ENUKPLAKPLA NYƆTA 19
Lé Mìatɛnŋ Awɛ Nɔ Mìwo Xɔse Asɛnŋ Do Xexe Yoyu Gbe Ci Yehowa Ðo Nuɔ?
“Nɔ [Yehowa] wa egbeɖu ɖe ɔ, Á wa do egbeɖu ci yí É wa ji.”—AMH. 23:19.
EHAJIJI 142 Míalé Míaƒe Mɔkpɔkpɔa Me Ðe Asi Sesĩe
SUSU VEVI LƆ a
1-2. Nyi ele mɔ mìawakɔ yí asɔ le te kpɔ xexe yoyu lɔɔ?
EGBE ci Yehowa ɖo mɔ yeasɔ xexe ci yí le jɔjɔɛɖe ɖɔli xexe cɛ jɔ ji nɔ mì. (2 Piɛ 3:13) Ci mìdenya hwenu xexe yoyu lɔ ava can ɔ, enu ciwo yí jɔjɔ dasɛ mɔ dagbejinjin ɖeeɖe gbɔxwe ava o.—Mt. 24:32-34, 36; Edɔ. 1:7.
2 Vɔ gbɔxwe hwenɔnu aɖoɔ, nɔ mìle nyɔnɔnwi lɔ mɛ yi tɔxu gbejinjin can ɔ, mì pleŋ yí ele mɔ mìana yí xɔse ci mìɖo do gbeɖu cɛ nu asɛnŋ doji. Nyi yí taɖoɔ? Ðo nɔ xɔse sɛnŋ can ɔ, átɛnŋ agbɔjɔ dru. Apotru Pɔlu nu mɔ xɔse manɔ amɛ shi nyi “evɔn ci yí jiji a lé mì.” (Ebre. 12:1) Nɔ mìwo xɔse ŋgbegbɔjɔɔ, ele mɔ mìabunɔ tamɛ kpɔ blaŋblaŋ so enu ciwo yí ɖo kpe yi ji nɔ mì mɔ xexe yoyu lɔ gogo.—Ebre. 11:1.
3. Nyi nu mìaxo nuxu so le nyɔta cɛ mɛɔ?
3 Le nyɔta cɛ mɛɔ, mìaxo nuxu so enu amɛtɔn ciwo mìawa keŋ nɔ xɔse ci mìɖo do xexe yoyu gbe ci Yehowa ɖo nu asɛnŋ doji: (1) tamɛbubukpɔ so tafɛn lɔ nu, (2) tamɛbubukpɔ so Yehowa ŋsɛn nu koɖo (3) gamɛ zanzan do gbɔngbɔnmɛnuwo nu. Le yi goduɔ, mìakan seŋ so lé eŋɛ ci Yehowa do nɔ Xabakuku ana yí mìwo xɔse asɛnŋ do gbɛ. Ŋkɔtɔɔ, mìaxo nuxu so nɔnɔmɛ ɖewo ciwo mìdodoɔ go yɛ nu yí ele mɔ xɔse sɛnŋ ɖo ale mì shi do xexe yoyu ci yí ava nu.
NƆNƆMƐ CIWO MƐ ELE MƆ MÌAÐO XƆSE SƐNŊ LE
4. Gbetasɔsɔ ciwo mɛ ele mɔ mìaɖo xɔse sɛnŋ leɔ?
4 Ŋkeke ɖeka duuɔ, mìsɔnɔ gbeta ciwo yí ʒan xɔse sɛnŋ. Le kpɔwɛ mɛ, mìsɔnɔ gbeta so mɛ ciwo mìado gbɛ koɖo, enu ciwo mìasɔ ɖe aye daɖɛ, fini mìayi suklu sɛn do, mɛ ci mìaɖe, evi nɛni ci mìaji koɖo edɔ ci mìawa nu. Anyɔ mɔ mìabiɔ mìwoɖekiwo se mɔ: ‘Gbeta ciwo ŋsɔnɔ dasɛ mɔ ŋkando ji mɔ xexe yoyu lɔ ava sabaaɖe yɛ yí xexe cɛ dagbenia? Anyi nuwanawo ɖyinɔ mɛ ciwo yí wanɔ nu shigbe mɔ eku yí nyi vɔxu nɔ enuwo pleŋ nɛa?’ (Mt. 6:19, 20; Luiki 12:16-21) Nɔ xɔse ci mìɖo mɔ xexe yoyu lɔ ava sabaaɖe yɛ sɛnŋ ɔ, mìasɔ gbeta nywiwo.
