Katoliki yiyi jɔnɔ eji nɔ edanyɛ kodo nɔnyɛ haan. Vɔ ci wovakpla le Bibla mɛ mɔ Mawu ŋkɔ yí nyi Yehowaɔ, wo koɖo ve lɔwo vanyi Yehowa Kunuɖetɔ ciwo mɛ ezo le. Edanyɛ mi Yesu nutatawo kpakpa. Vɔ ci ebi le kapita dɔwawa mɛɔ, évasɔ eji nɔ mìwo xɔ sɔ trɔ Fyɔɖuxuxɔ ŋkɔtɔ ci yí le San Juan del Monte, ci yí le fyɔju Philippines tɔ le Manille.

Wojiŋ le 1952 mɛ. Enyɛ can, ŋxɔ gbɔngbɔnmɛ kpla nywi ci anyi jilawo na fofonyɛ amɛnɛ koɖo dadanyɛ amɛtɔn lɔwo. Ci ŋshinshin ɛɔ, edanyɛ do ŋsɛnŋ mɔ mahlɛnnɔ eta ɖeka nɔ Bibla ŋkeke ɖekaɖeka duu yí ekplanɔ teokrasi nukplawema vovovowo koɖoŋ. Anyi jilawo yɔnɔ ekán lɔ mɛ hamɛwo jikpɔtɔwo koɖo alɔjedɔwaxu lɔ mɛdɔdɔwo nɔ woavanɔ mìwo xomɛ hweɖewonu. Mìwo xomu kpɔnɔ jijɔ koɖo ŋsɛndoamu sugbɔ nɔ nɔvi cɛwo nu enu ciwo mɛ wotowo nɔ mì yí ecɛ donɔ ŋsɛn mì pleŋ mɔ mìasɔ sumɔsumɔdɔ lɔ ɖo texwe ŋkɔtɔ le mìwo gbe mɛ.

Anyi jilawo ɖo xɔse sɛnŋ yí ŋkpla nu so wo gbɔ. Ci edɔ̀lele ɖeka wu enɔnyɛ vevi lɔ ɖegbɔɔ, nyɛ koɖo edanyɛ tɔ emɔɖeɖedɔ lɔ wawa doju le exwe 1971 mɛ. Vɔ le 1973 mɛ hwenu ŋɖo exwe 20 ɔ, edanyɛ ku. Ci anyi jilawo koɖo ve kuɔ, ŋdan ta nɔ nyɛɖeki yí ci nyɛɖekɛ. Vɔ emɔkpɔkpɔ “sɛnŋ” ci ji woakando ci ŋkpɔ le Bibla mɛ kpedo ŋnu yí ŋnɔ te sɛnsinɖe yí ŋkpɔtɔ le nywiɖe le susumɛ koɖo le gbɔngbɔn mɛ. (Ebre. 6:19) Ci danyɛ ku yí dejinjin ɔ, ŋlɔn yí wosɔŋ nɔ manyi emɔɖetɔ vevi le tɔdomɛnyigban ci yí te yi azɔge le Coron le Palawan kán mɛ.

Exwe 21 yí ŋɖo hwenu ŋvaɖo Coron. Ci ŋso jugan mɛɔ, ékpacaŋ ci ŋvakpɔɛ mɔ ezo, eshi nunu alo zokekewo debɔ le tɔdomɛnyigban cɛ lɔ ji ahan o. Ci nɔviŋsu ɖewo le nɔ can ɔ, ŋdekpɔ emɔɖetɔ anyi kpena ɖe ci yí naɖe kunu koɖo o yí ŋɖenɔ kunu nyɛɖekɛ  hweɖewonu. Le wleci ŋkɔtɔ mɛɔ, anyi xomu koɖo anyi xlɔwo wu doŋ sugbɔ. Zanmɛɔ, ŋglonɔ wleciviwo kpɔ le jeŋkwi mɛ yí ŋkɔnɔ ɖashi. Ewanɔ nɔŋ shigbe mɔ matashi anyi dɔ lɔ yí atrɔ ayi axwe hannɛ.

