1. Ci ekpɔtɔ hwɛɖeka yí Yesu aku ɖe, enyɔ ci enu nɔ danuwatɔ ɖeka ci yí le axa niɔ? (Luiki 23:39-43)

 CI YESU koɖo danuwatɔ ciwo yí le axa ni le ekudunuɔ, wosekɔ vevi. (Luiki 23:32, 33) Danuwatɔ lɔwo kokoɔ Yesu, eyi taɖo eze petii mɔ, wodenyi yi nukplaviwo o. (Mt. 27:44; Maki 15:32) Vɔ ɖeka le wo mɛ trɔ yi susu. Énu mɔ: ‘Yesu, gayimɛ Àyi Ao fyɔɖuxu mɛɔ, ɖo ŋwiŋ.’ Yesu ɖo ŋci ni mɔ: “Nyɔnɔnwi yí ŋnukɔ nɔ eo gbɛ mɔ, àvanɔ koɖoŋ le Paradiso mɛ.” (Luiki 23:43, NWT) (Hlɛn Luiki 23:39-42.) Ŋɖekɛ dedasɛ mɔ ése ŋɛdu ci yí xo nuxu so ‘jeŋkwi mɛ fyɔju’ lɔ nu, hwenu Yesu wa yi kunuɖeɖedɔ lɔ o. Yesu can denu gbeɖe mɔ ŋsu lɔ ayi Fyɔɖuxu lɔ mɛ le jeŋkwi mɛ o. (Mt. 4:17) Paradiso ci yí avanɔ nyigban ji nu yí Yesu xokɔ nuxu so. Nyi yí taɖo mìatɛnŋ anu ahan ɔ?

2. Nyi yí taɖo mìatɛnŋ anu mɔ Ʒuifu yí danuwatɔ ci yí trɔ ji mɛ lɔ nyiɔ?

² Ewa mɔ Ʒuifu yí danuwatɔ ci yí trɔ ji mɛ lɔ nyi. Énu nɔ yi kpena mɔ: “De vɔnvɔn nɔ Mawu . . . ba?” (Luiki 23:40) Mawu kuɖeka yí Ʒuifuwo sɛnnɔ, vɔ jukɔn bu mɛ tɔwo sɛnnɔ Mawu sugbɔwo. (Hun. 20:2, 3; 1 Kor. 8:5, 6) Nɔ denyi Ʒuifuwo yí danuwatɔ lɔwo nyi saɔ, lé abiɔ enyɔ lɔ se ke: “Devɔnvɔn nɔ Mawuwo ba?” Gbesɔ kpe niɔ, wodedɔ Yesu ɖaɖa jukɔn bu mɛ tɔwo gbɔ o, vɔ “lɛngbɔ ciwo yí bu le Izraɛli xwe mɛ” gbɔ yí wodɔɛ ɖaɖa. (Mt. 15:24) Yí Mawu nu nɔ Izraɛliviwo mɔ yeavafɔn amɛkukuwo. Enyɔ cɛ tɛnŋ le nyanya mɛ nɔ danuwatɔ cɛ. Yí nyɔ ciwo enu dasɛ mɔ, énya mɔ Yehowa avafɔn Yesu nɔ anyi efyɔ nɔ Mawu Fyɔɖuxu lɔ. Ewa mɔ ŋsu lɔ kpɔkɔ emɔ mɔ Mawu avafɔn ye so eku. Eyi taɖo mìatɛnŋ anu mɔ Ʒuifu yí danuwatɔ lɔ nyi.

3. Ci Yesu xo nuxu so Paradiso lɔ nu ɖe, nyi yí tɛnŋ va susu mɛ nɔ danuwatɔ trɔjimɛ lɔɔ? Ðe mɛ. (Gɔnmɛjeje 2:15)

 ³ Ci danuwatɔ lɔ nyi Ʒuifuɔ, ánya nu so Adamu koɖo Ɛva sɔ kpe nɔ Paradiso ci mɛ yí Yehowa sɔ wo do nu. Eyi taɖo danuwatɔ lɔ tɛnŋ xɔɛ se mɔ Paradiso ci nyɔ Yesu nukɔ anyi texwe nyakpɔkpɔ ɖeka le nyigban ji lɛ.—Hlɛn Gɔnmɛjeje 2:15.

