1. Lé mìwɛ yí nya mɔ amɛhwlɛngandɔ yí nukplaviwowawadɔ lɔ nyiɔ?

AMƐHWLƐNGANDƆ yí nukplaviwowawadɔ lɔ nyi! Lé mìwɛ yí nyaɔ? Hwecinu Yesu dokɔ ese ci woŋwlɛ do Matie 28:19, 20 mɛɔ, émɔ: ‘Míyi yí aɖo nukplaviwo. Mído wo eshi mɛ.’ Lé ӡinӡindoshimɛwawa le veviɖe doɔ? Mìɖo awa ӡinӡindoshimɛ nɔ mìji mɔ mìakpɔ hwlɛngan. Mɛ ci yí jikɔ awa ӡinӡindoshimɛ ɖo axɔɛ se mɔ, ci Yesu ku do ta nɔ mì yí fɔn so ku yí na yeatɛnŋ avanɔ agbe tɛgbɛɛ. Susu cɛ ŋci yí apotru Piɛ nu nɔ yi kpena Kristotɔwo mɔ: ‘Ӡinӡindoshimɛ lɔ hwlɛnhwlɛn mí toto fɔnfɔn Yesu Kristotɔ le kuvitɔwo domɛ ji.’ (1 Piɛ 3:21) Eyi taɖo nɔ nukplavi yoyu ɖe wa ӡinӡindoshimɛɔ, átɛnŋ akpɔ emɔ mɔ yeavanɔ agbe tɛgbɛɛ.

2. Enukplamɛtɔ ciŋmɛ yí 2 Timɔte 4:1, 2 mɔ mìɖo anyiɔ?

² Mìɖo anyi enukplamɛtɔ bibiwo gbɔxwe awa nukpaviwo ɖɛ. (Hlɛn 2 Timɔte 4:1, 2.) Nyi yí taɖoɔ? Ðo Yesu dɔ mì mɔ: ‘Míyi yí aɖo nukplaviwo. Mí kpla enu wo.’ Apotru Pɔlu mɔ: “Kpɔtɔ a zan ao gbe, yí a kpla enu amɛwo, . . . Hwehunnɔ nu ɔ, nà hwlɛn eoɖeki koɖo amɛ ciwo yí ɖo eto ao nukplamuwo gan.” Eyi taɖo Pɔlu nyɔ jɔ ci enu mɔ: “Le ao . . . nukplakpla mɛ ɔ, nà kpɔ eoɖeki ji.” (1 Tim. 4:16) Ci enukplakpla koɖo amɛwo ca ka koɖo nukplaviwowawadɔ lɔɔ, mìji mɔ mìabi doji le yi wawa mɛ.

3. Le nyɔta cɛ mɛ ɖe, nyi mìakpɔ kudo Bibla kplakpla koɖo amɛwo nuɔ?

³ Mìkplakpla Bibla mɛ nyɔnɔnwiwo koɖo amɛ miliɔn nɛniɖe le xexeɛ pleŋ mɛ. Vɔ shigbe lé nyɔta ci yí vayi nui nɛɔ, mìji mɔ mìanya lé mìatɛnŋ akpedo sugbɔtɔ nu  le wo mɛ nɔ woanyi Yesu nukplavi ciwo yí wa ӡinӡindoshimɛ. Le nyɔta cɛ mɛɔ, mìakpɔ enu amatɔn bu ciwo yí enukplamɛtɔ ɖekaɖeka ɖo awa keŋ akpedo nukplaviwo nu nɔ woawa ŋkɔyiyi keŋ awa ӡinӡindoshimɛ.

