1-2. (a) Nyi yí taɖo asu koɖo ashi yoyuwo ɖo akando Yehowa jiɔ? (Ehajiji Wema 37:3, 4) (b) Nyi mɛ mìagbeje le nyɔta cɛ mɛɔ?

ÈBUKƆ tamɛ kpɔ so nyɔnu ɖeɖe alo asu ɖeɖe nua, alo yinɛ yí míɖe nɔnɔ yɛ nɛa? Nɔ enyi ahan yɔ nɛɔ, kankandoji li mɔ èkpɔkɔ emɔ mɔ ye koɖo ye lɔnlɔntɔ lɔ ase vivi nɔ agbe lɔ doju. Le nyɔnɔnwi mɛɔ, alɔlele ɖe degɔnnɔ yi cukaɖawo maɖo o. Yí mɛ ciwo yí ɖe nɔnɔ yoyu ɖo asɔ gbeta veviwo. Gbɔxwe míakpɔ jijɔ le exwe ciwo yí avava mɛɔ, lé míwanɔ nu do le cukaɖawo hwenu koɖo gbeta ciwo yí mísɔnɔ yí adɔ. Nɔ míɖe ji do Yehowa nuɔ, míasɔ gbeta nywiwo, míwo lɔlele lɔ asɛnŋ doji yí eji ajɔ mí sugbɔ. Vɔ nɔ mídewa do nukplamu Mawu tɔ jiɔ, mítɛnŋ vado go cukaɖa ciwo yí adɔ mídavakpɔ jijɔ o.—Hlɛn Ehajiji Wema 37:3, 4.

² Ci enyi asu koɖo ashi yoyuwo nu yí nyɔta cɛ xokɔ nuxu so tiin can ɔ, axo nuxu so cukaɖa ciwo asu koɖo ashiwo pleŋ atɛnŋ ado go nu. Agbeje enu ciwo mìatɛnŋ akpla le ŋsu koɖo nyɔnu egbejinɔtɔ ɖewo ciwo nu Bibla xo nuxu so gbɔ. Mìakpɔ nukplamu ciwo ji mìatɛnŋ awa do le mìwo gbe koɖo mìwo lɔlele mɛ so Bibla mɛ kpɔwɛ cɛwo mɛ. Mìagbekpɔ enu ci mìatɛnŋ akpla so asu koɖo ashi ciwo li le egbɛ mɛ ɖewo gbɔ.

3-4. Cukaɖa ciwo asu koɖo ashi yoyuwo atɛnŋ ado goɔ?

³ Mɛɖowo tɛnŋ do ŋsɛn mɛ ciwo yí ɖe nɔnɔ yoyu mɔ wo le nɔ agbe shigbe lé amowo nɔnɔ agbe do gbɛ nɛ.  Le kpɔwɛ mɛ, wowo jilawo koɖo wowo xomumɛtɔ buwo atɛnŋ anu nɔ wo mɔ wo le ji vi blaŋ. Alo wowo xlɔ ciwo yí sɔ ɖe le ji nɔ wo koɖo xomumɛtɔwo tɛnŋ do ŋsɛn wo mɔ wo le cu axwe yí axwle nunywiwo do mɛ.

⁴ Nɔ asu koɖo ashi lɔ denya wawaɔ, woasɔ gbeta ciwo yí adɔ woavaɖu fɛn ganganwo. Eyi wowo koɖo ve lɔ avatɔ edɔ wawa gaxoxo sugbɔ keŋ atɛnŋ acu fɛn lɔwo. Edɔwawa sugbɔ ahan tɛnŋ na wodagbekpɔ gamɛ awanɔ amɛɖekɛ nukplakpla, sɛnsɛn xomumɛtɔ yí aɖenɔ kunu o. Asu koɖo ashi lɔ tɛnŋ vatɔ bɔbɔwo gɔngɔn keŋ akpɔ mɔ awa edɔ do dɔ ji nɔ eho sugbɔ ato alo nɔ edɔ ŋgbegble nɔ wo o. Ecɛ tɛnŋ wɛ mɔ, ŋɖewo ciwo woawa dru le Yehowa sɛnsɛn mɛ ato wo nu.