4. Nyi nu yí nyɔ ci Yesu nu nɔ danuwatɔ lɔwo ɖeka ɖo ana mìabu tamɛ kpɔ soɔ?

⁴ Enyɔ ciwo Yesu nu nɔ danuwatɔ lɔ ɖo ana mìabu tamɛ kpɔ so lé agbe lɔ avanɔ do le Paradiso lɔ mɛ nu. Lé fafa nɔ Efyɔ Salomɔ cɛkpakpa hwenu atɛnŋ akpla ŋɖe mì so Paradiso lɔ nu. Bibla nu mɔ Yesu gangan wu Salomɔ. Ecɛ wɛ mɔ mìatɛnŋ akpɔ emɔ mɔ Yesu koɖo mɛ ciwo yí abɔdo nu yí woaɖu fyɔ awɛ keke nyigban lɔ atrɔ Paradiso nyakpɔkpɔ ɖeka. (Mt. 12:42) Eyi taɖo, “lɛngbɔ bu” mɛ tɔwo ɖo atekpɔ yí anya enu ciwo woɖo awa keŋ atɛnŋ avanɔ agbe mavɔ le Paradiso lɔ mɛ.—Ʒan 10:16.

5. Lé èkpɔ mɔ agbe lɔ anɔ do le Paradiso lɔ mɛɔ?

⁵ Lé èkpɔ mɔ agbe lɔ ale do le Paradiso lɔ mɛɔ? Taŋfuin èkpɔɛni mɔ yɛanyi texwe nyakpɔkpɔ ɖeka shigbe Edɛn kpa lɔ mɛ nɛ. (Gɔnm. 2:7-9) Ètɛnŋ ɖo ŋwi nyɔnuɖɛ ci yí le Mishe wema mɛ ci yí mɔ Mawu mɛ “ɖeka ɖeka a le nyi nɔnɔ le gɔnmɛ nɔ yiŋtɔ vɛnci koɖo figici.” (Mishe 4:3, 4) Ètɛnŋ gbeɖo ŋwi Bibla kpukpui ɖewo ciwo yí mɔ ŋɖuɖu avabɔ. (Eha. 72:16; Ezai 65:21, 22) Ètɛnŋ kpɔɛ mɔ yele texwe nyakpɔkpɔ ɖeka yí nɔ nyinɔnɔ do ekplɔn ɖeka nu, ekplɔn lɔ ɖɔ koɖo ŋɖuɖu viviwo. Ètɛnŋ gbekpɔɛ le susu mɛ mɔ aci koɖo flawawo dɔ yí ayamɛ hwɛnhwɛn ete lilili. Ètɛnŋ gbekpɔkpɔ lé ao xomu koɖo ao xlɔwo sɔ kpe nɔ mɛ ciwo woafɔn so ku ale ju yí ale nukui kokɔ yí ale vivi sekɔ. Enu cɛwo pleŋ denyi drɔxwenyɔ ɖe o. Mìatɛnŋ akando ji mɔ enu cɛwo pleŋ ajɔ nyɔnɔnwitɔ le nyigban cɛ ji. Vɔ mìawa edɔ dojijɔnamɛwo le Paradiso lɔ mɛ hɛnnɛ.

6. Nyiwo yí mìavawa le Paradiso lɔ mɛɔ? (Kpɔ foto lɔ.)

⁶ Yehowa wa mì mɔ mìakpɔnɔ jijɔ le edɔ ci mìwanɔ mɛ. (Ŋun. 2:24) Edɔ ale mì ji mìawa le Exwe Kotokun ɖeka Cɛkpakpa Kristo tɔ hwenu haan. Mɛ ciwo yí aci agbe le efunkpekpe gangan lɔ hwenu sɔ kpe nɔ amɛ miliɔn nɛniɖe ciwo woafɔn so ku aʒan awu ci woado, enu ci woaɖu koɖo texwe ci woanɔ. Edɔ cɛwo wawa adɔ yí mìakpɔ jijɔ haan! Shigbe lé wonu nɔ Adamu koɖo Ɛva mɔ, wo le dra texwe ci wosɔ wo do nɔ anya kpɔkpɔ nɛɔ, ahanke mìwo can mìadra nyigban lɔ do yí avanyi Paradiso nɛ. Kpɔɛ le susu mɛ yí akpɔ lé  anyi jijɔkpɔkpɔ nɔ mì do, mɔ mìakpla nu amɛ miliɔn nɛniɖe ciwo yí woafɔn so ku, ciwo yí denya enu sugbɔ ɖe so Yehowa koɖo enu ci edrɔ mɔ yeawa nɔ mì nu o. Yí akpedo egbejinɔtɔ ciwo yí ku doŋkɔ nɔ Yesu hwenu nu, nɔ woakpla nu sugbɔ doji.

