Woɖe enutata gɔnmɛ mɔ yɛnyi “enyɔ vevi ci wonunɔ alo egbe ci woɖo mɔ woawa ŋɖe yí woyɔnɔ Mawu do ji.” Etɛnŋ nyi enyɔ ci woanu kpoŋ alo enyɔ ci woaŋwlɛ ɖɛ.

Mɛɖowo kpɔɛ mɔ enudɔndɔn enyi mɔ woata nu, ɖo Yesu nu mɔ: “Mí ŋgbe ta enu o. . . Míwo nuxuxoxo ɖogbe a nyi ‘Ɛɛ, ɛɛ’ alo ‘Oo, oo’. Vɔ, nɔ́ mí ɖo a nu sɔwu ‘Ɛɛ’ alo ‘Oo’ ɔ, Satan gbɔ yí e sonɔ.” (Mt. 5:33- 37) Yesu nya mɔ Moizi Se lɔ mɔ woɖo ata nu le ŋɖewo mɛ yí Mawu sɛntɔ egbejinɔtɔ ɖewo ta nu vayi. (Gɔnm. 14:22, 23; Hun. 22:10, 11) Égbenya hɛnnɛ mɔ Yehowa can ta nu. (Ebre. 6:13-17) Eyi taɖo Yesu denukɔ mɔ mìdeɖo ata nu gbeɖe o. Vɔ ékankɔxle amowo mɔ woŋgbeta nu do aya mɛ alo do enugbaliwo ji o. Mìɖo akpɔnɔ enyɔ ciwo ji mìmɔ mìawa do mɔ wonyi enukɔkɔɛwo. Eyi taɖo mìɖo awa do nyɔ ci mìnu ji.

Vɔ nɔ womɔ eo le ta nu ɖe, nyi èɖo awaɔ? Ŋkɔtɔ, kando ji mɔ yeawa do enu ci yejikɔ ata lɔ ji. Vɔ nɔ dekando jiɔ, ŋgbexaji amɔ yeata nu o. Mawu Nyɔ lɔ kanxle mì mɔ: “Nɔ deta nuɔ, enyɔ nɔ eo sɔwu mɔ àta nu gan yí dawa do ji o.” (Ŋun. 5:5, NWT) Evetɔ, ji Bibla gɔnmɛɖose ciwo yí xo nuxu so enu ci womɔ eo le ta nu, yí ci èsɔ Bibla na kpla ayexa aotɔɔ, wa do enu ci enu nɔ eo ji. Bibla gɔnmɛɖose ɖewo ciwo yí akpedo eo nuɔ?

Enutata ɖewo sɔgbe koɖo Mawu dro. Le kpɔwɛ mɛ gbecigbe yí Yehowa Kunuɖetɔ amɛve ɖekɔ nɔnɔɔ, woɖonɔ gbe nɔ nɔnɔ. Enutata gbɛmu ɖe yí nyi egbeɖoɖo cɛ. Ŋsu lɔ koɖo nyɔnu lɔ ɖonɔ gbe nɔ nɔnɔ le Mawu koɖo agbetɔwo ŋmɛ mɔ yewoalɔn nɔnɔ, ado vivi yewonɔnɔwo nu yí abunɔ yewonɔnɔwo “keke sɔyi yewo kugbe.” (Asu koɖo ashi ɖewo denunɔ enyɔ cɛ hanwo pɛpɛpɛ o, vɔ wowo can woɖonɔ gbe le ŋkɔ nɔ Mawu.) Eyi so gbenɔgbe jiɔ, wotrɔ asu koɖo ashi, woɖo anɔ wowonɔnɔwo gbɔ keke je wowo kugbe. (Gɔnm. 2:24; 1 Kor. 7:39) Egbe ci woɖonɔ le alɔlelezan lɔ ji sɔgbe koɖo Mawu dro.

Enutata ɖewo desɔgbe koɖo Mawu dro o. Kristotɔ adodwi ɖe deɖo ata nu yí amɔ yeayi ahwa asɔ glɔn ta nɔ ye ju alo ata nu amɔ yedagbesɛn Mawu o. Nɔ éwɛ ahan ɔ, anyi édada le Mawu se ji. Kristotɔwo “de nyi xexe lɔtɔ o,” eyi taɖo mìdeɖo ado nu xexe lɔ nyɔwo koɖo yi hwawawawo mɛ o.—Ʒan 15:19; Ezai 2:4; Ʒaki 1:27.

