Mìakpɔ lé Bibla ɖo enyɔ cɛwo ŋci do.

Edɔwawawo 24:15 nu mɔ “amɛnywi [alo amɛjɔjɔɛ] koɖo amɛvɔn [alo amɛmajɔmajɔ] can wo a fɔn wo so ekumɛ.” Amɛjɔjɔɛwo yí nyi mɛ ciwo yí se tonu nɔ Mawu hwenu wole agbe sa yí woŋwlɛ wowo ŋkɔwo do agbe wema lɔ mɛ. (Mal. 3:16) Amɛmajɔmajɔwo nyi mɛ ciwo yí emɔ detɛnŋ hun nɔ yí wokpla nu so Yehowa nu hwenu wole agbe sa o, eyi taɖo wodeŋwlɛ wowo ŋkɔwo do agbe wema lɔ mɛ o.

Ʒan 5:28, 29 xo nuxu so gbɛbɔbɔ amɛve ɖekɛ lɔwo ciwo nu Edɔwawawo 24:15 xo nuxu so. Yesu nu mɔ “amɛ ciwo yí wa enu nywi ɔ, a fɔn yí a nɔ̀ agbe. Vɔ, amɛ ciwo yí wa enuvwin a gbe fɔn, yí wo a ɖo kojo nɔ wo.” Mɛ ciwo yí nyi amɛjɔjɔɛwo wa enunywiwo hwenu wole agbe sa. Ci wowo ŋkɔwo kpɔtɔ le ŋwlɛŋwlɛ le agbe wema mɛɔ, eyi taɖo woafɔn wo nɔ agbe. Vɔ amɛmajɔmajɔwo wa enuvwinwo hwenu wole agbe sa. Eyi dɔ woafɔn wo nɔ kojoɖoɖo. Wodeŋwlɛ wowo ŋkɔwo do agbe wema lɔ mɛ o, eyi taɖo woaɖo kojo nɔ wo, ci gɔnmɛ yí nyi mɔ woalé ŋkuvi do wo nu akpɔ lé woawa enu do. Le hwenɔnuɔ, emɔ ahun nɔ wo yí woakpla enu so Yehowa nu yí woatɛnŋ avaŋwlɛ wowo ŋkɔwo do agbe wema lɔ mɛ.

Enyɔdasɛ 20:12, 13 nu mɔ mɛ ciwo pleŋ wofɔn so ku ɖo awa do ‘enu ciwo woŋwlɛ do wema lɔ mɛ’ ji, eyi nyi ese yoyu ciwo Mawu ana mì le xexe yoyu lɔ mɛ. Yehowa agu mɛ ciwo yí agbe mɔ yewodawa do wo ji si.—Ezai. 65:20.

Daniɛli 12:2 nu ɖɛ mɔ mɛɖewo ciwo yí le alɔn dɔnkɔ le ku mɛ afɔn nɔ “agbe mavɔ yí ebuwo nɔ ŋkpɛn mavɔ.” Kpukpui cɛ xokɔ nuxu so enu ci yí ajɔ do amɛwo ji le fɔnfɔnsoku wowotɔ godu. Woakpɔ “agbe mavɔ” alo “ŋkpɛn mavɔ.” Eyi taɖo le xwe 1 000 lɔ vɔvɔnuɔ, mɛɖewo akpɔ agbe mavɔ vɔ woagu mɛɖewo gbijigbiji.—Enyɔ. 20:15; 21:3, 4.

Mìasɔ kpɔwɛ cɛ asɔ ɖe mɛ. Mìatɛnŋ asɔ gbɛbɔbɔ amɛve ciwo woafɔn lɔwo sɔ koɖo mɛdru ɖekawo ciwo yí ji mɔ yewoavayi nɔ eju bu mɛ. Amɛjɔjɔɛwo le shigbe mɛ ciwo yí xɔ wema ci mɛɖe axɔ gbɔxwe anɔ eju ɖe mɛ yí woaxɔ gbe do ji ni mɔ yi le nɔ ju lɔ mɛ yí aɖo vovo ɖekatɔwo. Vɔ amɛmajɔmajɔwo le shigbe mɛdru ci yí xɔ wema ci woni mɔ asɔ nɔ eju lɔ mɛ na nɔ hwenu kleŋ ɖe. Ahanke woɖo awa enu ɖekatɔwo gbɔxwe woalɔn nɔ wo mɔ wo le kpɔtɔ anɔ eju yoyu ci mɛ wova lɔ mɛ. Nɛnɛke amɛmajɔmajɔ ciwo woafɔn wo can ɖo awa do Yehowa sewo ji yí adasɛ mɔ yewonyi amɛjɔjɔɛwo gbɔxwe woakpɔtɔ anɔ paradiso lɔ mɛ. Nɔ mɛdruwo xɔ wema ci yí dasɛ mɔ woxɔ gbe nɔ wo mɔ wole nɔ eju ɖe mɛ can ɔ, le yiyimɛɔ; eɖewo vaxɔnɔ wema ci yí dasɛ mɔ wonyi ju lɔ mɛ vi, vɔ wodelɔnnɔ yí nanɔ ɖekatɔwo o yí wodegbelɔnnɔ nɔ wo mɔ wole nɔ eju lɔ mɛ o. Enu ciwo amɛ lɔ wakɔ nu yí woakpɔ do gbɔxwe alɔn ni mɔ yi le ci eju lɔ mɛ. Ahanke lé mɛ ciwo pleŋ woafɔn so ku anɔ gbeji do koɖo lé woawa nu do nu yí woakpɔ do gbɔxwe yí amɔ wole nɔ xexe yoyu lɔ mɛ.

Yehowa nyi Mawu ci yí senɔ vevi do amɛ nu yí gbenyi Mawu ci yí wanɔ enujɔjɔɛ. (2 Ese. 32:4; Eha. 33:5) Édasɛ lɔnlɔn ci eɖo nɔ mì ci emɔ yeafɔn amɛjɔjɔɛwo koɖo amɛmajɔmajɔwo. Vɔ ékpɔkɔ emɔ mɔ amɛwo pleŋ awa do ye se jɔjɔɛwo ji. Mɛ ciwo pleŋ yí luin yí wa do yi se lɔwo ji ɖekɛ yí aɖe emɔ nɔ mɔ wo le nɔ agbe le xexe yoyu lɔ mɛ.