1. Gbeta vevi ci agbetɔwo pleŋ ɖo asɔɔ?

 EGBƐƆ, amowo ɖo asɔ gbeta vevi ɖeka. Woanɔ godu nɔ Yehowa Mawu ci yí nyi Xexegbɛ lɔ Cɛkpatɔgan jɔjɔɛ lɔa, alo woakplɔ yi ketɔnɔ xomɛvetɔ ci yí nyi Satana Legba do? Mɛɖe datɛnŋ mɔ Yehowa lɔ fin, Satana lɔ fin, yedele ɖe ji o. Gbetasɔsɔ cɛ adɔ woakpɔ agbe mavɔ le esɔ mɛ alo aku. (Mt. 25:31-33, 46) Le efunkpekpe gangan lɔ hwenuɔ, woado jeshi mɛ ciwo yí aci agbe alo mɛ ciwo yí aku.—Enyɔ. 7:14; 14:9-11; Eze. 9:4, 6.

2. (a) Nyi yí Ebretɔwo 10:35-39 do ŋsɛn mì mɔ mìwo le waɔ? (b) Lé Enyɔdasɛ wema lɔ atɛnŋ akpedo mì nu doɔ?

² Hlɛn Ebretɔwo 10:35-39. Nɔ èle godu nɔ Yehowa cɛkpakpaɔ, anyi èsɔ gbeta nywitɔ. Evyɛɔ, èjikɔ veviɖe mɔ yeakpedo mɛbuwo nu nɔ wowo can asɔ gbeta nywitɔ. Àtɛnŋ azan enyɔ ciwo yí le Enyɔdasɛ wema lɔ mɛ asɔ kpedo wo nu. Wema vevi cɛ xo nuxu so enu ciwo yí jikɔ ajɔ do mɛ ciwo yí fɔn gu do Yehowa ji, egbexo nuxu so nyɔna ciwo mɛ ciwo yí nɔ godu ni akpɔ nu. Anyɔ mɔ mìakpla enu so nyɔnɔnwi vevi cɛwo nu. Nɔ mìwɛ ahan ɔ, ado ŋsɛn gbeta ci mìsɔ mɔ mìakpɔtɔ asɛnkɔ Yehowa. Gbesɔ kpe niɔ, mìatɛnŋ azan enu ci mìkpla asɔ kpedo mɛbuwo nu yí wowo can asɔ gbeta asɛn Yehowa yí akpɔtɔ anɔ gbeji ni.

3. Nyi mìakpɔ le nyɔta cɛ mɛɔ?

³ Le nyɔta cɛ mɛɔ, mìakpɔ ɖoŋci nɔ nyɔbiɔse cɛwo: Enunywi ciwo yí le te kpɔ mɛ ciwo yí le gbeji nɔ Mawu cɛkpakpaɔ? Nyi yí ajɔ do mɛ ciwo yí sɔ gbeta  mɔ yewoakplɔ gbemɛlan wadan jin ci nu Enyɔdasɛ wema lɔ xo nuxu so jiɔ?

4. Gbɛbɔbɔ ci Ʒan kpɔ yí wole axa nɔ Yesu le jeŋkwi mɛɔ?

⁴ Le ŋtegan ɖeka mɛɔ, apotru Ʒan kpɔ gbɛbɔbɔ amɛve ciwo yí le godu nɔ Yehowa cɛkpakpa yí wosɔ agbe mavɔ cu shi nɔ wo. Amɛ 144 000 yí le gbɛbɔbɔ ŋkɔtɔ mɛ. (Enyɔ. 7:4) Wosɔ wo so nyigban ji yi jeŋkwi mɛ nɔ woabɔdo Yesu nu keŋ akpa acɛ do nyigban ji, eyi nyi Mawu Fyɔɖuxu lɔ. (Enyɔ. 5:9, 10; 14:3, 4) Le ŋtegan lɔ mɛɔ, Ʒan kpɔ wo yí wole axa nɔ Yesu le jeŋkwi mɛ le Siɔn to lɔ ji.—Enyɔ. 14:1.

