LE BIBLA mɛɔ, mìhlɛnnɔ lé egbejinɔtɔ ciwo yí le “shigbe mìwo ɛnɛ” se le wowoɖekiwo mɛ. (Ʒaki 5:17) Le kpɔwɛ mɛ, mìatɛnŋ ase enyɔ ci Pɔlu nu gɔnmɛ fafɛɖe ci enu le Rɔmatɔwo 7:​21-24 mɛ mɔ: “Nɔ́ ŋ dro mɔ na wa enunywi ɔ, enuvɔn tɛdonɔ ŋ ji. . . . Anyi nu sadɔnu.” Ci Pɔlu ci yí nyi egbejinɔtɔ se le yiɖeki ahan ɔ, ado ŋsɛn mì nɔ mìdokɔ gbla mɔ mìaɖu mìwo gbɔjɔgbɔjɔwo ji.

Pɔlu gbenu yi seselelanmɛ buwo. Le Galatitɔwo 2:20 mɛɔ, énu kankandoji ci eɖo mɔ, “Yesu yí nyi amɛ ci yí lɔn [ye], yi gbe sɔ Yiɖeki na yí hwlɛn [ye] gan.” Èsenɔ le eoɖeki mɛ ahan a? Taŋfuin denyi hweshiahwenu èsenɔ le eoɖeki ahan o.

Nɔ afɛn ciwo mìwa vayi na mìkpɔɛni mɔ mìdegbele bo ɖe nuɔ, atɛnŋ ana mìdaxɔɛ se mɔ Yehowa lɔn mì yí sɔ mìwo nuvɔnwo ke mì o. Atɛnŋ agbegbɔnnu mɔ mìakpɔ vɔnsa ci Yesu wa mɔ yɛnyi ŋɖe ci Mawu na mì. Ahan yí Yesu ji mɔ mìwo le kpɔ tafɛn lɔ nɛa? Nɔ nɔnɔmɛ cɛ mɛ yí mìle ɖe, nyi yí atɛnŋ akpedo mì nuɔ? Mìagbeje nyɔbiɔse amɛve cɛwo mɛ.

Ɛɛ, Yesu ji mɔ mìwo le kpɔ ye vɔnsa lɔ mɔ yɛnyi enu ci Mawu na mìwo domɛtɔ ɖekaɖeka. Lé mìawɛ akando jiɔ? Kpɔ enujɔjɔ ci woŋwlɛn do Luiki 23:​39-43 mɛ le susumɛ. Wokan ŋsu ɖeka do aci nu do axa nɔ Yesu. Ŋsu cɛ lɔn do ji mɔ yewa nubaɖawo. Tamɛsɛnnuwo yí ewa, ɖo mɛ ciwo yí wa nukpotuwo yí wokannɔ do aci nu nɔ woaku. Ŋsu cɛ se vevi do enu ciwo ewa nu yí ɖe kuku nɔ Yesu mɔ: “Gayimɛ A yì Ao fyɔɖuxumɛ ɔ, ɖoŋwi ŋ.”

Lé Yesu ɖo ŋci ni doɔ? Kpɔ vevi ci Yesu se hwenu etrɔkɔ ta keŋ akpɔ ŋmɛ nɔ ŋsu cɛ ɖa. Yesu sekɔ vevi, gan éko do nukpa yí do ŋsɛn yi. Énu ni mɔ: “Nyɔnɔnwi ŋnukɔ nɔ eo gbɛ mɔ, àvanɔ koɖoŋ le paradiso mɛ.” Yesu atɛnŋ anu ni kpoŋ sa mɔ ‘Amɛagbetɔ Vi lɔ va yí asɔ agbe Yitɔ sa vɔn do ta nɔ amɛ sugbɔwo.’ (Mt. 20:28) Vɔ dewɛ ahan o. Èdo jeshi lé Yesu sɔ xomɛfafa yí zan vɔnsa lɔ do ŋsu lɔ nu doa? Ésɔ wa xlɔ yí zan nyɔgbe “eo” koɖo “ŋ.” Égbenu nɔ ŋsu lɔ mɔ yɛanɔ agbe le paradiso mɛ le nyigban ji.

Kankandoji li mɔ Yesu jikɔ mɔ ŋsu cɛ le sɔ ye vɔnsa lɔ wa yiŋtɔ tɔ. Ci mɔnukpɔkpɔ desun tamɛsɛntɔ cɛ shi nɔ asɛn Mawu can ɔ, Yesu se le yiɖeki mɛ do nu ahan. Edasɛ mɔ Yesu jikɔ mɔ Kristotɔ ci yi wa ʒinʒindoshimɛ yi sɛnkɔ Mawu le sɔ ye vɔnsa lɔ wa yiŋtɔ tɔ. Nɔ èwa nuvɔnwo vayi sa ɖe, nyi yí atɛnŋ akpedo eo nu naxɔɛ se mɔ Kristo tafɛn vɔnsa lɔ ahɛn nyɔna vɛ nɔ ye can ɔ?