5-6. Nyi yí taɖo mìʒan xɔse sɛnŋ le cukaɖawo hwenuɔ? Na kpɔwɛ ɖeka.
5 Mìgbedonɔ go cukaɖa ciwo mɛ ele mɔ mìaɖo xɔse sɛnŋ le. Wotɛnŋ ci yumɛ nɔ mì, mìtɛnŋ lé edɔ̀ mavɔ ɖe alo nubu ɖewo tɛnŋ na yí mìagbɔjɔ. Ŋkɔtɔɔ, etɛnŋ wa nɔ mì mɔ mìatɛnŋ ado ji le cukaɖa lɔ mɛ. Vɔ nɔ cukaɖa lɔwo vani sɔwu lé mìbui do saɔ, mìʒan xɔse sɛnŋ gbɔxwe yí ado ji yí akpɔtɔ asɛnkɔ Yehowa koɖo jijɔ.—Rɔm. 12:12; 1 Piɛ 1:6, 7.
6 Nɔ mìle cukaɖa sɛnŋsɛnŋ ɖe mɛɔ, etɛnŋ wawa nɔ mì shigbe mɔ xexe yoyu gbe ci Yehowa ɖo davamɛ gbeɖe hannɛ. Ŋtɔ́ dasɛ mɔ mìwo xɔse gbɔjɔ yɔa? De ahan yɔ nɛ kokoko o. Nɔ eshi jaja keke ewa kwɛshila sugbɔɔ, etɛnŋ wa nɔ mì mɔ nyidɔn dagbevahun gbeɖe hannɛ. Vɔ ewe va tonɔ. Ahanke nɔ mìgbɔjɔ sugbɔɔ, etɛnŋ wa nɔ mì mɔ xexe yoyu lɔ dava gbeɖe o. Vɔ nɔ mìɖo xɔse sɛnŋ ɔ, mìakando ji mɔ gbeɖu Mawu tɔwo avamɛ. (Eha. 94:3, 14, 15; Ebre. 6:17-19) Nɔ kankandoji ŋtɔ́ kpɔtɔ le mì shiɔ, mìatɛnŋ akpɔtɔ asɔ Yehowa sɛnsɛn do texwe ŋkɔtɔ le mìwo gbe mɛ.
7. Susu ci mìdeɖo alɔn ava tamɛ nɔ mìɔ?
7 Ele mɔ mìagbeɖo xɔse sɛnŋ gbɔxwe awa kunuɖeɖedɔ lɔ. Amɛ sugbɔ ciwo mìɖenɔ kunu nɔ kpɔɛni mɔ xexe yoyu gbe ci Mawu ɖo “ŋɛnywi” ci mìdranɔ nɔ yewo nyɔ ɖoɖu keke yí datɛnŋ anyi nyɔnɔnwi o. (Mt. 24:14; Eze. 33:32) Mìɖo anya wawa keŋ nɔ mìŋgbevatɔ enu xoxo kpɔ so enu ciwo Yehowa kplakpla mì nu shigbe wowo hannɛ o. Nɔ cɛ ŋgbejɔ do mì jiɔ, mìɖo awɛ nɔ mìwo xɔse akpɔtɔ asɛnsɛnŋ. Ecɛyɛ mìakpɔ emɔ amɛtɔn ciwo ji mìato yí atɛnŋ awa cɛ.
BU TAMƐ KPƆ SO TAFƐN LƆ NU
8-9. Lé tamɛbubukpɔ so tafɛn lɔ nu ado ŋsɛn mìwo xɔse doɔ?