7. Nyi ji mìɖo akandoɔ, yí nyi yí taɖoɔ?

⁷ Mìatɛnŋ akando ji mɔ le Paradiso lɔ mɛɔ, mìanɔ fafa mɛ, aɖo enuɖekpokpui ci yí wudo mì yí enuwo anɔ toto nu. Nyi yí taɖo mìatɛnŋ anu ahan ɔ? Ðo Yehowa na mì kpɔwɛ ɖeka so lé agbe lɔ avanɔ do le Eviɛ cɛkpakpa hwenu. Lé enuwo nɔ do le Efyɔ Salomɔ cɛkpakpa hwenu nyi kpɔwɛ ɖeka ci yí dasɛ yi.

8. Lé enyɔ ciwo yí Efyɔ Davidi ŋwlɛ do Ehajiji Wema 37:10, 11, 29 mɛ vamɛ le blemaɔ? (Kpɔ “Enyɔbiɔse ciwo yí so yi hlɛntɔwo gbɔ” ci yí le Jutakpɔxɔ cɛ mɛ.)

⁸ Gbɔngbɔn kɔkɔɛ zan Efyɔ Davidi yí eŋwlɛ nu so lé agbe lɔ anɔ do nɔ mɛɖe ci yí nya ŋɖɛ yí gbenyi egbejinɔtɔ ɖu ega. (Hlɛn Ehajiji Wema 37:10, 11, 29.) Blaŋblaŋ ɔ, mìhlɛnnɔ Ehajiji Wema 37:11 tɔ nɔ mɛbuwo nɔ mìxokɔ nuxu nɔ wo so Paradiso ci yí avava nu. Mìɖo susu nywi ci yí taɖo yí mìawɛni ahan, ɖo Yesu can yɔ mawunyɔkpukpui cɛ mɛ nyɔwo le Etojinuxu yitɔ lɔ mɛ yí sɔ dadasɛ mɔ yɛavavamɛ le esɔ mɛ. (Mt. 5:5) Vɔ enyɔ ciwo yí Davidi nu dasɛ lé agbe lɔ nɔ do le Efyɔ Salomɔ hwenu. Hwenu yí Salomɔ kplɔkplɔ Izraɛliɔ, Mawu mɛwo le jijɔ koɖo fafa mɛ yí enuwo mlɛkɔ nɔ wo le nyigban ci ji “nyibunɔshu koɖo enyishi sasa le.” Mawu nu nɔ wo mɔ: “Nɔ míkpɔtɔ wakɔ do anyi nyɔwo ji yí nyinɔ anyi sewo yí wanɔ do wo jiɔ, . . . nahɛn fafa va nyigban lɔ ji, míamlɔ anyi yí mɛɖe dado vɔnvɔn nɔ mí o.” (1 Ese. 20:24, NWT; 26:3, 6, NWT) Gbeɖu cɛwo vamɛ hwenu yí Efyɔ Salomɔ le acɛ kpakɔ. (1 Kro. 22:9; 29:26-28) Eyi Yehowa ɖo gbe mɔ, amɛvwin ciwo yí sɛnnɔ mawu buwo “da gbe li o.” (Eha. 37:10) Eyi taɖo, enyɔ ciwo yí le Ehajiji  Wema 37:10, 11, 29 vamɛ vayi yí woagbevamɛ le esɔ mɛ.

9. Enyɔ ci yí Sheba fyɔ nyɔnu lɔ nu so Efyɔ Salomɔ cɛkpakpa nuɔ?

⁹ Sheba fyɔ nyɔnu lɔ se lé enuwo mlɛ nɔ Izraɛliviwo do yí fafa nɔ wo mɛ le Efyɔ Salomɔ cɛkpakpa hwenu. Éje agbla yí zɔn mɔ jinjin keke yi Ʒerusalɛmu yí vayi kpɔ nɔnɔmɛ lɔwo yiŋtɔ. (1 Efy. 10:1) Ci evakpɔ lé enuwo le do le Salomɔ cɛkpakpa lɔ mɛɔ, énu mɔ: “Ŋ kpɔ mɔ wana lɔwo gbe gangan wu enu ci yí ŋ se. . . . Ao [dɔwaviwo] xɔ shicu sugbɔ! Wo tɛnŋ sumɔ eo yí a ɖoto ao ŋununyanya ŋkeke ɖeka ɖeka!” (1 Efy. 10:6-8) Vɔ lé enuwo nɔ do le Efyɔ Salomɔ hwenu nyi kpɔwɛ kleŋ ɖeka nɔ enu ciwo Yehowa jikɔ avawa nɔ agbetɔwo le Eviɛ Yesu cɛkpakpa hwenu.

