1. Lé Bibla dre lɔnlɔn adodwi lɔ mɛ doɔ?

 LƆNLƆN “binɔ shigbe ezo ɛnɛ, ezoɖe Yehowa tɔ. Eshi sugbɔ datɛnŋ aci lɔnlɔn o, yí etɔsasawo can datɛnŋ akplɔɛ yi o.” b (Sal. 8:6, 7, NWT) Enyɔ cɛwo wa ɖaŋ dre lɔnlɔn adodwi lɔ mɛ nywiɖe! Enyɔ cɛwo atɛnŋ ado ŋsɛn asu koɖo ashiwo nɔ woatɛnŋ aɖo lɔnlɔn adodwi nɔ wowonɔnɔwo.

2. Nyi ele mɔ asu koɖo ashi ɖo akpɔtɔ awanɔ nɔ wowo lɔnlɔn ŋgbeciɔ?

² Ele mɔ asu koɖo ashi ɖo aje agbla alɔnnɔ wowonɔnɔwo nɔ wokpɔtɔ le agbe duu. Mìasɔ kpɔwɛ cɛ asɔ ɖe mɛ, gbɔxwe ezo akpɔtɔ ajejeɛɔ, ele mɔ woakpɔtɔ asɔ nake dodoɔ mɛ. Nɔ wodewɛkɔ ahan ɔ, ezo lɔ avaci keŋkeŋ. Nɛnɛke yí lɔnlɔn ci yí le asu koɖo ashi gblamɛ can le nɛ, woɖo ana yí akpɔtɔ asɛnsɛnŋ. Hweɖewonuɔ, etɛnŋ wa nɔ asu koɖo ashi ɖe mɔ lɔnlɔn yewotɔ fakɔ, vevitɔ nɔ wodokɔ go eho, lanmɛsɛn alo evihɛnhɛn cukaɖawo. Nɔ èɖe asu alo èɖe nyɔnu ɖe, lé àwɛ yí “ezoɖe Yehowa tɔ” akpɔtɔ ajejeɛ le ao lɔlele lɔ mɛɔ? Le nyɔta cɛ mɛɔ, mìaxo nuxu so enu amɛtɔn ciwo yí àkpɔtɔ awanɔ nu nɔ ao lɔlele akpɔtɔ asɛnŋ yí jijɔ ale mɛ. c

3. Nɔ asu koɖo ashi na yí ekacaca ci yí le wowo koɖo Yehowa gblamɛ sɛnkɔŋ doji ɖe, lé ana yí lɔnlɔn ci yí le wowo gblamɛ daci doɔ? (Ŋununyatɔ 4:12) (Kpɔ foto lɔ hɛnnɛ.)

³ Nɔ “ezoɖe Yehowa tɔ” akpɔtɔ ajejeɛɔ, asu koɖo ashi lɔ ɖo aje agbla nɔ ekacaca ci yí le wowo koɖo Yehowa gblamɛ asɛnŋ doji. Lé ecɛ wawa atɛnŋ akpedo wo nu le alɔlele lɔ mɛ doɔ? Nɔ exlɔnyinyi ci yí le wowo koɖo wowo Da ci yí le jeŋkwi mɛ gblamɛ ve nɔ woɔ, adɔ yí woawanɔ do yi sewo ji blaŋ yí agbena yí woaɖunɔ cukaɖa ciwo yí adɔ lɔnlɔn ci woɖo nɔ wowonɔnɔwo aci ji. (Hlɛn Ŋununyatɔ 4:12.) Mɛ ciwo yí shin le gbɔngbɔn mɛ jinɔ mɔ yewoɖyi Yehowa yí aɖo yi nɔnɔmɛwo shigbe xomɛvuwawa, jigbɔnɖɛxɔxɔ koɖo enusɔkeamɛ. (Efe. 4:32–5:1) Nɔ asu koɖo ashi ɖe tekpɔ yí ɖo nɔnɔmɛ cɛwoɔ, enɔnɔ fafɛɖe mɔ lɔnlɔn ci woɖo nɔ wowonɔnɔwo akpɔtɔ asɛnkɔŋ doji. Nɔvinyɔnu Lena ci yí ɖe asu yí ewu exwe 25 nu mɔ, “Enɔnɔ fafɛɖe mɔ woalɔn mɛ ci yí shin le gbɔngbɔn mɛ yí agbebuini.”