8 Tamɛbubukpɔ so tafɛn lɔ nu nyi emɔ ɖeka ci ji mìato yí ana mìwo xɔse asɛnŋ. Tafɛn lɔ na mìkando ji mɔ egbe ci Mawu ɖo avamɛ nyao. Nɔ mìwa ɖaŋ yí bu tamɛ kpɔ so enu ci yí taɖo Yehowa sɔ eviɛ na do ta nɔ mì koɖo enu ci egu do mɛɔ, ana yí xɔse ci mìɖo mɔ agbe mavɔ nɔnɔ gbe ci Mawu ɖo avamɛ asɛnŋ doji. Nyi yí taɖo mìatɛnŋ anu ahan ɔ?
9 Vɔnsa ci yí Mawu wa gbɔxwe yí tafɛn lɔ nyi wawaɔ? Yehova sɔ eviɛ vevi, yi xlɔ bakpomadɔn so jeŋkwi mɛ ɖaɖa nyigban ji yí wovaji enyi amɛmaɖonuvɔn. Hwenu Yesu le nyigban jiɔ, édo go cukaɖa hamɛhamɛwo. Ékpe fun yí se vevi keke yí ku. Efɛn gangan ŋtɔteŋ enyi Yehowa cu! Mìwo Mawu amɛlɔntɔ lɔ dalɔn yí atashi Eviɛ yí akpe fun yí aku keŋ nɔ mìasɔ nɔ agbe nywi le kleŋ mɛ kpoŋ o. (Ʒan 3:16; 1 Piɛ 1:18, 19) Ci Yehowa sɔ Eviɛ vevi sɔ na do ta nɔ mìɔ, áwɛ keke yí mìasun ji anɔ agbe mavɔ le xexe yoyu lɔ mɛ.
TAMƐBUBUKPƆ SO YEHOWA ŊSƐN NU
10. Sɔgbe koɖo Efezitɔwo 3:20 ɖe, nyi Yehowa atɛnŋ awaɔ?
10 Tamɛbubukpɔ so Yehowa ŋsɛn nu yí nyi emɔ evetɔ ci ji mìato yí ana mìwo xɔse asɛnŋ. Éɖo ŋsɛn yí awa do egbe ɖekpokpwi ci eɖo ji. Le nyɔnɔnwi mɛɔ, agbe mavɔ nɔnɔ le xexe yoyu mɛ gbe ci Mawu ɖo tɛnŋ wa nɔ agbetɔwo mɔ yidatɛnŋ avamɛ o. Vɔ blaŋblaŋ ɔ, Yehowa ɖonɔ egbe ɖewo ciwo agbetɔwo datɛnŋ awa yí avamɛ gbeɖe o. Átɛnŋ awa cɛ ɖo eyi nyi Mawu Ŋsɛnwopleŋtɔ. (Job 42:2; Maki 10:27) Eyi taɖo nɔ éwa gbeɖu ciwo yí datɛnŋ avamɛ do nu nɔ amɛwo can ɔ, dekpacanɔ mì o.—Hlɛn Efezitɔwo 3:20.
11. Na kpɔwɛ ɖeka le gbeɖu jiŋ ciwo Yehowa wa wo mɛ. (Kpɔ dakavi ci yí nyi “ Gbeɖu Jiŋ Ðewo Ciwo Yí Vamɛ.”)
11 Yehowa ɖo gbe nɔ yi mɛwo vayi le blema. Mìakpɔ ɖewo le wo mɛ. Do nu nɔ agbetɔwoɔ, wodatɛnŋ anyi wawa o. Énu nɔ Abraxamu koɖo Sara mɔ woaji vi ci woshin can. (Gɔnm. 17:15-17) Égbenu nɔ Abraxamu mɔ yeavasɔ Kanna nyigban nɔ yi jijimɛviwo. Le exwe sugbɔ ciwo pleŋ mɛ Abraxamu jijimɛvi ciwo yí nyi Izraɛliviwo sɔ nɔ hwashigbemɛ le Eʒiptiɔ, etɛnŋ ze shigbe mɔ gbeɖu cɛ davamɛ kpɔ hannɛ. Vɔ gbeɖu cɛ vavamɛ. Le yiyimɛɔ, Yehowa nu mɔ Elizabɛti ci yí nyi nyɔxo aji vi. Égbenu nɔ Mari ci yí nyi nyɔnuvi lealɔji mɔ, eyi aji ye viye. Vɔ Yehowa ɖo gbe ɖɛ exwe kotokun nɛniɖe vayi le Edɛn kpamɛ, yɛ can yɛgbevamɛ!—Gɔnm. 3:15.
