Kpukpui ci nu enyɔbiɔse lɔ kudo nu mɔ: “Nɔ èkpɔɛ mɔ wotafu wamɛnɔ do yí cu afɔ enujɔjɔɛ koɖo jɔjɔɛnyinyi le míwo nutwi mɛɔ, ŋgbekpaca eo o. Ðo mɛ ci yí yi ji wu acɛkpatɔ ŋkuvileji ŋtɔ́ kpɔkpɔɛ yí mɛ ciwo yí yi ji wu wowo can li.”—Ŋunu. 5:8, NWT.

Nɔ mìsɔ agbetɔ susu kpɔ kpukpui cɛɔ, mìamɔ yɛxokɔ nuxu so agbetɔwo cɛkpakpa ɖekɛ nu. Vɔ nɔ mìdo ŋkuvi yi mɛ kpɔ nywiɖeɔ, mìakpɔ mɔ edasɛ nyɔnɔnwi ɖɛka so Yehowa nu hɛnnɛ yí akɔnfafa koɖo kankandoji atɛnŋ ato so mɛ nɔ mì.

Ŋununyatɔ 5:8 xokɔ nuxu so acɛkpatɔ ci yí trenɔ fun nɔ wamɛnɔwo yí gbewanɔ enumajɔmajɔwo do wo nu. Acɛkpatɔ lɔ ɖo anya mɔ mɛɖeka li yí yi ji alo ɖo acɛ wu ye yí kpɔkpɔ ye. Enyɔ Iɔ yí nyi mɔ mɛbuwo tɛnŋ li yí aɖo acɛ wui. Ewa ŋshishi mɔ le agbetɔwo cɛkpakpawo mɛɔ, acɛkpatɔwo pleŋ tɛnŋ nyi enuficificiwatɔwo yí wowo nuwanawo na amɛwo kpekɔ fun le nɔnɔmɛ sugbɔ mɛ.

Vɔ ci ezenɔ shigbe mɔ emɔkpɔkpɔ ɖekɛ deli can ɔ, mìatɛnŋ akpɔ akɔnfafa ci mìnya mɔ Yehowa ‘kpɔkpɔ mɛ ciwo le texwe ganganwo’ le agbetɔwo cɛkpakpa mɛ. Mìatɛnŋ abiɔ kpekpedonu so Mawu gbɔ yí adro mìwo gban kpɛnkpinwo do ji. (Eha. 55:22; Fili. 4:6, 7) Mìnya mɔ “Yehowa ŋkuviwo kpɔnɔ afishiafi le nyigban lɔ pleŋ ji nɔ azan yi ŋsɛn keŋ ahwlɛn mɛ ciwo yí ku do nu koɖo wowo ji pleŋ.”—2 Kro. 16:9, NWT.

Edasɛ mɔ Ŋununyatɔ 5:8 ɖo ŋwi nɔ mì mɔ xexe cɛ ci mɛ mìleɔ, mɛɖe li yí ɖonɔ acɛ wu le agbetɔwo cɛkpakpa mɛ. Vevitɔɔ, kpukpui lɔ atɛnŋ aɖo ŋwi nɔ mì mɔ Yehowa yí yi ji wu, ɛɛ, eyi nyi Xexegbɛ Cɛkpatɔgan. Eviɛ, Yesu Kristo ci yí nyi Efyɔ nɔ yi Fyɔɖuxu, ji eto yí kpakɔ acɛ yɛ. Ŋsɛnwopleŋtɔ ci yí kpɔkɔ enushianu koɖo amɛshiamɛ le jɔjɔɛɖe keŋkeŋ. Ahanke Eviɛ can le nɛ.