Amɛyoyu Amɛve Ciwo Yí Vaɖo Edɔjikpɔha Lɔ Mɛ
LE ZANGAGBE, 18 Janvier 2023 mɛɔ, wowa nunɔwoase vevi ɖeka le jw.org ji, yí mɔ wosɔ nɔvi ŋsu Gage Fleegle koɖo Jeffrey Winder mɔ woanyi Edɔjikpɔha mɛ tɔ Yehowa Kunuɖetɔwo tɔ. Nɔviŋsu amɛve cɛwo sɛn Yehowa le gbejinɔnɔ mɛ na nɔ hwenu jinjinɖe.
Gage Fleegle koɖo ashiɛ, Nadia
Nɔviŋsu Fleegle shin le Weɖoxɔxu nɔ Pennsylvanie, États-Unis. Jila ciwo yí vɔnnɔ nɔ Mawu yí hin. Hwenu enyi ɖajɛvihwɛɔ, yi xomu vayi ci eju hwɛhwɛ ɖeka mɛ fini yí eʒan sugbɔ le. Ci wova nɔ yí dejinjin ɔ, éwa ʒinʒindoshimɛ le 20 Novembre 1988 mɛ.
Nɔviŋsu Fleegle jilawo donɔ ŋsɛn yi blaŋblaŋ mɔ yɛ le ɖo gashiagamɛ sumɔsumɔdɔ lɔ mɛ. Woxɔnɔ ekán lɔ mɛ hamɛwo jikpɔtɔwo koɖo mɛ ciwo yí wanɔ dɔ le Betɛliwo va wowo xomɛ, ecɛ dɔ yí nɔviŋsu Fleegle tɛnŋ do jeshi jijɔ ci yí nɔviŋsu koɖo nɔvinyɔnu cɛwo kpɔkɔ. Ci ewa ʒinʒindoshimɛ dejinjin ɔ, étɔ gashiagamɛ mɔɖeɖedɔ lɔ wawa le 1 Septembre 1989 mɛ. Exwe ve goduɔ, évaɖo tajinu ci eɖo sa hwenu eɖo xwe 12 gbɔ, mɔ yeawa dɔ le Betɛli. Évatɔ dɔwawa le Betɛli Brooklyn tɔ le Octobre 1991 mɛ.
Le Betɛliɔ, Nɔviŋsu Fleegle wa dɔ le wemawo blaxu na nɔ exwe 8, le yi goduɔ, évawa dɔ le sumɔsumɔ dɔwaxu. Le gahunnɔtɔ́ mɛɔ, énɔ hamɛ ɖeka ci mɛ wodonɔ Russie gbe le na nɔ xwe ɖewo. Le xwe 2006 mɛɔ, yɛ koɖo Nadia ɖe nɔnɔ, yí wobɔ yí wakɔ dɔ le Betɛli. Wosumɔ le Portugais nyigbanmama mɛ, yí gbewa wu exwe amɛ́wo le nyigbanmama ci mɛ wodonɔ Espagnol-gbe le. Ci ewa dɔ le Sumɔsumɔ Dɔwaxu na nɔ exwe sugbɔɔ, wovasɔɛ yí ewa dɔ le Enukplakpla Jikpɔgbɛ Dɔwaxu yí le yiyimɛɔ, évawa dɔ le Sumɔsumɔdɔ Jikpɔgbɛ Dɔwaxu lɔ mɛ. Le Mars 2022 ɔ wovasɔɛ yí enyi Sumɔsumɔ Jikpɔgbɛ Kpedonutɔ Edɔjikpɔha lɔ tɔ.
Jeffrey Winder koɖo ashiɛ, Angela
Nɔviŋsu Winder shin le Murrieta, Californie, États-Unis. Yi jilawo yí hin le nyɔnɔnwi lɔ mɛ yí ewa ʒinʒindoshimɛ le 29 Mars 1986 mɛ. Wleci ci yí kplɔɛdoɔ, ésɔ gbeta mɔ yeawa kpekpedonu mɔɖeɖedɔ lɔ. Mɔɖeɖedɔ lɔ jɔnɔ ji ni sugbɔ yí éji mɔ yeakpɔtɔ awɛwɛ. Ci ewa kpekpedonu mɔɖeɖedɔ lɔ na nɔ wleci sugbɔɔ, évatɔ gashiagamɛ mɔɖeɖedɔ lɔ ji le 1 Octobre 1986 mɛ.
Hwenu yí nɔviŋsu Winder nyi jajɛɔ, évayi jinɔ fofoɔ amɛve ciwo wakɔ dɔ le Betɛli hwenɔnu kpɔ. Ecɛ dɔ yí ejinɔ mɔ yeawa dɔ le Betɛli nɔ yevashin. Eyi le Mai 1990 mɛɔ, woyɔɛ nɔ avawa dɔ le Betɛli le Wallkill.
Le Betɛliɔ, Nɔviŋsu Winder wadɔ le dɔwaxu vovovowo mɛ, éwa dɔ le Kɔkwɛnyinyi Dɔwaxu, Agbledede Dɔwaxu koɖo Betɛli Bilo mɛ. Éle alɔ koɖo Angela le xwe 1997 mɛ, yí wowakɔ dɔ le Betɛli so hwenɔnu keke vaɖo gbɛ. Le 2014 mɛɔ, wosɔ wo ɖaɖa Warwick, nɔ woakpe ŋkuvi do exɔcucudɔ ci wowakɔ le xexeɛ keŋkeŋ dɔwaxu gangantɔ lɔ nu. Le 2016 mɛɔ, wosɔ wo ɖaɖa Enukplaxu Gangantɔ ci yí le Patterson. Enɔɔ, Nɔviŋsu Winder wadɔ le Audio/Video Dɔwaxu. Exwe amɛnɛ goduɔ, wosɔ wo ɖaɖa Warwick, yí womɔ Nɔviŋsu Winder awa dɔ koɖo Edɔwatɔwo Jikpɔgbɛ Bilo lɔ. Le Mars 2022 mɛɔ, wosɔɛ nɔ anyi Kpedonutɔ nɔ Edɔwatɔwo Jikpɔgbɛ Edɔjikpɔha lɔ tɔ.
Mì dodoɔgbe ɖaɖa nɔ Yehowa mɔ yɛ le cu shi sugbɔ nɔ ŋsu cɛ ciwo yí nyi “enunana” nɔ woakpɔtɔ awakɔ dɔ sɛnsinɖe nɔ Fyɔɖuxu lɔ nuwo akpɔtɔ ayikɔ ŋkɔ.—Efe. 4:8.
