ŋsɛn Timɔte mɔ yi le ɖoɔ, mìamɔŋje enyɔ lɔ mɛ doji. Énu ni mɔ: “Tekpɔ yí a nɔ emɔ jɔjɔɛ ji, yí a sumɔ Mawu, a ɖo xɔse, a ɖo lɔnlɔn, axɔ jigbɔnɖɛ, yí a ɖo xomɛfa.” (1 Tim. 6:11) Nɔnɔmɛ amɛnɛ (xɔse, lɔnlɔn, jigbɔnɖɛxɔxɔ koɖo xomɛfafa) yí eyɔ le lɛ yí wogbenyi akpa ɖewo nɔ “Gbɔngbɔn Kɔkwɛ kusɛnsɛn.” Vɔ Timɔte ɖo aɖo nɔnɔmɛ buwo ciwo yí nyi enujɔjɔɛwawa, amɛɖekisɔsɔna Mawu koɖo ejidodo. Vɔ énya mɔ gbɔngbɔn lɔ yí akpedo ye nu yí yeaɖo nɔnɔmɛ lɔwo.—Sɔ sɔ koɖo Kolosetɔwo 3:12; 2 Piɛ 1:5-7.

Eyi taɖo denyi nɔnɔmɛ ciwo pleŋ Kristotɔwo ɖo atekpɔ aɖo yí le Galatitɔwo 5:22, 23 mɛ o. Mawu gbɔngbɔn atɛnŋ akpedo mì nu mìatekpɔ aɖo “Gbɔngbɔn Kɔkwɛ kusɛnsɛn” kpaxwe amashiɖekɛ lɔwo. Vɔ nɔnɔmɛ sugbɔ buwo li ci Kristotɔwo ɖo atekpɔ aɖo gbɔxwe ashin le gbɔngbɔnmɛ “yí ado amɛnyinyi yoyu lɔ ci wowa sɔ koɖo Mawu dro le enujɔjɔɛwawa koɖo egbejinɔnɔ adodwi mɛ.”—Efe. 4:24, NWT.