1-2. (a) Nɔnɔmɛ ci mɛ yí Pɔlu le ci eŋwlɛ nu ɖaɖa Efezitɔwoɔ, yí nyi taɖo eŋwlɛ nu ɖaɖa woɔ? (b) Nyɔbiɔse ciwo mìakpɔ ɖoŋci nɔɔ?

 HWENU wosɔ Apotru Pɔlu do gakpa mɛ le exɔ ɖeka mɛ le Rɔmaɔ, éji mɔ yeado ŋsɛn ye kpena xɔsetɔwo. Ci datɛnŋ ayi wo gbɔ ŋmɛnŋmɛ ɔ, eyi dɔ eŋwlɛ wema ɖaɖa wo. Éŋwlɛ ɖeka le wema cɛwo mɛ ɖaɖa Efezitɔwo le exwe 60 alo 61 han K.H..—Efe.1:1; 4:1.

² Exwe 10 hanwo vayiɔ, Pɔlu zan gamɛ ɖewo le Efezi yí sɔ ɖe kunu, yí gbekpla nu amɛwo so eŋɛnywi lɔ nu. (Edɔ. 19:​1, 8-10; 20:​20, 21) Élɔn nɔviɛ ŋsuwo sugbɔ yí ji mɔ yeakpedo wo nu nɔ woakpɔtɔ anɔ gbeji nɔ Yehowa. Vɔ nyi yí taɖo eŋwlɛ nu ɖaɖa Kristotɔ amɛshiaminɔwo so vinvin koɖo klɛnklɛn nuɔ? Yí nyi Kristotɔwo pleŋ atɛnŋ akpla so nukplamu cɛ mɛɔ? Mìakpɔ ɖoŋci nɔ enyɔbiɔse cɛwo.

SO VINVIN MƐ VAYI KLƐNKLƐN MƐ

3. Enudredonunu ci Pɔlu wa le wema ci eŋwlɛ ɖaɖa Efezitɔwo mɛɔ?

³ Pɔlu ŋwlɛ enu ɖaɖa Kristotɔ ciwo yí le Efezi mɔ: “Sasavayi nyao ɔ, mí nyi vinvinwo. Vɔ ecɛyɛ ɔ, mí va nyi klɛnklɛn.” (Efe. 5:​8, Ezoɖuɖu Yoyu Wema) Le lɛɔ, Pɔlu zan enudredonunu ciwo yí nyi vinvin koɖo klɛnklɛn yí sɔ dre enu amɛve ciwo yí trɔkpe nɔnɔ. Ecɛyɛɔ, mìaxo nuxu so enu ci yí taɖo Pɔlu tɛnŋ nu nɔ Efezitɔwo mɔ “sasavayi nyao ɔ mí nyi vinvinwo” nu.

4. Emɔ ci nu yí Efezitɔwo le vinvin mɛ le sɛnsɛn kpaxwe mɛɔ?

⁴ Wole vinvin mɛ ɖo wole ŋsusɛnsɛnwo mɛ. Keŋ gbɔxwe Efezitɔ ciwo Pɔlu ŋwlɛ nu ɖaɖa vakpla nu so nyɔnɔnwi lɔ nu yí vanyi Kristotɔwoɔ, woxɔ ŋsusɛnsɛn koɖo wowo kɔnuwo ji se yí gbewanɔ maʒikiwo. Atɛmi gbedoxɔ gangan  ci wowa do Efezi na yí ŋkɔ yi tó nɔ Efezi jugan lɔ yí egbenyi ɖeka le exɔ amadrɛ ciwo yí gangan yí gbenya kpɔkpɔ wu le xexeɛ mɛ le hwenɔnu. Amɛwo vayinɔ gbedoxɔ lɔ mɛ yí sɛnnɔ vojuwo. Gacuho dɔwatɔwo wanɔ Atɛmi vojuxɔ hwɛhwɛwo yí gbewanɔ mawunɔ̀ Atɛmi bɔdo nu. Enu ŋtɔ́wo sasa na yí gacuho dɔwatɔwo nyi dɔkunɔwo. (Edɔ. 19:​23-27) Gbesɔ kpe niɔ, wojeshi ejugan lɔ mɔ wowanɔ maʒikinuwo haan.—Edɔ. 19:19.