5. Nyi èkpla le enu ci yí jɔ do Klaus koɖo Marisa ji mɛɔ?

⁵ Kpɔwɛ sugbɔwo dasɛ mɔ nɔ enu sugbɔ ɖoɖo yí nyi enuvevitɔ nɔ mì le agbe mɛɔ, mìdakpɔ jijɔ o. Kpɔ enu ci yí jɔ do asu koɖo ashi ɖeka ciwo woyɔnɔ mɔ Klaus koɖo Marisa ji ɖa. * Ci woɖe nɔnɔ kakaɔ, wo koɖo ve wanɔ dɔ gashiagamɛ keŋ akpɔ eho sugbɔ yí axwle nuwo. Ci wole edɔ wakɔ ahan can ɔ, eji ŋtɔŋtɔ dejɔnɔ wo o. Klaus nu mɔ: “Enu sugbɔ le mì shi sɔwu enu ci yí ʒan mì, vɔ le gbɔngbɔn mɛɔ, mìdeɖo tajinu ɖekɛ o. Nɔ nanu nyɔnɔnwiɔ, eji dejɔnɔ mì o yí mìdevoŋ le mìwoɖekiwo mɛ o.” Taŋfuin, míwo can míkpɔɛ mɔ ci enu sugbɔ ɖoɖo yí nyi enuvevitɔ nɔ yewoɔ, yewodekpɔkɔ jijɔ o. Nɔ ahan ele nɔ mí nɛɔ, míŋgbegbɔjɔ o. Mìakpɔ kpɔwɛ nywi ci mɛbuwo ɖo ciwo atɛnŋ akpedo mí nu míawa trɔtrɔ ciwo yí ʒan. Ŋkɔtɔɔ, mìakpɔ enu ci ŋsuwo atɛnŋ akpla le Efyɔ Ʒozafati gbɔ.

6. Sɔ koɖo nukplamu ci yí le Elododo Wema 3:5, 6 mɛ ɖe, lé Efyɔ Ʒozafati wa nu do ci edo go cukaɖa gangan ɖekaɔ?

⁶ Ŋsuwo, ewanɔ nɔ mí hweɖewonu mɔ agban ciwo yí le kɔ nɔ mí wugan mía? Nɔ enyi ahan yɔ nɛɔ, Efyɔ Ʒozafati kpɔwɛ atɛnŋ akpedo mí nu. Ci enyi fyɔ enyiɔ, eyi ɖo awɛ keke jukɔn lɔ pleŋ ale vofamɛ! Lé ewɛ do yí tɛnŋ wa dɔ gangan cɛɔ? Ʒozafati wa ci ji ekpe yí sɔ glɔn ta nɔ jukɔn lɔ. Éna wodra egli ciwo yí trɔdo Ʒuda juganwo do yí wosɛnŋ, éɖo ahwakɔn gangan ɖeka ci mɛ sɔja ciwo yí wu 1 160 000 le. (2 Kro. 17:12-19) Le yiyi mɛɔ, Ʒozafati vado go cukaɖa gangan ɖeka. Amonitiwo koɖo Moabutɔwo hwakɔn gangan ɖeka koɖo ŋsu ciwo yí so Seir-to nutwiwo mɛ do vɔnvɔn nɔ Ʒozafati ŋtɔ, yi xomu koɖo jukɔn lɔ. (2 Kro. 20:1, 2) Nyi Ʒozafati waɔ? Ébiɔ Yehowa mɔ yi le kpedo ye nu yí ado ŋsɛn ye. Enu  ci ewa sɔgbe koɖo enukplamu nywi ci yí le Elododo Wema 3:5, 6 mɛ. (Hliin.) Amɛɖekisɔsɔhwe gbedoɖa ci Ʒozafati wa yí woŋwli do 2 Kronika 20:5-12 mɛ, dasɛ lé ekando Edalɔ ci yí le jeŋkwi mɛ ji sugbɔ do. Lé Yehowa ɖo Ʒozafati gbedoɖa lɔ ŋci ni doɔ?

7. Lé Yehowa ɖo Ʒozafati gbedoɖa ŋci doɔ?

⁷ Yehowa to Levitɔ Ʒaxaziɛli ji yí xo nuxu nɔ Ʒozafati. Yehowa nu mɔ: “Mínɔ míwo tɔxuwo kpuu, míŋgbehwan o yí akpɔ lé Yehowa ahwlɛn mí gan do.” (2 Kro. 20:13-17, NWT) Mìnya mɔ de ahan yí wowanɔ ahwa nɛ o! Vɔ denyi agbetɔ ɖe yí na emɔdasɛnamɛ cɛwo o, Yehowa gbɔ yí nyɔ cɛwo so. Ci Ʒozafati kando Mawu ji keŋkeŋ ɔ, éwa do nyɔ ci enu ni ji. Ci yɛ koɖo yi mɛwo jikɔ awa ahwa koɖo ketɔnɔ lɔwoɔ, de sɔja bibiwo yí esɔ ɖo ŋkɔ nɔ yi hwakɔn lɔ o, vɔ ehajitɔ ciwo yí deɖo ahwawanu o yí esɔ ɖo ŋkɔ nɔ wo. Yehowa dedo ŋkpɛn Ʒozafati o; Éna eɖu ketɔnɔ lɔwo ji.—2 Kro. 20:18-23.