12. Kankandoji ci yí Ʒozue 23:14 koɖo Ezai 55:10, 11 na mì so Yehowa ŋsɛn nuɔ?
12 Nɔ mìbu tamɛ kpɔ so egbe ciwo pleŋ Yehowa ɖo koɖo lé ewa do wo ji nuɔ, mìakpɔɛ mɔ éɖo ŋsɛn haan. Eyi xɔse ci mìɖo do xexe yoyu gbe ci eɖo nu asɛnsɛnŋ doji. (Hlɛn Ʒozue 23:14; Ezai 55:10, 11.) Ecɛ dra mì do nywiɖe nɔ mìatɛnŋ akpedo mɛbuwo nu nɔ woakpɔɛ anya mɔ xexe yoyu gbe ci Mawu ɖo denyi drɔxwe nyɔ alo druvi nyɔ ɖe o. Yehowa ŋtɔ nu so jeŋkwi yoyu koɖo nyigban yoyu lɔ nu mɔ: “Nuxu lɔwo nyi nyɔnɔnwi yi wo a kando wo ji.”—Enyɔ. 21:1, 5.
SƆ GBƆNGBƆNMƐDƆWO DO TEXWE ŊKƆTƆ LE AO GBE MƐ
HAMƐ BƆBƆWO YIYI
Lé gbɔngbɔn mɛ dɔ cɛ atɛnŋ ado ŋsɛn ao xɔse doɔ? (Kpɔ mamamɛ 13)
13. Lé hamɛ bɔbɔwo na yí mìwo xɔse sɛnnɔŋ doji doɔ? Ðe mɛ.
13 Enu amɛtɔntɔ ci mìawa nɔ mìwo xɔse asɛnŋ yí nyi mɔ mìazannɔ gamɛ do gbɔngbɔnmɛdɔwo nu. Le kpɔwɛ mɛ, bu tamɛ kpɔ so nyɔna ciwo mìkpɔnɔ le hamɛ bɔbɔwo mɛ nu. Anna, ci yí wa gashiagamɛ sumɔsumɔdɔ lɔ kpaxwe vovovowo na nɔ exwe sugbɔ nu mɔ: “Bɔbɔwo yiyi na yí anyi xɔse kpɔtɔ sɛnŋ. Nɔ mɛ ci yí xokɔ nuxu denyi enukplamɛtɔ bibi alo dedre enyɔ yoyu ɖe mɛ can ɔ, ŋsenɔ nyɔ ɖe kokoko ci yí dɔ yí ŋmɔnɔŋje Bibla mɛ nyɔnɔnwi ɖe mɛ doji yí anyi xɔse sɛnnɔŋ doji.” b Ðoŋci ci amɛwo nanɔ le bɔbɔwo mɛ gbenanɔ yí mìwo xɔse sɛnnɔŋ doji.—Rɔm. 1:11, 12; 10:17.
KUNUÐEGBE YIYI
Lé gbɔngbɔn mɛ dɔ cɛ atɛnŋ ado ŋsɛn ao xɔse doɔ? (Kpɔ mamamɛ 14)
14. Lé kunuɖeɖedɔ lɔ na yí mìwo xɔse sɛnnɔŋ doɔ?
14 Kunuɖeɖedɔ lɔ na yí mìwo xɔse gbesɛnnɔŋ doji. (Ebre. 10:23) Barbara, ci yí sɛnkɔ Yehowa yí ewu xwe 70 nu mɔ: “Ŋkpɔɛni hwɛshiahwenu mɔ kunuɖeɖedɔ lɔ donɔ ŋsɛn xɔse. Nɔ ŋxokɔ nuxu nɔ mɛbuwo so egbe nywi ciwo Yehowa ɖo nuɔ, anyi xɔse sɛnnɔŋ doji.”
