SO TƆTƆMƐƆ, Izraɛliviwo jɔnɔ ho yí sɔ donɔ alɔ sɛnsɛn adodwi lɔ. Vɔ tagajɔjɔ nyɔ lɔ vasɛnŋ yí nyi agban kpɛnkpin le kɔ nɔ Ʒuifuwo le Yesu hwenu.

Ʒuifu ciwo yí nyi mɛganxoxuwo ɖo ajɔ shekel mamu alo (drakma amɛve) keŋ asɔ do alɔ Mawu sɛnsɛndɔ lɔ le gbedoxɔ lɔ mɛ. Le xwe sanŋdi ŋkɔtɔ mɛɔ, wozan ho lɔ sɔ wanɔ vɔnsawo yí lenɔ bu nɔ gbedoxɔ ci Erodi cu. Ʒuifu ɖewo biɔ Piɛ se mɔ Yesu jɔnɔ taga ma yí Yesu mɔ yɛdedɔn mɔ woajɔ taga o. Can hɛnnɛ édɔ Piɛ mɔ yɛ le yi ji gaju ɖeka keŋ avacu taga lɔ.—Mt. 17:24-27.

Hwenɔnuɔ, Mawu mɛwo ɖo agbena mado amɛwo ci gɔnmɛ yí nyi mɔ, woama wowo jinukuwo alo ele ciwo wokpɔnɔ do amɛwo yí asɔ ɖeka na. (1 Ese. 27:30-32; Amh. 18:26-28) Sɛnsɛnŋkɔnɔtɔwo ʒin amowo ji gligaan mɔ woɖo ana mado amɛwo lɔ nɔ amagbewo pleŋ keke ama ciwo woyɔnɔ mɔ “mɛti, kumɛ, koɖo dili” can le mɛ. Yesu denu mɔ mado amɛwo nana denyɔ o, vɔ éklo nu so ayemɛnu ci esekplamɛtɔwo koɖo Farizitɔwo wanɔ ji.—Mt. 23:23.

Vɔ hwenɔnuɔ, Rɔmatɔwo yí kpakɔ acɛ yí kan taga sugbɔ kɔɖɛ nɔ jumɛviwo yí wojɔnɔ. Le kpɔwɛ mɛ, mɛ ciwo shi nyigban le ɖo asɔ ŋɖe alo eho na yí anyi taga. Nɔ woma nuku ci yí to le nyigban lɔ ji do amɛnɛ alo amatɔn ɔ, taga lɔ anyi akpaxwe ɖeka. Gbesɔ kpe niɔ, woxɔnɔ taga do ta nɔ Ʒuifu ɖeshiaɖe. Taga cɛ nu yí Farizitɔwo biɔ nyɔ Yesu so. Édasɛ lé mìɖo akpɔnɔ tagajɔjɔ do ci emɔ: “Mí sɔ enu ci yí nyi Sezatɔ sɔ jo nɔ Seza, yí a sɔ ci yí nyi Mawutɔ sɔ jo nɔ Mawu.”—Mt. 22:15-22.

Gbesɔ kpe niɔ, woxɔnɔ taga nɔ wolɔ nusasa va nutwi ɖe mɛ alo sɔ yikɔ nutwi bu mɛ. Woxɔnɔ taga cɛ le tɔjihunɖoxuwo, anawo ji, emɔtɔkplinuwo, juganwo alo afiwo gbonu.

Taga ciwo pleŋ wokan nɔ mɛ ciwo ji Rɔma kpa acɛ do kpɛn ɖoɖu. Sɔ koɖo Rɔma xolɔtɔ Tacite ɔ, le Acɛkpatɔ Tibère fyɔɖuɖu hwenu ci Yesu le nyigban jiɔ, “Syrie koɖo Ʒude ɖe kuku mɔ wo le ɖe taga ci yewojɔnɔ kpɔtɔ, ɖo yi jɔjɔ vagbɔnkɔnu nɔ wo.”

Alɔkpa ci wozan yí sɔ jɔnɔ taga lɔwo na agban lɔ gbekpɛn doji. Gbɔxwe mɛɖe akpɔ mɔ axɔ taga le amowo shiɔ, wokannɔ eho gangan ni yí acu keŋ atɔ dɔ lɔ wawa. Mɛ ciwo yí na eho gangan wu, xɔnɔ taga ci yí wu ahan le amowo shi yí enyi nɔ ele nɔ wowoŋtɔwo. Wogbexɔnɔ mɛbuwo do dɔ lɔ mɛ nɔ wowo can axɔkɔ taga le amowo shi. Ewa shigbe mɔ Zashe xɔ mɛɖewo yí wojɔnɔ taga le amowo shi hannɛ. (Luiki 19:1, 2) Eyi taɖo amɛ lɔwo lenɔ mɛ ciwo yí jɔnɔ taga le wo shi do dɔmɛ yí wodeɖonɔ susu nywi do wo nu o.