Le hwenu ŋtɔ́wo ciwo mɛ ŋci nyɛɖekɛ leɔ, ŋnunɔ anyi jimɛnyɔwo nɔ Yehowa. Ŋɖo ŋwi ŋsɛndoamunyɔ ciwo yí ŋhlɛn le Bibla koɖo mìwo Bibla nukplawemawo mɛ. Ehajiji Wema 19:14 vanɔ susu mɛ nɔŋ blaŋblaŋ. Ŋvakpɔɛ mɔ Yehowa atɛnŋ anyi “anyi Kpe koɖo Anyi [Hwlɛngantɔ]” nɔ ŋbunɔ tamɛ kpɔ so enu ciwo yí jɔnɔ eji ni nu shigbe yi nuwawawo koɖo yi nɔnɔmɛ nywiwo nu nɛ. Jutakpɔxɔ ci nyɔta yí nyi “Vous n’êtes jamais seul” a kpedoŋ nu sugbɔ. Ŋhlin zenɛniɖe. Nɔ mìanuiɔ, ŋnɔnɔ nyɛɖekɛ koɖo Yehowa le hwenu ŋtɔ́wo mɛ yí emɔ hun nɔŋ yí ŋdonɔ gbe ɖaɖa ni, kplanɔ nu yí bunɔ tamɛ kpɔ so enu ciwo ŋkpla nu.

Ci ŋva Coron dejinjin ɔ, wosɔŋ yí nyi hamɛmɛshinshin. Ci enyi nyɛɖekɛ yí nyi hamɛmɛshinshin ɔ, ŋtɔ Teokrasi Sumɔsumɔ Suklu, Sumɔsumɔ Bɔbɔ, Hamɛ Bibla Nukplakpla koɖo Jutakpɔxɔ nukplakpla ciwo wowanɔ le kwɛshila ɖekaɖeka mɛ wawa. Ŋgbenanɔ jugbaja nuxu kwɛshila ɖekaɖeka duu. Ŋnɔwo pleŋ na gamɛ degbeli nɔŋ keke mavakpɔɛ mɔ ŋci nyɛɖekɛ o!

Ŋkpɔ nyɔna sugbɔ le kunuɖeɖedɔ lɔ mɛ le Coron, anyi Bibla nukplavi ɖewo vawa ʒinʒindoshimɛ le yiyimɛ. Vɔ cukaɖawo gbeli hɛnnɛ. Hweɖewonuɔ, ŋzɔnnɔ zɔnlin so nyidin sɔyi gawive mɛ keŋ gbɔxwe aɖo nyigbanmama lɔ mɛ yí ŋdenyanɔ fini navayi dɔn alɔn do, nɔ ŋvayi ɖo nɔ o. Tɔdomɛnyigban hwɛhwɛ sugbɔsugbɔ ɖekawo can le hamɛ lɔ nyigbanmama mɛ. Blaŋblaŋ ɔ, ŋɖonɔ zovihun yí tonɔ jihɔnshi ciwo yí xonɔ le axu ji ci ŋdenya etɔ xuxu ɖɛ can! Le cukaɖa cɛwo keŋkeŋ mɛɔ, Yehowa glɔnnɔ ta nɔŋ yí kpenɔdoŋ nu. Le yiyimɛɔ, ŋvakpɔɛ mɔ Yehowa dradraŋ do ɖɛ nɔ cukaɖa gangan ciwo navado go le edɔ ciwo ejikɔ avaɖo nɔŋ mɛ.

Le exwe 1978 mɛɔ, wosɔŋ ɖaɖa Papouasie-Nouvelle-Guinée ci yí le tagbe nɔ Australie. Etowo ju yí nyi Papouasie-Nouvelle-Guinée yí ekpɔtɔ hwɛɖeka agangan shigbe Espagne nɛ. Ekpacaŋ ci ŋvakpɔɛ mɔ agbetɔ miliɔn amɛtɔn han ciwo yí le eju lɔ mɛ donɔ egbe ciwo yí wu 800. Mawu wɛ yí amɛ sugbɔtɔ donɔ Pidgin Mélanesien-gbe ci woyɔnɔ blaŋblaŋ mɔ Tok Pisin.

