1. Sɔgbe koɖo Malashi 3:16 ɖe, wema ci Yehowa ŋwlɛkɔɔ, yí nyi yí le mɛɔ?

 SO XWE kotokun nɛniɖe keɔ, Yehowa ɖo wema vevi ɖeka ci mɛ eŋwlɛnɔ yi sɛntɔ egbejinɔtɔwo ŋkɔwo do. Abɛli yí nyi amɛ ŋkɔtɔ ci ŋkɔ eŋwlɛ. * (Luiki 11:50, 51) So hwenɔnuɔ, Yehowa gbeŋwlɛ ŋkɔ buwo do wema lɔ mɛ, yí ŋkɔ miliɔn nɛniɖe yí le wema lɔ mɛ gbɛ. Bibla yɔ wema ŋtɔ́ mɔ ‘eŋwiɖoɖo wema’ alo “agbe wema.” Le nyɔta cɛ mɛɔ, mìayɔ wema lɔ mɔ “agbe wema.”—Hlɛn Malashi 3:16; Enyɔ. 3:5; 13:8.

2. Miwo ŋkɔwo yí woŋwlɛ do agbe wema lɔ mɛɔ, yí lé mìawɛ yí mìwo ŋkɔ can anɔ mɛɔ?

² Mɛ ciwo pleŋ yí sɛnnɔ Yehowa, vɔnnɔ ni, yí buini yí gbelɔnnɔ yi ŋkɔ lɔ ŋkɔwo yí le wema vevi cɛ mɛ. Emɔ ahun nɔ wo yí woakpɔ agbe mavɔ. Nɔ xɔse ci mìɖo do Yesu tafɛnvɔnsa lɔ nu na yí mìwo koɖo Yehowa nyi exlɔ bakpomadɔnwoɔ, atɛnŋ ana woaŋwlɛ mìwo ŋkɔwo do wema lɔ mɛ gbɛ. (Ʒan 3:16, 36) Mì pleŋ ji mɔ mìwo ŋkɔ le nɔ wema ŋtɔ́ mɛ, nɔ jeŋkwi mɛ alo nyigban ji mìɖokɔ ŋkuvi mɔ mìavanɔ agbe le can.

3-4. (a) Nɔ woŋwlɛ mìwo ŋkɔwo do agbe wema lɔ mɛ vyɛ ɖe, edasɛ mɔ mìakpɔ agbe mavɔa? Dre mɛ. (b) Nyi mìakpɔ le nyɔta cɛ koɖo ci yí gbɔgbɔ mɛɔ?

³ Ecɛ dasɛ mɔ de buɖe anyi o, mɛ ciwo pleŋ ŋkɔ woŋwlɛ do wema cɛ mɛ akpɔ agbe mavɔ dandandan a? Mìakpɔ  ɖoŋci nɔ nyɔbiɔse cɛ le enyɔ ciwo yí Yehowa nu nɔ Moizi le Hunhun 32:33 mɛ. Yehowa nu mɔ: “Amɛ ciwo ɖekɛ Na cucu le Anyi wema mɛ nyi amɛ ciwo yí je agɔ do Ŋ.” Edasɛ mɔ woatɛnŋ acucu ŋkɔ ciwo yí le wema cɛ mɛ yɛ dru. Ele shigbe Yehowa ŋwlɛ ŋkɔ lɔwo koɖo klɛyɔn hannɛ. (Enyɔ. 3:5.) Mìɖo atekpɔ keke nɔ mìwo ŋkɔwo akpɔtɔ ale wema cɛ mɛ keke je hwecinu woavasɔ biki sɔ ŋwli yí anyi evɔ.

⁴ Ci ele nɛnɛɔ, mɛɖewo tɛnŋ biɔ nyɔ ɖewo se. Le kpɔwɛ mɛ, nyɔ ci Bibla nu so mɛ ciwo ŋkɔ woŋwlɛ do agbe wema lɔ mɛ koɖo mɛ ciwo ŋkɔ wodeŋwlɛ do mɛɔ? Hwenu yí mɛ ciwo ŋkɔwo yí kpɔtɔ le wema lɔ mɛ akpɔ agbe mavɔɔ? Vɔ mɛ ciwo yí detɛnŋ jeshi Yehowa ɖɛ gbɔxwe yí ku ɖe, lé anyi nɔ woɔ? Woasɛnŋ aŋwlɛ wowo ŋkɔwo do wema cɛ mɛa? Mìakpɔ ɖoŋci nɔ nyɔbiɔse cɛwo le nyɔta cɛ koɖo ci yí gbɔgbɔ mɛ.