4. Nyi yí taɖo Yehowa sɔ Ʒozɛfu koɖo Mari nɔ woanyi jilawo nɔ Mɛsia lɔɔ?

⁴ Mìasɔ Bibla mɛ kpɔwɛ ɖeka. Hwenu Yehowa jikɔ asɔ asu koɖo ashi ciwo yí anyi jilawo nɔ Mɛsia lɔɔ, ésɔ Ʒozɛfu koɖo Mari ciwo yí nyi Davidi jijimɛviwo. Nyi yí taɖoɔ? Ðo wo koɖo ve nyi exlɔ nɔ Yehowa, yí Yehowa nya mɔ woasɔ ye ɖo texwe ŋkɔtɔ le wowo lɔlele mɛ. Asu koɖo ashiwo, nyi míatɛnŋ akpla so Ʒozɛfu koɖo Mari gbɔɔ?

5. Nyi ŋsuwo atɛnŋ akpla so Ʒozɛfu gbɔɔ?

⁵ Ʒozɛfu wanɔ do emɔdasɛnamɛ Yehowa tɔ ji blaŋ, yí ecɛ na yí enyi asu nywi. Nɔ ehwe din ɔ, éxɔ emɔdasɛnamɛwo so Yehowa gbɔ zetɔn so yi xomu nu. Zetɔn lɔwo pleŋ ɔ, éɖe blɛ wa do enyɔ ciwo Yehowa nu ni ji, nɔ egbɔnnu ni ŋtɔkpu can. (Mt. 1:20, 24; 2:13-15, 19-21) Ci Ʒozɛfu wa do emɔdasɛnamɛ Yehowa tɔ jiɔ, églɔn ta nɔ Mari yí le bu ni. Dèkpɔɛ mɔ ci Ʒozɛfu wɛni ahan ɔ, adɔ yí Mari aluini yí agbeshini doji ba? Ŋsuwo, míatɛnŋ awa Ʒozɛfu tɔ han, nɔ míjinɔ Bibla mɛ mɔdasɛnamɛwo yí lenɔ bu nɔ míwo xomu. d Nɔ míwanɔ do emɔdasɛnamɛ lɔwo ji nɔ egbɔnnu nɔ mí can ɔ, anyi mídadasɛ mɔ mílɔn míwo shiwo yí gbedodoɔ ŋsɛn alɔlele míwotɔ. Nɔvinyɔnu ɖeka ci yí le Vanuatu yí eɖe asu yí ewu exwe 20 yɛ nu mɔ: “Ci asunyɛ jinɔ emɔdasɛnamɛwo so Yehowa gbɔ yí gbewanɔ do wo jiɔ, ena ŋbuini sɔwu. Ecɛ na  ŋvonɔ le nyɛɖeki mɛ yí gbekannɔdo yi gbetasɔsɔwo ji.”