4. Nyi yí taɖo enukplamɛtɔ ɖo aɖu yiɖeki ji nɔ éwakɔ Bibla nukplakpla koɖo mɛɖeɔ? (Kpɔ gɔnmɛnuŋwlɛŋwlɛ lɔ hɛnnɛ.)

⁴ Mìlɔn enu ciwo mìkplakɔ koɖo amɛwo le Mawu Nyɔ lɔ mɛ. Eyi taɖo mìtɛnŋ tɔ nuxu xoxo shiin so wo nu nɔ amɛwo. Vɔ nɔ mɛɖe kpɔkɔ Jukpɔxɔ nukplakpla, alo hamɛ Bibla nukplakpla ji alo wakɔ Bibla nukplakpla koɖo mɛɖeɔ, deɖo axonɔ nuxu sugbɔ o. Enukplamɛtɔ lɔ ɖo aɖu yiɖeki ji keŋ ana mɔ Bibla nɔ akpla nu amɛ lɔ, datekpɔ mɔ yeanu enyɔshianyɔ ci yejeshi ɖɛ so Bibla kpukpui lɔ alo nyɔci lɔ nu o. * (Ӡan 16:12) Sɔ enu ciwo yí èjishi le Bibla mɛ hwenu èwa ӡinӡindoshimɛ sɔ koɖo ciwo yí èjeshi ɖɛyɛ. Kankandoji li mɔ hwenu èwa ӡinӡindoshimɛɔ, Bibla mɛ gɔnmɛjeje nukplakplawo ɖekɛ yí ènya. (Ebre. 6:1) Exwe sugbɔ yí sɔ èkpla enu ciwo yí ènya le egbɛmɛ, eyi taɖo ŋgbemɔ yeakpla enu lɔwo pleŋ ao nukplavi lɔ zeɖeka o.

5. (a) Sɔ koɖo 1 Tɛsalonikitɔwo 2:13 ɖe, nyi mɛ mìji mɔ mìwo nukplavi amɔŋje so yi nukplakpla lɔ mɛɔ? (b) Lé mìatɛnŋ ado ŋsɛn mìwo nukplavi lɔ nɔ axonɔ nuxu so enu ci ekplakɔ nuɔ?

⁵ Mìji mɔ nukplavi lɔ anya mɔ, Mawu Nyɔ ci yí so gbɔngbɔnmɛ mɛ yí enu ci yekplakɔ so. (Hlɛn 1 Tɛsalonikitɔwo 2:13.) Lé mìatɛnŋ awɛ doɔ? Do ŋsɛn ao nukplavi lɔ nɔ axonɔ nuxu so enu ci ekplakɔ nu. Ŋgbemɔ yeaɖenɔ kpukpui lɔwo mɛ nɔ nukplavi lɔ tɛgbɛɛ o, nu ni nɔ aɖe ɖewo mɛ yiŋtɔ. Kpedo nu nɔ akpɔ lé atɛnŋ azan Mawu Nyɔ lɔ do le yi gbemɛ. Wa nyɔbiɔse ciwo yí akpedo nu nɔ anu yi susu koɖo lé esekɔ le yiɖeki mɛ do kpukpui ciwo ehlɛn nu. (Luiki 10:25-28) Le kpɔwɛ mɛ, biɔɛ se mɔ: “Lé kpukpui cɛ kpedo eo nu yí èkpɔ Yehowa nɔnɔmɛ ɖeka doɔ?” “Lé Bibla mɛ nyɔnɔnwi cɛ atɛnŋ akpedo eo nu doɔ?” “Lé enu ci èkpla yɛ na èse le eoɖeki mɛɔ?” (Elo. 20:5) Denyi enu sugbɔ jejeshi yí le veviɖe o, vɔ lé nukplavi lɔ lɔn enu ciwo ekpla yí gbewakɔ do wo ji do yí le veviɖe.

