1. Mìaɖu mìwoɖekiwo ji gɔnmɛ ɖe? (2 Timɔte 4:5)

 NƆ MÌDO go cukaɖawoɔ, etɛnŋ gbɔnnu nɔ mì mɔ mìakpɔtɔ anɔ gbeji nɔ Yehowa koɖo yi habɔbɔ lɔ. Lé mìawɛ yí atɛnŋ aɖu cukaɖa cɛ hanwo jiɔ? Ele mɔ mìaɖu mìwoɖekiwo ji, anɔ zanŋte yí alike le xɔse mɛ. (Hlɛn 2 Timɔte 4:5.) Mìɖunɔ mìwoɖekiwo ji nɔ mìle mìwoɖeki do mɛ, bu nuwo kpɔ nywiɖe yí tekpɔ yí kpɔ enu lɔwo shigbe lé Yehowa kpɔkpɔ wo do nɛ. Nɔ mìwɛni ahan ɔ, lé enu lɔwo wakɔ do nɔ mì dadɔ yí mìabu tamɛ kpɔ so enu lɔwo nu nywiɖe aglo o.

2. Nyi nu mìakan seŋ so le nyɔta cɛ mɛɔ?

² Le nyɔta ci yí vayi mɛɔ, mìkpɔ cukaɖa amɛtɔn ciwo mìatɛnŋ ado go le hamɛ lɔ godu. Le nyɔta cɛ mɛɔ, mìakpɔ cukaɖa amɛtɔn ciwo yí mìatɛnŋ ado go le hamɛ lɔ mɛ ciwo yí atɛnŋ adɔ yí egbejinɔnɔ nɔ Yehowa agbɔnnu nɔ mì. Wowo yí nyi (1) nɔ mìwo kpena xɔsetɔ ɖe wa nu koɖo mì, (2) nɔ wona kpla mì koɖo (3) nɔ egbɔnkɔnu nɔ mì mɔ mìawa do trɔtrɔ ciwo yí wowa le habɔbɔ lɔ mɛ ji. Lé mìawɛ yí akpɔtɔ aɖunɔ mìwoɖekiwo ji yí akpɔtɔ anɔ egbeji nɔ Yehowa koɖo yi habɔbɔ lɔ nɔ mìdo go cukaɖa cɛ hanwoɔ?

3. Lé mìatɛnŋ awa nu do nɔ mìwo kpena Kristotɔ ɖe wa nu koɖo mìɔ?

³ Ao kpena Kristotɔ ɖe wa fɛn wa nu do eo nu kpɔa? Taŋfuin etɛnŋ nyi nɔvi ɖe ci yí ɖo edɔ sugbɔwo le hamɛ lɔ mɛ yɔ, shigbe hamɛmɛshinshin nɛ. Taŋfuin nɔvi lɔ dedrɔɛ mɔ yeado vevisese nɔ eo gbɔxwe o. (Rɔm.  3:23; Ʒaki 3:2) Vɔ yi nuwanawo tɛnŋ do gbazavi nɔ eo. Ecɛ atɛnŋ ana yí nadɔn alɔn zanmɛ yí aglo yí nabubuɔ tamɛ kpɔ so enyɔ lɔ nu gbɛmɛgbɛmɛ. Ètɛnŋ biɔ eoɖeki se mɔ, ‘Nɔ nɔvi yí wa nu ahan ɖe, Yehowa habɔbɔ lɔ yí nyi cɛ teŋ nyaoa?’ Ahan pɛɛ yí Satana jinɔ mɔ mìwo le bu nɛ. (2 Kor. 2:11) Susu masɔgbe cɛwo tɛnŋ na yí mìaklan mìwoɖekiwo so Yehowa koɖo yi habɔbɔ lɔ nu. Nɔ ewa nɔ mì mɔ nɔviŋsu alo nɔvinyɔnu ɖe wa fɛn wa nu do mì nu ɖe, lé mìawɛ yí akpɔtɔ aɖunɔ mìwoɖekiwo ji yí mìdavabubuɔ enu ciwo yí ado vevisese nɔ mì kpɔɔ?

