LISA * nu mɔ: “Xomɛvu ci nɔviŋsu koɖo nɔvinyɔnuwo wa nɔŋ yí wa dɔ do ŋji sugbɔ sɔwu.” Énu mɔ eyi nyi enu ŋkɔtɔ ci yí dɔn ye va nyɔnɔnwi lɔ mɛ. Nyɔ ŋtɔ́ han yí Anne can nu nɛ, énu mɔ: “Xomɛvu ci Kunuɖetɔwo wa yí dɔnŋ va nyɔnɔnwi lɔ mɛ sɔwu enyɔ ci wonu.” Bibla hlɛnhɛn koɖo tamɛbubukpɔ so nu yí jɔnɔ ji nɔ nɔvinyɔnu amɛve cɛwo ɖɛyɛ. Vɔ xomɛvu ci wowa nɔ wo gahunnɔmɛ yí wa dɔ do wo ji sɔwu.

Lé mìawɛ awa xomɛvu nɔ amɛwo yí ado ŋsɛn wo doɔ? Mìaxo nuxu so emɔ amɛve ciwo ji mìato awɛ nu. Wowo yí nyi: le nuxuxoxo koɖo enuwawa mɛ. Le yi goduɔ, mìakpɔ miwo yí mìɖo awanɔ xomɛvu nɔ.

Wonu so nyɔnu bibi ci nu Elododo Wema eta 31 xo nuxu so mɔ “xomɛvuwawa se” le yi ɖe ji. (Elo. 31:26, NWT) “Ese” cɛ yí kpenɔdo nu enyanɔ nyɔ ci teŋ anu koɖo lé anui do. Ele mɔ “ese” cɛ ale vidawo ɖe ji hɛnnɛ. Jila sugbɔtɔ nya nywiɖe mɔ, nɔ yewodexo nuxu nywiɖe nɔ yewo viwoɔ, ekpɔnɔ ŋsɛn dɔndɔn do wo ji. Nɔ jilawo wa fɛn xo nuxu nɔ wowo viwoɔ, etɛnŋ dɔ ɖevi lɔ dawa do enyɔ ci wonukɔ ji o. Eyi taɖo nɔ jilawo xo nuxu nɔ wowo viwo koɖo xomɛvuɔ, ale fafɛɖe nɔ ɖevi lɔwo mɔ woase nyɔ lɔwo yí awa do wo ji.

Nɔ evi le eo shi alo dele eo shi can ɖe, lé àwɛ axonɔ nuxu koɖo xomɛvuɔ? Mìkpɔ ɖoŋci lɔ le akpaxwe ŋkɔtɔ mɛ nɔ Elododo Wema 31:26. Emɔ: “É xonɔ nuxu do ŋununyanyatɔ ji.” Edasɛ mɔ mìɖo awa ɖaŋ yí akpɔnɔ enyɔ ciwo mìanu koɖo lé mìanu wo do le nunya mɛ. Anyɔ mɔ mìabiɔnɔ mìwoɖekiwo se mɔ, ‘Nyɔ ci ŋjikɔ anu ɖe, adɔ yí amɛwo ado dɔmɛzia, alo ana yí fafa ani?’ (Elo. 15:1) Ɛɛ, nɔ mìbunɔ tamɛ kpɔ gbɔxwe yí xonɔ nuxuɔ, anyi mìnya ŋɖɛ.

Elododo bu nu mɔ: “Nuxuxoxo tamɛmabukpɔtɔ le shigbe ewi tɔ amɛ hannɛ.” (Elo. 12:18, NWT) Nɔ mìbu tamɛ kpɔ so nyɔ ci mìjikɔ anu koɖo lé mìanui do awa nɔ mɛbuwoɔ, adɔ mìanya lé mìanu nyɔ lɔ do yí anyɔ. Nɔ mìwanɔ do “xomɛvuwawa se” jiɔ, akpedo mì nu mìdanunɔ xomɛveve nyɔwo alo axo nuxu amɛmabutɔ o. (Efe. 4:31, 32) Agbena yí mìasɔ nyɔgbe fafɛwo koɖo enyɔ nywiwo asɔ ɖɔli susu dɔndɔnwo koɖo enyɔ dɔndɔnwo. Yehowa ɖo kpɔwɛ ɖɛ nɔ mì le akpaxwe cɛ. Hwenu yí yi sɛntɔ Eli vɔnvɔn ɔ, énu enyɔ ciwo yí do ŋsɛn yi. Yehowa zan mawudɔla ɖeka sɔ xo nuxu ni koɖo “gbemɛ fafa.” (1 Efy. 19:12) Vɔ denyi enyɔ nywiwo nunu nɔ amɛ ɖekɛ yí xomɛvuwawa nyi o, mìɖo agbewa xomɛvunuwo hɛnnɛ. Lé mìawɛ doɔ?

