Vɔ Yehowa ji mɔ mìwo le xɔ jigbɔnɖɛ yí anɔ te kpɔ ye keke na nɔ hwenu yí yeawɛ nɔ mì do gamɛ ci yeɖo ji. Nyi yí taɖo eji mɔ mìwo lé wɛ ahan ɔ? Nyi yí atɛnŋ akpedo mì nu mìale jijɔ kpɔkɔ hwenu mìle te kpɔ Yehowaɔ?

NYI YÍ TAÐO YEHOWA JI MƆ MÌWO LE NƆ TE KPƆ YEƆ?

Bibla nu mɔ: “Tɔhonɔ dro yí a dasɛ yi dɔnusoswi nɔ mí, Tɔhonɔ le etenɔkpɔ mɛ. Tɔhonɔ dro yí a kɔ mí yi a do akɔnfa lanmɛ nɔ mí. Tɔhonɔ Mawu nyi jɔjɔɛ yí wo a cushi nɔ amɛ ɖeka ɖeka ci yí le te kpɔ Tɔhonɔ lɔ̀du.” (Ezai. 30:18) Ʒuifu tonumasetɔwo yí Ezai nu nyɔ cɛwo nɔ doŋkɔ. (Ezai 30:1) Vɔ egbejinɔtɔ ɖewo le Ʒuifu lɔwo mɛ yí nyɔ cɛwo na wo mɔkpɔkpɔ. Enyɔ cɛ lɔwo ke yí nakɔ emɔkpɔkpɔ Yehowa sɛntɔ egbejinɔtɔ ciwo yí li egbɛ.

Eyi taɖo mìɖo axɔ jigbɔnɖɛ yí anɔ te kpɔ Yehowa, ɖo Yehowa xɔnɔ jigbɔnɖɛ. Éɖo hwenu ɖe ɖɛ koŋ ci ji ahɛn xexe cɛ va vɔvɔnu le, yí ele te kpɔ ŋkeke koɖo gamɛ ci ji awɛ. (Mat. 24:36) Le gahunnɔtɔ́ mɛɔ, ávaze gbawlɛ mɔ ehwɛ ci yí Satana dodoɔ Yehowa koɖo yí sɛntɔwo nyi ŋsu. Le yi goduɔ, avaɖe Satana koɖo mɛ ciwo yí le yi kpaxwe swi, vɔ ádasɛ “Yi dɔnusoswi nɔ mì.”

Gbɔxwe hwehunnɔnu aɖoɔ, Yehowa daɖe mìwo cukaɖawo swi nɔ mì o, vɔ éna kankandoji mì mɔ mìatɛnŋ akpɔkpɔ jijɔ hwenu yí mìle te kpɔɛ. Shigbe lé Ezai nui nɛɔ, mìatɛnŋ akpɔkpɔ jijɔ hwenu mìle te kpɔ ŋɖe alo kpɔkpɔ emɔ nɔ enunywi ɖe mɔ yɛavamɛ. (Ezai 30:18) a Nyi yí atɛnŋ ana mìakpɔ jijɔ ŋtɔ́ɔ? Enu amɛnɛ ɖekawo atɛnŋ akpedo mì nu.

LÉ WOANƆ TE KPƆ ŊÐE LE JIJƆKPƆKPƆ MƐ DO

Sɔ susu ɖo enunywiwo ji. Efyɔ Davidi kpɔ enubaɖa sugbɔ tɔxu le yi gbe pleŋ mɛ. (Eha. 37:35) Éle ahan gan, éŋwlɛ mɔ: “Kando Tɔhonɔ ji yí a lete kpɔ yi lɔ̀du. Ŋgbe do dɔmɛzi hwecinu amɛ vɔnwo ɖuji o. Ŋgbe do dɔmɛzi hwecinu amɛ vɔnwo wanɔ totomɛ vwinwo yí wowo totomɛ lɔwo ɖuji o.” (Eha. 37:7) Davidi ŋtɔ wa do nukplamu ŋtɔ́ ji yí sɔ susu yitɔ do hwlɛngan  mɔkpɔkpɔ lɔ ji. Gbesɔ kpe niɔ, enunywi ciwo Yehowa wa ni jɔ ji ni sugbɔ. (Eha. 40:5) Nɔ mìsɔ susu ɖo enunywi ciwo yí jɔjɔ le mìwo gbe mɛ ji yí mìdesɔ susu ɖo mìwo cukaɖawo jiɔ, ale fafɛɖe nɔ mì mɔ mìanɔ te kpɔ Yehowa.