5. Nyi yí jikɔ avajɔ do amɛcancan kpɛtɛ lɔwo ji le majinjinɖe mɛɔ?

⁵ So apotruwo hwenu ɖiiɔ, wocan amɛ kotokun nɛniɖe nɔ woanɔ agbetɔ 144 000 lɔwo mɛ. (Luiki 12:32; Rɔm. 8:17) Wonu nɔ Ʒan mɔ amɛ hwɛɖeka akpɔtɔ le amɛcancan lɔwo mɛ le nyigban ji le ŋkeke kpɛtɛkpɛtɛ lɔwo mɛ. Gbɔxwe efunkpekpe gangan lɔ atɔ jiɔ, mɛcancan “kpɛtɛ” cɛwo axɔ ‘jeshidu’ kpɛtɛ ci yí adasɛ mɔ wowo nu jeŋ nɔ Yehowa. (Enyɔ. 7:2, 3; 12:17) Mɛ ciwo yí ku le amɛ 144 000 lɔwo mɛ le jeŋkwi mɛ xoxoxo vɔ. Ecɛyɛɔ, le efunkpekpe gangan lɔ mɛɔ, woasɔ mɛkpɛtɛwo yi bɔdo wo nu. Woayi kpa acɛ koɖo Yesu le Mawu Fyɔɖuxu lɔ mɛ.—Mt. 24:31; Enyɔ. 5:9, 10.

6-7. (a) Gbɛbɔbɔ bu ci yí Ʒan kpɔɔ, yí nyi mìkpla so wo nuɔ? (b) Nyi yí taɖo Enyɔdasɛ eta 7 tɔ mɛ nyɔwo jɔ ji nɔ amɛshiaminɔ kpɛtɛwo koɖo “agbetɔ sugbɔ sugbɔ” lɔwoɔ?

⁶ Ci Ʒan kpɔ mɛ ciwo yikɔ jeŋkwi mɛ ɖegbɔɔ, évakpɔ “agbetɔ sugbɔ sugbɔ” ɖekawo, wosugbɔ keke wodatɛnŋ ahlɛn wo o. (Enyɔ. 7:9, 10) Nyi mìnya so wo nuɔ? Wonu nɔ Ʒan mɔ: “Amɛ ciwo yí tó le efunkpekpe gangan lɔ mɛ ke. Wo nya wowo wu koɖo Lɛngbɔvi hùn. Evyɛ ɔ, awu lɔwo kɔ yí ɣe.” (Enyɔ. 7:14) Nɔ wohwlɛn “agbetɔ sugbɔ sugbɔ” lɔwo ti le efunkpekpe gangan lɔ mɛ vɔɔ, woanɔ agbe le nyigban ji lɛ yí akpɔ nyɔna sugbɔ.—Eha. 37:9-11, 27-29; Elo. 2:21, 22; Enyɔ. 7:16, 17.

⁷ Nɔ jeŋkwi mɛ mɔkpɔkpɔ alo nyigban ji lɛ nɔnɔ mɔkpɔkpɔ yí le eo shi can ɖe, èkpɔkɔ eoɖeki le enyɔ ci wonu le Enyɔdasɛ wema eta 7 tɔ lɔ mɛa? Ele mɔ àtekpɔ akpɔ eoɖeki le mɛ. Anyi hwenu dojijɔnamɛ ɖeka nɔ amɛshiaminɔ lɔwo koɖo mɛ ciwo yí avanɔ agbe le nyigban ji lɛ! Mìakpɔ jijɔ manumanu ci mìsɔ gbeta mɔ mìanɔ godu nɔ Yehowa cɛkpakpa. Nubu ci Enyɔdasɛ wema lɔ nu nɔ mì so efunkpekpe gangan lɔ nuɔ?—Mt. 24:21.