6. Nyi nyɔnuwo atɛnŋ akpla so Mari gbɔɔ?

⁶ Mari can nyi exlɔ koɖo Yehowa yí yiŋtɔ ɖo xɔse sɛnŋ, éjeshi Enuŋwlɛŋwlɛ lɔwo nywiɖe. Éjinɔ gamɛ yí bunɔ tamɛ kpɔ so ŋci ekpla nu. (Luiki 2:19, 51) Mìatɛnŋ akando ji mɔ, exlɔ ci enyi koɖo Yehowa na yí enyi nyɔnu nywi. Egbɛɔ, nyɔnu sugbɔ je agbla yí wawa Mari tɔ han. Le kpɔwɛ mɛ, nɔvinyɔnu ci yí tɔ mɔ Emiko nu mɔ: “Hwenu ŋdeɖe asuɔ, nyɛŋtɔ wanɔ gbɔngbɔn mɛ dɔwo. Vɔ ci ŋvaɖe asuɔ, asunyɛ yí donɔ gbe ɖaɖa nɔ mì yí gbenɔnɔ ŋkɔ le sɛnsɛn xomumɛtɔ mɛ, eyi ŋvakpɔɛ mɔ ŋvanɔnɔ ete kpɔɛ mɔ eyi awa gbɔngbɔn mɛ dɔwo do nu nɔŋ. Nyɛŋtɔ ŋɖo aje agbla nɔ exlɔnyinyi ci yí le nyɛ koɖo Yehowa gblamɛ asɛnŋ. Eyi taɖo ŋɖo gamɛ ɖɛ yí donɔ gbe ɖaɖa yí hlɛnnɔ Enuŋwlɛŋwlɛ lɔwo, yí bunɔ tamɛ kpɔ so wo nu.” (Gal. 6:5) Nyɔnuwo, nɔ míkpɔtɔ dokɔ ŋsɛn ekacaca ci yí le míwo koɖo Yehowa gblamɛɔ, míwo suwo akannɔfu mí yí agbelɔnnɔ mí doji.—Elo. 31:30.

7. Nyi yí asu koɖo ashiwo atɛnŋ akpla so Ʒozɛfu koɖo Mari gbɔ kudo Yehowa sɛnsɛn nu dojuɔ?

⁷ Ʒozɛfu koɖo Mari gbewa nu doju keŋ nɔ exlɔnyinyi ci yí le wowo koɖo Yehowa gblamɛ akpɔtɔ asɛnŋ. Womɔŋje mɛ mɔ shigbe xomu nɛɔ, yi le veviɖe mɔ yewoasɛn Yehowa doju. (Luiki 2:22-24, 41; 4:16) Ecɛ wawa defa o, vevitɔ ci ɖeviwo tɔ egbɔ susu le xomu lɔ mɛ, vɔ wokpe ji yí wɛ. Kpɔwɛ nywi ŋtɔteŋ wonyi nɔ asu koɖo ashiwo le egbɛ mɛ. Nɔ ɖeviwo le mí shi shigbe Ʒozɛfu koɖo Mari nɛɔ, bɔbɔwo yiyi alo akpɔ gamɛ awa sɛnsɛn xomumɛtɔ doju atɛnŋ agbɔnnu. Ŋtɔkpu can ɔ, agbɔnnu gbɔxwe asu koɖo ashi lɔ akpla nu alo ado gbe ɖaɖa doju. Míɖo ŋwi mɔ, nɔ mísɛnkɔ Yehowa dojuɔ, adɔ míate gogo Yehowa koɖo míwonɔnɔwo doji. Eyi taɖo mísɔ Yehowa sɛnsɛn sɔ ɖo texwe ŋkɔtɔ.

8. Nyi yí asu koɖo ashi ɖe ci yí dokɔ go cukaɖawo le xomu mɛ awa yí aɖu ele nywiɖe nɔ sɛnsɛn xomumɛtɔɔ?

⁸ Nɔ mídokɔ go cukaɖawo le míwo xomu lɔ mɛ ɖe, lé míawa nu doɔ? Taŋfuin nɔ womɔ woanɔ ju awa sɛnsɛn xomumɛtɔɔ, dakpe nɔ mí o. Nɔ enyi ahan ɔ, míbu tamɛ kpɔ so enu kleŋ ci yí ajɔ ji nɔ mí nu keŋ akan seŋ so nu. Nɔ míwɛkɔ ahan ɔ, adɔ yí míalɔn míwonɔnɔwo doji yí míaji mɔ yewoasɛn Yehowa doju.