Kannɔfu Yehowa hweɖekpokpuinu. Éwa shigbe mɔ Davidi yí ŋwlɛ Ehajiji wema 71 tɔ. Énu nɔ Yehowa mɔ: “Eyi na do ji do Eo nu tɛgbɛɛ; Na kanfu Eo sugbɔ sugbɔ.” (Eha. 71:14) Lé akanfu Yehowa doɔ? Áxo nuxu so Yehowa nu nɔ mɛbuwo yí aji eha asɔ kanfui. (Eha. 71:​16, 23) Shigbe Davidi nɛɔ, mìwo can mìatɛnŋ akpɔ jijɔ hwenu mìle te kpɔ Yehowa. Mìkannɔfui hwenu mìɖekɔ kunu, hwenu mìle seŋ kankɔ koɖo mìwo xlɔwo koɖo mìwo xomumɛtɔwo, koɖo hwenu mìjikɔ mìwo hawo. Nɔ àgbeji Fyɔɖuxu ha ɖe yɛ ɖe, danyɔ mɔ alé ŋkuvi do eha lɔ nyɔgbewo koɖo lé ena yí èkpɔ jijɔ do ba?

Lɔn nɔ nɔvio ŋsu koɖo nɔvio nyɔnuwo ado ŋsɛn eo. Ci Davidi dogo cukaɖawoɔ, énu nɔ Yehowa mɔ: “Le egbejinɔtɔ aotɔwo ŋkɔɔ, nakpɔkpɔ emɔ nɔ eo le ao ŋkɔ mɛ.” (Eha. 52:​9, NWT) Mìwo can mìatɛnŋ axɔ ŋsɛndoamu so mìwo nɔvi ŋsu koɖo nɔvi nyɔnuwo gbɔ, denyi le bɔbɔwo alo le kunuɖegbe ɖekɛ yɔ o, vɔ hwenu bu ciwo mìzannɔ gamɛ do ju koɖo wo can le mɛ hɛnnɛ.—Rɔm. 1:​11, 12.

Na nɔ ao mɔkpɔkpɔ lɔ asɛnŋ. Ehajiji Wema 62:5 nu mɔ: “Anyi kla lete le jigbɔnɖɛ xɔxɔ mɛ kpɔ Mawu nɔ a hwlɛn ŋ gan.” Éle veviɖe mɔ mìana mìwo mɔkpɔkpɔ lɔ asɛnŋ, vevitɔ nɔ vɔvɔnu lɔ devava do hwenu mìwo kpɔkpɔ mɔ ni do o. Mìɖo akando ji mɔ Yehowa gbeɖuwo avamɛ dandandan nɔ mìagbenɔ te kpɔ wo na nɔ hwenu jinjinɖe can. Mìatɛnŋ ana yí mìwo mɔkpɔkpɔ lɔ asɛnŋ nɔ mìkplanɔ Bibla. Le kpɔwɛ mɛ, mìatɛnŋ abu tamɛ kpɔ so lé enyɔnuɖɛwo vamɛ do, lé enyɔ ciwo Bibla ŋwlɛtɔwo ŋwlɛ detrɔ kpe nɔnɔ do, koɖo enyɔ vevi ciwo Yehowa dasɛ nɔ mì so yiɖeki nu. (Eha. 1:​2, 3) Gbesɔ kpe niɔ, mìɖo akpɔtɔ “[afannɔkwi] toto gbɔngbɔn kɔkwɛ mɛ” yí akpɔtɔ anɔ ekacaca nywi mɛ koɖo Yehowa hwenu yí mìle te kpɔ agbe mavɔ gbe ci eɖo nɔ mì vavamɛ.—Ʒuda 20, 21.

Shigbe Efyɔ Davidi nɛɔ, kando ji mɔ Yehowa kpɔnɔ mɛ ciwo yí le te Kpɔɛwo ji yí danɔsɛ egbejinɔnɔ lɔnlɔn Yitɔ nɔ wo. (Eha. 33:​18, 22) Kpɔtɔ asɔ ʒinxododo anɔ tekpɔ Yehowa yí asɔ susu ɖo enunywi ciwo yí jɔjɔ le ao gbe mɛ ji, akannɔfui, axɔnɔ ŋsɛndoamu so ao kpena Kunuɖetɔwo gbɔ yí akpɔtɔ adodoɔ ŋsɛn ao mɔkpɔkpɔ vevi lɔ.