Mary koɖo asuɔ John, a le xexe lɔ kpaxwe ɖe fini woatɛnŋ adra eŋɛnywi lɔ nɔ mɛdru ciwo yí sonɔ Philippines yí vawanɔ edɔ le nɔ. Le COVID-19 dɔ̀bamɛ lɔ hwenuɔ, denyi mɛ ciwo yí le eju lɔ mɛ ɖekɛ yí Mary kpeji yí kpla Bibla koɖo o, vɔ égbewɛ koɖo mɛbu ciwo yí so akpaxwe buwo nɔ xexe lɔ hɛnnɛ. Lé ewɛ doɔ?

Mary biɔnɔ yi Bibla nukplaviwo se mɔ: “Èjeshi mɛbu ɖe ɖɛ ci yí jijiɛ mɔ yeakpla Biblaa?” Nɔ woxɔgbeɔ, énunɔ nɔ wo mɔ wo le kpedo ye nu yeaxɔ wowo numɛlo. Blaŋblaŋ ɔ, enunywiwo vatonɔ so enyɔ kleŋ cɛ biɔbiɔse mɛ. Nyi yí taɖoɔ? Ðo mɛ ciwo Mawu Nyɔ lɔ jɔnɔ ji nɔ jinɔ mɔ yewoanu enu ciwo yewokpla nɔ yewo xomumɛtɔwo koɖo yewo xlɔwo ciwo yí le veviɖe nɔ yewo. Nyi yí to so enyɔ ŋtɔ́ biɔbiɔse mɛɔ?

Mary Bibla nukplavi Jasmin kplɔ Bibla nukplavi yoyu amɛnɛ va. Bibla nukplakpla lɔ jɔnɔ eji nɔ ɖeka le wo mɛ sugbɔ ci yí tɔ mɔ Kristine keke yí enu mɔ Mary le vakplanɔ Bibla lɔ koɖo ye zeve le kwɛshila lɔ mɛ. Ci Mary biɔ Kristine se mɔ yɛgbejeshi mɛbuɖe ɖɛ ci yí ji mɔ yeakpla Bibla maɔ, émɔ “Ɛɛ nakplɔ eo yi anyi xlɔwo gbɔ.” Le kwɛshila ɖewo gblamɛɔ, Kristine kplɔ Mary yi yi xlɔ amɛnɛwo gbɔ ciwo yí ji mɔ yewokpla enu. Le yiyimɛɔ, Kristine kplɔɛ yi yi xlɔ buwo gbɔ yí ɖewo le wo mɛ yí gbekplɔɛ yi wowo xlɔ buwo gbɔ ke.

Gbesɔ kpe niɔ, Kristine ji mɔ ye xomumɛtɔ ciwo yí le Philippines can akpla Bibla hɛnnɛ. Eyi taɖo éxo nuxu nɔ eviɛ nyɔnuvi Andrea. Le tɔtɔmɛɔ, Andrea bui mɔ ‘Kunuɖetɔwo nyi sɛnsɛnklandoakpo ɖe yí wodekando Yesu ji o yí enyi nublabla xoxuitɔ ɖekɛ yí wozannɔ.’ Vɔ zeɖeka yí ekpla nu yi trɔ susu dɔndɔn ŋtɔ́. Nɔ wole enu kplakɔ koɖiɔ, énunɔ mɔ “nɔ enyɔ lɔ vlɛ yí so Bibla mɛ duuɔ, nyɔnɔnwi yí enyi!”

Le hwenu ɖewo goduɔ, Andrea kplɔ Mary yi yi xlɔ amɛve koɖo yi dɔmɛkpena ɖeka gbɔ yí wotɔ Bibla kplakpla. Le manyamanya mɛɔ, hwenu yí Mary kplanɔ nu koɖo Andreaɔ, tashiɛ Angela ɖonɔ to enu ciwo wokplakpla. Eyi gbeɖekaɔ, Angela nu nɔ Andrea mɔ yi le nu nɔ Mary mɔ ye can yeakpla Bibla. Enu ci Angela kplakpla jɔkɔ eji ni sugbɔ. Le wleci ɖeka gblamɛɔ, éle mawunyɔkpukpui sugbɔ do tamɛ yí ji mɔ yeakpla enu lɔ zenɛ le kwɛshila ɖeka mɛ! Ci Andrea kpedo nuɔ, étɔ bɔbɔwo yiyi to video kacaca ji koɖi.

 Hwenu Mary se mɔ Kristine asuɔ Joshua nɔnɔ exɔ bu mɛ hwenu wokplanɔ nu lɔɔ, Mary biɔɛ se mɔ yɛaji mɔ yeavabɔ do mì nu ma. Joshua ɖoŋci mɔ: “Nale enɔ yí aɖokɔ to kpoŋ, vɔ wodabiɔ enyɔ ɖe ŋse o, vɔ nɔ míbiɔ enyɔŋ seɔ, naso.” Le minici amatɔn gblamɛ nɔ nukplakpla lɔɔ, ebiɔ enyɔ sugbɔ se sɔwu lé Kristine wɛni do yí ji mɔ yeakpla Bibla.

Enyɔ kleŋ ci Mary biɔnɔse na yí amɛ sugbɔ vaji mɔ yewoakpla Bibla. Ci amɛ lɔwo vasugbɔ ahan ɔ, Mary wa toto keŋ nɔ yi kpena Kunuɖetɔ buwo akpla Bibla koɖo mɛ lɔwo. Le vɔvɔnuɔ, Mary tɔ Bibla kpla koɖo amɛ 28 le eju vovovo amɛnɛ mɛ.

Jasmin, ci yí nyi Bibla nukplavi ŋkɔtɔ ci nu mìxo nuxu so wa ʒinʒindoshimɛ le Avril 2021. Kristine yɛ wa ʒinʒindoshimɛ le Mai 2022 yí trɔ yi Philippines keŋ anɔ eju koɖo yi xomu. Nukplavi amɛve ciwo Kristine dasɛ nɔ Mary can wa ʒinʒindoshimɛ. Angela wa ʒinʒindoshimɛ le wleci ɖewo godu le yiyimɛ yí ecɛyɛɔ, ényi gashiagamɛ mɔɖetɔ. Kristine asuɔ Joshua koɖo wowo vi nyɔnuvi Andrea sɔ kpe nɔ Bibla nukplavi sugbɔsugbɔ buwo can wakɔ gbɔngbɔn mɛ ŋkɔyiyiwo.

Le exwe sanŋdi ŋkɔtɔ mɛɔ, eŋɛnywi lɔ ɖeblɛ kaka do xomumɛtɔwo koɖo exlɔwo gblamɛ. (Ʒan 1:​41, 42a; Edɔ. 10:​24, 27, 48; 16:​25-33) Danyɔ mɔ àbiɔ ao Bibla nukplaviwo koɖo ejinywitɔ buwo se mɔ: “Èjeshi mɛbu ɖe ɖɛ ci yí ji mɔ yeakpla Biblaa?” Mi yí nya Bibla nukplakpla nɛni atɔ ji nɔ èbiɔ nyɔ kleŋ ŋtɔ́ ci mɛɖekpokpui atɛnŋ abiɔseɔ?