1. Nyi Yehowa na gbe mì mɔ mìwo le waɔ?

YEHOWA na gbe mì nɔ mìacan lé mìanɔ agbe do. Ékplanɔ mì lé mìasɔ gbeta nywiwo do yí nɔ gbetasɔsɔ lɔwo jɔ ji niɔ, ékpenɔdo mì nu mìɖenɔgbɔ nɔ wo nywiɖe. (Eha. 119:173) Zenɛni ci yí mìwanɔ do nunya ci yí le Bibla mɛ jiɔ, ahanke yí mìsɔnɔ gbeta ciwo yí nyɔ wu nɛ.​—Ebre. 5:14.

2. Cukaɖa ci yí mìatɛnŋ ado go le gbetasɔsɔ ɖe goduɔ?

² Nɔ gbeta ci mìsɔ nyɔ can ɔ, atɛnŋ ʒan mɔ mìado gbla gbɔxwe aɖegbɔ nɔ enu ci mìtɔ. Mìakpɔ kpɔwɛ ɖewo: Nɔviŋsu jajɛ ɖeka ɖui mɔ yeahlɛn Bibla vɛ pleŋ. Étɔɛ ji nywiɖe; vɔ le kwɛshila ɖewo goduɔ, susu ɖewo dɔ eɖo te yi. Nɔvinyɔnu ɖeka ɖui mɔ yeanyi gbeshiagbe mɔɖetɔ, vɔ ékpɔtɔ sɔnɔ azan ci ji atɔɛ ji ɖonɔ esɔ-esɔ. Hamɛmɛshinshinwo-ha ɖeka ɖui doju mɔ yewoayi jinɔ nɔviwo kpɔ sɔwu sa le hamɛ lɔ mɛ, vɔ le wleci sugbɔ goduɔ, wodetɔ wɛwɛ o. Nɔnɔmɛ cɛwo to vo, vɔ woɖyi wowonɔnɔwo le fiɖeka. Wodewa do gbeta ciwo wosɔ ji o. Exwe sanŋdi ŋkɔtɔ mɛ Kristotɔ ciwo yí le Korɛnti do go cukaɖa cɛ han. Kpɔ nu ci mìatɛnŋ akpla so wo gbɔ.

3. Gbeta ci yí Korɛntitɔwo sɔɔ, vɔ nyi yí vajɔɔ?

³ Exwe 55 K.H. han ɔ, Korɛntitɔwo sɔ gbeta vevi ɖeka. Wose mɔ yewo nɔvi ciwo yí le Ʒeruzalɛmu koɖo Ʒude ɖukɔ aya yí nyi wamɛnɔwo keke hamɛ buwo jɔkɔ ho mɔ yewoakpedo wo nu. Korɛntitɔwo nyi xomɛvunɔwo yí nanɔ nu amɛ, eyi taɖo woɖui mɔ yewoakpedo nɔvi lɔwo  nu keŋ biɔ apotru Pɔlu mɔ lé yewoawɛ do ma. Pɔlu na emɔdasɛnamɛwo hamɛ lɔ yí gbecan Titu mɔ yɛ le kpedo wo nu le eho lɔ jɔjɔ mɛ. (1 Kor. 16:1; 2 Kor. 8:6) Vɔ le wleci ɖewo goduɔ, Pɔlu se mɔ Korɛntitɔwo dewa do nyɔ lɔwo ji o. Edɔ mɔ enunana wowo tɔ lɔ datɛnŋ ale gbesɔsɔ do gamɛ ji nɔ woasɔɛ yi Ʒeruzalɛmu koɖo hamɛ buwo tɔ doju o.​—2 Kor. 9:4, 5.

4. Shigbe lé 2 Korɛntitɔwo 8:7, 10, 11 tɛ gbe do ji nɛ ɖe, nyi yí Pɔlu do ŋsɛn Korɛntitɔwo mɔ wo le waɔ?

⁴ Gbeta ci Korɛntitɔwo sɔ nyɔ yí Pɔlu kanfu wo, ɖo xɔsɛ sɛnŋ le wo shi yí woji mɔ yewoana nu. Vɔ ele mɔ Pɔlu ado ŋsɛn wo nɔ woaɖegbɔ enu ci wotɔ. (Hlɛn 2 Korɛntitɔwo 8:7, 10, 11.) Enu cɛ ci mɛ woto kpla mì mɔ atɛnŋ nyi evu koɖo kɔn gbɔxwe Kristotɔ egbejinɔtɔwo awa do gbeta nywi ci wosɔ ji.