5. Lé Efezitɔwo le vinvin mɛ le agbenɔnɔ kpaxwe doɔ?

⁵ Wole vinvin mɛ ɖo wodewakɔ do agbenywinɔnɔ sewo ji o. Amɛ ciwo yí le Efezi nɔnɔ agbedɔndɔnwo haan yí enudɔndɔn ciwo yí wowanɔ dewanɔ ŋkpɛn nɔ wo o. Nɔ wobɔ do fini womunɔ munu le le jugan lɔ mɛɔ, wonunɔ enyɔdɔndɔnwo yí ahanke wogbewanɔ le sɛnsɛn xweɖuɖuwo mɛ hɛnnɛ nɛ. (Efe. 5:3) “Wananyuiwo pleŋ vɔ le lanmɛ nɔ” amɛ sugbɔ ciwo yí le jugan lɔ mɛ. Enyɔgbe cɛwo gɔnmɛ yí nyi mɔ “wodegbesenɔ vevi nɔ wowa nuvɔn o.” (Efe. 4:​17-19, Ezoɖuɖu Yoyu Wema) Keŋ gbɔxwe woakpla nu so Yehowa se kudo enywi koɖo vɔn nuɔ, wowo yexawo dedonɔ ehwɛ wo nɔ wowa nuvɔn o. Yí lé Yehowa akpɔ wowo nuwana lɔwo do dewanɔ eɖe nɔ wo kpetii o. Eyi taɖo Pɔlu tɛnŋ dre wo mɔ “ahlɔnmɛ do vinvin nɔ́ wo, wo cí azɔge nɔ́ Mawu gbenɔnɔ.”

6. Nyi yí taɖo Pɔlu tɛnŋ nu nɔ Efezitɔwo mɔ “evyɛ ɔ, [wovanyi] klɛnklɛn” ɔ?

⁶ Vɔ Efezitɔ ɖewo dekpɔtɔ ci vinvin mɛ o. Pɔlu ŋwlɛ mɔ, “ecɛyɛ ɔ [wo] va nyí klɛnklɛn le Axwetɔ mɛ.” (Efe 5:8 Ezoɖuɖu Yoyu Wema.) Nyɔnɔnwi ci yí le Enuŋwlɛŋwlɛ lɔwo mɛ na yí wovakpɔ klɛnklɛn. (Eha. 119:105) Efezitɔ ŋtɔ́wo tashi ŋsusɛnsɛn nuwana wowotɔwo koɖo agbedɔndɔn nɔnɔ. Wotekpɔ yí ‘wa [Mawu] tɔ hanci’ yí je agbla yí sɛn Yehowa nɔ wowo nu akpe ni.—Efe. 5:1.

7. Nyi mɛ yí mìwo nɔnɔmɛ lɔ ɖyi Kristotɔ ciwo yí le Efezi leɔ?

⁷ Ahanke mìwo can, gbɔxwe mìavakpla  nyɔnɔnwi lɔɔ, mìnɔ ŋsusɛnsɛnwo mɛ yí wanɔ vinvinmɛnuwo. Mɛɖɛwo le mì mɛ yí ɖu ŋsusɛnsɛn xwewo vayi; yí mɛɖewo nɔ agbedɔndɔnwo. Vɔ ci mìvakpla nu so Yehowa se jɔjɔɛ kudo enywi koɖo evɔn nuɔ, mìvatrɔ mìwoɖekiwo. Mìwa trɔtrɔwo, mìtɔ agblajeje keŋ nɔ mìwo gbenɔnɔ asɔ koɖo Yehowa se jɔjɔɛwo. Ecɛ na yí mìvakpɔ nyɔna sugbɔwo. (Ezai. 48:17) Vɔ denɔnɔ fafɛɖe gashagamɛ mɔ, mìanɔ azɔge nɔ vinvinmɛnuwo yí “anɔ agbe shigbe klɛnklɛnmɛviwo ɛnɛ” o. Ci ele ahan ɖe, lé mìatɛnŋ awɛ doɔ?