4. Lé Ʒozɛfu wɛ yí kpɔtɔ ɖu yiɖeki ji hwenu wowa enu koɖiɔ, yí nyiwo yí mìatɛnŋ akpla so gbɔɔ? (Gɔnmɛjeje 50:19-21)

⁴ Ŋgbeshin xomɛ o. Hwenu Ʒozɛfu nyi ɖayɛviɔ, fofoɔwo dewa nu do nu nywiɖe o. Woxɛ keke eɖewo ji mɔ yewoawui ŋtɔkpu can. (Gɔnm. 37:4, 18-22) Wovasɛ do hwashigbemɛ. Ecɛ wɛ mɔ Ʒozɛfu to cukaɖa sɛnŋsɛnŋwo mɛ keke ewa exwe 13 han. Ʒozɛfu tɛnŋ vabiɔbiɔ yiɖeki se mɔ Yehowa lɔn ye nyɔnɔnwi teŋ ma, yí evagbe ye ɖɛ hwenu yi nu wudo ye ma. Vɔ Ʒozɛfu dedo dɔmɛzi o. Ewaɖeɔ, éɖu yiɖeki ji yí le yiɖeki do mɛ. Ci emɔ vahun ni mɔ áɖe fi do enu ci fofoɔwo wa ni nu can ɔ, dewɛ ahan o, ésɔ ke wo yí sɔ dasɛ nɔ wo mɔ yelɔn wo. (Gɔnm. 45:4, 5) Ʒozɛfu wa nu ahan, ɖo ésun ji yí bu tamɛ kpɔ nywiɖe. Desɔ susu ɖo yi cukaɖawo ji o, vɔ ékpɔtɔ bukɔ tamɛ kpɔ so edro Yehowa tɔ nu. (Hlɛn Gɔnmɛjeje 50:19-21.) Nukplamu ci yí le mɛ nɔ mìɔ? Nɔ mɛɖe wa nu koɖo eɔ, ŋgbedo dɔmɛzi do Yehowa alo abubuɔ mɔ yɛgbe ye ɖɛ yɔ ma o. Ewaɖeɔ, bu tamɛ kpɔ so lé ekpekpeɛdo eo nu yí èdodoɔ ji le tetekpɔ lɔ mɛ nu. Gbesɔ kpe niɔ, nɔ mɛbuwo wa fɛn wa nu do eo nuɔ, tekpɔ asɔ lɔnlɔn cɔn wowo fɛnwo ji.—1 Piɛ 4:8.

5. Lé Miqueas ɖu yiɖeki ji ci ekpɔɛ mɔ wowa enu koɖo yeɔ?

⁵ Mìakpɔ egbɛ mɛ kpɔwɛ ɖeka. Nɔviŋsu Miqueas nyi hamɛmɛshinshin yí eso Amérique du Sud. b Hweɖekanuɔ, évakpɔɛ mɔ hamɛmɛshinshin ɖewo dewa nu do ye nu nywiɖe o. Ci eɖo ŋwi hwenɔnu jiɔ, énu mɔ: “Enu ŋtɔ́ han ɖe dejɔ do ŋji kpɔ vayi o. Aye gbando nɔŋ. Ŋdetɛnŋ dɔnnɔ alɔn zanmɛ o, ŋfannɔ avin, ɖo ŋdenya lé nawɛ do o.” Ele ahan gan, Miqueas ɖu yiɖeki ji yí do gbla sɛnsinɖe keŋ lé yiɖeki do mɛ. Édonɔ gbe ɖaɖa blaŋblaŋ yí biɔnɔ Yehowa mɔ yi le na ye gbɔngbɔn kɔkɔɛ yitɔ koɖo ŋsɛn nɔ yeado ji. Égbeji enyɔ ciwo yí atɛnŋ akpedo nu le mìwo wemawo mɛ. Nukplamu ci yí le mɛ nɔ mìɔ? Nɔ nɔviŋsu alo nɔvinyɔnu ɖe wa nu koɖo eoɔ, kpɔtɔ anɔ kpuu yí atekpɔ aɖu susu dɔndɔn ciwo yí ava nɔ eo ji. Taŋfuin denya enu ciwo yí dɔ nɔvi lɔ xo nuxu alo wa nu ahan o. Eyi taɖo, do gbe ɖaɖa nɔ Yehowa yí abiɛ mɔ yi le kpedo ye nu nɔ yeamɔŋje nɔvi lɔ nɔnɔmɛ mɛ. Nɔ èwɛ ahan ɔ, akpedo eo nu nakpɔɛ mɔ nɔvi lɔ dedrɔɛ mɔ yeawa enubaɖa ɖe koɖo ye o, eyi natɛnŋ asɔɛ ki. (Elo. 19:11) Ðo ŋwi mɔ, Yehowa nya nɔnɔmɛ ci mɛ ètokɔ yí ana eo ŋsɛn ci èʒan keŋ ado ji.—2 Kro. 16:9; Ŋun. 5:8.