8. Lé efunkpekpe gangan lɔ atɔ ji doɔ, yí lé amɛ sugbɔ awa nu doɔ?

⁸ Shigbe lé mìkpɔɛ le nyɔta ci yí vayi mɛ nɛɔ, xexeɛ mɛ politiki totomɛ aje Babiloni gangan ci yí nyi ŋsusɛnsɛnhawo ji sabaɖe yɛ. (Enyɔ. 17:16, 17) Ecɛ yí anyi tɔtɔmɛ nɔ efunkpekpe gangan lɔ. Nɔ amowo kpɔɛ ahan ɖe, adɔ yí woatɔ Yehowa sɛnsɛn a? Oo. Enyɔdasɛ eta 6 nu mɔ le hwenu sɛnŋ ŋtɔ́ mɛɔ, mɛ ciwo yí denyi Yehowa sɛntɔwo aji bexu le xexeɛ mɛ politiki koɖo afisasa totomɛwo gbɔ, wowo yí wosɔ sɔ koɖo etowo. Ci wodenɔ godu nɔ Mawu cɛkpakpa lɔɔ, Yehowa akpɔ wo do yi ketɔnɔwo ji.—Luiki 11:23; Enyɔ. 6:15-17.

9. Lé Yehowa mɛwo awa nu do le efunkpekpe gangan lɔ hwenuɔ, yí nyi yí ajɔ do wo jiɔ?

 ⁹ Vɔ lé Yehowa sɛntɔ egbejinɔtɔwo awa nu do le efunkpekpe gangan lɔ hwenu ato akpo. Wowo ɖekɛ kpaŋ yí akpɔtɔ asɛnkɔ Yehowa le nyigban lɔ pleŋ ji yí agbe kpiŋ mɔ yewodanɔ godu nɔ ‘gbemɛlan wadan’ lɔ o. (Enyɔ. 13:14-17) Ci womɔ yewoakpɔtɔ anɔ gbeji nɔ Yehowaɔ, adɔ yí Yehowa ketɔnɔ lɔwo ado dɔmɛzi do wo nu sugbɔ. Ecɛ awɛ mɔ jukɔnwo ajɔn nu keŋ aje Mawu mɛwo ji le nyigban lɔ pleŋ ji. Enujɔjɔ cɛ yí woyɔ le Bibla mɛ mɔ Gɔgi ci yí so Magɔgi mɛjijeje.—Eze. 38:14-16.

10. Shigbe lé wonui le Enyɔdasɛ 19:19-21 mɛ nɛ ɖe, lé Yehowa awa nu do nɔ woje yi mɛwo jiɔ?

¹⁰ Nɔ wovaje Mawu sɛntɔwo ji ɖe, lé Yehowa awa nu doɔ? Yehowa nu mɔ: “Anyi dɔmɛzi awugan.” (Eze. 38:18, 21-23; NWT) Enyɔdasɛ eta 19 dre enu ci yí ajɔ kplɔɛdo. Yehowa adɔ Eviɛ ɖaɖa nɔ ava glɔn ta nɔ Yi mɛwo yí aɖu ketɔnɔ lɔwo ji. Mawudɔla egbejinɔtɔwo koɖo amɛ 144 000 lɔwo ciwo yí nyi “jeŋkwi mɛ hwakɔnwo” abɔdo Yesu nu keŋ awa ahwa kpe Gɔgi ci yí so Magɔgi. (Enyɔ. 17:14; 19:11-15) Lé ahwa cɛ avɔ doɔ? Mɛɖekpokpui koɖo habɔbɔ ɖekpokpui ci yí fɔn gu do Yehowa ji agu pleŋpleŋ!—Hlɛn Enyɔdasɛ 19:19-21.