8. Nyi ŋsuwo atɛnŋ akpla so Ʒozafati gbɔɔ?

⁸ Ŋsuwo, míatɛnŋ akpla nu so Ʒozafati kpɔwɛ lɔ mɛ. Míwo dɔ enyi mɔ míale bu nɔ míwo xomu, eyi taɖo míwanɔ dɔ sɛnsinɖe keŋ ale bu ni yí agbeglɔn ta ni. Nɔ èdo go cukaɖawoɔ, ètɛnŋ nu mɔ yeakpɔ enyɔ lɔ gbɔ yeŋtɔ. Vɔ ŋgbego kpo do eɔŋtɔ ŋsɛn nu o. Do gbe ɖaɖa nɔ Yehowa mɔ yɛ le kpedo ye nu. Gbesɔ kpe niɔ, do gbe ɖaɖa koɖo ashio so ji mɛ. Ji mɔdasɛnamɛ so Yehowa gbɔ to Bibla kplakpla koɖo wema ciwo yí Mawu habɔbɔ lɔ wa ji keŋ awanɔ do wo ji. Taŋfuin mɛɖewo dalɔn do gbeta ciwo yí èsɔ yí wosɔ koɖo Bibla gɔnmɛɖosewo ji o, wotɛnŋ nu hɛnnɛ mɔ ɔje suku. Wotɛnŋ nu mɔ eho koɖo enu ciwo àtɛnŋ axwle yí ana àglɔn ta nɔ ao xomu nywiɖe. Vɔ ɖo ŋwi Ʒozafati. Ékando Yehowa ji yí eze le yi nuwanawo mɛ. Yehowa degbe ŋsu egbejinɔtɔ cɛ ɖɛ o yí dagbe eo can ɖɛ o. (Eha. 37:28; Ebre. 13:5) Nubu ci yí asu koɖo ashiwo atɛnŋ awa keŋ akpɔ jijɔɔ?

9. Enyɔ ci mìatɛnŋ anu so enyɔnuɖɛtɔ Ezai koɖo ashiɛ nuɔ?

⁹ Yehowa sɛnsɛn yí nyi enuvevitɔ nɔ enyɔnuɖɛtɔ Ezai koɖo ashiɛ le wowo gbe mɛ. Ezai nyi enyɔnuɖɛtɔ, yí ewa mɔ ashiɛ can nyi enyɔnuɖɛtɔ nɛ, ɖo Bibla yɔɛ mɔ “nyɔnu Mawu nyɔnuɖɛtɔ.” (Ezai 8:1-4) Eze petii mɔ, Ezai koɖo ashiɛ sɔ Yehowa sɛnsɛn ɖo texwe ŋkɔtɔ le wowo gbe mɛ. Kpɔwɛ nywi ŋtɔ teŋ woɖo ɖɛ nɔ asu koɖo ashiwo le egbɛ mɛ!

10. Lé nukplakpla so Bibla mɛ nyɔnuɖɛwo nu akpedo asu koɖo ashiwo nu woaɖui mɔ yewoawa sugbɔ nɔ Yehowa dojiɔ?

¹⁰ Le egbɛ mɛ can ɔ, mɛ ciwo yí ɖe nɔnɔ atɛnŋ aɖyi Ezai koɖo ashiɛ, nɔ wowa ci ji wokpe le Yehowa sɛnsɛn mɛ. Nɔ wokplanɔ Bibla mɛ nyɔnuɖɛwo doju yí kpɔ lé wovakɔ mɛ doɔ, kankandoji ci woɖo do Yehowa nu asɛnŋ doji. * (Titu 1:2) Woatɛnŋ agbebu tamɛ kpɔ so enu ci woatɛnŋ awa le Bibla mɛ nyɔnuɖɛ ɖewo mɛvava mɛ. Le kpɔwɛ mɛ, Yesu nu ɖɛ mɔ woadra eŋɛnywi lɔ le nyigban lɔ pleŋ ji gbɔxwe vɔvɔnu lɔ ava. (Mt. 24:14) Asu koɖo ashiwo atɛnŋ awa ɖe le edɔ cɛ mɛ. Nɔ wokpɔkɔ mɔ Bibla mɛ nyɔnuɖɛ cɛ jɔjɔ  do jiɔ, adɔ yí gbeta ci wosɔ mɔ yewoawa sugbɔ nɔ Yehowa asɛnkɔŋ doji.