6. Nyi yí taɖo ele veviɖe mɔ mìakpɔɛni mɔ ci Yehowa lɔn mì taɖo edɔn to nɔ mìɔ? (Ebretɔwo 12:5, 6, 11)

⁶ Hweɖewonu nɔ Yehowa dɔn eto nɔ mìɔ, etɛnŋ na mìase vevi. Vɔ nɔ mìsɔ  susu ɖo vevisese lɔ ɖekɛ jiɔ, etɛnŋ na mìatɔ buibui mɔ ekpla lɔ desɔgbe o yí deje nɔ mì o. Ecɛ awɛ mɔ enuvevi ɖeka ato mì nu: mìdagbekpɔɛ mɔ ci Yehowa lɔn mì taɖo ena kpla mì o. (Hlɛn Ebretɔwo 12:5, 6, 11.) Eyi nɔ mìkpɔtɔ bukɔ lé ekpla lɔ na mìsekɔ vevi doɔ, mìnakɔ emɔ Satana nɔ ale mì. Éjinɔ mɔ mìwo le gbe ekpla ci wona mì, yí ci yí gbenyina wuɔ, viviviɔ, mìami Yehowa sɛnsɛn yí ato le hamɛ lɔ mɛ. Nɔ wona kpla eo ɖe, lé àwɛ yí akpɔtɔ aɖunɔ eoɖeki jiɔ?

7. (a) Shigbe lé ezekɔ le foto lɔ mɛ nɛ ɖe, ci Piɛ lɔn yí xɔ ekpla ci woni ɖe, lé Yehowa vazin doɔ? (b) Nyi èkpla so Piɛ gbɔɔ?

⁷ Lɔn axɔ etodɔnnamɛ lɔ yí awa trɔtrɔ ciwo yí ʒan. Yesu gbe nyɔ nɔ apotru Piɛ le ŋmɛ nɔ apotru kpɛtɛwo zenɛniɖe. (Maki 8:33; Luiki 22:31-34) Ecɛ atɛnŋ ana ŋkpɛn awa Piɛ. Ele ahan gan, Piɛ kpɔtɔ nɔ egbeji nɔ Yesu. Élɔn yí xɔ ekpla lɔ yí kpla nu so yi fɛnwo mɛ. Eyi taɖo Yehowa cu shi nɔ Piɛ do egbejinɔnɔ yitɔ ŋci yí ɖo edɔ veviwo ni le hamɛ lɔ mɛ. (Ʒan 21:15-17; Edɔ. 10:24-33; 1 Piɛ 1:1) Nyi mìatɛnŋ akpla so Piɛ gbɔɔ? Nɔ mìdesɔ susu ɖo ŋkpɛn ci yí awa mì ji o keŋ lɔn xɔ etodɔnnamɛ lɔ yí wa trɔtrɔ ciwo yí ʒan ɔ, mìwoŋtɔwo koɖo mɛbuwo akpɔ nyɔnawo le mɛ. Nɔ mìwɛ ahan ɔ, Yehowa agbezan mì doji yí mìwo nɔviwo can aɖunɔ ele nɔ mì.