11. Nyi yí do jijɔ nɔ amɛ sɔwu le Enyɔdasɛ wema lɔ mɛɔ?

¹¹ Kpɔ lé anɔ do, nɔ wogu Mawu ketɔnɔwo pleŋ yí enyi Mawu sɛntɔwo ɖekɛ yí kpɔtɔ le nyigban lɔ ji ɖa! Jijɔ hwenu teŋ yí anyi! Hwenu woagu Babiloni Gangan lɔ siɔ, eji ajɔ jeŋkwi mɛ tɔwo. Vɔ nubu li ci yí adɔ woagbekpɔ jijɔ wu hunnɔ. (Enyɔ. 19:1-3) Eyi nyi nyɔnuɖeɖe “Lɛngbɔvi” lɔ tɔ. Alɔlele cɛ yí nyi enu ci yí do jijɔ nɔ amɛ sɔwu ci nu Enyɔdasɛ wema lɔ xo nuxu so.—Enyɔ. 19:6-9.

12. Shigbe lé Enyɔdasɛ 21:1, 2 nui nɛ ɖe, hwenu Lɛngbɔvi lɔ ale alɔɔ?

¹² Hwenu woawa alɔlele lɔɔ? Amɛ 144 000 lɔwo pleŋ ɖo asɔgbe le jeŋkwi mɛ gbɔxwe Harmagedɔn hwa lɔ akpan. Vɔ denyi gahunnɔmɛ yí Lɛngbɔvi lɔ awa alɔlɔle lɔ o. (Hlɛn Enyɔdasɛ 21:1, 2.) Nɔ wowa Harmagedɔn hwa lɔ ɖegbɔ yí gu Mawu ketɔnɔwo xloŋ si gbɔxwe Lɛngbɔvi lɔ awa alɔlele lɔ.—Eha. 45:3, 4, 13-17.

13. Nyi yí ajɔ le Lɛngbɔvi lɔ lɔlele hwenuɔ?

¹³ Nyi yí ajɔ le Lɛngbɔvi lɔ lɔlele hwenuɔ? Alɔlele na yí ŋsu koɖo nyɔnu nɔnɔ ju. Ahanke Lɛngbɔvi lɔlele lɔ ana yí Efyɔ Yesu Kristo koɖo amɛ 144 000 lɔwo anɔ ju. Enujɔjɔ vevi cɛ hwenu yí woaɖo Fyɔɖuxu yoyu ɖeka ci yí akpa acɛ do nyigban lɔ ji na nɔ exwe 1000.—Enyɔ. 20:6.

14-15. Nyi yí Enyɔdasɛ eta 21 sɔ amɛ 144 000 lɔwo sɔ koɖoɔ? (Kpɔ foto ci yí le akpa lɔ ji.)

¹⁴ Enyɔdasɛ eta 21 sɔ amɛ 144 000 lɔwo sɔ koɖo jugan nyakpɔkpɔ ɖeka, eyi nyi “Ʒerusalemu yoyu.” (Enyɔ. 21:2, 9) Woɖo jugan lɔ gliwo do ekpe 12 ji. “Wo ŋwlɛ Lɛngbɔvi lɔ Mɛdɔdɔ wive lɔwo ŋkɔwo do ekpe lɔwo ji.” Nyi yí taɖo akpaxwe cɛ nɔ ŋtegan lɔ jɔ ji nɔ Ʒan ɔ? Ðo woŋwlɛ yi ŋkɔ do ekpe lɔwo ɖeka ji. Bubu gangan ŋtɔteŋ yí enyi ni!—Enyɔ. 21:10-14; Efe. 2:20.