AMƐÐEKƐNUKPLAKPLA
Lé gbɔngbɔn mɛ dɔ cɛ atɛnŋ ado ŋsɛn ao xɔse doɔ? (Kpɔ mamamɛ 15)
15. Lé amɛɖekɛnukplakpla na yí mìwo xɔse sɛnnɔŋ doɔ? (Kpɔ foto lɔ hɛnnɛ.)
15 Gbɔngbɔnmɛdɔ bu ci yí na mìwo xɔse sɛnnɔŋ yí nyi: amɛɖekɛnukplakpla. Susan kpɔɛ mɔ nɔ yewa toto do enu ciwo yeakpla nuɔ, ekpenɔdo ye nu. Énu mɔ: “Kwɛshilagbewoɔ, ŋkplanɔ Jutakpɔxɔ ci woawa le kwɛshila ci yí akplɔɛdo mɛ. Le Tɛnigbe koɖo Tanatagbewoɔ, ŋdranɔ kwɛshila dodomɛ bɔbɔ lɔ do. Le azan kpɛtɛwo gbeɔ, ŋwanɔ amɛɖekɛnukplakpla.” Ci Susan kpɔtɔ wanɔ do enukplakpla toto ci yí le shi jiɔ, yi xɔse sɛnsɛnŋ doji. Irene, ci yí wa dɔ le Yehowa Kunuɖetɔwo dɔwaxu gangantɔ na nɔ xwe sugbɔ nu mɔ, enukplakpla so Bibla mɛ nyɔnuɖɛwo nu na yí anyi xɔse sɛnŋ doji. Énu mɔ, “Ci ŋkpɔ lé enyɔ ciwo Yehowa nu ɖɛ vamɛ hlɛnhlɛnhlɛn doɔ, éjiŋ nɔŋ.” c
“Á VA NYƆNƆNWITƆ”
16. Nyi yí taɖo kankandoji ci Yehowa na Xabakuku kan mìwo can egbɛɔ? (Ebretɔwo 10:36, 37)
16 Ejinjin yɛ ci Yehowa sɛntɔ ɖewo le te kpɔ xexe cɛ vɔvɔnu. Etɛnŋ wa nɔ agbetɔwo mɔ egbe ci Mawu ɖo lɔ mɛvava jijiɛ gamɛ. Vɔ Yehowa nya lé ewawa do nɔ yi sɛntɔwo. Éna kankandoji enyɔnuɖɛtɔ Xabakuku mɔ: “Eŋɛdwi cɛ kudo hwenu vevi nu le esɔ ŋkekewo mɛ. Eŋɛdwi cɛ lɔ kudo vɔvɔnu, yí á va nyɔnɔnwitɔ! Vɔ, xɔ jigbɔnɖɛ yí a nɔ̀te kpɔɛ. Gamɛ hunnɔ a va. Dá ji gamɛ o.” (Xab. 2:3) Xabakuku ɖekɛ yí Mawu na kankandoji ŋtɔ́a? Alo yi nyɔ lɔwo kan mìwo can gbɛa? Gbɔngbɔn kɔkɔɛ kpedo apotru Pɔlu nu yí enu enyɔ cɛwo ke nɔ Kristotɔ ciwo yí kpɔkpɔ mɔ veviɖe nɔ xexe yoyu lɔ. (Hlɛn Ebretɔwo 10:36, 37.) Nɔ egbe ci Mawu ɖo mɔ yeahwlɛn mì gan mɛvava gbejinjinkɔ do nu nɔ mì can ɔ, mìatɛnŋ akando ji mɔ “á va nyɔnɔnwitɔ! Dá ji gamɛ o.”