5. Enyɔbiɔse ciwo mìakpɔ ɖoŋci nɔɔ?

⁵ Atɛnŋ gbɔnnu nɔ mì gbɔxwe mìawa do gbeta ciwo mìsɔnɔ ji shigbe Korɛntitɔwo hannɛ. Nyi yí taɖoɔ? Ci mìnyi nuvɔnmɛwoɔ, mìatɛnŋ asɔ gbeta lɔ ɖokɔ esɔ-esɔ. Alo nubu ciwo mìdekpɔ emɔ nɔ tɛnŋ jɔ yí mìdagbetɛnŋ wa do gbeta ci mìsɔ ji o. (Ŋun. 9:11; Rɔm. 7:18) Lé mìawɛ nɔ eʒan mɔ mìagbeje gbeta ci mìsɔ vayi mɛ keŋ anya nɔ mìɖo atrɔ ashi le nuɔ? Yí nɔ mìtɔ ŋɖe ji ɖe, lé mìawɛ aɖegbɔ ni nywiɖeɔ?

6. Hwenu yí atɛnŋ avaʒan mɔ mìatrɔ ashi le gbetasɔsɔ ɖe nuɔ?

⁶ Mìsɔ gbeta vevi ɖewo ciwo mìdeji mɔ mìatrɔ gbeɖe o. Le kpɔwɛ mɛ, mìsɔ gbeta mɔ mìasɛn Yehowa; mìgbesɔ gbeta mɔ mìanɔ gbeji nɔ mɛ ci mìɖe. Mìkpɔtɔ ɖui gligaan mɔ mìawa do gbetasɔsɔ cɛwo ji. (Mt. 16:24; 19:6) Vɔ atɛnŋ ʒan mɔ mìatrɔ ashi le gbetasɔsɔ buɖewo nu. Nyi yí taɖoɔ? Ðo nɔnɔmɛwo trɔnɔ. Afɔɖeɖe ciwo yí atɛnŋ akpedo mì nu mìasɔnɔ gbeta nywitɔwoɔ?

7. Nyi mìado gbe ɖaɖa abiɔɔ, yí nyi yí taɖoɔ?

⁷ Do gbe ɖaɖa yí abiɔ nunya. Yehowa gbɔngbɔn na Ʒaki ŋwlɛn mɔ: “Nɔ́ ŋununyanya hwe do amɛ ɖe le míwo domɛ ɔ, amɛ lɔ le byɔ Mawu ci yí nanɔ enu amɛshamɛ nywiɖe afɛn makpɔmakpɔ, yi wo a sɔɛ jo ni.” (Ʒaki 1:5) “Ŋununyanya hwe[nɔ] do” mì pleŋ le ŋɖewo mɛ. Eyi taɖo nɔ èsɔkɔ gbeta ɖe alo nɔ ègbejekɔ gbeta ci èsɔ mɛɔ, biɔ Yehowa mɔ yɛ le kpedo ye nu. Yehowa akpedo eo nu yí nawa cancan nywiwo.

8. Enumɛkuku ciwo mìɖo awa gbɔxwe asɔ gbeta ɖeɔ?

⁸ Wa numɛkuku nywiɖe. Wa numɛkuku le Mawu Nyɔ lɔ koɖo Yehowa habɔbɔ lɔ wemawo mɛ. Biɔ nyɔ mɛ ciwo ji èkando se. (Elo. 20:18) Enumɛkuku ahan le veviɖe gbɔxwe mìasɔ gbeta mɔ mìawa dɔ ɖe, ahun ayi ci fibu alo ayi suklu ci yí akpedo mì nu mìasumɔ Yehowa.