¹⁵ Ejugan cɛ nyakpɔkpɔ wu juganwo pleŋ, ɖekɛ desɔ koɖi o. Shika yí wosɔ  do jugan lɔ mɔgan, jenu yí wosɔ wa yi gbo 12 lɔwo. Ekpexɔafiwo yí wosɔ wa yi gɔnmɛɖokpewo koɖo yi gliwo pleŋ. Jinjinmɛ, kekemɛ koɖo ejiyiyimɛ nɔ eju lɔ nyi enudredre ci yí sɔgbe pɛɛ. (Enyɔ. 21:15-21) Ele ahan gan, ewa nɔ Ʒan mɔ ŋɖeka hwedo! Ʒan nu mɔ: “Ŋ de kpɔ Sɛnxu [alo gbedoxɔ] ɖe le jugan lɔ mɛ o. Tɔhonɔ Mawu Ŋsɛnwo Pleŋtɔ koɖo Lɛngbɔvi lɔ (Yesu) nyi Sɛnxu nɔ jugan lɔ. Ejugan lɔ de ʒan ewe alo wleci gbɔxwe a klɛn o. Kanfukanfu Mawu tɔ na klɛnklɛn nɔ jugan lɔ. Lɛngbɔvi lɔ nyi jugan lɔ kaɖyigban.” (Enyɔ. 21:22, 23) Mɛ ciwo yí le Ʒerusalɛmu yoyu lɔ mɛ anɔ koɖo Yehowa. (Ebre. 7:27; Enyɔ. 22:3, 4) Edasɛ mɔ Yehowa koɖo Yesu yí nyi gbedoxɔ nɔ jugan cɛ.

16. Hwenu Mawu Fyɔɖuxu lɔ akpa acɛ na nɔ exwe kotokun ɖeka ɖe, nyɔna ciwo yí agbetɔwo akpɔɔ?

¹⁶ Ejɔnɔ ji nɔ amɛshiaminɔwo mɔ yewoabu tamɛ kpɔ so eju cɛ nu. Vɔ mɛ ciwo yí jikɔ avanɔ agbe le nyigban ji can kpɔkɔ jijɔ so jugan lɔ nu hɛnnɛ. Ʒerusalɛmu yoyu lɔ ahɛn nyɔna sugbɔ vɛ nɔ wo le Exwe Kotokun ɖeka Cɛkpakpa Fyɔɖuxu lɔ tɔ hwenu. Ʒan xo nuxu so nyɔna lɔwo nu mɔ wole shigbe “etɔ” ci mɛ agbeshi le hannɛ. Ékpɔ ‘agbeciwo’ yí wole toga ɖekaɖeka nɔ etɔsasa lɔ yí “aci lɔ makpawo danɔ edɔ̀ nɔ amɛwo pleŋ.” (Enyɔ. 22:1, 2) Enunywi cɛwo yí le te kpɔ mɛ ciwo pleŋ yí anɔ nyigban lɔ ji hwenɔnu. Viviviɔ, mɛ ciwo pleŋ yí se tonu nɔ Yehowa atrɔ amɛmaɖoafɛnwo. Eyi edɔ̀lele, efunkpekpe koɖo avinfanfan dagbeli o.—Enyɔ. 21:3-5.

17. Shigbe lé Enyɔdasɛ 20:11-13 nui nɛ ɖe, miwo yí akpɔ nyɔna so Exwe Kotokun ɖeka Cɛkpakpa lɔ mɛɔ?

¹⁷ Miwo yí aɖu ele nɔ enunywi ŋtɔ́woɔ? Agbetɔ ciwo pleŋ yí aci agbe le Harmagedɔn hwa lɔ hwenu koɖo evi ciwo pleŋ woavaji le xexe yoyu lɔ mɛ, wowo yí anyi amɛ ŋkɔtɔ ciwo yí aɖu ele nɔ enunywi ŋtɔ́wo. Vɔɔ, Enyɔdasɛ eta 20 gbenu kpi mɔ woafɔn mɛkukuwo. (Hlɛn Enyɔdasɛ 20:11-13.) Woafɔn “amɛnywi” alo amɛjɔjɔɛ ciwo pleŋ ku vayi nɔ woanɔ agbe le nyigban ji. Woagbefɔn “amɛvɔn” abi amɛmajɔmajɔwo can, ɖo wodenya nyɔ ɖe so Yehowa nu sa o. (Edɔ. 24:15; Ʒan 5:28, 29) Edasɛ mɔ le Exwe  Kotokun ɖeka Cɛkpakpa lɔ hwenu ɖe, woafɔn amɛshiamɛ yɔa? Oo. Wodafɔn mɛ ciwo yí wonu Mawu nyɔ lɔ nɔ vɔ yí wosɔ tamɛsɛnsɛn gbe mɔ yewodasɛn Yehowa o. Wodasɛ to wowo nuwanawo mɛ mɔ yewodeje yí anɔ agbe le Paradiso mɛ le nyigban ji o.—Mt. 25:46; 2 Tɛs. 1:9; Enyɔ. 17:8; 20:15.