8-9. Ci wona kpla Bernardo le tɔtɔmɛ ɖe, lé ewa niɔ; vɔ nyi yí kpedo nu etrɔ yi susuɔ?

⁸ Mìakpɔ enu ci yí jɔ do nɔviŋsu Bernardo ci yí le Mozambique ji. Womɔ yɛdagbenyi hamɛmɛshinshin o. Lé ewa nɔ Bernardo le tɔtɔmɛɔ? Énu mɔ: “Ŋdo dɔmɛzi ɖo ekpla ci wonaŋ dejɔ ji nɔŋ o.” Enu ci yí xɛ yí nyi lé nɔviwo akpɔɛ do le hamɛ lɔ mɛ. Énu mɔ: “Ewa wleci ɖewo gbɔxwe ŋvalɔn do ekpla ci wonaŋ ji yí gbevatɔ kankando Yehowa koɖo yi habɔbɔ lɔ ji ke.” Nyi yí kpedo Bernardo nu yí etrɔ susuɔ?

⁹ Bernardo trɔ lé ebunɔ tamɛ do. Éɖe mɛ mɔ: “Hwenu ŋnyi hamɛmɛshinshin ɔ, ŋzannɔ Ebretɔwo 12:7 yí sɔ kpenɔdo mɛbuwo nu nɔ woaɖo susu nywi do etodɔnnamɛ Yehowa tɔ nu. Eyi ŋbiɔ nyɛɖeki se mɔ: ‘Mi yí ɖo awa do mawunyɔkpukpui cɛ mɛ nyɔwo jiɔ?’ Yehowa  sɛntɔwo pleŋ yɔ, nyɛ can ŋle mɛ.” Eyi Bernardo gbewa nubu ciwo yí akpedo nu agbetrɔ akando Yehowa koɖo yi habɔbɔ ji ke. Évahlɛnkɔ Bibla doji yí gbeji gamɛ yí bunɔ tamɛ kpɔ nywiɖe so enu ci ehlɛn nu. Ci lé nɔviŋsu koɖo nɔvinyɔnuwo akpɔɛ do kpɔtɔ wakɔ ɖeka ni can ɔ, éyinɔ kunuɖegbe koɖo wo yí ɖonɔ nyɔ ŋci le bɔbɔwo. Le yiyimɛɔ, wogbevakanfu Bernardo yí enyi hamɛmɛshinshin ke. Shigbe Bernardo nɛɔ, nɔ wona ekpla eoɔ, tekpɔ nɔ ŋgbesɔ susu ɖo ŋkpɛn ci yí wakɔ eo ji o, lɔn axɔ etodɔnnamɛ lɔ yí awa trɔtrɔ ciwo yí ʒan. c (Elo. 8:33; 22:4) Nɔ èwɛ ahan ɔ, àtɛnŋ akando ji mɔ Yehowa acu shi nɔ ye, nɔ ci èkpɔtɔ yí nɔ gbeji nɔ yi koɖo yi habɔbɔ lɔ.