Woɖonɔ edɔwo nɔŋ hweɖewonu le Ŋlɛshigbe hamɛ ci yí le Port Moresby fyɔju mɛ. Vɔ ŋvayi ci Tok Pisin hamɛ mɛ yí tɔ egbe lɔ kplakpla. Ŋzannɔ enu ciwo ŋkpla le suklu lɔ le kunuɖeɖedɔ lɔ mɛ, ecɛ kpedoŋ nu yí ŋkpla egbe lɔ blaŋ. Dejinjin o, ŋvasun ji yí tɔ jugbaja nuxu xoxoxo do Tok Pisin gbe mɛ. Ekpacaŋ mɔ, masun exwe ɖeka godu hwenu yí ŋva Papouasie-Nouvelle-Guinéeɔ, wosɔŋ mɔ manyi ekán lɔ mɛ hamɛwo jikpɔtɔ le Tok Pisin hamɛ sugbɔ ciwo yí le ekán gangan lɔwo mɛ.

Ci hamɛ lɔwo jinjin do nɔnɔ gbɔɔ, ŋwa toto nɔ ekán lɔwo mɛ takpekpe sugbɔ yí zɔnnɔ emɔ sugbɔ. Doŋkɔɔ, ŋkpɔɛ mɔ ŋci nyɛɖekɛ, ɖo ŋvale eju yoyu mɛ le fini amɛwo  donɔ egbe vovovowo yí ɖo kɔnu vovovowo ciwo yí ŋdenya sa o. Ŋdatɛnŋ ato nyigban mɔwo yí ayi hamɛ lɔwo mɛ o, ɖo etowo koɖo ekpe glijaglijawo le nɔ. Eyi taɖo nɔ eglo kekeɔ, ŋɖonɔ yamɛhunhun kwɛshila ɖekaɖeka. Gaɖewo mɛɔ, nyɛɖekɛ yí ɖonɔ yamɛhun ci yí dele nywiɖe lɔ. Le emɔzɔnzɔn ŋtɔ́wo mɛɔ, ŋvɔnnɔ sɔwu nɔ ŋɖo tɔjihun!

Amɛ kankin ɖewo kpoŋ yí ɖo telefonu, eyi taɖo ŋxonɔ nuxu koɖo hamɛ lɔ to wemawo ŋwlɛŋwlɛ ji. Blaŋblaŋ ɔ, ŋvaɖonɔ enɔ gbɔxwe yí wema ciwo ŋŋwlɛ ɖaɖa wo vaɖonɔ wo gbɔ yí ŋbiɔnɔ amɛwo se mɔ kunuɖetɔ ɖe le nɔ ma. Hweɖekpokpuinu ci ŋvlɛ yí kpɔ nɔviwo yí wodasɛ lɔnlɔn koɖo enujeŋnamɛ wowotɔ nɔŋ ɔ, ŋɖonɔ ŋwi enu ci yí taɖo ŋle egbla cɛwo pleŋ dokɔ. Ŋkpɔ ebulenamɛ Yehowa tɔ le enu sugbɔ mɛ yí ekacaca ci yí le mìwo koɖo yɛ gblamɛ gbevasɛnŋ doji sugbɔ.

Le bɔbɔ ŋkɔtɔ ci ŋwa le tɔdomɛnyigban ci woyɔnɔ mɔ Bougainville mɛɔ, asu koɖo ashi ɖeka le nukui kokɔ yí te gogoŋ yí biɔŋ se mɔ: “Ègbejeshi mì yɛa?” Ŋɖo ŋwi mɔ ŋɖe kunu nɔ asu koɖo ashi cɛ hwenu ŋva Port Moresby ŋkɔtɔ. Ŋtɔ Bibla kplakpla koɖo wo gbɔxwe yí vasɔ wo jo nɔ nɔvi ɖeka ci yí le nɔtɔxu. Wo koɖo ve wa ʒinʒindoshimɛ yɛ! Ecɛ nyi ɖeka le shicu sugbɔ ciwo ŋxɔ hwenu ŋwa exwe amɛtɔn le Papouasie-Nouvelle-Guinée.