9. Nyi yí taɖo asu koɖo ashi ɖo aji gamɛ anɔnɔ juɔ?

⁹ Asu koɖo ashiwo, nɔ míji gamɛ yí nɔnɔ juɔ, adɔ yí lɔnlɔn ci míɖo nɔ nɔnɔ akpɔtɔ ali. Nɔ míwɛni ahan ɔ, adɔ yí mɛɖekamɛɖeka anya ŋci yi kpena bubuɔ kpɔ koɖo lé enu wakɔ ni do. (Gɔnm. 2:24) Lilia koɖo Ruslan ɖe nɔnɔ yɛɔ, ewu exwe 15. Kpɔ ŋci jɔ do wo ji ci woɖe nɔnɔ sabaaɖe godu ɖa. Lilia nu mɔ: “Mìdo jeshi mɔ mìdekpɔkɔ gamɛ anɔ eju shigbe lé mìbui do sa nɛ o. Edɔ ci mìawa aɖu enu koɖo axomɛ dɔwo yí xanɔ mì le ŋkeke lɔ mɛ. Le yiyimɛɔ, eviwo hɛnhɛn can vaxɔkɔ gamɛ le mì shi. Mìvakpɔ mɔ nɔ mìdesɔ gamɛ ɖe ɖɛ yí nɔnɔ ju asu koɖo ashi tɔ han ɔ, mìatɛnŋ avaklan le nɔnɔ gbɔ.”

10. Lé asu koɖo ashiwo atɛnŋ awa do gɔnmɛɖose ci yí le Efezitɔwo 5:15, 16 mɛ ji doɔ?

¹⁰ Nyi asu koɖo ashiwo ɖo awa yí akando ji mɔ yewozanzan gamɛ dojuɔ? Míɖo  aɖo gamɛ ci míasɔ nɔnɔ eju ɖɛ. (Hlɛn Efezitɔwo 5:15, 16.) Nɔviŋsu ɖeka ci yí le Nigéria yí tɔ mɔ Uzondu nu mɔ: “Nɔ ŋwakɔ toto do anyi dɔwo nuɔ, ŋwanɔ toto do gamɛ ci nasɔ nɔ eju koɖo ashinyɛ nu hɛnnɛ yí hwenu ŋtɔ́ nɔnɔ veviɖe nɔŋ.” (Fili. 1:10) Kpɔ lé nɔvinyɔnu Anastasia ci yí asuɔ nyi ekán lɔ mɛ hamɛwo jikpɔtɔ le Moldavie zannɔ yi gamɛwo nywiɖe do ɖa. Énu mɔ: “Ŋwanɔ nyɛŋtɔ dɔwo nɔ edɔwo xa asunyɛ. Ecɛ wɛ mɔ, mìvakpɔnɔ gamɛ yí nɔnɔ eju.” Vɔ lé àwa nu do nɔ gamɛ denɔnɔ mí shi yí míanɔ juɔ?

11. Edɔ ciwo yí Akilasi koɖo Prisi wanɔ dojuɔ?

¹¹ Asu koɖo ashiwo atɛnŋ akpla enu so Akilasi koɖo Prisi gbɔ. Kristotɔ ŋkɔtɔ sugbɔtɔ lɔn asu koɖo ashi cɛwo. (Rɔm. 16:3, 4) Bibla denu enyɔwo so wowo lɔlele lɔ nu hlɛnhlɛnhlɛn o, vɔ énu mɔ wowanɔ edɔ, ɖenɔ kunu yí kpenɔdo mɛbuwo nu doju. (Edɔ. 18:2, 3, 24-26) Le nyɔnɔnwi mɛɔ, nɔ Bibla jikɔ axo nuxu so Akilasi koɖo Prisi nuɔ, éyɔnɔ wo doju.