9. Nyɔna ciwo mìakpɔ nɔ mìnunɔ nyɔnɔnwi nɔ mìwoŋtɔwoɔ?

⁹ Gbeje enu ci yí dɔ èjikɔ asɔ gbeta lɔ mɛ. Yehowa sɔnɔ ɖe le enu ci yí dɔ mìwakɔ ŋɖe ji. (Elo. 16:2) Éji mɔ mìwo le nunɔ nyɔnɔnwi le nushianu mɛ. Eyi taɖo nɔ mìsɔkɔ gbetawoɔ, mìji mɔ mìanunɔ nyɔnɔnwi nɔ mɛbuwo koɖo mìwoŋtɔwo kudo enu ci yí taɖo mìsɔkɔ wo nu. Nɔ mìdenu nyɔnɔnwi lɔ pleŋ ɔ, mìatɛnŋ ado go cukaɖawo le wawa do gbeta ciwo mìasɔ ji mɛ. Le kpɔwɛ mɛ, nɔviŋsu jajɛ ɖe ɖui mɔ yeanyi gbeshiagbe mɔɖetɔ. Gan le hwenu ɖe goduɔ, egbɔnnɔnu ni gbɔxwe ekpɔnɔ gaxoxo ci eɖo ana yí degbekpɔnɔ jijɔ le  sumɔsumɔdɔ lɔ mɛ o. Átɛnŋ bui mɔ susu ci yí dɔ yewakɔ gbeshiagbe mɔɖeɖedɔ lɔ yí nyi mɔ ye nu le jeŋ nɔ Yehowa. Vɔ taŋfuin danyi susu ŋkɔtɔ ci yí dɔ ewɛkɔ yí nyi mɔ ye nu le jeŋ nɔ ye jilawo alo mɛbuɖe yɔ ba?

10. Nyi yí ʒan gbɔxwe mìawa trɔtrɔwoɔ?

¹⁰ Mìasɔ kpɔwɛ cɛ. Bibla nukplavi ɖeka ɖui mɔ yeami shiga yɔyɔ. Doŋkɔɔ, édo gbla yí wɛ nywiɖe; vɔ éna ta yí gbeyɔɛ le kwɛshila ɖeka alo amɛve godu. Gan le vɔvɔnuɔ, évami yɔyɔɛ! Lɔnlɔn ci eɖo nɔ Yehowa koɖo edro ci yí nyi mɔ ye nu le jeŋ ni kpedo nu eɖu enumamɛ lɔ ji.​—Kol. 1:10; 3:23.

11. Nyi yí taɖo ele mɔ mìaɖo tajinu ɖewo koŋ ɔ?

¹¹ Ðo tajinu ɖewo koŋ. Nɔ èɖo tajinu ɖewo koŋ ɔ, àɖegbɔ nɔ enu ci ètɔ fafɛɖe sɔwu. Le kpɔwɛ mɛ, àtɛnŋ ɖui mɔ yeahlɛnnɔ Bibla blaŋblaŋ sɔwu sa. Vɔ nɔ toto ɖe ci àsɔ wɛ dele susumɛ nɔ eo koŋ ɔ, datɛnŋ awɛ vɛ o. * Alo hamɛmɛshinshin ciwo yí le hamɛ ɖe mɛ tɛnŋ ɖui mɔ yewoayi jinɔ nɔviwo kpɔ sɔwu sa; vɔ le hwenu ɖe goduɔ, wodegbewakɔ do gbetasɔsɔ lɔ ji o. Gbɔxwe woawɛ nywiɖeɔ, wotɛnŋ biɔ wowoɖekiwo se mɔ: “Mìnya nɔviŋsu koɖo nɔvinyɔnu ciwo koŋ ele veviɖe mɔ mìayi ji kpɔa? Mìɖo gamɛ ɖe koŋ yí ayi wo gbɔa?”