Gbɔxwe naso le Coron le exwe 1978 mɛɔ, ŋvakpɔ nɔvinyɔnu nyɔvi ɖeka ci yí tɔ mɔ Adel ci yí sɔnɔ yiɖeki sɔ savɔn. Éwakɔ gbeshiagbe mɔɖeɖedɔ lɔ keŋ gbehɛnkɔ yi vi amɛve ciwo yí nyi Samuel koɖo Shirley yí le gaxoxo ɖekɛ lɔ mɛɔ, ékpekpeɛ ŋkuvi do nɔlɔ ci yí shin nu. Le Mai 1981 mɛɔ, ŋtrɔyi Philippines yí vayi ɖe Adel. Le mìwo lɔlele lɔ goduɔ, mìvatrɔ gbeshiagbe mɔɖetɔwo yí valeleɛ bu nɔ mìwo xomu lɔ doju.

Le 1983 mɛɔ, ci mìɖo eviwo can ɔ, wosɔŋ mɔ manyi emɔɖetɔ vevi le tɔdomɛnyigban Linapacan ci yí le Palawan kán mɛ. Xomu lɔ pleŋ vayi ci fini yí te yi azɔge le texwe ci yí kunuɖetɔ ɖe dele o. Adel nɔlɔ ku le xwe ɖeka han godu. Vɔ ci mìsɔ kunuɖeɖedɔ lɔ sɔ jan mìwoɖekiwoɔ, ekpedo mì nu sugbɔ le hwenu sɛnŋsɛnŋ ŋtɔ́ mɛ. Mìtɔ Bibla nukplakpla ciwo yí wakɔ ŋkɔyiyi sugbɔ wawa le Linapacan yí dejinjin o, evaʒan mɔ mìawa Fyɔɖuxuxɔ hwɛhwɛ ɖeka. Eyi mìwoŋtɔwo cu ɖeka. Ci mìva enɔ yí ewa exwe amɛtɔn ɔ, ejɔ eji nɔ mì ci mìkpɔ mɔ amɛ 110 va Eŋwiɖoɖo yí sugbɔtɔ le wo mɛ wa ŋkɔyiyi yí wa ʒinʒindoshimɛ ci mìso le nɔ godu.

Le 1986 mɛɔ, wosɔŋ ɖaɖa Culion tɔdomɛnyigban ci ji yí mɛ ciwo yí lé kpodɔ̀wo le. Le yi goduɔ, wosɔ Adel can nɔ anyi emɔɖetɔ vevi. Le tɔtɔmɛɔ, egbɔnnu nɔ mì mɔ mìaɖe kunu nɔ mɛ ciwo yí ekpodɔ̀ dahɛn ŋmɛ nɔwo. Eŋɛnywidratɔ ciwo yí le nɔ na kankandoji mì mɔ wokpɔkpɔ mɛ ciwo yí lé kpodɔ̀ lɔwo gbɔ yí agbɔnnu gbɔxwe woasɔ ba nɔ amɛ. Mɛɖewo le dɔ̀nɔ lɔwo mɛ vanɔ bɔbɔ le nɔvinyɔnu ɖeka xomɛ. Dejinjin o évama do mì yí ejɔ eji nɔ mì sugbɔ mɔ mìvamama Bibla mɛ mɔkpɔkpɔ  koɖo mɛ cɛ ciwo yí bukɔ mɔ Mawu koɖo agbetɔwo gbe yewo. Enudojijɔnamɛ enyi ci mìkpɔ mɛ cɛ ciwo yí lé edɔ̀ veviɖe kpɔkpɔ jijɔ yí kpɔkpɔ emɔ mɔ gbeɖekaɔ, yewoavanɔ lanmɛsɛn blebu mɛ.—Luiki 5:​12, 13.

Lé mìwo viwo wɛ yí agbenɔnɔ le Culion vama do woɔ? Nyɛ koɖo Adel yɔ nɔvinyɔnu jajɛ amɛve ciwo le Coron nɔ woavabɔ do mì nu, nɔ mìwo viwo atɛnŋ akpɔ mɛ ciwo woado eha nywi koɖo. Samuel, Shirley koɖo nɔvinyɔnu jajɛ amɛve lɔwo kpɔnɔ jijɔ le kunuɖeɖedɔ lɔ mɛ, wokplanɔ Bibla koɖo ɖevi sugbɔ hwenu yí nyɛ koɖo adel akplakpla Bibla koɖo ɖevi lɔwo jilawo. Evaje gadeka mɛɔ, mìvale enu kplakɔ koɖo xomu wiɖeka. Dejinjin o, mìvaɖo Bibla nukplavi sugbɔ ciwo yí wakɔ ŋkɔyiyi yí ŋtɔ́ na yí mìvaɖo hamɛ yoyu ɖeka!