GBE VINVINMƐNUWO

8. Sɔ koɖo Efezitɔwo 5:​3-5 ɖe, nyi Efezitɔwo ɖo agbeɔ?

⁸ Hlɛn Efezitɔwo 5:​3-5. Gbɔxwe Kristotɔ ciwo yí le Efezi asun ji anɔ azɔge nɔ vinvin mɛ nuwanawoɔ, woɖo akpɔtɔ agbegbeɛ ŋciwo yí dekpenɔ nɔ Yehowa o. Denyi gbɔdɔndɔn masɔkoɖose nuwo ɖekɛ yɔ o, vɔ woagbegbe enyɔdɔndɔnwo nunu hɛnnɛ. Pɔlu ɖo ŋwi nɔ Efezitɔwo mɔ woɖo agbe enu ŋtɔ́wo wawa nɔ woji mɔ yewoakpɔ “texwe le Mawu koɖo Kristo fyɔju mɛ.”

9. Nyi yí taɖo mìɖo akpɔ mìwoɖekiwo ji nɔ mìŋgbewa ŋɖe ci yí ana mìanɔ agbedɔndɔn ɔ?

⁹ Mìwo can mìɖo akpɔtɔ akpɔkpɔ mìwoɖekiwo ji nywiɖe nɔ mìŋgbedo nu “vinvinmɛ dɔwawa maɖotawo mɛ o.” (Efe. 5:​11, Ezoɖuɖu Yoyu Wema) Nyɔnɔnwi yɔ, nɔ mɛɖe kpɔkpɔ alo seseɛ alo xonɔ nuxu so enumakɔmakɔwo nu, abi enudɔndɔnwo nuɔ, ale fafɛɖe ni mɔ awa enudɔndɔn. (Gɔnm. 3:6; Ʒaki. 1:​14, 15) Lé eju ɖeka mɛɔ, nɔviŋsu sugbɔ wanɔ xlɔ koɖo wowonɔnɔwo le intɛnɛti jugbajahadoxuwo ji yí ŋwlɛnɔ nu ɖaɖa wowonɔnɔwo. Le tɔtɔmɛɔ, sugbɔtɔ le wo mɛ xonɔ nuxu so gbɔgbɔn mɛ nuwo nu. Vɔ nɔ hwenuwo vayikɔɔ, wovatɔnɔ enudɔndɔnwo ŋwlɛŋwlɛ ɖaɖa wowonɔnɔwo, wovatɔnɔ gbɔndɔndɔn nyɔwo nunu. Le yiyimɛɔ, sugbɔtɔ le wo mɛ valɔn do ji mɔ nuxu dɔndɔn cɛwo xoxo vakplɔ yewo do gbɔdɔndɔn masɔkoɖose nuwanawo mɛ yí yewovawa gbɔdɔndɔn masɔkoɖose nuwo.

10. Lé Satana teteɛkpɔ mɔ yeable mì doɔ? (Efezitɔwo 5:6)

¹⁰ Satana xexe lɔ teteɛkpɔ mɔ yeable mì nɔ mìabui mɔ lé Yehowa kpɔnɔ agbedɔndɔn do koɖo enumakɔmakɔwo do dedɔn ɖeeɖe o. (2 Piɛ. 2:19) Ecɛ dekpaca mì o! Ayemɛnu Legba tɔ ɖeka yi nyí mɔ yeacaka amɛwo susu nɔ woŋgbesun ji anya enu ci yí dɔn koɖo enu ci yí nyɔ o. (Ezai. 5:20; 2 Kor. 4:4) Eyi taɖo dekpaca mì mɔ, le fimu sugbɔwo mɛ, televiʒiɔn koɖo intɛnɛti jiɔ, wonunɔ susu ciwo yí trɔnɔ kpe agbenywinɔnɔ se Yehowa tɔwo! Satana teteɛkpɔ mɔ yeable mì nɔ mìabui mɔ wohɛn woawa enu makɔmakɔwo yí anɔ agbedɔndɔnwo dru fɛɛ yí nɔ wowa woɔ, alɔzu ɖe dato so mɛ o.—Hlɛn Efezitɔwo 5:6.