Mìwanɔ Yehowa tɔ han nɔ mìxonɔ nuxu nywiwo yí wanɔ nu koɖo xomɛvu. (Efe. 4:32; 5:1, 2) Lisa ci nu mìxo nuxu so vayi dre lé Kunuɖetɔwo wa xomɛvu ni do. Énu mɔ: “Hwenu yí mìwo xomu ɖo aso le avomɛ le fini mìleɔ, asu koɖo ashi amɛve ɖekawo le hamɛ lɔ mɛ biɔ gbe le wowo dɔmɛ keŋ va kpedo mì nu yí mìlɔ agban.  Le hwenɔnuɔ, ŋdekpɔ tɔ Bibla kplakpla ŋtɔkpu can o!” Xomɛvunuwana cɛwo yí dɔ Lisa tɔ nu kplakpla mɔ yeajeshi nyɔnɔnwi lɔ.

Xomɛvunu ci Kunuɖetɔwo wa jeŋ nɔ Anne ci nu mìxo nuxu so le tɔtɔmɛ nɔ nyɔta cɛ hɛnnɛ. Émɔ: “Lé amɛwo wanɔ nu do le xexeɛ mɛ dɔ yí ŋdegbekannɔdo amɛwo ji ɖeeɖe o.” Énu kpi mɔ: “Hwenu ŋdo go Kunuɖetɔwoɔ, ŋdekando wo ji o. Eyi ŋbiɔ nyɛɖeki se mɔ, ‘Nyi yí taɖo wosɔ ɖe le ji nɔŋ ahan ɔ?’ Mɛ ci yí kpla Bibla koɖoŋ wa xomɛvu nɔŋ nyɔnɔnwitɔ yí ŋkando ji.” Enunywi ci yí to so mɛɔ? Énu mɔ: “Viviviɔ, ŋvatɔ tamɛ bubu kpɔ so enu ciwo yí ŋkplakɔ nu nywiɖe.”

Do jeshi mɔ ci lɔnlɔn dɔ yí mɛ ciwo yí le hamɛ lɔ mɛ wa xomɛvunu nɔ Lisa koɖo Anne ɔ, ewa dɔ do wo ji sugbɔ yí ecɛ yí dɔ wolɔn yí vakpla nyɔnɔnwi lɔ. Xomɛvunu ciwo yí hamɛ lɔ wa nɔ wo yí dɔ wovatɔ kankando Yehowa koɖo yi mɛwo ji.

Fini yí mɛɖewo shin le alo fini yí woso, dɔ yí woxonɔ nuxu nɔ amɛ koɖo xomɛvu  sɔwu yí gbekonɔ nukwi do amɛ ji sɔwu. Enyɔ mɔ mɛɖewo ɖonɔ nɔnɔmɛ ŋtɔ́wo, ɖo akɔta ci mɛ wonɔ alo lé wojɔ do yí dɔ wowanɔ nu ahan. Vɔ nɔ enu ŋtɔ́wo ɖekɛ yí dɔ mìwanɔ ahan ɔ, anyi mìdeɖyikɔ Mawu o.—Sɔ sɔ koɖo Edɔwawawo 28:2.

Xomɛvuwawa nyɔnɔnwitɔ nyi Mawu gbɔngbɔn kɔkɔɛ kusɛnsɛn kpaxwe ɖeka. (Gal. 5:22, 23) Ecɛ dasɛ mɔ mìʒan Mawu gbɔngbɔn kɔkɔɛ lɔ nɔ akpedo mì nu gbɔxwe mìaɖo nɔnɔmɛ cɛ. Nɔ mìwɛni ahan ɔ, anyi mìɖyikɔ Yehowa koɖo Yesu. Ci mìnyi Kristotɔwoɔ, mɛbuwo nyɔna nɔnɔ veviɖe nɔ mì. Eyi taɖo lɔnlɔn ci mìɖo nɔ Yehowa koɖo mìwo kpenawo yí dɔ mìwanɔ xomɛvu nɔ wo. Xomɛvuwawa Kristotɔwo tɔ nyi nɔnɔmɛ nywi ɖeka ci yí sonɔ ji mɛ nɔ mì yí jɔnɔ ji nɔ Mawu.