12. Nyi asu koɖo ashiwo atɛnŋ awa yí azannɔ gamɛ dojuɔ? (Kpɔ foto lɔ hɛnnɛ.)

¹² Lé asu koɖo ashiwo atɛnŋ awa Akilasi koɖo Prisi tɔ han doɔ? Bu tamɛ kpɔ so enu ciwo eo koɖo mɛ ci èɖe atɛnŋ awa doju nu. Danyɔ mɔ míawanɔ edɔ cɛwo doju sɔwu mɔ mɛɖeka awanɔ wo ba? Le kpɔwɛ mɛ, Akilasi koɖo Prisi ɖenɔ kunu doju. Míatɛnŋ awa toto yí aɖenɔ kunu doju blaŋblaŋ a? Akilasi koɖo Prisi gbewanɔ edɔ doju. Taŋfuin eo koɖo mɛ ci èɖe dewanɔ edɔ ɖekɛ ŋmɛ o, vɔ míatɛnŋ awanɔ axomɛ dɔwo dojua? (Ŋun. 4:9) Nɔ míkpenɔdo míwonɔnɔwo nu yí wanɔ dɔ dojuɔ, míavakpɔ mɔ yewonyi edɔwadoɖekɛtɔwo yí emɔ agbehun nɔ mí míakannɔ seŋ. Robert koɖo Linda ɖe nɔnɔ yɛɔ, ewu exwe 50. Robert nu mɔ: “Nyɔnɔnwitɔɔ, gamɛ dele nyɛ koɖo ashinyɛ shi yí mìanɔnɔ ju ahan o. Vɔ nɔ ŋklɔkɔ kpanu yí yɛ cucukɔ wo mɛ alo ŋdedeɛ gbadenu yí evale ŋgbɔɔ, eji jɔnɔŋ keke. Ci mìwakɔ enuwo dojuɔ, mìvave doji. Lɔnlɔn ci mìɖo nɔ nɔnɔ sɛnkɔŋ doji.”

13. Nɔ asu koɖo ashi atɛnŋ anɔ eju nyao ɖe, nyi ele mɔ woawaɔ?

¹³ Vɔ míɖo ŋwi mɔ denyi ejunɔnɔ ɖekɛ yí ana yí asu koɖo ashi alɔn nɔnɔ o. Nyɔnu ɖeka ci yí le Brésil nu mɔ: “Egbɛɔ, vovo denɔnɔ mì shi ɖeeɖe o. Eyi taɖo àtɛnŋ abui mɔ ci míle axwe ɖekɛ mɛɔ, anyi mízanzan gamɛ doju. Ŋɖo agbewa ŋɖewo ciwo yí adasɛ mɔ ŋsɔkɔ eɖe le ji nɔ asunyɛ.” Kpɔ lé Bruno koɖo ashiɛ Tays tekpɔ yí sɔnɔ eɖe le ji nɔ wowonɔnɔwo ɖa. Bruno nu mɔ: “Nɔ nyɛ koɖo ashinyɛ le juɔ, mìsɔnɔ míwo telefonuwo do akpa  keŋ atɛnŋ ase vivi nɔ gamɛ ci mìzanzan doju.”

14. Nɔ asu koɖo ashi ɖe detɛnŋ zannɔ gamɛ doju ɖe, nyi woawaɔ?

¹⁴ Vɔ nyi àwa nɔ eo koɖo mɛ ci èɖe detɛnŋ zankɔ gamɛ dojuɔ? Taŋfuin denyi enu ɖekɛ ŋmɛwo yí jɔnɔ ji nɔ mí o alo míɖe blɛ ʒinʒinnɔ nɔnɔ. Nyi míatɛnŋ awaɔ? Ðo ŋwi ezo ci nu mìxo nuxu so le tɔtɔmɛ. Ezo lɔ detɔnɔ jeje koɖo ŋsɛn ci wobɔɛ kaka o, woɖo akpɔtɔ asɔnɔ aci donɔ ezo lɔ mɛ. Ahanke, danyɔ mɔ míatɔ ji koɖo gamɛ kleŋ zanzan doju le ŋkeke ɖeka mɛ ba? Mítekpɔ awanɔ ŋciwo míwo amɛve lɔwo lɔnnɔ doju yí míŋgbewanɔ ŋciwo yí adɔ míwo amɛve lɔwo atɔ evu o. (Ʒaki 3:18) Nɔ mítɔɛ ji viviviɔ, míakpɔɛ mɔ lɔnlɔn ci yewoɖo nɔ yewonɔnɔwo agbesɛnkɔŋ doji.