Gbɔxwe mìata enu ɖewoɔ, ayexadohwɛnamɛnu mìwotɔ nu yí mìakpɔ do. Yesu kpla nu mì mɔ, “mí sɔ enu ciwo yí nyi Sezatɔ nɔ Seza, yí a sɔ enu ciwo yí nyi Mawutɔ nɔ  Mawu.” Eyi taɖo hweɖewonuɔ, ele mɔ mìabu tamɛ kpɔ nywiɖe so enyɔ cɛ ci Yesu nu nu gbɔxwe amɔ mìata nu.—Luiki 20:25.

Sɔɛ mɔ wonu nɔ Kristotɔ ɖe mɔ yiɖo ata nu amɔ yeanɔ gbeji nɔ ju lɔ keŋ gbɔxwe yí axɔ wema ci yí adasɛ mɔ yɛnyi eju lɔ mɛ vi alo axɔ emɔzɔnzɔnwema. Nɔ enu ci woata mɔ woanɔ egbeji nɔ eju lɔ anyi mɔ woaɖo gbe mɔ woawa ŋɖe ci yí ada le Mawu se jiɔ, ayexadohwɛnamɛnu yitɔ ci esɔ Bibla na kpla dalɔn ni yí ata nu lɔ o. Vɔ acɛkpakpa lɔ tɛnŋ lɔn mɔ yɛ le trɔ ŋɖewo le enutata lɔ mɛ nɔ anɔ do yi lɔ ji, nɔ ayexadohwɛnamɛnu yitɔ ŋgbeɖe fun ni o.

Nɔ wotrɔ nyɔ ɖewo le enu ci woata keŋ asɔ nɔ gbeji nɔ eju lɔ nu yí mɛɖe lɔn mɔ yeanuiɔ, etɛnŋ sɔgbe koɖo gɔnmɛɖose ci yí le Rɔmatɔwo 13:1 mɛ, ci yí nu mɔ: “Míwo pleŋ mí ɖo a na bubu acɛkpakpa gawo.” Eyi taɖo Kristotɔ ɖe tɛnŋ kpɔɛ mɔ ci Mawu ŋtɔ nu vɔ mɔ wo le na bubu acɛkpakpawoɔ, ŋɖe dedɔn le nu nɔ yeta gbe ŋtɔ́ o.

Egbele veviɖe mɔ àɖo to ayexadohwɛnamɛnu aotɔ nywiɖe nɔ womɔ eo le zan ŋɖe alo awa jeshi ɖe keŋ asɔ ta nu. Blema Rɔmatɔwo koɖo Scytitɔwo sɔnɔ ewi tanɔ nu yí sɔ danasɛ mɔ yewosɔ ahwa mawu sɔ ɖokɔ kpe yi ji mɔ mɛ lɔ ɖo awa do nyɔ ci enu ji. Grɛkitɔwo kɔnɔ alɔ yi ji nɔ wotakɔ nu. Nɔ wowɛ ahan ɔ, wonukɔ mɔ Mawu sekɔ enyɔ ci wonu yí kpɔ enu ci wowa, ɖo eyi nyi mɛ ci agbetɔwo ana kɔnŋta.

Nyɔnɔnwi enyi mɔ Yehowa sɛntɔwo dasɔ eju lɔ jeshidu ɖe ci yí ca ka koɖo ŋsusɛnsɛn keŋ asɔ ta nu o. Vɔ nɔ èyi kojoɖoxu ɖe yí womɔ eo le sɔ alɔ da do Bibla ji keŋ ata nu mɔ yeato nyɔnɔnwi ɖe, lé àwɛɔ? Nɔ evajɔ ahan ɔ, ètɛnŋ mɔ yeawɛ, ɖo le Bibla mɛɔ, Mawu sɛntɔ egbejinɔtɔ ɖewo zan ŋɖewo yí sɔ ta nu. (Gɔnm. 24:2, 3, 9; 47:29-31) Ele veviɖe mɔ àɖo ŋwi mɔ nɔ yetata enu ŋtɔ́ hanwoɔ, yeɖokɔ gbe le Mawu ŋmɛ mɔ yeato nyɔnɔnwi. Dra do ɖɛ nɔ wovabiɔ nyɔ ɖekpokpui eo seɔ, natekpɔ ato nyɔnɔnwi.

Ci ekacaca ci yí le mìwo koɖo Yehowa gblamɛ le veviɖe nɔ mìɔ, mìɖo ado gbe ɖaɖa yí abu tamɛ kpɔ nywiɖe so ŋɖekpokpui ci woamɔ mìwo le ta nu yí akando ji mɔ mìwo yixa dado hwɛ mì o yí mìdedada le Bibla gɔnmɛɖose ɖe ji o. Eyi nɔ mìmɔ mìata nuɔ, mìɖo awa do enyɔ ci mìnu ji.—1 Piɛ 2:12