Le tɔtɔmɛɔ, nyɛɖekɛ yí nyi hamɛmɛshinshin le nɔtɔxu. Eyi taɖo alɔjedɔwaxu lɔ nu nɔŋ mɔ nyɛŋ le kpɔnɔ kwɛshila lɔ mɛ bɔbɔwo ji koɖo eŋɛnywidratɔ amɛnyi ciwo yí le Culion yí le yi goduɔ, mavayiwa ŋɖeka lɔ ŋmɛ koɖo eŋɛnywidratɔ amashiɖekɛ ciwo yí le kɔxwi ɖeka ci woyɔnɔ mɔ Marily ci woɖo azɔn tɔjihun gaxoxo amɛtɔn gbɔxwe yí ayi. Nɔ mìwa bɔbɔ koɖo wo ɖegbɔɔ, nyɛ koɖo anyi xomu zɔnnɔ toto etowo ji yí sɔ gaxoxo sugbɔ sɔ wanɔ Bibla nukplakpla le kɔxwi ɖeka ci woyɔnɔ mɔ Halsey mɛ.

Le yiyimɛɔ, mìvakpɔ mɔ amɛ sugbɔ vaxɔkɔ nyɔnɔnwi lɔ le Marily koɖo Halsey keke mìcu Fyɔɖuxuxɔwo do afi amɛve lɔwo. Shigbe Linapacan nɛɔ, nɔviwo koɖo ejinywitɔwo na enu sugbɔtɔ ciwo mìʒan keŋ asɔ wa edɔ lɔ. Fyɔɖuxuxɔ ci mìcu do Marily atɛnŋ ahɛn agbetɔ 200 yí nɔ wovahuin ɔ, woatɛnŋ awa takpekpewo le nɔ.

Ci mìwo viwo vashin le 1993 mɛɔ, nyɛ koɖo Adel vatɔ ekán lɔ mɛ hamɛwo jijikpɔdɔ lɔ wawa le Philippines. Eyi le 2000 mɛɔ, ŋyi Ekplanana Suklu nɔ Sumɔsumɔdɔ, eyi wona kplaŋ nɔ manyi enukplamɛtɔ le suklu ŋtɔ́. Ŋkpɔɛ mɔ ŋdeje nɔ edɔ cɛ wawa o, vɔ Adel donɔ ŋsɛnŋ gashiagamɛ. Éɖonɔ ŋwi nɔŋ mɔ Yehowa ado ŋsɛnŋ nɔ matɛnŋ awa edɔ yoyu cɛ ci woɖo nɔŋ. (Fili. 4:13) Enyɔ ci Adel nu  nɔŋ nyi nyɔnɔnwi, ɖo yiŋtɔ totoɔ lanmɛsɛn cukaɖawo mɛ hwenu yí ewakɔ edɔ ci woɖo ni lɔ.

Le 2006 mɛ, hwenu yí ŋnakɔ ekpla amɛwoɔ, wokpɔ Parkinson dɔ̀ ɖeka le Adel nu. Mìcaka le mìwoɖekiwo mɛ! Hwenu yí ŋnu mɔ matashi anyi dɔ lɔ yí ale bu niɔ, Adel ɖoŋci mɔ: “Ŋɖekuku ji doto ɖe ci yí atɛnŋ akpedo ŋnu le anyi dɔ̀lele lɔ mɛ yí ŋnya mɔ Yehowa akpedo mì nu le edɔ ci woɖo nɔ mì mɛ.” Le exwe amadɛn ciwo yí kplɔɛdo mɛɔ, Adel kpɔtɔ yí wakɔ sumɔsumɔdɔ lɔ nɔ Yehowa yí detotoɔ enyɔ o. Ci datɛnŋ agbezɔn ɔ, énɔnɔ ʒinkpin mɛ keŋ aɖe kunu. Ci egbɔnnu ni mɔ axo nuxu can ɔ, étɛnŋ ɖonɔ enyɔ ɖeka alo amɛve ŋci le bɔbɔwo. Keke vaje hwenu yí eku le 2013 mɛɔ, woŋwlɛnɔ enu ɖaɖa Adel blaŋblaŋ keŋ asɔ do akpe ni nɔ ejidodo kpɔwɛ nywi ci eɖo. Ŋwa wu exwe 30 koɖo ŋɖe koɖo ashinyɛ Adel amɛlɔntɔ koɖo egbejinɔtɔ, eyi taɖo ci ekuɔ, ŋvatɔ vevisese ke yí gbeci nyɛɖekɛ ke.