10. Trɔtrɔ ci yí wowa ci yí dɔ egbɔnnu nɔ Izraɛli ŋsu ɖewo mɔ woakpɔtɔ anɔ gbejiɔ?

¹⁰ Nɔ wowa trɔtrɔ ɖe le habɔbɔ lɔ mɛɔ, etɛnŋ na egbejinɔnɔ agbɔnnu nɔ mì. Nɔ mìdenya wawaɔ, etɛnŋ na mìaklan so Yehowa gbɔ. Le kpɔwɛ mɛ, Moizi Se lɔ na yí lé Izraɛliviwo wanɔ ŋɖewo do trɔ. Gbɔxwe Yehowa ana Ese lɔɔ, xomutatɔwo yí wanɔ avɔnsatɔwo dɔ. Wocunɔ avɔnsakpewo yí wanɔ vɔnsawo nɔ Yehowa do ta nɔ wowo xomuwo. (Gɔnm. 8:20, 21; 12:7; 26:25; 35:1, 6, 7; Job 1:5) Vɔ hwenu wovado Ese lɔɔ, xomutatɔwo ɖo atashi enu cɛwo wawa. Arɔn xomu lɔ yí Yehowa vasɔ mɔ woanyi avɔnsatɔwo yí awanɔ vɔnsawo. Ci wowa trɔtrɔ cɛɔ, nɔ xomutatɔ ɖe denyi Arɔn xomumɛtɔ o gan yí mɔ yeawa avɔnsatɔwo dɔɔ, éje nɔ eku. d (1 Ese. 17:3-6, 8, 9) Taŋfuin trɔtrɔ cɛ can dɔ yí Kore, Datan, Abiramu koɖo mɛgan 250 lɔwo fɔn gu do Moizi koɖo Arɔn jia? (Amh. 16:1-3) Mìdatɛnŋ anui koɖo kankandoji o. Vɔ ɖekpokpuiɖe ci enyiɔ, Kore koɖo mɛ ciwo yí bɔdo nu denɔ gbeji nɔ Yehowa o. Nɔ habɔbɔ lɔ wa trɔtrɔ ɖewo ciwo yí dɔ egbɔnnu nɔ eo mɔ nakpɔtɔ anɔ gbeji ɖe, nyi àtɛnŋ awaɔ?

11. Nyi mìatɛnŋ akpla so Kexatitɔwo gbɔɔ?

¹¹ Nɔ wowa trɔtrɔ ɖe le habɔbɔ lɔ mɛɔ, lɔn do ji yí awa do ji. Hwenu Izraɛliviwo le zogbeji yikɔɔ, woɖo edɔ vevi ɖeka nɔ Kexatitɔwo. Hweɖekpokpuinu ci Izraɛliviwo aso le fiɖe ayi fibuɔ, Kexatitɔwo yí kɔnɔ enublabladaka lɔ yí nɔnɔ ŋkɔ nɔ jukɔn lɔ pleŋ. (Amh. 3:29, 31; 10:33; Ʒoz. 3:2-4) Mɔnukpɔkpɔ gangan ɖeka enyi nɔ wo! Vɔɔ, enuwo trɔ nɔ wo hwenu Izraɛliviwo vaɖo Gbeɖu Nyigban lɔ ji. Degbeʒan mɔ woakɔnɔ enublabladaka lɔ o. Eyi taɖo le efyɔ Salomɔ hwenuɔ, wosɔ Kexatitɔ ɖewo mɔ woanyi ehajitɔwo, ɖewo nyi agbocɔtɔwo yí buwo kpɔnɔ fini woɖonɔ enuwo do ji. (1 Kro. 6:31-33; 26:1, 24) Wodenu so Kexatitɔwo nu le fiɖe mɔ woto nyɔ alo mɔ wo le na edɔ bu ci yí nyɔ wu yewo, ɖo edɔ ci yewowanɔ sa nyi edɔ vevi o. Nyi mìakpla so wo gbɔɔ? Nɔ godu nɔ Yehowa habɔbɔ lɔ koɖo ao ji keŋkeŋ nɔ wowa trɔtrɔwo, nɔ woɖɔli edɔ ci èwakɔ le Yehowa habɔbɔ lɔ mɛ can. Kpɔtɔ akpɔnɔ jijɔ le edɔ ɖekpokpui ci wosɔ na eo mɔ wo le wa mɛ. Ðo  ŋwi mɔ de edɔ ci èwakɔ yí dɔ èle veviɖe nɔ Yehowa o. Tonusese aotɔ le veviɖe nɔ Yehowa sɔwu edɔ ɖekpokpui ci woɖo nɔ eo yí èwakɔ.—1 Sam. 15:22.