6. Nyi yí taɖo anyɔ mɔ mìakplɔ enukplamɛtɔ bibi ɖe yi mìwo Bibla nukplavi gbɔɔ?

⁶ Èkplɔnɔ eŋɛnywidratɔ ciwo yí nyi  enukplamɛtɔ kpɔnutɔxuwo yi ao Bibla nukplaviwo gbɔa? Nɔ ahan yɔ nɛɔ, àtɛnŋ biɔ wo se mɔ lé wokpɔ ye nukplakpla lɔ do ma. Àtɛnŋ agbebiɔ wo se mɔ yewa ɖaŋ zan Bibla le enukplakpla lɔ mɛ ma. Èɖo asɔ eoɖeki hwe nɔ èji mɔ yeanyi enukplamɛtɔ nywi. (Sɔ sɔ koɖo Edɔwawawo 18:24-26.) Gbesɔ kpe niɔ, biɔ eŋɛnywidratɔ bibi lɔ se mɔ, nukplavi lɔ tɛnŋ mɔŋje enu ci ekplakɔ lɔ mɛ ma. Nɔ èjikɔ axɔ mɔ na nɔ kwɛshila ɖeka alo ci yí wu ahan ɔ, àtɛnŋ anu nɔ eŋɛnywidratɔ bibi lɔ nɔ awa nukplakpla lɔ. Ecɛ awɛ mɔ nukplakpla lɔ daɖo te o, yí nukplavi lɔ atɛnŋ ado jeshi mɔ enukplakpla lɔ le veviɖe. Ŋgbenu gbeɖe mɔ “ye” nukplavi yɔ taɖo mɛbuɖe dakpla nu koɖi o. Kankandoji li mɔ, enu ci yí nyɔ yí èjikɔ nɔ nukplavi lɔ, èjikɔ mɔ yɛakpɔtɔ akplakpla nyɔnɔnwi lɔ doji.

7. Nyi yí atɛnŋ ado zo lanmɛ nɔ nukplavi ɖe doji yí alɔn enu ci ekplakɔɔ?

⁷ Nukplavi lɔ ɖo ado jeshi mɔ èlɔn Bibla mɛ nyɔnɔnwiwo yí gbekando wo ji. (1 Tɛs. 1:5) Ecɛ atɛnŋ ado zo lanmɛ ni doji yí alɔn enu ci ekplakɔ. Taŋfuin àtɛnŋ anu lé wawa do Bibla gɔnmɛɖosewo ji kpedo eo nu le ao gbemɛ do ni. Ana akpɔ mɔ Bibla atɛnŋ akpedo ye can nu.

8. Nubu ci àtɛnŋ awa asɔ kpedo ao Bibla nukplavi nuɔ, yí nyi yí taɖo àwɛ ahan ɔ?

⁸ Le Bibla nukplakpla lɔ mɛɔ, kan seŋ so nɔviŋsu koɖo nɔvinyɔnu ciwo yí do go cukaɖa ciwo han mɛ nukplavi lɔ le yí anu lé wowɛ yí ɖu cukaɖa lɔwo ji ni. Nɔ mɛɖe le hamɛ lɔ mɛ yí yi kpɔwɛ atɛnŋ akpedo nukplavi lɔ nuɔ, àtɛnŋ akplɔɛ yi gbɔ. Alo àtɛnŋ akpɔ nutɔxukpɔkpɔ nywiwo le jw.org ji le enyɔta ciwo yí nyi “Bibla trɔkɔ agbenɔnɔ amɛwo tɔ” mɛ. * Nyɔta koɖo video cɛwo atɛnŋ akpedo ao nukplavi nu akpɔ mɔ, Bibla atɛnŋ akpedo ye nu yeatrɔ ye gbenɔnɔ.