MIWO ŊKƆWO YÍ LE WEMA LƆ MƐƆ?

5-6. (a) Shigbe lé Filipitɔwo 4:3 nui nɛ ɖe, miwo ŋkɔwo can yí le agbe wema lɔ mɛɔ? (b) Hwenu yí wodagbevacucu wowo ŋkɔwo kpɔ gbeɖe le agbe wema lɔ mɛɔ?

⁵ Miwo ŋkɔwo yí woŋwlɛ do agbe wema lɔ mɛɔ? Nɔ mìakpɔ ɖoŋci nɔ nyɔbiɔse cɛɔ, mìaxo nuxu so gbɛbɔbɔ vovovo amatɔn ɖekawo nu. Le wo mɛɔ, woŋwlɛ mɛɖewo ŋkɔwo do agbe wema lɔ mɛ yí mɛɖewo ŋkɔwo dele mɛ o.

⁶ Gbɛbɔbɔ ŋkɔtɔ yí nyi mɛ ciwo wosɔ mɔ wo le ɖu fyɔ koɖo Yesu le jeŋkwi mɛ. Le kakacɛ mɛ ɖe, wowo ŋkɔwo le agbe wema lɔ mɛa? Ɛɛ. Le enyɔ ciwo yí Pɔlu nu nɔ yi “kpena” ciwo yí le Filipi mɛɔ, amɛshiaminɔ ciwo woyɔ mɔ wole yi ɖu fyɔ koɖo Yesu, ŋkɔwo le agbe wema lɔ mɛ vɔ. (Hlɛn Filipitɔwo 4:3.) Vɔ gbɔxwe wowo ŋkɔwo akpɔtɔ anɔ wema cɛ mɛɔ, woɖo akpɔtɔ anɔ gbeji. Eyi wowo ŋkɔwo aci agbe wema lɔ mɛ hwenu woatre wo nu  kpɛtɛkpɛtɛtɔ. Ecɛ ajɔ doŋkɔ nɔ wowo ku alo doŋkɔ nɔ hwenu efunkpekpe gangan lɔ atɔ ji.—Enyɔ. 7:3.

7. Sɔgbe koɖo Enyɔdasɛ 7:16, 17 ɖe, gayimɛ yí agbetɔ sugbɔsugbɔ lɔwo ciwo yí nyi lɛngbɔ bu mɛ tɔwo ŋkɔwo aci agbe wema lɔ mɛɔ?

⁷ Gbɛbɔbɔ amɛvetɔ lɔ yí nyi agbetɔ sugbɔsugbɔ lɔwo ciwo yí nyi lɛngbɔ bu mɛ tɔwo. Woŋwlɛ wowo ŋkɔwo do agbe wema lɔ mɛ ɖɛyɛa? Ɛɛ. Wowo ŋkɔwo akpɔtɔ ale agbe wema lɔ mɛ le Harmagedɔn godua? Ɛɛ. (Enyɔ. 7:14) Yesu nu mɔ mɛ cɛwo ciwo yí le shigbe lɛngbɔwo nɛ ayi “agbe mavɔ mɛ.” (Mt. 25:46) Vɔ mɛ cɛwo ciwo yí agan le Harmagedɔn mɛ dakpɔ agbe mavɔ lɔ zeɖeka o. Woakpɔtɔ aŋwlɛ wowo ŋkɔwo koɖo klɛyɔn do agbe wema lɔ mɛ. Le Xwe Kotokun ɖeka Cɛkpakpa lɔ mɛɔ, Yesu “a kplɔ wo yì gumɛshi ci yí nanɔ agbe gbɔ.” Mɛ ciwo yí wa do Yesu mɔdasɛnamɛwo ji yí nɔ gbeji nɔ Yehowa ŋkɔwo yí aci agbe wema lɔ mɛ tɛgbɛɛ.—Hlɛn Enyɔdasɛ 7:16, 17.