18. Lé amowo avanɔ le nyigban lɔ ji le vɔvɔnu nɔ exwe 1000 lɔɔ?

¹⁸ Le vɔvɔnu nɔ exwe 1000 lɔɔ, mɛ ciwo pleŋ le nyigban ji atrɔ amɛmaɖonuvɔnwo. Adamu nuvɔn cinɔ ci mìɖu dagbedo aya nɔ mɛɖekpokpui hwenɔnu o. (Rɔm. 5:12) Adamu nuvɔn kpɛnsɛn lɔ aso le kɔ nɔ mì pleŋpleŋ. Ecɛ dasɛ mɔ mɛ ciwo pleŋ le nyigban lɔ ji ‘atrɔva agbemɛ’ le kpɔwɛnyɔnunu mɛ, ɖo le vɔvɔnu nɔ exwe 1000 lɔɔ, woatrɔ amɛmaɖoafɛnwo.—Enyɔ. 20:5.

19. Nyi yí taɖo woɖo ado amowo kpɔ kpɛtɛkpɛtɛtɔɔ?

¹⁹ Mìnya mɔ Yesu kpɔtɔ nɔ gbeji nɔ Mawu ci Satana wa ŋɖekpokpui sɔ ti kpɔ can. Vɔ nɔ wovatashi Satana yí evate agbetɔ maɖoafɛn lɔwo kpɔ hwenɔnu ɖe, woasun ji yí anɔ gbeji Yesu tɔ han a? Mɛɖekamɛɖeka yí adasɛ mɔ yele gbeji nɔ Mawu hwenu Satana ato le edumaɖosɛnxu lɔ mɛ yí ate wo kpɔ le vɔvɔnu nɔ exwe 1000 lɔ. (Enyɔ. 20:7) Woasɔ agbe mavɔ cu fɛn nɔ mɛ ciwo pleŋ yí anɔ gbeji le tetekpɔ kpɛtɛkpɛtɛ ŋtɔ́ mɛ yí woakpɔ vovo ŋtɔŋtɔ. (Rɔm. 8:21) Woagu egufɔntɔwo pleŋ sɔ kpe nɔ Satana koɖo yi gbɔngbɔnvɔnwo.—Enyɔ. 20:8-10.

20. Ci mìgbeje Enyɔdasɛ wema lɔ mɛ kleŋ yɛ ɖe, lé ewa nɔ eoɔ?

²⁰ Ci mìgbeje Enyɔdasɛ wema lɔ mɛ kleŋ yɛ ɖe, lé ewa nɔ eoɔ? Dejɔ ji nɔ eo ci èkpɔ eoɖeki le nyɔnuɖɛ dojijɔnamɛ cɛwo mɛ ba? Kankandoji li mɔ èjijiɛ veviɖe mɔ yeayɔ mɛbuwo nɔ woava bɔdo mì nu le sɛnsɛn kɔkɔɛ lɔ mɛ. (Enyɔ. 22:17) Ci mìgbeje enu ciwo yí jikɔ avajɔ zanɖe yɛ mɛɔ, kpakpa sɔkɔ mì yí mìnukɔ shigbe Ʒan nɛ mɔ: “Amen! Va, Axwetɔ Yesu.”—Enyɔ. 22:20.