12. Lé ewa nɔ Zaina ci woɖɔli edɔ ni yí eso le Betɛliɔ?

¹² Mìakpɔ nɔvinyɔnu Zaina kpɔwɛ. Edɔ ci ewanɔ le habɔbɔ lɔ mɛ jɔnɔ ji ni, vɔ wovaɖɔli edɔ ni. Éwa edɔ le Betɛli yí ewu exwe 23, yí wovasɔɛ hɔntɔn mɔ yɛanyi emɔɖetɔ vevi. Énu mɔ: “Ŋdeɖoŋ do nu ɖeeɖe mɔ woaɖɔli edɔ nɔŋ o. Ewa nɔŋ mɔ ŋdegbele ebo ɖe nu o, eyi ŋbiɔbiɔ nyɛɖeki se mɔ, ‘Afɛn ci ŋwaɔ?’” Ewa ŋshishi mɔ nɔviŋsu koɖo nɔvinyɔnu ɖewo le yi hamɛ lɔ mɛ ciwo yí na egbese vevi kpi ci wonu ni mɔ: “Nɔ enyi wa èwanɔ ao dɔwo nywiɖe le Betɛli saɔ, wodatashi eo o.” Na nɔ hwenu ɖeɔ, Zaina se vevi haan keke yí fanɔ avin ezan ɖekpokpui mɛ. Vɔ énu mɔ: “Ŋdelɔn yí vatɔ enu xoxo kpɔ so Yehowa habɔbɔ lɔ alo lɔnlɔn ci Yehowa ɖo nɔŋ nu gbeɖe o.” Lé Zaina wɛ yí tɛnŋ ɖu yiɖeki jiɔ?

13. Lé Zaina wɛ yí ɖu gbɔjɔgbɔjɔ jiɔ?

¹³ Zaina kpe ji yí ɖu susu masɔgbewo ji. Lé ewɛ doɔ? Éhlɛn mìwo wema ciwo yí xo nuxu so cukaɖa ci mɛ etokɔ nu. Nyɔta ci yí nyi “Àtɛnŋ aɖu gbɔjɔgbɔjɔ ji!” ci yí le Jutakpɔxɔ 1^er février 2001 tɔ mɛ kpedo nu sugbɔ. Nyɔta lɔ xo nuxu so lé Bibla ŋwlɛtɔ Maki wɛ yí tɛnŋ ɖu gbɔjɔgbɔjɔ ji hwenu woɖɔli edɔ ni. Zaina mɔ, “Maki kpɔwɛ lɔ yí nyi enu ci pɛɛ yí ʒanŋ nɔ masɔ ɖu gbɔjɔgbɔjɔ ji.” Zaina demi eha dodo koɖo yi xlɔwo o. Deɖe yiɖeki do akpo o, yí yi nu desadɔnu ni o. Ékpɔɛ mɔ gbɔngbɔn kɔkɔɛ lɔ yí dadasɛ emɔ nɔ habɔbɔ lɔ yí nɔvi ciwo yí le ŋkɔ nɔ edɔ lɔ sɔ ɖe le ji nɔ ye veviɖe. Égbedo jeshi hɛnnɛ mɔ enu ci yí le veviɖe nɔ Yehowa habɔbɔ lɔ yí nyi mɔ Yehowa dɔ le nyi wawa.