11. Nyi Prisi koɖo Akilasi sun ji yí waɔ, yí nyi yí taɖoɔ?

¹¹ Asu koɖo ashi yoyuwo atɛnŋ akpla nu so Prisi koɖo Akilasi gbɔ. Wonyi Ʒuifuwo yí le Rɔma jugan mɛ. Wose eŋɛnywi so Yesu nu yí vanyi Kristotɔwo. Kankandoji li mɔ, agbeɛ nyɔ nɔ wo le jugan lɔ mɛ. Eyi le avomɛ kpoŋ vɔɔ, wowo gbe trɔ, hwenu Efyɔ Klodu ɖe gbe mɔ Ʒuifu ciwo pleŋ yí le Rɔma le so. Kpɔ lé awa nɔ Prisi koɖo Akilasi do ɖa. Woɖo aso le fini wojeshi ɖɛ nywiɖe keŋ aji xɔ le fibu yí agbetɔ avɔnzavadɔ lɔ wawa le nɔ. Trɔtrɔ cɛ ci yí va wowo gbe mɛ awɛ mɔ woasɔ Fyɔɖuxu lɔ ɖo godua? Kankandojitɔɔ, mínya ɖoŋci nɔ nyɔbiɔse cɛ. Ci Prisi koɖo Akilasi je wowo xwe yoyu mɛ le Korɛntiɔ, wowa dɔ alɔlealɔmɛ koɖo hamɛ ci yí le nɔ, wogbewa dɔ koɖo apotru Pɔlu keŋ do ŋsɛn nɔvi lɔwo. Le yiyi mɛɔ, wohun yi eju buwo mɛ, finiwo yí eŋɛnywidratɔ sugbɔ ʒan le. (Edɔ. 18:18-21; Rɔm. 16:3-5) Yehowa dɔwo sɔsɔ ɖo ŋkɔ ahan ana woakpɔ jijɔ haan!

12. Nyi yí taɖo mɛ ciwo yí jikɔ alé alɔ ɖo aɖo gbɔngbɔn mɛ tajinuwoɔ?

¹² Asu koɖo ashi ciwo li gbɛ atɛnŋ aɖyi Prisi koɖo Akilasi, nɔ wosɔnɔ Fyɔɖuxu nuwo ɖo texwe ŋkɔtɔ. Doŋkɔ nɔ alɔlele yí nyi hwenu nywitɔ ci asu koɖo ashi ɖe axo nuxu so tajinu ciwo woaɖo le agbe mɛ nu. Nɔ asu koɖo ashi ɖe sɔkɔ gbetawo doju yí jenɔ agbla keŋ ɖonɔ gbɔngbɔn mɛ tajinuwo gbɔɔ, emɔ sugbɔ ahun nɔ wo yí woakpɔ mɔ Yehowa kpekpeɛdo yewo nu. (Ŋun. 4:9, 12) Kpɔ enu ci yí jɔ do Russell koɖo Elizabeth ji ɖa. Russell nu mɔ: “Gbɔxwe mìaɖe nɔnɔɔ, enuvevitɔ ci nu mìxo nuxu so yí nyi gbɔngbɔn mɛ tajinuwo.” Elizabeth nu mɔ: “Mìkan seŋ so nyɔ cɛwo nu doŋkɔ nɔ gbeta vovovo ciwo mìavasɔ le ŋkɔ mɛ nɔ woŋgbevaxe mɔ nɔ mìwo gbɔngbɔn mɛ tajinuwo o.” Nɔnɔmɛ lɔ ɖe mɔ nɔ Russell koɖo Elizabeth yí wohun yi Micronesie, fini yí eŋɛnywidratɔ sugbɔ ʒan le taŋ.