11. Shigbe lé enu ci yí jɔ do Angela ji dasɛ yi nɛ ɖe, nyi yí taɖo mìɖo awa do nukplamu nywi ci yí le Efezitɔwo 5:7 mɛɔ? (Kpɔ foto lɔ hɛnnɛ.)

¹¹ Satana ji mɔ mìado egbɛ koɖo mɛ ciwo yí adɔ agbɔnnu nɔ mì mɔ mìawa do Yehowa sewo ji. Eyi taɖo, Pɔlu do ŋsɛn Efezitɔwo mɔ: “Mí ŋgbe do eha ɖe koɖo nɛnɛ mɛwo” ciwo yí wanɔ enudɔndɔnwo le ŋmɛ nɔ Mawu o. (Efe. 5:​7, Ezoɖuɖu Yoyu Wema) Mìɖo aɖo ŋwi mɔ, mìɖo akpɔ mìwoɖekiwo ji sɔwu Efezitɔ ciwo yí ni vayi, ɖo egbɛɔ, mɛ ciwo mìdonɔ eha koɖo desɛn mɛ ciwo mìkpɔnɔ ŋmɛŋmɛ ɖekɛwo ji o, vɔ mɛ ciwo mìkannɔseŋ  koɖo le Ɛntɛnɛti ji jugbajahadoxuwo ji le mɛ hɛnnɛ. Angela, a ci yí le Asie kpɔɛ mɔ afɔku sugbɔ le jugbajahadoxuwo mɛ. Élɔn do ji mɔ: “Viviviɔ, lé ŋbunɔ tamɛ kpɔ do trɔ. Ŋvaɖoɖoɔ exlɔ sugbɔwo keke le yiyimɛɔ, degbevawa ɖe nɔŋ ci ŋvaɖo exlɔ ciwo yí dewanɔ do Yehowa mɔdasɛnamɛwo ji can o. Ŋvatɔ kpɔɛkpɔɛ mɔ enudɔndɔn ciwo Yehowa gbe nyi enunywi.” Mawu wɛ yí hamɛmɛshinshin amɛlɔntɔ ɖewo vakpedo Angela nu yí ewa trɔtrɔwo. Énu mɔ: “Ecɛyɛɔ, ŋvasɔ susu ɖo gbɔngbɔn mɛ nuwo nu sɔwu jugbajahadoxuwo ji.”

12. Nyi yí akpedo mì nu mìakpɔtɔ awanɔ do Yehowa se ci yí kudo enywi koɖo evwin jiɔ?

¹² Mìɖo ado gbla koɖo susu ci xexe lɔ ɖo mɔ dedɔn mɔ woanɔ agbedɔndɔn o. Mì nya mɔ ŋsu yɔ. (Efe. 4:​19, 20) Anyɔ mɔ mìabiɔ mìwoɖekiwo se mɔ: ‘Ŋkpɔnɔ nyɛɖeki ji yí ŋdedonɔ egbɛ maɖota ɖe koɖo anyi dɔmɛkpenawo, suklukpenawo, alo mɛbu ciwo yí dewanɔ do Yehowa se jɔjɔɛwo jia? Ŋgbenɔ dɔn yí wanɔ do ese ci Yehowa do kudo enywi kodo evɔn nu nɔ mɛɖewo kpɔ mɔ nyeŋwɛkɔ ɖoɖu can a?’ Shigbe lé wonui le 2 Timɔte 2:​20-22 mɛ nɛɔ, mìɖo agbekpɔ mìwoɖekiwo ji nɔ mìsɔsɔ amɛ ciwo mìanyi xlɔ koɖo le Kristotɔwo hamɛ lɔ mɛ. Eɖo anɔ susu mɛ nɔ mì mɔ etɛnŋ jɔ mɔ mɛɖewo dakpedo mì nu yí mìakpɔtɔ asɛnkɔ Yehowa le egbejinɔnɔ mɛ o.