14. Trɔtrɔ ci yí va yí wawa do ji gbɔnnu nɔ Vlado ɔ, vɔ nyi yí kpedo nuɔ?

¹⁴ Vlado nyi hamɛmɛshinshin, éɖo exwe 73 yí so Slovenie. Hwenu wosɔ yi hamɛ xoca koɖo hamɛ bu yí cú Fyɔɖuxuxɔ ci mɛ eyinɔ saɔ, egbɔnnu ni. Énu mɔ: “Ŋdese enu ci yí taɖo wocú Fyɔɖuxuxɔ nywi cɛ mɛ o. Eveŋ nu ɖo yi nɛ mìgbetrɔ yí dra exɔ lɔ do yɛ nɛ. Kapita  yí ŋnyi yí ŋwa edɔ ɖewo le exɔ lɔ nu. Ahanke ci wosɔ hamɛ amɛve lɔwo xocaɔ, mìɖo awa trɔtrɔ sugbɔ ciwo yí denɔ fafɛɖe nɔ mìwo ciwo yí nyi eŋɛnywidratɔ shinshinwo o.” Nyi yí kpedo Vlado nu yí etɛnŋ lɔn do trɔtrɔ cɛ jiɔ? Énu mɔ: “Nɔ wolɔn yí wa do trɔtrɔ ciwo yí habɔbɔ lɔ wa jiɔ, wokpɔnɔ nyɔnawo gashiagamɛ. Trɔtrɔ cɛwo dradra mì do ɖɛ nɔ trɔtrɔ gangan ciwo yí avava le esɔ mɛ.” Wosɔ míwo hamɛ xoca koɖo hamɛ bu yí lé àwɛ alɔn do trɔtrɔ lɔwo ji gbɔngbɔnnu nɔ eoa alo woɖɔli edɔ nɔ eo yí egbɔnkɔnu nɔ eoa? Kando ji mɔ Yehowa mɔŋje lé enu lɔwo wakɔ do nɔ eo mɛ. Nɔ èlɔn yí wa do trɔtrɔ ci habɔbɔ lɔ wa ji yí kpɔtɔ yí nɔ gbeji nɔ Yehowa koɖo habɔbɔ lɔɔ, àtɛnŋ akando ji mɔ yeakpɔ nyɔnawo.—Eha. 18:25.

15. Lé mìawɛ akpɔtɔ aɖukɔ mìwoɖekiwo ji nɔ mìdo go cukaɖawo le hamɛ lɔ mɛɔ?

¹⁵ Ci mìɖokɔ vɔvɔnu nɔ xexe cɛɔ, mìatɛnŋ akpɔ emɔ mɔ mìado go cukaɖawo le hamɛ lɔ mɛ. Cukaɖa ŋtɔ́wo atɛnŋ adɔ agbɔnnu nɔ mì mɔ mìanɔ egbeji nɔ Yehowa. Eyi taɖo mìɖo akpɔtɔ aɖunɔ mìwoɖekiwo ji. Nɔ èkpɔɛ mɔ ao kpena Kristotɔ ɖe wa enu koɖo yeɔ, ŋgbeshin xomɛ o. Nɔ wona ekpla eoɔ, ŋgbesɔ susu ɖo ŋkpɛn ci yí awa eo ji o, vɔ lɔn axɔ ekpla lɔ yí awa trɔtrɔ ciwo yí ʒan. Nɔ Yehowa habɔbɔ lɔ wa trɔtrɔwo yí trɔtrɔ lɔwo kan eo tiin ɔ, lɔn do trɔtrɔ cɛwo ji so ji mɛ yí awa do emɔdasɛnamɛwo ji.

16. Lé àwɛ yí akpɔtɔ akankando Yehowa koɖo yi habɔbɔ lɔ jiɔ?

¹⁶ Àtɛnŋ akpɔtɔ akankando Yehowa koɖo yi habɔbɔ lɔ ji nɔ egbejinɔnɔ aotɔ ɖo tetekpɔ mɛ. Vɔ gbɔxwe anyi ahan ɔ, èɖo aɖu eoɖeki ji, ci gɔnmɛ yí nyi mɔ, nale eoɖeki do mɛ, abu enuwo kpɔ nywiɖe, yí akpɔ enu lɔwo shigbe lé Yehowa kpɔkpɔ wo do nɛ. Ðui mɔ yeakplanɔ enu so mɛ ciwo nu Bibla xo nuxu so yí woɖu cukaɖa ŋtɔ́ hanwo ji yí abu tamɛ kpɔ so wowo kpɔwɛwo nu. Do egbe ɖaɖa nɔ Yehowa nɔ akpedo eo nu. Ŋgbeɖe eoɖeki do azɔge le hamɛ lɔ nu gbeɖe o. Eyi nɔ ŋɖekpokpui jɔkɔ can ɔ, Satana dasun ji yí aklan eo le Yehowa koɖo yi habɔbɔ lɔ nu gbeɖe o.—Ʒaki 4:7.