Pɔlu nu le 1 Korɛntitɔwo 15:8 mɛ mɔ: “Le vɔvɔnu nɔ wo pleŋ ɔ, É dasɛ Yiɖeki nɔ ŋ can hɛnnɛ, yí ŋ le shigbe evi ci yí wo ji azan masun ɛnɛ.” Mìdrenɔ enyɔ cɛ mɛ vayi sa mɔ, ewa shigbe Pɔlu xokɔ nuxu so enu ci yí jɔ do yiŋtɔ ji hwenu Yesu dasɛ jeŋkwi mɛ ŋcikɔkɔɛ yitɔ ni. Ewa shigbe wogbetrɔ yí ji alo fuin so ku le gbɔngbɔn mɛ doŋkɔ nɔ exwe sanŋdi nɛniɖewo gbɔxwe yí amɛwo fɔnfɔnsoku le gbɔngbɔn mɛ cɛ avajɔ. Vɔ ci mìtrɔ yí ji enu gɔnmɛ kpɔ so kpukpui cɛ nu dojiɔ, mìkpɔ mɔ ele veviɖe mɔ mìatrɔ gɔnmɛsese ci mìɖo do nu sa.

Nyɔnɔnwi enyi mɔ le lɛɔ, Pɔlu xokɔ nuxu so enu ci yí jɔ do ji hwenu etrɔ ji mɛ nu. Vɔ enyɔ ci ejikɔ anu ci emɔ woji ye “azan masun” ɔ? Atɛnŋ anyi susu sugbɔ yí dɔ enu enyɔ cɛwo.

Jimɛtrɔtrɔ yitɔ nyi enu ci yí va le avomɛ yí gbekpaca amɛ. Evi ci azan desun nɔ gbɔxwe woaji vanɔ le avomɛ. Hwenu Sɔlu (ci wovayɔnɔ mɔ Pɔlu) zɔn emɔ yikɔ Damasi yí ayi alé Kristotɔwo le nɔɔ, deɖo ŋkuvi yi mɔ yeavakpɔ Kristo ci wofɔn so ku le ŋtegan mɛ o. Jimɛtrɔtrɔ Pɔlu tɔ kpaca yiŋtɔ koɖo Kristotɔ ciwo yí edrɔdrɔ mɔ yeayi cu nu koɖo le jugan ŋtɔ́ mɛ. Gbesɔ kpe niɔ, lé enu lɔ jɔ do le avomɛ do dɔ yí ŋkuvi gban ni na nɔ hwenu ɖe.—Edɔ. 9:1-9, 17-19.

Étrɔ ji mɛ le “hwenu vwin mɛ.” Woatɛnŋ agbeɖe Grɛki nyɔgbe ci gɔnmɛ woɖe mɔ “wo ji azan masun” gɔnmɛ mɔ “woji le hwenu vwin mɛ.” Bibla gɔnmɛɖeɖe ci yí nyi La Bible de Jérusalem yɛ nui mɔ: “Ewa shigbe wojiŋ le hwenu ci mɛɖe deɖo ŋwi do o.” Hwenu Pɔlu trɔ ji mɛɔ, Yesu yɛ yi jeŋkwi mɛ xoxoxo vɔ. Mɛ ciwo yí Pɔlu xokɔ nuxu nɔ le kpukpui ciwo yí doŋkɔ mɛ kpɔ Yesu ci wofɔn so ku gbɔxwe eyi jeŋkwi mɛ, vɔ kpɔ Pɔlu yɛ dekpɔɛ o. (1 Kor. 15:4-8) Ci Yesu vaze nɔ Pɔlu le ajijimɛ dɔ yí emɔ hun ni etɛnŋ kpɔ Yesu le fɔnfɔnsoku yitɔ godu, ci ewa shigbe enyi “hwenu vwin” mɛ can.

Ésɔ amɛɖekisɔsɔhwe xokɔ nuxu so yiɖeki nu. Wemanyatɔ ɖewo nu mɔ Pɔlu zan enyɔ cɛwo yí sɔ ɖeɖeɛ yiɖeki kpɔtɔ. Nɔ enyi enyɔ ci Pɔlu jikɔ anu nɛɔ, anyi edadasɛ mɔ enukɔ mɔ yedeje anyi apotru o. Eyi taɖo énu mɔ: “Ŋ nyi amɛhwɛhwɛtɔ le amɛdɔdɔ lɔwo domɛ, yí ŋ nyi amɛ ci yí de je mɔ wo a yɔ mɔ “amɛdɔdɔ” [alo apotru] o, ɖo ŋ trenɔfun nɔ Mawu habɔbɔ. Vɔ, sɔ to Mawu dɔnusoswi mɛ yí ŋ va trɔsun enu ci yí ŋ nyi.”—1 Kor. 15:9, 10.

Eyi taɖo ewa shigbe Pɔlu xokɔ nuxu so lé Yesu dasɛ yiɖeki ni le ajijimɛ yí etrɔ ji mɛ nu alo lé ekpɔɛ mɔ yedeje akpɔ ŋtegan jiŋ cɛ o. Ðekpokpuiɖe ci enyiɔ, enu cɛ ci yí jɔ do Pɔlu ji le veviɖe ni sugbɔ. Ecɛ na ekando ji keŋkeŋ mɔ Yesu fɔn so ku. Eyi taɖo dekpaca mì mɔ éxonɔ nuxu so enujɔjɔ cɛ nu nɔ éɖekɔ kunu nɔ amɛwo so fɔnfɔnsoku Yesu tɔ nu o.—Edɔ. 22:6-11; 26:13-18.