10. Emɔ ciwo ji yí Yesu le ŋkɔ nɔ Salomɔ leɔ?

¹⁰ Yesu ɖo ŋsɛn wu Salomɔ le emɔ ɖeshiaɖe ji. Salomɔ nyi amɛmakpemakpe yí ewa afɛn gangan ciwo yí dɔ Mawu mɛwo vaɖo cukaɖa mɛ. Vɔ Yesu yɛ nyi Acɛkpatɔ maɖonuvɔn ci yí dewanɔ afɛn ɖekɛ o. (Luiki 1:32; Ebre. 4:14, 15) Yesu kpɔtɔ nɔ gbeji nɔ Mawu, ci Satana na yí eto tetekpɔ sɛnŋsɛnŋwo mɛ can. Kristo dasɛ mɔ yedavawa nuvɔn gbeɖe alo awa ŋɖe yí adahɛn nu le mɛ ciwo yeakpa nɔ nu o. Eyi nyi Efyɔ nywitɔ ci mìatɛnŋ aɖo.

11. Miwo yí akpedo Yesu nu le yi cɛkpakpa hwenuɔ?

¹¹ Agbetɔ 144 000 aɖu efyɔ koɖo Yesu yí woale be nɔ agbetɔwo yí awɛ nɔ Yehowa gbeɖuwo avamɛ le nyigban ji. (Enyɔ. 14:1-3) Tetekpɔ ciwo mɛ yí ŋsu koɖo nyɔnu cɛwo to akpedo wo nu woamɔŋje enu ciwo mɛ amɛ ciwo yí le nyigban ji totoɔ mɛ. Vɔ ɖe, edɔ ci koŋ yí mɛ cɛwo jikɔ avayi waɔ?

12. Edɔ ci yí Yehowa avaɖo nɔ amɛ 144 000 lɔwoɔ?

¹² Edɔ ci yí Yesu koɖo mɛ ciwo yí abɔdo nu yí woaɖu fyɔ awa wugan sesese wu edɔ ci yí Salomɔ wa. Efyɔ Salomɔ kpe ŋkuvi do amɛ miliɔn nɛniɖe ciwo yí le eju ɖeka mɛ nu. Vɔ mɛ ciwo yí akpa acɛ le Mawu Fyɔɖuxu lɔ mɛ akpe ŋkuvi do agbetɔ miliya nɛniɖe ciwo yí le xexeɛ pleŋ mɛ nu. Yehowa gangan amɛ 144 000 lɔwo haan!

13. Edɔ vevi ci yí Yesu koɖo mɛ ciwo yí aɖu efyɔ koɖi awaɔ?

¹³ Shigbe Yesu nɛɔ, amɛ 144 000 lɔwo anyi efyɔwo koɖo avɔnsatɔwo. (Enyɔ. 5:10) Hwenu yí Izraɛliviwo wawa do Moizi Se lɔ jiɔ, edɔ vevi ŋkɔtɔ ci avɔnsatɔwo wanɔ yí nyi mɔ, woakpedo amɛwo nu nɔ woanɔ nywiɖe le gbaza mɛ yí anɔ ekacaca nywi mɛ koɖo Yehowa. Ese lɔ nyi “[kpɔli] nɔ enu nywi ci yí gbɔgbɔ.” Eyi taɖo mìatɛnŋ anu mɔ mɛ ciwo yí aɖu efyɔ koɖo Yesu awɛ keke nɔ amɛwo anɔ nywiɖe le gbaza mɛ yí anɔ ekacaca nywi mɛ koɖo Yehowa. (Ebre. 10:1) Mìdenya lé efyɔ koɖo avɔnsatɔ cɛwo awɛ yí axo nuxu koɖo mɛ ciwo yí anɔ nyigban ji hwenɔnu o. Nɔ Yehowa gbewa toto lɔ do ɖe can ɔ, mìatɛnŋ akando ji mɔ le Paradiso lɔ mɛɔ, mɛ ciwo yí anɔ nyigban lɔ ji axɔ emɔdasɛnamɛ ciwo woʒan.—Enyɔ. 21:3, 4.