8. Miwo ŋkɔwo yí wodeŋwlɛ do agbe wema lɔ mɛɔ, yí nyi ajɔ do wo jiɔ?

⁸ Gbɛbɔbɔ amɛtɔntɔ lɔ yí nyi mɛ ciwo yí le shigbe egbɔwo nɛ, woagu wo le Harmagedɔn mɛ. Wowo ŋkɔwo dele agbe wema lɔ mɛ o. Yesu nu mɔ woayi “etodɔndɔn mavɔ mɛ.” (Mt. 25:46) Gbɔngbɔn kɔkɔɛ na apotru Pɔlu nu mɔ, “wo a sɔ trɔntrɔn mavɔmavɔ sɔ dɔntɔ nɔ wo.” (2 Tɛs. 1:9; 2 Piɛ 2:9) Ahanke anyi nɔ mɛ ciwo yí xa shi wa nuvɔn do gbɔngbɔn kɔkɔɛ nu nɛ. Woaxɔ etodɔndɔn mavɔ, wodakpɔ agbe mavɔ o. Yi mɛ kɔ petii mɔ, wodafɔn wo so ku o. (Mt. 12:32; Maki 3:28, 29; Ebre. 6:4-6) Ecɛyɛɔ, mìaxo nuxu so gbɛbɔbɔ amɛve ciwo yí woafɔn do agbe le nyigban ji nu.

MƐ CIWO YÍ WOAFƆN SO KU

9. Shigbe lé Edɔwawawo 24:15 nui nɛ ɖe, gbɛbɔbɔ amɛve ciwo yí woafɔn so kuɔ, yí vovototo ci yí le wo mɛɔ?

⁹ Bibla xo nuxu so amɛwo gbɛbɔbɔ amɛve ciwo yí woafɔn so ku yí woanɔ agbe tɛgbɛɛ le nyigban ji nu, “amɛnywi” alo amɛjɔjɔɛ koɖo “amɛvɔn” alo amɛmajɔmajɔ. (Hlɛn Edɔwawawo 24:15.) “Amɛnywi” alo amɛjɔjɔɛ lɔwo yí nyi mɛ ciwo yí sɛn Yehowa le egbejinɔnɔ mɛ hwenu wole agbe. “Amɛvɔn” alo amɛmajɔmajɔ lɔwo nyi mɛ ciwo yí desɛn Yehowa gbɔxwe yí ku o. Wodenɔ agbenywi vayi o. Ci woafɔn gbɛbɔbɔ amɛve ŋtɔ́wo do agbe ɖe, mìatɛnŋ anu mɔ woŋwlɛ wowo ŋkɔwo do agbe wema lɔ mɛa? Nɔ mìakpɔ ɖoŋci nɔ nyɔbiɔse ŋtɔ́ɔ, mìaxo nuxu so gbɛbɔbɔ ɖekaɖeka nu.

10. Nyi yí taɖo woafɔn ‘amɛjɔjɔɛwoɔ,’ yí edɔ ci eɖewo awa le wo mɛɔ? (Gbekpɔ “Enyɔbiɔse ciwo yí so yi hlɛntɔwo gbɔ” ci yí xo nuxu so fɔnfɔnsoku nyigban ji tɔ nu le Jutakpɔxɔ cɛ mɛ.)

¹⁰ Gbɛbɔbɔ amɛnɛtɔ lɔ yí nyi “amɛnywi” alo amɛjɔjɔɛwo. Woŋwlɛ wowo ŋkɔwo do agbe wema lɔ mɛ hwenu wole agbe sa. Vɔ ci wovaku yɛ ɖe, woaɖe wowo ŋkɔwo si le agbe wema lɔ mɛa? Oo, ɖo le Yehowa gbɔɔ, wokpɔtɔ “le agbe” ni. Yehowa “de nyi amɛkukuwo Mawu o. Vɔ, É nyi amɛlagbuwo Mawu. Ðo ɔ, amɛshamɛ le agbe ni.” (Luiki 20:38) Edasɛ mɔ nɔ wofɔn amɛjɔjɔɛwo do agbeɔ, woakpɔ wowo ŋkɔwo le agbe wema lɔ mɛ, ɖo woŋwlɛ wo koɖo “klɛyɔn” vayi sa. (Luiki 14:14) Woasɔ mɛɖewo le amɛjɔjɔɛ cɛ lɔwo ciwo woafɔn mɛ yí woanyi “acɛkpatɔwo toto nyigban lɔ ji.”—Eha. 45:16.