MÍNƆ AGBE “SHIGBE KLƐNKLƐNMƐVIWO NƐ”

13. Woanɔ “agbe shigbe klɛnklɛnmɛviwo” nɛ gɔnmɛ ɖe? (Efezitɔwo 5:​7-9)

¹³ Pɔlu do ŋsɛn Kristotɔ ciwo yí le Efezi mɔ denyi vinvinmɛnuwo ɖekɛ woagbe o, vɔ woɖo agbenɔkɔ “agbe shigbe klɛnklɛnmɛviwo ɛnɛ.” (Hlɛn Efezitɔwo 5:​7-9.) Nyɔ cɛ gɔnmɛ ɖe? Le kleŋ mɛɔ, yi gɔnmɛ yí nyi mɔ mìawakɔ nu shigbe mɔ Kristotɔ adodwiwo nɛ gashiagamɛ. Enu ɖeka ci mìawa yí aɖo tajinu ŋtɔ́ gbɔ yí nyi mɔ mìadonɔ vevi Bibla hlɛnhlɛn koɖo yi kplakpla yí agbekplanɔ  Bibla nukplawemawo. Vevitɔ lɔ yí nyi mɔ mìalé ŋkuvi do kpɔwɛ koɖo enukplakpla Yesu Kristo tɔwo nu, ɖo eyi yí nyi “klɛnklɛn xexe lɔ tɔ.”—Ʒan 8:12; Elo. 6:23.

14. Lé gbɔngbɔn kɔkɔɛ lɔ atɛnŋ akpedo mì nu doɔ?

¹⁴ Mìgbeʒan Mawu gbɔngbɔn lɔ kpekpedonu keŋ gbɔxwe atɛnŋ anɔ agbe “shigbe klɛnklɛnmɛviwo ɛnɛ.” Nyi yí taɖoɔ? Ðo egbla koɖo ekɔn enyi gbɔxwe woakpɔtɔ anɔ mɛmiɖe le xexe dɔndɔn cɛ mɛ. (1 Tɛs. 4:​3-5, 7, 8) Gbɔngbɔn kɔkwɛ atɛnŋ akpedo mì nu mìaɖu xexe lɔ susu ji. Eɖewo yí nyi xexemɛnunya koɖo susu ciwo yí trɔkpe lé Mawu bunɔ nuwo do. Gbɔngbɔn kɔkwɛ lɔ atɛnŋ agbekpedo mì nu mìawanɔ “enunywi hamɛhamɛ koɖo enujɔjɔɛ wawa koɖo nyɔnɔnwi.”—Efe. 5:9.

15. Nyiwo mɛ yí mìxɔnɔ gbɔngbɔn kɔkɔɛ lɔ leɔ? (Efezitɔwo 5:​19, 20)

¹⁵ Emɔ ɖeka ci ji mìato axɔ gbɔngbɔn kɔkwɛ yí nyi mɔ mìadonɔ egbe ɖaɖa yí abiɔɛni. Yesu nu mɔ Yehowa ana “gbɔngbɔn kɔkwɛ amɛ ci yí [biɔbiɔɛ].” (Luiki 11:13) Mìgbexɔnɔ Mawu gbɔngbɔn kɔkwɛ lɔ hɛnnɛ nɔ mìkanfukɔ Yehowa le Kristotɔwo bɔbɔwo mɛ. (Hlɛn Efezitɔwo 5:​19, 20.) Enunywi ciwo gbɔngbɔn kɔkwɛ lɔ wanɔ nɔ mì akpedo mì nu mìanɔ agbe ci yí akpe nɔ Mawu.

16. Nyi yí akpedo mì nu mìasɔ gbeta nywiwoɔ? (Efezitɔwo 5:​10, 17)

¹⁶ Nɔ mìjikɔ asɔ gbeta veviɖeɔ, mìɖo atekpɔ anya “enu ci yí jɔnɔji nɔ Axwetɔ” yí awa nu asɔ koɖi. (Hlɛn Efezitɔwo 5:​10, 17.) Nɔ mìji Bibla gɛnmɛɖose ci yí sɔ koɖo mìwo nɔnɔmɛ lɔɔ, anyi mɔ mìjijiɛ Mawu susu kudo nyɔ lɔ nu. Yi goduɔ, nɔ mìwado yi gɔnmɛɖose lɔwo jiɔ, atɛnŋ akpedo mì nu mìasɔ gbeta nywiwo.