9. Lé àtɛnŋ ado ŋsɛn nukplavi lɔ nɔ axo nuxu so enu ciwo yí ekpla nu nɔ yi xomumɛtɔ koɖo yi xlɔwoɔ?

⁹ Nɔ nukplavi lɔ ɖe nyɔnu alo ɖe asu ɖe, mɛ ci eɖe kplakɔ nu hɛnnɛa? Nɔ dewɛkɔɔ, yɔɛ nɔ akpla nu lɔ koɖo mí. Do ŋsɛn ao nukplavi nɔ axonɔ nuxu so enu ciwo ekplakɔ nu nɔ yi xomumɛtɔ koɖo yi xlɔwo. (Ӡan 1:40-45) Lé àwɛ doɔ?  Àtɛnŋ abiɔɛ se kpoŋ mɔ: “Lé àtɛnŋ adre nyɔnɔnwi cɛ mɛ nɔ ao xomumɛtɔwo doɔ?” alo “Kpukpui ci àtɛnŋ azan asɔ aɖe susu cɛ mɛ nɔ ao xlɔɔ?” Nɔ èwɛni ahan ɔ, anyi ènakɔ kpla nukplavi lɔ nu nɔ avanyi enukplamɛtɔ. Eyi nɔ èjeɔ, átɛnŋ anyi eŋɛnywidratɔ mawaӡinӡindoshimɛ yí atɔ kunuɖegbe yiyi koɖo hamɛ lɔ. Àtɛnŋ abiɔ nukplavi lɔ se mɔ, yijeshi mɛɖe ci yí aji mɔ yeakpla Bibla ma. Nɔ éyɔ mɛɖe nɔ eoɔ, kpɔ amɛ lɔ zeɖeka keŋ asɔ Bibla nukplakpla ɖo ŋmɛ ni. Dasɛ video ci yí nyi, Lé mìwanɔ Bibla nukplakpla doɔ? * ni.

10. Shigbe lé 1 Tɛsalonikitɔwo 2:7, 8 dasɛ nɛ ɖe, lé enukplamɛtɔ ɖe atɛnŋ asran Pɔlu kpɔwɛ doɔ?

¹⁰ Enukplamɛtɔwo ɖo adasɛ mɔ yewosɔ ɖe le ji nɔ yewo nukplaviwo. Kpɔnɔ wo mɔ woavanyi ye nɔviyewo le gbɔngbɔnmɛ le majinjinɖe mɛ. (Hlɛn 1 Tɛsalonikitɔwo 2:7, 8.) Dele fafɛɖe nɔ wo mɔ woatashi xexeɛ mɛ xlɔwo yí awa trɔtrɔ ciwo pleŋ yí ӡan keŋ asɛn Yehowa o. Mìɖo akpedo wo nu nɔ woakpɔ exlɔ nywiwo le hamɛ lɔ mɛ. Nyi xlɔ koɖo ao nukplavi lɔ yí azannɔ gamɛ koɖi le nukplakpla lɔ hwenu koɖo le gabuwo mɛ hɛnnɛ. Nɔ èxonɔ ka ɖaɖɛ, ŋwlɛnɔ nu ɖaɖɛ alo yi jini kpɔ le azan buwo ji to akpɔ nukplakpla zanwoɔ, àdasɛ ni mɔ yesɔ ɖe le ji ni.

11. Nyi mìji mɔ mìwo nukplaviwo akpɔ le hamɛ lɔ mɛɔ, yí nyi yí taɖoɔ?

¹¹ Amɛwo nunɔ mɔ: “Jukɔn yí hɛnnɔ vi.” Mìatɛnŋ anu hɛnnɛ mɔ: “Hamɛ lɔ pleŋ yí kpenɔdo nukplavi ɖeshiaɖe nu.” Eyi taɖo Bibla nukplamɛtɔ nywiwo kpenɔdo wowo nukplaviwo nu nɔ woajeshi nɔvi buwo ɖɛ le hamɛ lɔ mɛ. Nɔvi cɛwo atɛnŋ akpedo wo nu nɔ woate gogo Yehowa doji. Ecɛ agbena nukplavi lɔwo ase vivi nɔ ehadodo koɖo Mawu mɛ ciwo yí atɛnŋ ado ŋsɛn wo yí agbekpedo wo nu le cukaɖawo mɛ. Mìji mɔ nukplavi ɖekaɖeka ase le yiɖeki mɛ mɔ, yenyi hamɛ lɔ mɛ tɔ koɖo gbɔngbɔnmɛ xomu lɔ mɛ tɔ ɖeka. Mìji mɔ nukplavi lɔ ase vivi nɔ lɔnlɔn ci yí le nɔvi Kristɔwo xomu lɔ mɛ. Eyi dagbegbɔnnu ni gbɔxwe ami eha dodo koɖo mɛ ciwo yí datɛnŋ akpedo nu alɔn Yehowa o. (Elo. 13:20) Nɔ yi xlɔ xoxuiwo tɔ gbigbiɔ, ánya mɔ yeatɛnŋ akpɔ exlɔ nywiwo le Yehowa habɔbɔ lɔ mɛ.—Maki 10:29, 30; 1 Piɛ 4:4.