11. Nyi ‘amɛmajɔmajɔwo’ ɖo akpla keŋ gbɔxwe woatɛnŋ aŋwlɛ wowo ŋkɔwo do agbe wema lɔ mɛɔ?

¹¹ Ecɛyɛɔ, mìaxo nuxu so gbɛbɔbɔ  kpɛtɛkpɛtɛtɔ nu, eyi nyi amatɔntɔ. Wowo yí nyi “amɛvɔn” alo amɛmajɔmajɔwo. Taŋfuin ci wodejeshi Yehowa sewo ɖɛɔ, wodenɔ agbe esɔ koɖo yi se jɔjɔɛwo hwenu wole agbe sa o. Eyi taɖo wodeŋwlɛ wowo ŋkɔwo do agbe wema lɔ mɛ o. Vɔ Mawu afɔn wo so ku keŋ nɔ emɔ atɛnŋ ahun nɔ wo nɔ woaŋwlɛ wowo ŋkɔwo do agbe wema lɔ mɛ. Woɖo akpedo ‘amɛmajɔmajɔ’ cɛwo nu sugbɔ. Ðo hwenu wole agbe saɔ, wowa enudɔndɔnwo haan. Eyi taɖo woɖo akpla wo lé woawɛ awa do Yehowa se jɔjɔɛwo ji. Nɔ woatɛnŋ akpedo wo nu ahan ɔ, Mawu Fyɔɖuxu lɔ anɔ ŋkɔ nɔ enukplakpla amɛwo dɔ gangan ɖeka ci wodewa le nyigban ji ahan kpɔ o.

12. (a) Miwo yí akpla nu amɛmajɔmajɔwoɔ? (b) Nyi yí ajɔ do mɛ ciwo yí agbe mɔ yewodawa do enu ci wokpla wo jiɔ?

¹² Miwo yí akpla nu amɛmajɔmajɔ lɔwoɔ? Wowo yí nyi agbetɔ sugbɔsugbɔ lɔwo koɖo amɛjɔjɔɛ ciwo yí woafɔn. Gbɔxwe woaŋwlɛ amɛmajɔmajɔwo ŋkɔwo do agbe wema lɔ mɛɔ, ele mɔ woatekpɔ anyi exlɔ koɖo Yehowa yí asɔ wowoɖekiwo jo ni. Yesu koɖo amɛshiaminɔwo ale jeŋkwi mɛ yí aleleɛ ŋkuvi do lé amɛmajɔmajɔwo wakɔ nu do enu ci wokplakɔ wo nu. (Enyɔ. 20:4) Nɔ mɛɖe gbe mɔ yedawa do enu ci wokplakɔ ye jiɔ, woaɖi si, nɔ égbeɖo exwe 100 can. (Ezai 65:20) Yehowa koɖo Yesu tɛnŋ kpɔnɔ enu ci yí le ji mɛ nɔ amɛ yí wodalɔn yí mɛɖe avadahɛn xexe yoyu lɔ o.—Ezai 11:9; 60:18; 65:25; Ʒan 2:25.

FƆNFƆNSOKU NƆ AGBE KOÐO NƆ KOJOÐOÐO

13-14. (a) Lé mìsenɔ Yesu nyɔ ciwo yí le Ʒan 5:29 mɛ do saɔ? (b) Nyi mìvado jeshi kudo nyɔ cɛwo nuɔ?

¹³ Yesu gbexo nuxu so mɛ ciwo woafɔn so ku le nyigban ji nu. Le kpɔwɛ mɛ, énu mɔ: “Gaxoxo lɔ gbɔgbɔ, yí amɛ ciwo yí le yɔdu mɛ a se egbe lɔ. Amɛ ciwo yí wa enu nywi ɔ, a fɔn yí a nɔ̀ agbe. Vɔ, amɛ ciwo yí  wa enuvwin a gbe fɔn, yí wo a ɖo kojo nɔ wo.” (Ʒan 5:28, 29) Yesu nyɔ cɛwo gɔnmɛ ɖe?