13. Nɔ mìkando Yehowa ji shigbe lé Ehajiji Wema 28:7 nui nɛ ɖe, nyi yí ato so mɛ nɔ mìɔ?

 ¹³ Shigbe Russell koɖo Elizabeth nɛɔ, asu koɖo ashi sugbɔ sɔ gbeta mɔ yewoanɔ agbe kleŋ, keŋ akpɔ tɛn awa eŋɛnywidradradɔ koɖo nukplaviwowawadɔ lɔ lé woakpe ji do. Nɔ asu koɖo ashiwo ɖo gbɔngbɔn mɛ tajinuwo yí wa dɔ sɛnsinɖe doju keŋ wa do wo jiɔ, enunywi sugbɔ ato so mɛ. Woakpɔ lé Yehowa le bu nɔ wo do yí ecɛ ana kankandoji ci woɖo do nu asɛnŋ doji. Gbesɔ ta niɔ, woakpɔ jijɔ ŋtɔŋtɔ.—Hlɛn Ehajiji Wema 28:7.

14. Lé apotru Piɛ koɖo ashiɛ dasɛ mɔ yewokando gbeɖu ci yí le Matie 6:25, 31-34 mɛ ji doɔ?

¹⁴ Asu koɖo ashiwo atɛnŋ agbekpla nu so kpɔwɛ ci apotru Piɛ koɖo ashiɛ ɖo mɛ. Le wleci amadɛn yi xwe ɖeka han godu nɔ ŋkɔtɔ ci apotru Piɛ kpɔ Yesuɔ, éɖo asɔ gbeta vevi ɖeka. Eɖɔdatɔ yí Piɛ nyi; eyi ewanɔ yí sɔ kpɔnɔ yi xomu ji. Eyi taɖo ci Yesu yɔ Piɛ mɔ yɛakplɔnɔ ye do gashiagamɛɔ, éɖo abu tamɛ kpɔ so yi xomu nu. (Luiki 5:1-11) Piɛ sɔ gbeta mɔ yeakplɔ Yesu do le kunuɖeɖedɔ lɔ mɛ. Gbeta nywi yí esɔ! Mìatɛnŋ anu koɖo kankandoji mɔ Piɛ ashiɛ lɔn do gbeta cɛ ji. Bibla nu nɔ mì mɔ le fɔnfɔnsoku Yesu tɔ goduɔ, Piɛ ashiɛ zɔn mɔ koɖi na nɔ hwenu kleŋ ɖe. (1 Kor. 9:5) Kankandojitɔɔ, kpɔwɛ nywi ci eɖo shigbe Kristotɔ nyɔnu nɛ yí dɔ Piɛ tɛnŋ voŋ le yiɖeki mɛ yí ŋwlɛ nukplamunyɔ ciwo yí so gbɔngbɔn mɛ nɔ Kristotɔ asu koɖo ashiwo. (1 Piɛ 3:1-7) Eze gbawlɛɛ mɔ, Piɛ koɖo ashiɛ kando egbe ci Yehowa ɖo ji mɔ Yeana wo enu ci yí wudo wo, nɔ wosɔ Fyɔɖuxu lɔ nuwo ɖo texwe ŋkɔtɔ le wowo gbe mɛ.—Hlɛn Matie 6:25, 31-34.

15. Nyi èkpla so enu ci mɛ Tiago koɖo Esther to mɛɔ?

¹⁵ Nɔ xwe ɖewo ke yí míɖe nɔnɔ ɖe, lé míawɛ yí akpɔtɔ aɖo dro mɔ yewoawa sugbɔ nɔ Yehowaɔ? Enu ɖeka ci míawa yí nyi míakpla nu so asu koɖo ashi buwo gbɔ. Le kpɔwɛ mɛ, míatɛnŋ ahlɛn nyɔta ciwo yí nyi “Agbe mɛ xolɔlɔwo.” Nyɔta cɛwo kpedo Tiago koɖo Esther ciwo yí nyi asu koɖo ashi le Brésil nu, yí woji mɔ yewoayi sumɔ le fini yí eʒan sugbɔ le wu. Tiago nu mɔ: “Ci mìhlɛn nu so lé Yehowa kpedo yi sɛntɔwo nu do le egbɛ mɛɔ, mìwo can mìji mɔ Yehowa le dasɛ mɔ nɔ mì yí ale bu nɔ mì.” So xwe 2014 mɛɔ, wovayi ci Paraguay fini yí woɖekɔ kunu nɔ Portugais-gbe dotɔwo le. Esther mɔ: “Efezitɔwo 3:20 yí nyi kpukpui ci yí jɔnɔ ji nɔ mì amɛve lɔwo. Mìkpɔ mɔ nyɔ cɛwo va mɛ nɔ mì zenɛniɖe.” Le wema cɛ ci yí Pɔlu ŋwlɛ ɖaɖa Efezitɔwo mɛɔ, Pɔlu nu mɔ Yehowa ana mì nu wu ci mìbiɔɛ. Nyɔnɔnwi teŋ nyɔ cɛ nyi, eva mɛ nɔ amowo zenɛniɖe!