Adel ji mɔ nyɛŋ le kpɔtɔ awakɔ edɔ ci woɖo nɔŋ lɔ, eyi ŋkpɔtɔ le ji. Ŋsɔ edɔ lɔ sɔ xa nyɛɖeki yí ecɛ kpedo ŋnu ŋvakpɔɛ mɔ ŋdegbeci nyɛɖekɛ o. So 2014 vaɖo 2017 ɔ, wosɔŋ nɔ mavayi ji hamɛ ciwo yí donɔ Tagalog-gbe le eju ciwo mɛ wodeɖe emɔ do mìwo dɔwo pleŋ nu le sa o. Le yi goduɔ, ŋvayi ji hamɛ ciwo yí donɔ Tagalog gbe kpɔ le Taïwan, États-Unis koɖo Canada. Le 2019 mɛɔ, ŋna ekpla amɛwo le Ŋlɛshigbe mɛ le Fyɔɖuxu Ŋɛnywidratɔwo Suklu le Inde koɖo le Thaïlande. Ŋkpɔ jijɔ sugbɔ hwenu yí ŋwakɔ edɔ cɛwo pleŋ. Ŋkpɔnɔ jijɔ sugbɔ sɔwu nɔ ŋsɔ anyi susu keŋkeŋ do Yehowa sumɔsumɔdɔ lɔ mɛ.

Le edɔ yoyu ɖekaɖeka ci woɖo nɔŋ mɛɔ, lɔnlɔn ci ŋɖo nɔ nɔviŋsu koɖo nɔvinyɔnu ciwo ŋdo go gbevasɛnnɔŋ doji, eyi taɖo soso le wo gbɔ defanɔ gbeɖe o. Le hwenu ŋtɔ́wo mɛɔ, ŋkpla mɔ ŋɖo akando Yehowa ji keŋkeŋ. Ŋkpɔnɔ ebulenamɛ yitɔ gashiagamɛ yí ecɛ kpedo ŋnu yí ŋxɔnɔ gbe do trɔtrɔ ɖekpokpui ci yí vavanɔ le edɔ lɔ wawa mɛ koɖo anyi ji keŋkeŋ. Egbɛɔ, ŋnyi emɔɖetɔ vevi le Philippines. Ŋvayi ci anyi hamɛ yoyu lɔ mɛ ci yí vanyi xomu ci yí leleɛ bu nɔŋ yí kpekpeɛdo ŋnu. Ejɔ eji nɔŋ sugbɔ ci ŋkpɔ Samuel koɖo Shirley yí wosrankɔ wowo nɔ xɔse.—3 Ʒan 4.

Nyɔnɔnwi enyi mɔ ŋdo go cukaɖa sugbɔ le anyi gbe mɛ, ɖeka le wo mɛ yí nyi mɔ ŋkpɔ yí ashinyɛ vevi kpekɔ fun keke yí edɔ̀lele sɛnŋsɛnŋ ɖeka sɔ wu. Ŋgbekpla lé natrɔdo nɔnɔmɛ yoyu sugbɔ buwo nu. Ele ahan gan, ŋkpɔɛ mɔ Yehowa “de jinjin le [mìwo ɖekaɖeka] gbɔ o.” (Edɔ. 17:27) Yehowa “lɔ dekpokpo” yí akpedo yi sɛntɔwo nu yí agbedo ŋsɛn wo, nɔ wole nyigbanmama ciwo yí teyi azɔgewo ji can. (Ezai 59:​1, nwt) Yehowa, anyi Kpe le koɖoŋ le anyi gbe pleŋ mɛ yí ejeŋ nɔŋ sugbɔ, ŋdeci nyɛɖekɛ gbeɖe o.