Ci Yesu ɖo kunuɖeɖedɔ lɔ nɔ Pɔluɔ, ése le yiɖeki mɛ mɔ eye yí Yesu ku do ta nɔ.  Léɔ? Éɖe mɛ mɔ: “Ŋ do akpe nɔ Kristo Yesu mìwo Xwetɔ, ɖo É ɖeji do ŋ nyɛ, yi É ɖo edɔ cɛ nɔ ŋ nɔ ma sumɔ Yi. É na ŋsɛn ŋ. Sa ɔ, ŋ zunɔ Kristo, yi donɔ aya ni, yi gbe gbali ni.” (1 Tim. 1:​12-14) Ci Pɔlu wa nuvwin cɛwo, gan yí Yesu dɔ edɔ cɛ yiɔ, édo jeshi mɔ Yesu ku ŋshishi nɔ ye yí lɔn ye yí gbekando ye ji. Yesu ɖo eŋɛnywidradradɔ lɔ nɔ mìwo domɛtɔ ɖekaɖeka hɛnnɛ. (Mt. 28:​19, 20) Ecɛ atɛnŋ akpedo mì nu mìamɔŋje mɛ mɔ Yesu ku do ta nɔ mìwo hɛnnɛa?

Ewa xwe 34 han yí woɖe Albert ti le eha lɔ mɛ. Étrɔva Yehowa gbɔ yɛ dejinjin o. Énu mɔ: “Ŋdeŋlɔbe nuvɔn ciwo ŋwa gbeɖe o. Vɔ nɔ ŋle kunuɖegbeɔ, ŋsenɔ le nyɛɖeki mɛ shigbe apostolo Pɔlu nɛ mɔ Yesu yí dɔ edɔ lɔŋ. Ena ŋkpɔnɔ jijɔ yí ɖonɔ susu nywi do nyɛɖeki, anyi gbe koɖo esɔmɛ nu.”​—Eha. 51:3.

Allan nyi adantɔnɔ yí wa tamɛsɛnnu sugbɔ gbɔxwe yí vakpla nyɔnɔnwi lɔ. Énu mɔ: “Ŋkpɔtɔ ɖokɔ ŋwi enubaɖa ciwo pleŋ ŋwa koɖo amɛwo. Edonɔ ŋmavui nɔŋ hweɖewonu. Vɔ ŋdakpe nɔ Yehowa ci eɖe mɔ nɔ enyɛ ci yí nyi nuvɔnwatɔ nɔ madra eŋɛnywi lɔ nɔ mɛbuwo. Nɔ ŋkpɔ lé amɛwo wakɔ nu do eŋɛnywi lɔ nu doɔ, ena ŋɖonɔ ŋwi mɔ Yehowa nyi amɛ nywi yí gbelɔnnɔ amɛ. Ŋsenɔ le nyɛɖeki mɛ mɔ ézanŋ sɔ kpekɔdo mɛ ciwo yí wakɔ nubaɖawo nu shigbe lé ŋwɛ vayi nɛ.”

Mìwo kunuɖeɖedɔ lɔ na mìɖonɔ susu nywiwo yí gbewanɔ nunywiwo. Ena mìnyanɔ mɔ Yesu ku ŋshishi nɔ mì, lɔn mì yí gbekando mì ji.

Mìwo ji atɛnŋ akpɔtɔ adokɔ hwɛ mì do nuvɔn ciwo mìwa vayi nu, keke sɔ na nɔ hwenu woagu Satana xexe cɛ. Nyi yí akpedo mì nu mìaɖu seselelanmɛ ŋtɔ́wo jiɔ?

Ci Jean le jajɛ mɛɔ, énɔnɔ agbeve. Vɔ eji yi tɔ dokɔ hwɛ yi yí ejekɔ agbla mɔ yeaɖu seselelanmɛ lɔ ji. Énu mɔ: “Evivi nɔŋ mɔ ‘Mawu gangan wu mìwo yexawo’ ” (1 Ʒan 3:​19, 20) Shigbe Jean nɛɔ, mìwo can mìakpɔ akɔnfafa nɔ mìnya mɔ Yehowa koɖo Yesu mɔŋje mɛ nywiɖe mɔ nuvɔnmɛwo yí mìnyi. Ðo ŋwi mɔ lɔn wolɔn mì taɖo yí na tafɛn lɔ mì. Denyi amɛmaɖonuvɔnwo yí wona tafɛn lɔ o, vɔ nuvɔnmɛ ciwo yí trɔ jimɛ yí wona tafɛn lɔ.​—1 Tim. 1:15.

Nɔ èdo gbe ɖaɖa yí bu tamɛ kpɔ so lé Yesu wa nu do nuvɔnmɛwo nu, yí gbewa ci ji àkpe le kunuɖeɖedɔ ci edɔ eo mɛɔ, àkando ji mɔ ao ta yí wocu tafɛn lɔ do. Nɔ èwɛ ahan ɔ, àtɛnŋ anu shigbe Pɔlu nɛ mɔ: “Yesu yí nyi amɛ ci yí lɔn ŋ, yi gbe sɔ Yiɖeki na yí hlɛn ŋ gan.”