Oo. Enu ci Davidi ŋwlɛ sɔgbe yí nyi nyɔnɔnwi.

Kpɔ enyɔ ci enu le kpukpui cɛ koɖo kpukpui bu ciwo mɛ yí enu enyɔ ɖekɛ ŋmɛ lɔwo ke le ɖa: “Na kanfu Ao ŋkɔ keke a sɔyì mavɔmavɔ. Le ŋkeke ɖeka ɖeka mɛ ɔ, na wa enu ciwo gbe yí ŋ ɖo.” “Mawu Anyi Xwetɔ, ŋ kanfu Eo koɖo anyi ji pleŋ. Na na bubu Ao ŋkɔ keke a sɔyì mavɔmavɔ!” “Ŋ kanfu Ao ŋkɔ keke a sɔyì mavɔmavɔ.”—Eha. 61:8; 86:12; 145:1, 2.

Davidi degangankɔ enyɔ lɔwo ɖoɖu yí bukɔ mɔ yedejikɔ avaku kpɔ gbeɖe o. Énya mɔ Yehowa nu mɔ enuvɔnwawa adɔ yí agbetɔwo aku, yí yiŋtɔ lɔn do ji mɔ yenyi nuvɔnmɛ. (Gɔnm. 3:3, 17-19; Eha. 51:4, 5) Davidi gbenya hɛnnɛ mɔ ŋsu egbejinɔtɔ ciwo nu yí kpe nɔ Mawu shigbe Abraxamu, Izaki koɖo Ʒakɔbu nɛ ku vayi yí enya mɔ eye can yeavaku. (Eha. 37:25; 39:4) Vɔ enyɔ ciwo enu le Ehajiji Wema 61:8 tɔ mɛ dasɛ edro koɖo lé eji veviɖe do mɔ yeakanfu Mawu keke asɔyi mavɔ nɔ ye vlɛ yí le agbe duu.—2 Sam. 7:12.

Enuŋwlɛŋwlɛ ciwo yí le Ehajiji Wema 18, 51 koɖo 52 tɔ mɛ dɔ yí mìkpɔɛ mɔ hweɖewonuɔ, Davidi ŋwlɛ enu so enu ciwo mɛ yiŋtɔ to le agbe mɛ nu. Le Ehajiji Wema 23 tɔ mɛɔ, mìkpɔ mɔ Davidi gbeyɔ Yehowa mɔ yɛnyi lɛngbɔkplɔtɔ ci yí danasɛ emɔ nɔ amɛ yí fanɔ akɔn nɔ amɛ yí gbeglɔnnɔ eta nɔ amɛ. Davidi ŋtɔ nyi lɛngbɔkplɔtɔ ŋtɔ́ han. Eyi eji mɔ yeasɛn Mawu le ye ‘gbe pleŋ mɛ.’—Ehajiji Wema 23:6.

Ele mɔ mìaɖo ŋwi mɔ Yehowa yí nu enu ciwo pleŋ Davidi ŋwlɛ ni. Enyɔnuɖɛ ciwo yí xo nuxu so enu ciwo avajɔ nu le enu ciwo yí eŋwlɛ mɛ. Le kpɔwɛ mɛ, le Ehajiji Wema 110 tɔ mɛɔ, Davidi ŋwlɛ nu so hwenu yí yi Xwetɔ anɔ “axa ji nɔ [Mawu le yi] ɖushi ji” le jeŋkwi mɛ yí axɔ ŋsɛn gangan. Nyi asɔ ŋsɛn lɔ waɔ? Ásɔ ɖu Mawu ketɔnɔwo ji, yí “a ɖo kojo nɔ jukɔnwo” le nyigban lɔ ji. Davidi yí nyi tɔgbi nɔ Mɛsia lɔ, mɛ ci yí akpa acɛ so jeŋkwi mɛ yí anyi “Mawu ɖexotɔ keke a sɔyì mavɔmavɔ.” (Ehajiji Wema 110:1-6) Yesu nu mɔ eye nu yí enyɔnuɖɛ ci yí le Ehajiji Wema 110 tɔ mɛ xokɔ nuxu so yí yiavavamɛ le esɔ mɛ.—Mt. 22:41-45.

Mawu na yí Davidi ŋwlɛ enu so yi hwenu koɖo esɔ mɛ nu, hwenu yí woavafuin so eku yí atɛnŋ akanfu Yehowa keke asɔyi mavɔmavɔ. Ecɛ kpedo mì nu yí mìkpɔɛ mɔ Ehajiji Wema 37:10, 11, 29 tɔ xokɔ nuxu so lé enuwo nɔ do le blema Izraɛli vayi koɖo lé enuwo avanɔ do le xexeɛ pleŋ mɛ hwenu yí Mawu awa do gbeɖu yitɔwo ji.—Kpɔ mamamɛ 8 tɔ nɔ nyɔta ci yí nyi “Àvanɔ koɖoŋ le Paradiso mɛ” ci yí le Jutakpɔxɔ cɛ mɛ.

Enyɔ ciwo yí le Ehajiji Wema 61:8 koɖo kpukpui bu ciwo yí nu enyɔ ŋtɔ́ hanwo dasɛ mɔ Davidi ji mɔ yeakanfu Yehowa le blema Izraɛli keke aje ye kugbe. Yí wogbedadasɛ hɛnnɛ mɔ Davidi agbevakanfu Yehowa le esɔ mɛ hwenu woafuin do agbe.