Enɔnɔ fafɛɖe nɔ mì mɔ mìawa xomɛvu nɔ mɛ ciwo yí wa xomɛvu nɔ mì alo mɛ ciwo yí mìjeshi ɖɛ. (2 Sam. 2:6) Emɔ ɖeka ci ji mìtonɔ yí nyi mɔ mìdonɔ akpe nɔ wo. (Kol. 3:15) Vɔ nɔ ewa nɔ mì mɔ mìdeɖo awa xomɛvu nɔ mɛɖe ɖe, lé mìawɛɔ?

Mìasɔ kpɔwɛ cɛ: Yehowa yí ɖo dɔnusoswi kpɔwɛ gangantɔ ɖɛ nɔ mì yí yi Nyɔ lɔ na nukplamu vevi ɖeka so lé woadasɛ nɔnɔmɛ cɛ do nu. Wozan nyɔgbe “dɔnusoswi” donu zenɛniɖe le Kristotɔwo Grɛki Nuŋwlɛŋwlɛ lɔwo mɛ. Lé Mawu wanɔ xomɛvu nɔ mì doɔ?

Yehowa wa xomɛvu nɔ mɛ ciwo pleŋ le agbe le nyigban ji, ci enanɔ wo enu ciwo pleŋ woʒan yí akpɔtɔ anɔ agbe. (Mt. 5:45) Ŋtɔkpu can ɔ, gbɔxwe mìavajeshi Yehowa ɖɛɔ, éwa xomɛvu nɔ mì. (Efe. 2:4, 5, 8) Le kpɔwɛ mɛ ésɔ yi nu vevitɔ ci yí nyi Eviɛ akogo na yí eku do ta nɔ agbetɔwo pleŋ. Apotru Pɔlu nu mɔ Yehowa “dɔnusoswi vevi” yí dɔ ecu tafɛn lɔ. (Efe. 1:7) Gbesɔ kpe niɔ, ci mìjenɔ agɔ do Yehowa yí donɔ dɔmɛzi ni can ɔ, ékpɔtɔ danasɛ emɔ nɔ mì yí kplanɔ nu mì. Yi nukplamu koɖo yi nyɔwo le shigbe “shitan cucu” nɛ. (2 Ese. 32:2) Ŋɖe deli mìawa keke asɔ ɖo xomɛvu ci Yehowa wa nɔ mì tɔxu kpɔ o. Yí mìnya mɔ nɔ adɔnusoswi Yehowa tɔ dɛn le mɛɔ, esɔ mɛ mɔkpɔkpɔ ɖe dale mì shi o.—Sɔ sɔ koɖo 1 Piɛ 1:13.

Kankandojitɔɔ, xomɛvuwawa Yehowa tɔ fanɔ akɔn nɔ mì yí gbedonɔ ŋsɛn mì. Eyi taɖo mìdeɖo atranɔ mɛ ciwo yí mìawa xomɛvu nɔ mɛ o. Ewaɖeɔ, mìaje agbla aɖyi Yehowa yí awanɔ xomɛvu nɔ amɛwo gashiagamɛ. (1 Tɛs. 5:15) Nɔ mìwanɔ xomɛvu nɔ amɛwo gashiagamɛɔ, mìale nɔ wo shigbe ezo ci woaxu le fafa hwenu hannɛ. Nɔ mìwɛni ahan ɔ, mìafanɔ akɔn nɔ mìwo xomumɛtɔwo, mìwo kpena xɔsetɔwo, dɔmɛkpenawo, suklukpenawo koɖo mìwo xwexatɔwo.

Bu tamɛ kpɔ so nyɔna ciwo yí mɛ ciwo yí le ao xomu mɛ alo hamɛ lɔ mɛ akpɔ nɔ èxonɔ nuxu yí wanɔ nu koɖo xomɛvu ɖaɖa wo gbɔ. Taŋfuin mɛɖe le ao hamɛ lɔ mɛ yí ʒan kpekpedonu, vevitɔ le axomɛ alo ʒadɛn mɛ dradrado alo woawa edɔ ɖewo ni shigbe afi mɛ yiyi hannɛ. Alo nɔ èdo go mɛɖe le kunuɖeɖedɔ lɔ mɛ yí eʒan kpekpedonu ɖe, àtɛnŋ awa enuŋtɔŋtɔ ɖewo yí asɔ kpedo nua?

Mína nɔ mìaɖyi Yehowa yí “xomɛvuwawa se” anɔnɔ mìwo nyɔwo koɖo mìwo nuwanawo mɛ tɛgbɛɛ.