12. Nyi atɛnŋ aʒan mɔ mìawaɔ, yí nyi yí taɖoɔ?

¹² Ðo tajinuwo le dredrenu. Mìdeɖo gamɛ, ŋsɛn koɖo enu ciwo mìasɔ wa ŋɖekpokpui ci yí dro mì o. Eyi taɖo ɖo tajinu ciwo yí le dredrenu koɖo ciwo ji àtɛnŋ awa do. Atɛnŋ ʒan mɔ, àtrɔ ashi le gbeta ci èsɔ gbɔxwe yí vanya mɔ yedatɛnŋ wɛ nu. (Ŋun. 3:6) Gan sɔɛ mɔ, ètrɔ yí gbeje gbeta ci èsɔ mɛ yí trɔ ashi le nu keŋ kpɔ mɔ yeatɛnŋ awɛ. Afɔɖeɖe amatɔn ciwo yí gbɔgbɔ atɛnŋ akpedo eo nu naɖegbɔ nɔ enu ci ètɔ.

13. Lé àwɛ akpɔ ŋsɛn ci èʒan keŋ awa do gbeta ci èsɔ jiɔ?

¹³ Do gbe ɖaɖa yí abiɔ ŋsɛn ci àsɔ wɛ. Mawu atɛnŋ do “ŋsɛn” eo nawa do ao gbetasɔsɔ ji. (Fili. 2:13) Eyi taɖo biɔ Yehowa, nɔ yi gbɔngbɔn kɔkɔɛ lɔ ana eo ŋsɛn ci èʒan. Kpɔtɔ adonɔ gbe ɖaɖa nɔ eze shigbe mɔ Yehowa deɖo ao gbedodoɖa ŋci hɔɖo nɛ. Yesu nu mɔ: ‘Míkpɔtɔ abiɔnɔ nɔ woana gbɔngbɔn kɔkɔɛ mí.’​—Luiki 11:9, 13.

14. Lé gɔnmɛɖose ci yí le Elododo Wema 21:5 mɛ atɛnŋ akpedo eo nu naɖegbɔ enu ci ètɔɔ?

¹⁴ Wa toto. (Hlɛn Elododo Wema 21:5.) Gbɔxwe àɖegbɔ nɔ enu ci ètɔɔ, ele mɔ àwa toto do nu. Le yi goduɔ, èɖo awa do toto lɔ ji. Ahanke nɔ èsɔ gbeta ɖeɔ, èɖo anya afɔ ciwo teŋ àɖe keŋ aɖegbɔ nɔ enu ci ètɔ. Nɔ enu ci èjikɔ awa gangan ɔ, ma enu lɔ do tajinu hwɛhwɛwo mɛ. Nɔ èwakɔ do tajinu lɔwo ji ɖekaɖekaɔ, akpedo eo nu nakpɔ lé èwakɔ ŋkɔyiyi do. Pɔlu do ŋsɛn Korɛntitɔwo mɔ wo le sɔ eho ɖe donɔ akpo “le ŋkeke ŋkɔtɔ mɛ nɔ kwɛshila ɖekaɖeka.” Émɔ woŋgbenɔ te kpɔ ye yeava gbɔxwe woabɔ eho lɔwo o. (1 Kor. 16:2) Nɔ èma enu gangan ci èjikɔ awa do tajinu hwɛhwɛwo mɛɔ, agbetɛnŋ kpedo eo nu yí dase le eoɖeki mɛ mɔ yɛwugan ye o.

15. Nyi àtɛnŋ awa nɔ èsɔ gbeta ɖe vɔɔ?

¹⁵ Nɔ èŋwlɛn afɔ ciwo àɖe daɖɛɔ, anɔ fafɛɖe mɔ nawa do ao gbetasɔsɔwo ji. (1 Kor. 14:40) Le kpɔwɛ mɛ, woɖo aɖaŋ  nɔ hamɛmɛshinshinwo-hawo mɔ, wo le can hamɛmɛshinshin ɖeka nɔ aŋwlɛnnɔ gbeta ciwo wosɔ daɖɛ. Ágbeŋwlɛnnɔ mɛ ci wocan mɔ yɛakpɔ ji koɖo ŋkeke ci ji woɖo aɖegbɔ ni. Enɔnɔ fafɛɖe nɔ hamɛmɛshinshin ciwo yí wanɔ do emɔdasɛnamɛ cɛ ji mɔ woaɖegbɔ nɔ enu ci wotɔ. (1 Kor. 9:26) Àtɛnŋ ate kpɔ awɛni ahan le ao gbenɔnɔ mɛ gbeshiagbe. Le kpɔwɛ mɛ, àtɛnŋ aŋwlɛn enu ciwo awa gbeshiagbe daɖɛ yí aŋwlɛn ciwo èjikɔ awa doŋkɔ. Akpedo eo nu naɖegbɔ nɔ enu ciwo ètɔ yí ana nagbewa nu sugbɔ le hwenu nyɛkuin mɛ.

