AYAMƐNƆNƆMƐKPƆTƆ ɖeka kpɔkɔ mashinni ci yí kpɔnɔ nuwo le ayamɛ mɛ. Édo jeshi mɔ jihɔnshi gangan ɖeka gbɔkɔ eju ɖeka ci mɛ amɛwo sugbɔ le mɛ. Deji mɔ afɔku ajɔ do eju lɔ mɛ tɔwo ji o, eyi taɖo edo gbla veviɖe keŋ yí kanxle wo gbɔxwe gamɛ ayi.

Ahanke le egbɛmɛɔ, Yehowa kankanxle nyigbanjitɔwo mɔ “jihɔnshi” gangan ɖeka gbɔgbɔ nɛ. “Jihɔnshi” lɔ gangan wu afɔkunu ɖekpokpui ci nu ayamɛnɔnɔmɛkpɔtɔwo atɛnŋ axo nuxu so. Lé Yehowa wɛkɔ doɔ? Yí nyi yí taɖo mìatɛnŋ akando ji mɔ gamɛ ci ena agbetɔwo sugbɔ keke woawa do amɛkanxlenyɔ lɔ ji druɔ? Nɔ mìakpɔ ɖoŋci lɔwoɔ, na mìakpɔ amɛkanxlenyɔ ɖewo ciwo Yehowa nu le blema doŋkɔ.

Le Bibla hwenuwoɔ, Yehowa nu amɛkanxlenyɔ so “jihɔnshi” vovovo alo kojoɖoɖo ci ahɛn va mɛ ciwo yí ɖui koŋ yí gbe wawa do yi sewo ji. (Elo. 10:25; Ʒer. 30:23) Le nɔnɔmɛ ɖeshiaɖe mɛɔ, ékannɔxle mɛ ciwo yí gbe etoɖoɖo doŋkɔ yí nunɔ nɔ wo mɔ wo le trɔ keŋ awa nu asɔ koɖo ye dro. (2 Efy. 17:​12-15; Nex. 9:​29, 30) Gbɔxwe akpedo mɛ ciwo yí ji mɔ yewoawa trɔtrɔwo nuɔ, ézannɔ yi sɛntɔ egbejinɔtɔwo le nyigban ji yí wokpenɔdo wo nu nɔ woamɔŋje mɛ mɔ yewoɖo awa nu le afɔdumɛ.​—Amosu 3:7.

Nowe nyi egbejinɔtɔ ɖeka ci Mawu zan yí sɔ nu yi kojoɖonyɔ nɔ amɛwo. Ésɔ exwe nɛniɖe yí kanxle mɛ ciwo yí nɔnɔ agbedɔndɔn alo wanɔ tamɛsɛnnuwo le yi hwenu mɔ eshiɖɔɖɔ ɖeka gbɔgbɔ xexeɛ pleŋ mɛ. (Gɔn 6:​9-13, 17) Égbenu enu ci woɖo awa keŋ aci agbe le eshiɖɔɖɔ lɔ mɛ nɔ wo. Nowe ɖe kunu keke wovayɔɛ mɔ “enyɔ jɔjwɛ dratɔ.”​—2 Piɛ 2:5.

Ci Nowe je agbla sugbɔ can ɔ, mɛ ciwo yí nɔ agbe doŋkɔ nɔ eshiɖɔɖɔ lɔ gbe Mawu ŋɛdu ci edra nɔ wo. Wodasɛ mɔ xɔse dele yewo shi kpetii o. Ecɛ na woku hwenu eshi- ɖɔɖɔ “lɔ va yí kplɔ wo keŋkeŋ hɛn yi.” (Mt. 24:39; Ebre. 11:7) Ci eshi lɔ tɔ jajaɔ, wodatɛnŋ anu gbeɖe mɔ Mawu dekanxle yewo o.

Gaɖewo mɛɔ, Yehowa kannɔxle amɛwo hwenu nyɛkuin ɖe doŋkɔ gbɔxwe yi kojoɖoɖo lɔ tɔnɔ ji. Vɔ étenɔ kpɔ yí nanɔ gamɛ mɛ ciwo ji enu lɔ ajɔ do nɔ woawa trɔtrɔ. Le kpɔwɛ mɛ, le blema Eʒiptiɔ, ékanxle amɛwo doŋkɔ gbɔxwe efunkpekpe amɛwo lɔwo atɔ ji. Le ɖeka mɛɔ, Yehowa dɔ Moizi koɖo Arɔn mɔ wo le kanxle Faraɔn koɖo yi dɔwaviwo mɔ efunkpekpe amadrɛtɔ lɔ ci yí nyi ekevɔnwo jaja gbɔgbɔ. Ci enyi ŋkeke ci yí akplɔɛ do yí ekevɔn lɔwo aja ɖe, Mawu na gamɛ wo nywiɖe nɔ woaji bexu keŋ ashi nɔ jihɔnshi lɔa? Bibla nu mɔ: “[Yehowa] ŋɛ kutokan nɔ amɛ ɖowo ciwo yí bɔnɔdo Faraɔn nu. Amɛ hunnɔwo ɖeblɛ sɔ wowo lanwo pleŋ koɖo wowo hwashiwo pleŋ do exɔwo mɛ. Vɔ, amɛ kpɛtɛwo ɖekɔ le Tɔhonɔ ŋɛ lɔ nu. Hwashiwo koɖo elanwo ku le agblewo mɛ nɔ amɛ hunnɔwo.” (Hun. 9:​18-21) Yi mɛ kɔ gbajɛ mɔ Yehowa kanxle wo nywiɖe, eyi taɖo mɛ ciwo yí ɖe blɛ wa do ji dekpe fun shigbe mɛ kpɛtɛwo nɛ o.