12. Nyi yí taɖo mìɖo axonɔ nuxu so amɛɖekisɔsɔna Mawu koɖo ӡinӡindoshimɛ nu nɔ mìwo nukplaviɔ?

¹² Xonɔ nuxu ni so lé amɛɖekisɔsɔna koɖo ӡinӡindoshimɛwawa le veviɖe do. Nɔ mìkplakɔ Bibla koɖo mɛɖeɔ, mìwo tajinu yí nyi mɔ mìakpedo nu asumɔ Yehowa yí awa ӡinӡindoshimɛ. Nɔ nukplavi lɔ kpla nu lɔ kwɛshila ɖeshiaɖe na nɔ wleci ɖewo, yí vevitɔ nɔ etɔ bɔbɔwo yiyiɔ, éɖo amɔŋje mɛ mɔ, enu ci yí taɖo mìkplakɔ Bibla koɖo ye yí nyi mɔ mìjikɔ akpedo ye nu nɔ yeatrɔ Yehowa Kunuɖetɔ.

13. Afɔ ciwo yí nukplavi lɔ ɖo aɖe keŋ awa ӡinӡindoshimɛɔ?

¹³ Bibla nukplavi nywi atɛnŋ aɖe afɔ ɖewo keke awa ӡinӡindoshimɛ! Ŋkɔtɔ yí nyi mɔ, ájeshi Yehowa, áluin yí axɔɛ se. (Ӡan 3:16; 17:3) Átrɔ Yehowa xlɔ yí agbenyi exlɔ koɖo nɔviwo le hamɛ lɔ mɛ. (Ebre. 10:24, 25; Ӡaki 4:8) Le yiyimɛɔ, nukplavi lɔ ase vevi do enudɔndɔn ciwo yí ewa vayi nu yí ami wo wawa. (Edɔ. 3:19) Yi xɔse acucui hɛnnɛ yí atɔ nuxu xoxo so nyɔnɔnwi ciwo yí ekpla nu nɔ mɛbuwo. (2 Kor. 4:13) Yi goduɔ, ásɔ yiɖeki na Yehowa yí awa ӡinӡindoshimɛ keŋ asɔ ɖo kpe yi ji. (1 Piɛ 3:21; 4:2) Amɛshiamɛ yí kpɔnɔ jijɔ le ӡinӡindoshimɛ ŋkeke lɔ ji! Nɔ nukplavi lɔ ɖe afɔ ɖeɔ, kanfui yí ado ŋsɛn yi nɔ aɖe afɔ kpɛtɛwo.

14. Lé enukplamɛtɔ ɖe atɛnŋ agbeje ŋkɔyiyi nukplavi lɔ tɔ mɛ doɔ?

¹⁴ Ele mɔ mìado ӡinxo nɔ mìkpekɔdo nukplavi ɖe nu nɔ asɔ yiɖeki na Yehowa keŋ awa ӡinӡindoshimɛ. Vɔ mìɖo akpɔ hɛnnɛ mɔ nukplavi lɔ jikɔ mɔ yeasɛn Yehowa Mawu nyao ma. Nukplavi lɔ dadasɛ mɔ yeji mɔ yeazɔn do Yesu sewo jia, alo éjikɔ kpoŋ mɔ yeakpla enunywi ciwo yí le Bibla mɛ?