14. Lé “lɛngbɔ bu” mɛ tɔwo koɖo Kristo nɔviɛwo gblamɛ le doɔ?

¹⁴ Yesu yɔ mɛ ciwo yí aɖu efyɔ koɖi mɔ “lɛngbɔha hwɛhwɛ.” (Luiki 12:32) Éyɔ gbɛbɔbɔ amɛvetɔ lɔ mɔ “lɛngbɔ bu” mɛ tɔwo. (Ʒan 10:16) Gbɛbɔbɔ amɛve cɛwo xoca yí trɔ lɛngbɔha ɖeka. Gbɛbɔbɔ amɛve cɛwo le edɔ wakɔ doju xoxoxo vɔ,  yí woakpɔtɔ ale edɔ wakɔ doju hwenu yí nyigban lɔ atrɔ Paradiso. Vɔ hwenɔnuɔ, mɛ ciwo yí nyi “lɛngbɔha hwɛhwɛ” mɛ tɔwo anɔ jeŋkwi mɛ yí mɛ ciwo yí nyi “lɛngbɔ bu” mɛ tɔwo anɔ agbe tɛgbɛɛ le nyigban ji. Vɔ nyiwo yí “lɛngbɔ bu” mɛ tɔwo ɖo awakɔ kakayɛ keŋ atɛnŋ avanɔ agbe le Paradiso lɔ mɛɔ?

15. (a) Lé “lɛngbɔ bu” mɛ tɔwo wakɔ edɔ alɔlealɔmɛ koɖo Kristo nɔviɛwo doɔ? (b) Lé mìawɛ yí awa nɔviŋsu ci yí le nusaxu lɔ tɔ han doɔ? (Kpɔ foto lɔ.)

¹⁵ Edanuwatɔ ci yí trɔ ji mɛ lɔ detɛnŋ dasɛ lé enu ci yí Yesu wa jeŋ ni do gbɔxwe yí ku o. Vɔ mìwo ciwo yí nyi “lɛngbɔ bu” mɛ tɔwoɔ, emɔ sugbɔ hun nɔ mì kakayɛ nɔ mìadasɛ mɔ enu ci Yesu wa jeŋ nɔ mì. Le kpɔwɛ mɛ, lé mìwanɔ nu do Yesu nɔviɛ amɛshiaminɔwo nu, danasɛ lé mìlɔn Yesu do. Yesu nu mɔ yeaɖo kojo nɔ lɛngbɔ lɔwo sɔ koɖo lé wowanɔ enu do ye nɔviyewo nu do. (Mt. 25:31-40) Mìatɛnŋ ado alɔ Kristo nɔviɛwo nɔ mìsɔ ezolelanmɛ kpenɔdo wo nu le kunuɖeɖe koɖo nukplaviwowawadɔ lɔ mɛ. (Mt. 28:18-20) Ecɛ dɔ yí mìjinɔ mɔ mìazan Bibla nukplawema ciwo wonanɔ mì nywiɖe. Ðeka yí nyi Se vivi nɔ agbe lɔ sɔyi mavɔ! wema lɔ. Nɔ dekpɔtɔ Bibla kplakpla koɖo mɛɖe yɛ ɖe, daɖui mɔ yeasɔ Bibla kplakpla ɖo ŋmɛ nɔ amɛ sugbɔ lé àkpe ji do ba?

16. Nyi mìɖo awakɔ kakayɛ keŋ atɛnŋ avanɔ agbe le Paradiso lɔ mɛɔ?

¹⁶ Mìdeɖo abɔ nu keke aɖo Paradiso lɔ mɛ gbɔxwe amɔ mìanyi mɛ ciwo han yí Yehowa jijiɛ mɔ woanɔ Paradiso lɔ mɛ o. Le kakacɛ mɛɔ, mìatɛnŋ aje agbla yí atonɔ nyɔnɔnwi le mìwo nuxuxoxo koɖo mìwo nuwanawo mɛ yí awanɔ nu le dredrenu le agbe mɛ. Yí mìanɔ gbeji nɔ Yehowa, anɔ gbeji nɔ mɛ ci mìɖe koɖo mìwo kpena xɔsetɔwo. Nɔ mìsenɔ tonu nɔ Yehowa kakacɛ le xexe vwin cɛ mɛɔ, anɔ fafɛɖe nɔ mì mɔ mìase tonu ni le Paradiso lɔ mɛ. Mìatɛnŋ atekpɔ aɖoɖoɔ adɛn koɖo nɔnɔmɛ ciwo yí adasɛ mɔ mìdradra do ɖɛ yí anɔ agbe le Paradiso lɔ mɛ. Kpɔ nyɔta ci yí nyi: “Èle gbesɔsɔ yí ‘a ɖu nyigban lɔ cinɔ’ a?” le Jutakpɔxɔ cɛ mɛ.