Wogbekanxle Faraɔn koɖo yi dɔwaviwo doŋkɔ nɔ funkpekpe amɛwotɔ lɔ vava. Vɔ wojɔ xlu keke yí gbe wawa do amɛkanxlenyɔ lɔ ji. (Hun. 4:​22, 23) Ecɛ na wowo vi- ŋsuvi ŋkɔtɔwo ku. Esadɔnu sugbɔ! (Hun. 11:​4-10; 12:29) Woatɛnŋ awa do amɛkanxlenyɔ lɔ ji gbɔxwe gamɛ ayi saa? Ɛɛ! Moizi kanxle Izraɛliviwo mɔ efunkpekpe amɛwotɔ lɔ gbɔgbɔ yí nu lé woawɛ ahwlɛn wowo xomuwo  gan nɔ wo. (Hun. 12:​21-28) Amɛ nɛni yí wa do Moizi nyɔ lɔwo jiɔ? Izraɛliviwo koɖo “akɔta buwo mɛ tɔwo sugbɔ” ciwo denyi Izraɛliviwo o, ci agbe le Mawu kojoɖoɖo lɔ mɛ yí so le Eʒipti yí kɔnŋtawo dasɛ wowo hlɛnhlɛnmɛ ayi miliɔn amɛtɔn.​—Hun. 12:38.

Shigbe lé kpɔwɛ cɛwo dasɛ nɛɔ, Yehowa nanɔ gamɛ amɛwo nywiɖe nɔ woawa do amɛkanxlenyɔ yi tɔ ji. (2 Ese. 32:4) Nyi yí cucunɔ Mawu ewanɔ ahan ɔ? Apostolo Piɛ ɖe mɛ mɔ Yehowa “Dé jiji mɔ amɛ ɖe a trɔn o, vɔ, É jiji mɔ amɛshamɛ a trɔjimɛ.” (2 Piɛ 3:9) Ɛɛ, Mawu sɔ ɖe le mɛ nɔ agbetɔwo. Éji mɔ wo le trɔ jimɛ yí awa do ye ɖaŋɖoɖo ji gbɔxwe ye kojoɖoɖo lɔ ava.​—Ezai 48:​17, 18; Rɔm. 2:4.

Egbɛmɛ can ɔ, amɛwo pleŋ ɖo awa do amɛkanxlenyɔ vevi ɖeka ci wodrakɔ le nyigban lɔ pleŋ ji. Hwenu Yesu le nyigban jiɔ, énu mɔ woavagu xexe vwin cɛ le “xáxá gangan ɖeka” mɛ. (Mt. 24:21) Yesu nu nyɔ ɖɛ so enu ciwo yí avajɔ le esɔmɛ kojoɖoɖo lɔ mɛ nɔ yi dokplɔtɔwo. Égbenu enu ciwo woakpɔ koɖo enu ciwo mɛ woato nɔ hwenu lɔ gogokɔ nɔ wo. Enujɔjɔ vevi ciwo nu Yesu xo nuxu so jɔkɔ le xexeɛ mɛ yí mìkpɔkɔ.​—Mt. 24:​3-12; Luiki 21:​10-13.

Sɔ koɖo nyɔnuɖɛ cɛɔ, Yehowa yɔkɔ amɛwo pleŋ mɔ wo le sɔ gbeta aɖo to ye yí asɛn ye. Éji mɔ tonusetɔwo ase vivi nɔ agbe lɔ le kakacɛ mɛ yí agbevaxɔ yayrawo le ye xexe yoyu jɔjɔɛ lɔ mɛ. (2 Piɛ 3:13) Yehowa ji mɔ yeakpedo amɛwo nu nɔ woaxɔ ye gbeɖuwo ji se. Éna wodrakɔ ŋɛdu ci yí ahwlɛn wowo gbe gan nɔ wo. Ŋɛdu lɔ yí nyi “Mawu [Fyɔɖuxu] ŋɛnywi lɔ,” eyi Yesu nu ɖɛ mɔ woasɔ “ɖe kunu nɔ jukɔn lɔwo pleŋ.” (Mt. 24:14) Mawu wa toto yí yi sɛntɔ adodwiwo ɖekɔ “kunu” alo drakɔ ŋɛdu ci yí so Mawu gbɔ le eju 240 han mɛ. Yehowa ji mɔ amɛ sugbɔ le wa do amɛkanxlenyɔ lɔ ji keŋ aci agbe le ye kojoɖoɖo jɔjɔɛ ci yí gbɔkɔ mɛ.​—Zef. 1:​14, 15; 2:​2, 3.

Degbeʒan mɔ mìabiɔ se mɔ Yehowa nanɔ gamɛ amɛwo nywiɖe nɔ woawa do amɛkanxlenyɔ yi tɔwo ji ma o. Ðo kpeɖojiwo dasɛ mɔ ahan ewɛni nɛ. Vɔ nyɔbiɔse vevi ci yí kpɔtɔ yí nyi mɔ: Gbɔxwe gamɛ lɔ asun ɖe, amɛwo alɔn awa do amɛkanxlenyɔ Mawu tɔ lɔ jia? Ci mìnyi Mawu ŋɛdotɔwoɔ, le vamɛ mɔ mìakpɔtɔ akpenɔdo amɛ sugbɔ nu nɔ woaci agbe le xexe vwin cɛ vɔvɔnu.