16. Miwo gbɔ yí asu koɖo ashi yoyuwo atɛnŋ aji nukplamu le nɔ wobukɔ tamɛ kpɔ so tajinuwo nuɔ?

¹⁶ Mɛ ciwo yí ɖe nɔnɔ yoyu le egbɛ mɛ atɛnŋ akpla nu so mɛ ciwo yí ɖoŋ do Yehowa nu gbɔ. Asu koɖo ashi ɖewo wa gashiagamɛ sumɔsumɔdɔ lɔ na nɔ xwe sugbɔ. Míbiɔ wo nukplamu hwenu míabukɔ tamɛ kpɔ so tajinuwo nu. Ecɛ wawa can adasɛ mɔ míkando Yehowa ji. (Elo. 22:17, 19) Hamɛmɛshinshinwo can atɛnŋ akpedo mɛ ciwo yí ɖe nɔnɔ yoyu nu keŋ nɔ woaɖo gbɔngbɔn mɛ tajinuwo yí awa do wo ji.

17. Nyi yí jɔ do Klaus koɖo Marisa jiɔ, yí nyi mìkpla le mɛɔ?

 ¹⁷ Hweɖewonuɔ, mìjinɔ mɔ mìawa ŋɖewo le Yehowa sɛnsɛn mɛ; vɔ enuwo devayinɔ nɔ mì shigbe lé mìji do nɛ o. Eyi jɔ do Klaus koɖo Marisa ci nu mìxo nuxu so le tɔtɔmɛ ji. Ci woɖe nɔnɔ xwe amɛtɔn goduɔ, woso le wowo xwe yí sɔ wowoɖekiwo jo mɔ yewoawa dɔ le exɔcucudɔ mɛ le Finlande lɔjedɔwaxu. Vɔ wovase mɔ yewodaɖeŋ awa wu wleci amadɛn le nɔ o. Zeɖeka kakaɔ, wogbɔjɔ. Vɔ dejinjin o, woyɔ wo mɔ wo le va kpla Arabegbe. Yí ecɛ ɖɛyɛɔ, woɖekɔ kunu koɖo jijɔ le eju bu mɛ le shini yí wodonɔ Arabegbe le. Ci Marisa ɖo ŋwi enu ciwo mɛ wotoɔ, énu mɔ: “Soso le fini wovoŋ le avayi ci fibu ɖyi vɔnvɔn, ele mɔ woakando Yehowa ji keŋkeŋ. Vɔ ŋkpɔ mɔ Yehowa kpenɔdo mì nu gashiagamɛ le emɔ maɖoŋdonuwo ji. Ecɛ na lé ŋkando Yehowa ji gbevasɛnŋ doji.” Shigbe lé kpɔwɛ cɛ dasɛ nɛɔ, àtɛnŋ akando ji mɔ Yehowa acu fɛn nɔ ye dandandan nɔ èɖoŋ do nu keŋkeŋ.

18. Nyi asu koɖo ashiwo awa keŋ akpɔtɔ akankando Yehowa jiɔ?

¹⁸ Alɔlele nyi nunana so Yehowa gbɔ. (Mt. 19:5, 6) Éji mɔ asu koɖo ashiwo le se vivi nɔ enunana cɛ. (Elo. 5:18) Asu koɖo ashi yoyuwo, míbu tamɛ kpɔ so enu ci míawa le míwo gbe mɛ nu. Míwakɔ ci ji míkpe yí sɔ dadasɛ nɔ Yehowa mɔ enu cɛ ci yɛna yewo jeŋ nɔ yewoa? Míxo nuxu nɔ Yehowa le gbedoɖa mɛ. Míji Bibla gɔnmɛɖose ciwo míatɛnŋ azan le míwo nɔnɔmɛ lɔ mɛ. Míwa do nukplamu ci Yehowa na mí ji. Nɔ Yehowa sɛnsɛn yí nyi enuvevitɔ nɔ mí le míwo lɔlele lɔ mɛɔ, míatɛnŋ akando ji mɔ eji ajɔ mí yí enuwo amlɛ nɔ mí le agbeɛ mɛ!