17. Enyɔ mɔ mìakpɔtɔ ale vevi sekɔ yí agbɔjɔ do nuvɔn ciwo mìwa vayi nua? Ðe mɛ.

 ¹⁷ Nɔ mìwa nuvɔn ganganwo vayiɔ, etɛnŋ kpɔtɔ aveveɛ mì nu. Vɔ mìɖo aje agbla nɔ mìŋgbesekɔ vevi keke yí agbɔjɔ o. Mìdeɖo akpɔ do tafɛnvɔnsa lɔ nu yí ‘asɔ gbeta akpɔtɔ ale agɔ jekɔ’ gbeɖe o. (Ebre. 10:26-31) Mìatɛnŋ akando ji mɔ nɔ mìtrɔ ji mɛ nyɔnɔnwitɔ yí biɔ Yehowa koɖo hamɛmɛshinshinwo mɔ wo le kpedo mì nu yí trɔ wana mìwotɔɔ, Yehowa asɔ ke mì keŋkeŋ. (Ezai 55:7; Edɔ. 3:19) Ðo ŋwi nyɔ ciwo Yesu nu nɔ Farizitɔwo. Émɔ: “Ŋ de va nɔ amɛjɔjɔɛwo yɔyɔ o, vɔ Ŋ va a yɔ agɔjetɔwo.” (Mt. 9:13) Yesu Kristo tafɛnvɔnsa lɔ sɛnŋ keke yí acu nu do mìwo gɔjejewo pleŋ.

18. Enyɔ ci àji mɔ yeabiɔ danuwatɔ ci yí ku le axa nɔ Yesu seɔ?

¹⁸ Kpɔɛ le susu mɛ mɔ yele Paradiso lɔ mɛ yí kankɔ seŋ koɖo danuwatɔ ci yí xo nuxu koɖo Yesu. Kankandoji li mɔ, míwo koɖo ve lɔ míaxo nuxu so lé Yesu vɔnsa lɔ jeŋ nɔ mí nɔ míwonɔnɔwo. Àtɛnŋ agbebiɔ enyɔ buwo yi se so enu ciwo yí jɔ le gaxoxo kpɛtɛkpɛtɛ ci Yesu wa le nyigban ji nu koɖo lé ewa ni, ci Yesu ɖo yi nyɔ lɔ ŋci ni. Yí yɛ can atɛnŋ abiɔ eo se mɔ, lé agbe lɔ nɔ do le ŋkeke kpɛtɛkpɛtɛwo mɛ nɔ Satana xexe vwin lɔ ma. Ajɔ eji nɔ mì mɔ mìakpla Bibla koɖo mɛ ŋtɔ́ hanciwo!—Efe. 4:22-24.

19. Agbenɔnɔ le Paradiso mɛ acikɔ nɔ amɛa? (Kpɔ foto ci yí le akpa lɔ ji.)

¹⁹ Agbenɔnɔ le Paradiso mɛ dacikɔ nɔ mì gbeɖe o. Mìafɔn yí adodoɔ go amɛ veviwo gashiagamɛ yí aɖo edɔ nywiwo awakɔ. Ci yí gbenyɔ wu wo pleŋ ɔ, ŋkeke ɖeka duuɔ, mìajejeɛshi mìwo Da ci yí le jeŋkwi mɛ nywiɖe doji yí aseseɛ vivi nɔ enu ciwo yí enana mì. Mìdatɛnŋ akpla nu so nu vɛ gbeɖe o, ahanke enu sugbɔ li mìakpla so enu ciwo ewa nu. Nɔ mìle agbe mavɔ yí exwewo vayikɔɔ, lɔnlɔn ci mìɖo nɔ Mawu asɛnsɛnŋ doji. Ejɔ ji nɔ mì sugbɔ mɔ Yehowa koɖo Yesu ɖo gbe nɔ mì mɔ mìatɛnŋ avanɔ agbe tɛgbɛɛ le Paradiso mɛ!