16. Nyi yí le veviɖe gbɔxwe àwa do ao gbetasɔsɔwo jiɔ, yí lé Rɔmatɔwo 12:11 ɖo kpe yi ji doɔ?

¹⁶ Ðɔŋ awa enu ci èdrɔ. Eʒan mɔ àɖɔŋ gbɔxwe awa do ao totowo ji yí aɖegbɔ nɔ enu ci ètɔ. (Hlɛn Rɔmatɔwo 12:11.) Pɔlu nu nɔ Timɔte mɔ yi le ‘kpɔtɔ ado vevi’ nu yí awa ŋkɔyiyi le enukplakpla amɛwo mɛ. Mìatɛnŋ azan Pɔlu ɖaŋɖoɖo cɛ le gbɔngbɔnmɛ tajinu buwo mɛ hɛnnɛ.​—1 Tim. 4:13, 16.

17. Lé Efezitɔwo 5:15, 16 atɛnŋ akpedo mì nu mìawa do mìwo toto ji doɔ?

¹⁷ Zan ao gamɛ nywiɖe. (Hlɛn Efezitɔwo 5:15, 16.) Can hwenu àwa do ao gbetasɔsɔ lɔ ji yí ŋgbetrɔɛ o. Ŋgbenɔ te mɔ yeakpɔ gamɛ nywitɔ gbɔxwe atɔ ji o. Taŋfuin dakpɔ nɔnɔmɛ nywitɔ ciwo mɛ èjikɔ mɔ yeatɔɛ ji le gbeɖe o. (Ŋun. 11:4) Nɔ zanŋte nɔ ŋgbeɖe mɔ enu ciwo yí dele veviɖe aɖu gamɛ nɔ eo alo ana enu aci kɔ nɔ eo yí dagbewa enuvevitɔwo o. (Fili. 1:10) Nɔ àtɛnŋ ɔ, can hwenu ci mɛbuwo daɖe fun nɔ eo asɔ wɛ. Nu nɔ amɛwo mɔ yexa. Àtɛnŋ aci telefonu alo akpɔ enu ciwo wosɔ ɖaɖa eo to ɛntɛnɛti ji hadoxuwo ji gabumɛ. *

18-19. Nyi yí atɛnŋ kpedo eo nu yí dana ta, nɔ èdo go mɔxenuwo hwenu èji mɔ yeawa do gbeta nywi ci èsɔ jiɔ?

¹⁸ Ao susu le nɔ nunywi ciwo yí ato so mɛ ji. Enu ciwo yí ato so ao gbetasɔsɔ lɔ mɛ le shigbe fini èyikɔ nɔ èzɔnkɔ mɔ hannɛ. Nɔ èji mɔ yeaɖo fini èyikɔɔ, èɖo akpɔtɔ azɔnzɔn mɔ lɔ, nɔ evacu le fiɖe yí èɖo asɔ emɔ bu ayi can. Ahanke nɔ mìsɔ susu ɖo enu ci yí ato so gbetasɔsɔ mìwo tɔ lɔ jiɔ, mìdana ta blaŋ nɔ mìdo go cukaɖa alo mɔxenuwo o.​—Gal. 6:9.

¹⁹ Esɛnnɔŋ gbɔxwe mìasɔ gbeta nywiwo, vɔ wawa do wo ji keke aɖegbɔ tɛnŋ gbɔnnu sɔwu. Vɔ to Yehowa kpekpedonu mɛɔ, àtɛnŋ xɔ nunya koɖo ŋsɛn ci èʒan keŋ asɔ ɖegbɔ nɔ enu ci ètɔ.