15. Nyiwo yí adasɛ nɔ nukplamɛtɔ mɔ enukplavi ɖe je yí awa ӡinӡindoshimɛɔ?

¹⁵ Gbejenɔ ŋkɔyiyi ciwo nukplavi lɔ wakɔ mɛ blaŋblaŋ. Le kpɔwɛ mɛ, énunɔ yi seselelanmɛwo nɔ Yehowaa? Édonɔ gbe ɖaɖa nɔ Yehowaa? (Eha. 116:1, 2) Bibla hlɛnhlɛn jɔnɔ ji nia? (Eha. 119:97) Éyinɔ bɔbɔwo gashiagamɛa? (Eha. 22:22) Éwa trɔtrɔwo le yi gbenɔnɔ nu keŋ sɔ dasɛ mɔ yewakɔ do enu ci yekplakɔ jia? (Eha. 119:112) Étɔ seŋ kankan  nɔ yi xomumɛtɔwo koɖo yi xlɔwo so enu ciwo yí ekplakɔ nua? (Eha. 9:1) Ci yí gbele veviɖe yí nyi mɔ, nukplavi lɔ jikɔ mɔ yeanyi Yehowa Kunuɖetɔa? (Eha. 40:8) Nɔ nukplavi lɔ dewakɔ ŋkɔyiyi le enu cɛwo ɖe mɛɔ, sɔ ayexa keŋ aji enu ci gbɔ eso. Le yi goduɔ, kan seŋ koɖi so nu koɖo lɔnlɔn, vɔ to nyɔnɔnwi ni. *

16. Nyi yí adɔ àmi enukplakpla koɖo mɛɖeɔ?

¹⁶ Kpɔ mɔ yeakpɔtɔ kplakɔ nu koɖo amɛ lɔ alo yeaɖo te enukplakpla lɔ ma. Biɔ eoɖeki se mɔ: ‘Nukplavi lɔ gbe mɔ yedadranɔ nukplakpla lɔ doa? Égbe mɔ yedayi bɔbɔwoa? Égbe mɔ yedatrɔ adɛn baɖawoa? Égbekpɔtɔ le ŋsusɛnsɛnha ɖe mɛa?’ Nɔ ɖoŋci lɔ nyi ɛɛ, vɔ yí èkpɔtɔ kplakɔ nu koɖiɔ, ele shigbe mɔ èkplakɔ lé woxunɔ tɔ do mɛ ci yí deji mɔ eshi le klɛn gbaza nɔ ye hannɛ! Nɔ nukplavi lɔ delɔn enu ciwo ekplakɔ o yí deji mɔ yeasɔ wo do dɔwawa mɛ ɖe, nyi yí taɖo woakpɔtɔ akplakɔ nu koɖiɔ?

17. Sɔ koɖo 1 Timɔte 4:16 ɖe, nyi yí Bibla nukplamɛtɔwo pleŋ ɖo awaɔ?

¹⁷ Mìdonɔ vevi mìwo gbanleamɛji ci yí nyi nukplaviwowawadɔ lɔ yí ji mɔ, mìakpedo mìwo Bibla nukplaviwo nu nɔ woawa ŋkɔyiyi keŋ awa ӡinӡindoshimɛ. Eyi taɖo mìji mɔ mìana mɔ Bibla nɔ akpla nu lɔ wo yí mìakpla nu lɔ koɖo ezolelanmɛ koɖo kankandoji. Mìado ŋsɛn nukplavi lɔ nɔ aɖo exlɔwo le hamɛ lɔ mɛ. Mìagbexonɔ nuxu ni so tajinu ci yí nyi amɛɖekisɔsɔna koɖo ӡinӡindoshimɛwawa nu yí agbejenɔ ŋkɔyiyi yi tɔ mɛ blaŋblaŋ. (Kpɔ dakavi ci yí nyi, “ Enu ciwo enukplamɛtɔ ɖo awa nɔ nukpaviwo awa ŋkɔyiyi keŋ awa ӡinӡindoshimɛ.”) Jijɔ yí enyi nɔ mì mɔ mìwakɔ akpa ɖe le amɛhwɛngandɔ cɛ mɛ! Lé vamɛ mɔ mìaɖui gligaan yí awa ci ji mìkpe keŋ akpedo Bibla nukplaviwo nu nɔ woawa ŋkɔyiyi keŋ awa ӡinӡindoshimɛ.