17. Lé nɔvinyɔnu ɖeka wa do nukplamu ci Yehowa na Xabakuku ji doɔ?
17 Yehowa sɛntɔ sugbɔ wa do yi nukplamu ci yí nyi “nɔ̀te kpɔɛ” ji na nɔ xwe sugbɔ. Le kpɔwɛ mɛ, Louise tɔ Yehowa sɛnsɛn le xwe 1939 mɛ. Énu mɔ: “Gahunnɔmɛɔ, ŋbu mɔ Harmagedɔn ava gbɔxwe yí naɖe gbɔ suklu. Vɔ devayi do ahan ji o. Ci xwewo vayikɔɔ, ŋhlɛn nu so mɛ ciwo yí ‘nɔte kpɔ’ Yehowa yí ewa do yi gbeɖuwo ji ciwo nu Bibla xo nuxu so yí wokpedo ŋnu, wowo yi nyí Nowe, Abraxamu, Ʒozɛfu koɖo mɛbuwo. Ci ŋkpɔtɔ xɔɛ se mɔ egbe ciwo Mawu ɖo avamɛɔ, ekpedo nyɛ koɖo mɛbuwo nu yí mìkando ji mɔ xexe yoyu lɔ gogo.” Amɛ sugbɔ bu ciwo yí sɛn Yehowa na nɔ xwe sugbɔ lɔn do nyɔ cɛ ji.
18. Lé tamɛbubukpɔ so enuwawawo nu ana yí xɔse ci mìɖo mɔ xexe yoyu lɔ ava asɛnŋ doɔ?
18 Nyɔnɔnwi enyi mɔ xexe yoyu lɔ dekpɔva hɔɖo o. Vɔ, bu tamɛ kpɔ so ŋciwo yí li kakayɛ nu: wleciviwo, aciwo, elanwo koɖo agbetɔwo. Mɛɖe datɛnŋ anu mɔ ŋcɛwo denyi enuŋtɔŋtɔ o, nɔ hwenu ɖe ni vayi yí wodeni kpɔ sa can. Woli yɛ, ɖo Yehowa yí wa wo. (Gɔnm. 1:1, 26, 27) Mìwo Mawu lɔ gbeɖo xexe yoyu ɖeka gbe. Áwa do gbeɖu cɛ ji. Le xexe yoyu lɔ mɛɔ, amɛwo anɔ agbe mavɔ yí afɛn ɖekɛ dagbele wo nu o. Mìatɛnŋ akando ji mɔ xexe yoyu lɔ ava le gamɛ ci Mawu ɖo ji.—Ezai 65:17; Enyɔ. 21:3, 4.
19. Lé àtɛnŋ ado ŋsɛn ao xɔse doɔ?
19 Vɔ gbɔxwe hwenɔnu aɖoɔ, wa enu ɖekpokpui ci ji èkpe keŋ nɔ ao xɔse asɛnŋ. Wɛ nɔ tafɛn lɔ nu ajenɔŋ nɔ eo gashiagamɛ. Bunɔ tamɛ kpɔ so Yehowa ŋsɛn nu. Sɔ gbɔngbɔnmɛdɔwo ɖo texwe ŋkɔtɔ le ao gbe mɛ. Nɔ èwɛkɔ ahan ɔ, àle ‘mɛ ciwo yí xɔnɔ Mawu gbeɖoɖowo mɛ, ɖo woɖo xɔse yí gbexɔnɔ jigbɔnɖɛ.’—Ebre. 6:11, 12; Rɔm. 5:5.
EHAJIJI 139 Kpɔ Ðokuiwò Le Xexe Yeyea Me
a Amɛ sugbɔ li egbɛ ciwo yí dekando xexe yoyu gbe ci woɖo do Bibla mɛ ji o. Wobunɔ mɔ drɔxwe nyɔ ɖe yɔ, enyɔkpakpa ɖe yɔ, yí wonunɔ mɔ yi nyɔ ɖoɖu. Vɔ mìwo kando ji mɔ egbe ciwo pleŋ Yehowa ɖo avamɛ. Ele ahan gan, ele mɔ mìawɛ nɔ mìwo xɔse akpɔtɔ asɛnŋ. Lé mìawɛ doɔ? Nyɔta cɛ adre mɛ.
b Ŋkɔ ɖewo trɔ.
c Àtɛnŋ akpɔ nyɔta sugbɔ ciwo yí xo nuxu so Bibla mɛ nyɔnuɖɛwo nu le gɔnmɛ nɔ nyɔta ci yí nyi “Prophéties” le Index des Publications des Témoins de Jéhovah mɛ. Le kpɔwɛ mɛ, kpɔ nyɔta ci yí nyi “Les prédictions de Jéhovah s’accomplissent” le Jutakpɔxɔ 1er janvier 2008 tɔ mɛ.