¹⁴ Mìsenɔ nyɔ cɛwo ciwo Yesu nu gɔnmɛ vayi sa mɔ woxokɔ nuxu so ŋciwo mɛ ciwo wofɔn do agbe awa le fɔnfɔnsoku wowotɔ godu, ci yí nyi mɔ woafɔn mɛɖewo do agbe yí woawa nunywiwo, vɔ ɖewo awa nudɔndɔnwo. Vɔ do jeshi mɔ Yesu denukɔ mɔ mɛ ciwo woafɔn so eŋwiɖoɖo yɔduwo mɛ avawa enunywi alo enudɔndɔnwo o. Enu ci yí jɔ vayi nu yí exokɔ nuxu so. Éxokɔ nuxu so mɛ ciwo yí “wa enunywi” koɖo mɛ ciwo yí “wa enuvwin” nu. Edasɛ mɔ enu ci wowa hwenu wole agbe sa nyɔ yí enukɔ. Ecɛ sɔgbe, ɖo wodaɖe emɔ nɔ mɛɖekpokpui yí awa enudɔndɔn ɖe le xexe yoyu lɔ mɛ o. Amɛmajɔmajɔ lɔwo wa enubaɖabaɖawo vayi sa hwenu wole agbe. Vɔ ecɛyɛ ɖe, lé mìase enyɔ ciwo yí Yesu nu so ‘fɔnfɔnsoku do agbe’ koɖo ‘fɔnfɔnsoku nɔ kojoɖoɖo’ gɔnmɛɔ?

15. Miwo yí woafɔn nɔ ‘fɔnfɔnsoku do agbeɔ,’ yí nyi yí taɖoɔ?

¹⁵ Woafɔn amɛjɔjɔɛwo, mɛ ciwo yí wa enunywi hwenu wole agbe nɔ ‘fɔnfɔnsoku do agbe,’ ɖo woŋwlɛ wowo ŋkɔwo do agbe wema lɔ mɛ vɔ. Ecɛ dasɛ mɔ fɔnfɔnsoku “amɛ ciwo wa enu nywi” tɔ ci nyɔ yí Ʒan 5:29 nu nyi ŋɖekɛŋmɛ lɔ koɖo fɔnfɔnsoku “amɛnywiwo” tɔ ci nyɔ wonu le Edɔwawawo 24:15. Gɔnmɛsese cɛ sɔ koɖo enyɔ ci wonu le Rɔmatɔwo 6:7 mɛ, ci yí nu mɔ: “Amɛ ci yí ku to le hlɔnhlɔn agɔjejetɔ mɛ.” Eyi taɖo hwenu amɛjɔjɔɛ cɛwo kuɔ, Yehowa sɔ wowo nuvɔnwo ke wo, vɔ yí kpɔtɔ yí ɖonɔ ŋwi enu ciwo wowa yí sɔ nɔ gbeji ni hwenu wole agbe. (Ebre. 6:10) Vɔ gbɔxwe amɛjɔjɔɛ cɛwo ciwo wofɔn ŋkɔwo akpɔtɔ anɔ agbe wema lɔ mɛɔ, woɖo akpɔtɔ anɔ gbeji.

16. Lé mìase ‘fɔnfɔnsoku nɔ kojoɖoɖo’ gɔnmɛ doɔ?

¹⁶ Vɔ lé anyi nɔ mɛ ciwo yí wa enukpotuwo hwenu wole agbeɔ? Ci wosɔ wowo nuvɔnwo ke wo hwenu woku can ɔ, wodesɛn Yehowa hwenu wole agbe o. Wodeŋwlɛ wowo ŋkɔwo do agbe wema lɔ mɛ o. Eyi taɖo fɔnfɔnsoku “amɛ ciwo yí wa enuvwin” tɔ ke yí gbenyi fɔnfɔnsoku “amɛvɔn” alo amɛmajɔmajɔwo tɔ ci nu woxo nuxu so le Edɔwawawo 24:15. Wowotɔ yí nyi ‘fɔnfɔnsoku nɔ kojoɖoɖo.’ * Ecɛ dasɛ mɔ Yesu alé ŋkuvi do amɛmajɔmajɔ cɛwo nu yí akpɔ mɔ woanɔ gbeji ma. (Luiki 22:30) Axɔ gamɛ gbɔxwe Yesu akpɔ mɔ woje nɔ woaŋwlɛ wowo ŋkɔwo do agbe wema lɔ mɛ ma. Nɔ amɛmajɔmajɔ cɛwo tashi agbedɔndɔn ciwo wonɔnɔ sa yí sɔ wowoɖekiwo jo nɔ Yehowa keŋ gbɔxwe woaŋwlɛ wowo ŋkɔwo do agbe wema lɔ mɛ.