15. Nyi yí taɖo bubu le veviɖe gbɔxwe lɔnlɔn ci yí le asu koɖo ashi gblamɛ akpɔtɔ asɛnŋ ɔ?

¹⁵ Bubu le veviɖe le alɔlele mɛ. Ele shigbe aya ci yí adɔ yí ezo abi nywiɖe nɛ. Nɔ aya deliɔ, ezo lɔ ɖe blɛ cinɔ. Ahanke nɔ asu koɖo ashi debukɔ wowonɔnɔwoɔ, lɔnlɔn ci yí le wowo gblamɛ aɖe blɛ atɔ cici. Vɔ nɔ asu koɖo ashi lɔ tekpɔ yí bunɔ wowonɔnɔwoɔ, woana yí lɔnlɔn ci woɖo nɔ wowonɔnɔwo akpɔtɔ asɛnsɛnŋ. Ðo ŋwi mɔ, lé mɛ ci èɖe kpɔɛ mɔ èbukɔ ye do yí le veviɖe, de lé eɔbuikɔ do yɔ o. Penny koɖo Aret ɖe nɔnɔ yɛɔ, ewu exwe 25. Penny nu mɔ: “Ci mìbunɔ mìwonɔnɔwoɔ, éna yí lɔnlɔn le xomu lɔ mɛ nywiɖe. Mìvonɔ yí nunɔ lé enu wakɔ nɔ mì do nɔ mìwonɔnɔwo, ɖo mìnya mɔ mɛɖekaɖeka susu le veviɖe.” Nyi àtɛnŋ awa yí asɔ dasɛ nɔ mɛ ci èɖe mɔ yebuini nyɔnɔnwimɛtɔɔ? Mìakpɔ Abraxamu koɖo Sara kpɔwɛ.

16. Nyi ŋsuwo atɛnŋ akpla le Abraxamu kpɔwɛ lɔ mɛɔ? (1 Piɛ 3:7) (Kpɔ foto lɔ hɛnnɛ.)

¹⁶ Abraxamu wanɔ nu do Sara nu koɖo bubu. Éɖonɔ to Sara yí degbalinɔ enyɔ ciwo yí enunɔ o. Gbeɖekaɔ, Sara xa le yiɖeki mɛ sugbɔ. Énu lé enu lɔwo wakɔ do ni nɔ Abraxamu yí do hwɛ yi ŋtɔkpu mɔ eyi dɔ yí cukaɖa lɔwo li. Abraxamu shin xomɛ yí ɖo enyɔ lɔ ŋci koɖo dɔmɛzia? Oo. Énya mɔ Sara nyi nyɔnu ci yí sɔ yiɖeki hwenɔ yí lɔnnɔ do ye gbetasɔsɔwo ji. Abraxamu ɖo to yi yí tekpɔ yí kpɔ enyɔ lɔ gbɔ. (Gɔnm. 16:5, 6) Nyi mìatɛnŋ akpla le mɛɔ? Ŋsuwo, míwo yí ɖo acɛ yí asɔ gbeta do nu nɔ míwo xomu. (1 Kor. 11:3) Vɔ ŋci míawa asɔ dasɛ nɔ míwo shi mɔ yewoluin yí nyi mɔ, míaɖo to yi susu gbɔxwe asɔ gbeta, vevitɔ nɔ gbeta lɔ kan yɛ can. (1 Kor. 13:4, 5) Gaɖewomɛɔ, etɛnŋ jɔ mɔ ashio axa  le yiɖeki mɛ yí aji mɔ yeanu lé ewakɔ nɔ ye do nɔ eo. Àtɛnŋ aɖo eto yi nywiɖe yí asɔ dasɛ ni mɔ lé enuwo wakɔ ni do le veviɖe nɔ yea? (Hlɛn 1 Piɛ 3:7.) Angela koɖo Dmitry ɖe nɔnɔ yɛɔ, ayi exwe 30 han. Nɔvinyɔnu lɔ nu lé asuɔ buini do yí nu mɔ: “Nɔ ŋɖe ve ŋnu alo nɔ ŋji mɔ naxo nuxu nɔ Dmitry ɔ, éɖonɔ toŋ gashiagamɛ. Égbɔnnɔ ji ɖɛ nɔŋ nɔ ŋxokɔ nuxu koɖo dɔmɛzi can.”