17. Lé mìawɛ azan mìwo gamɛ nywiɖeɔ? (Efezitɔwo 5:​15, 16) (Kpɔ foto lɔ hɛnnɛ.)

¹⁷ Pɔlu gbena ekpla Kristotɔ ciwo yí le Efezi mɔ wo le zan wowo gamɛwo nywiɖe. (Hlɛn Efezitɔwo 5:​15, 16.)  Míwo ketɔnɔ Satan ci yí nyi “Enuvwinwatɔ,” jijiɛ mɔ xexeɛ mɛ nuwo jiji lé jan mì keke mìdagbekpɔ gamɛ nɔ Mawu sɛnsɛn o. (1 Ʒan 5:19) Anɔ fafɛɖe nɔ Kristotɔ ɖe mɔ asɔ susu ɖo eho, suklu yiyi, koɖo edɔ ci awa ji sɔwu emɔ sugbɔ ciwo yí ahun ni le Yehowa sɛnsɛn mɛ ji. Nɔ ejɔ ahan ɔ, anyi évatɔ enu bubu kpɔ shigbe lé xexe lɔ bunɔ enuwo do nɛ. Nɔ mìanuiɔ, enu ŋtɔ́wo dedɔn gbɔxwe o, vɔ wodeɖo axɔ tɔxwe ŋkɔtɔ nɔ mì le agbe mɛ gbeɖe o. Nɔ mìnɔkɔ “agbe shigbe klɛnklɛnmɛviwo” nɛɔ, ele mɔ mìanya mìwo “gamɛ zanzan,” yí asɔ susu ɖo enu ci yí le veviɖe ji koŋ.

18. Afɔ ciwo Donald ɖe keŋ zan yi gamɛ nywiɖe sɔwuɔ?

¹⁸ Ji emɔ ɖekpokpui ci ji àto yí asɛn Yehowa sugbɔ doji. Enu ci yí Donald, ci yí nɔnɔ Afrique du Sud wa nɛ. Énu mɔ: “Ŋbu tamɛ kpɔ so anyi gbe nu yí ŋdo gbe ɖaɖa nɔ Yehowa mɔ lé kpedo ŋnu mawa sugbɔ doji ni le kunuɖeɖedɔ lɔ mɛ. Ŋdo gbe ɖaɖa so edɔ ci yí aɖe mɔ nɔŋ yí nakpɔ gamɛ sugbɔ yí awa kunuɖeɖedɔ lɔ. Yehowa kpedo ŋnu, yí ŋkpɔ edɔ ci yí anyɔ nɔŋ. Eyi nyɛ koɖo ashinyɛ tɔ gashiagamɛ sumɔsumɔdɔ lɔ wawa doju.”

19. Nyi yí atɛnŋ akpedo mì nu mìakpɔtɔ anɔ “agbe shigbe klɛnklɛnmɛviwo” nɛɔ?

¹⁹ Wema ci Pɔlu ŋwlɛ ɖaɖa Efezitɔwo kpedo wo nu yí wokpɔtɔ nɔ gbeji nɔ Yehowa. Yí nukplamu ŋtɔ́ ci yí so Yehowa gbɔ atɛnŋ agbekpedo mìwo can nu. Shigbe lé mìkpɔɛ nɛɔ, átɛnŋ akpedo mì nu mìacan enu ciwo mìasɔ ɖe aye daɖɛ nywiɖe koɖo mɛ ciwo mìado gbɛ koɖo le nunya mɛ. Átɛnŋ ado ŋsɛn mì yí míakpɔtɔ anɔ klɛnklɛn nyɔnɔnwitɔ lɔ mɛ nɔ míwa toto nɔ Bibla nukplakpla míwotɔ yí zɔnnɔ doji. Égbe tɛ gbe do enu ci yí taɖo gbɔngbɔn kɔkwɛ lɔ le veviɖe yí atɛnŋ akpedo mì nu mìaɖo jijɔ nywiwo. Wawa do enu ciwo Pɔlu ŋwlɛ ji atɛnŋ akpedo mì nu mìasɔ gbeta nywi ciwo yí sɔ koɖo Yehowa susu. Nɔ mìwakɔ ŋcɛwoɔ, mìasun ji agbe vinvinmɛnu xexe cɛ mɛ tɔwo yí akpɔtɔ anɔ klɛnklɛn lɔ mɛ!