17-18. Nyi yí mɛ ciwo pleŋ woafɔn do agbe le nyigban ji ɖo awaɔ, yí nyiwo yí nyi “enu ciwo wowa” ci nyɔ wonu le Enyɔdasɛ 20:12, 13 mɛɔ?

¹⁷ Nɔ mɛɖe nyi amɛjɔjɔɛ alo amɛmajɔmajɔ hwenu wofuin so ku can ɔ, ele mɔ áwa do ese ciwo yí le wema yoyu ciwo woahun le exwe 1000 cɛkpakpa lɔ mɛ ji. Apotru Ʒan dre enu ci ekpɔ le ŋtegan lɔ mɛ mɔ: “Ŋ gbe kpɔ amɛ ciwo yí ku, amɛshinshinwo koɖo ɖevihwɛwo, yí wo lete le ŋkɔ nɔ efyɔ ʒinkpin lɔ. Eyi, wo hun agbe wema lɔ. Wema buwo gbe le hunhun. Wo  ɖo kojo nɔ amɛkuku hunnɔwo do enu ciwo yí wo wa ji. Wo ŋwlɛ enu hunnɔ lɔwo do wema lɔ mɛ.”—Enyɔ. 20:12, 13.

¹⁸ Nyiwo yí mɛ ciwo yí wofɔn so ku ‘wa’ ciwo ji woanɔ te do yí aɖo kojo nɔ woɔ? Enu ciwo wowa hwenu wole agbe sa yɔa? Oo! Ðo ŋwi mɔ wocu wowo nuvɔn xoxwiwo fɛn hwenu woku. Eyi taɖo “enu ciwo wowa” le lɛ datɛnŋ anyi enu ciwo wowa vayi hwenu wole agbe sa o. Lé wovawa nu do ekpla ci wona wo le xexe yoyu lɔ mɛ nu yí nyi enu ciwo wowa lɔwo. Egbejinɔtɔwo shigbe Nowe, Samiɛli, Davidi, koɖo Daniɛli ŋtɔkpu can ɖo akpla nu so Yesu Kristo nu yí aɖo xɔse do yi vɔnsa lɔ nu. Nɔ ŋsu cɛwo ɖo akpla nuɔ, edasɛ mɔ enu ci amɛmajɔmajɔ cɛwo akpla asugbɔ haan!

19. Nyi yí ajɔ do mɛ ciwo yí agbe mɔnukpɔkpɔ nywi ŋtɔ́ jiɔ?

¹⁹ Nyi yí ajɔ do mɛ ciwo yí agbe mɔnukpɔkpɔ nywi ŋtɔ́ jiɔ? Enyɔdasɛ 20:15 nu mɔ: “Nɔ̀ wo de kpɔ amɛ ɖe ŋkɔ le agbe wema lɔ mɛ ɔ, wo sɔnɔ amɛ lɔwo dannɔŋkpe do etɔsasa zo lɔ mɛ.” Woagu wo si keŋkeŋ yí wodagbekpɔ wo kpɔ o. Eyi taɖo ele veviɖe mɔ mìana nɔ mìwo ŋkɔ anɔ agbe wema lɔ mɛ yí mìawɛ nɔ akpɔtɔ anɔ mɛ tɛgbɛɛ!

20. Edɔ dojijɔnamɛ ɖeka ci woawa le Exwe Kotokun ɖeka Cɛkpakpa lɔ mɛɔ? (Kpɔ foto ci yí le akpa lɔ ji.)

²⁰ Exwe Kotokun ɖeka Cɛkpakpa lɔ anyi hwenu dojijɔnamɛ ɖeka haan! Woawa enukplakpla amɛwo dɔ gangan ɖeka ci Mawu mɛwo dewa le nyigban ji kpɔ o. Vɔ agbenyi hwenu ɖeka ci mɛ woale ŋkuvi do lé amɛjɔjɔɛwo koɖo amɛmajɔmajɔwo wa nu do nu. (Ezai 26:9; Edɔ. 17:31) Lé woawa enukplakpla amɛwo toto lɔ doɔ? Nyɔta ci yí kplɔ ecɛ do akpedo mì nu mìase enyɔ cɛ mɛ yí agbena yí toto nywi cɛ ajɔ ji nɔ mì.