17. Nyi nyɔnuwo atɛnŋ akpla le Sara kpɔwɛ lɔ mɛɔ? (1 Piɛ 3:5, 6)

¹⁷ Sara bunɔ Abraxamu ci elɔnnɔ do yi gbetasɔsɔwo ji. (Gɔnm. 12:5) Gbeɖekaɔ, mɛɖekawo va Abraxamu gbɔ maɖoŋdonutɔ yí eji mɔ yeaxɔ wo mɛdru. Énu nɔ Sara mɔ, yi le tashi edɔ ci ewakɔ yí avaɖa kpɔnnɔ gangan ɖeka nɔ wo. (Gɔnm. 18:6) Sara wa enu le afɔdumɛ yí wa do enyɔ ci Abraxamu nu ji. Nyɔnuwo, míatɛnŋ awa Sara tɔ han nɔ míwanɔ do míwo suwo gbetasɔsɔwo ji. Nɔ míwɛni ahan ɔ, anyi mídodoɔ ŋsɛn míwo lɔlele lɔ. (Hlɛn 1 Piɛ 3:5, 6.) Dmitry ci nu mìxo nuxu so le mamamɛ ci yí vayi mɛ nu lé ashiɛ buini do. Énu mɔ: “Lé Angela nɔnɔ godu nɔ anyi gbetasɔsɔwo do jɔnɔ ji nɔŋ. Nɔ mìdeɖo susu ɖekɛ ŋmɛ do enyɔ ɖe ji can ɔ, élɔnnɔ do ji. Eyi nɔ enu lɔwo devayi nywiɖe can ɔ, dedonɔ hwɛŋ o.” Ele fafɛɖe mɔ woalɔn mɛ ci yí bunɔ amɛ.

18. Nɔ asu koɖo ashiwo tekpɔ yí lɔnlɔn ci yí le wo mɛ kpɔtɔ sɛnsɛnŋ ɖe, nyɔna ci yí woakpɔɔ?

¹⁸ Egbɛɔ, Satana jijiɛ mɔ lɔnlɔn ci yí le asu koɖo ashi Kristotɔwo gblamɛ aci. Énya mɔ nɔ asu koɖo ashi ɖe degbeɖo lɔnlɔn nɔ wowonɔnɔwoɔ, woaso gbeɖe Yehowa ɖɛ. Vɔ lɔnlɔn akun-akun lɔ decinɔ o. Mína nɔ lɔnlɔn ci yí le míwo gblamɛ ale shigbe lɔnlɔn ci nu woxo nuxu so le Salomɔ Ha mɛ nɛ. Eyi taɖo lɔnlɔn ɖoɖo nɔ Yehowa le nyi enu ŋkɔtɔ le míwo lɔlele lɔ mɛ. Mízannɔ gamɛ do míwonɔnɔwo nu, mídonɔ bubu míwonɔnɔwo nu yí lé enu wanɔ nɔ mɛɖekamɛɖeka koɖo yi ʒanwo le nɔ veviɖe nɔ mí. Nɔ míwɛni ahan ɔ, míwo lɔlele lɔ ahɛn kanfukanfu vɛ nɔ Yehowa, Mɛ ci gbɔ yí lɔnlɔn adodwi lɔ so. Eyi shigbe ezo ci wole bu nɔ nɛɔ, míwo lɔnlɔn daci gbeɖe o.