1. Enyɔ ci mìatɛnŋ abiɔ mìwoɖekiwo seɔ?

HWEÐEWONU nɔ èbukɔ tamɛ kpɔ so enu ciwo ajɔ le majinjinɖe mɛ shigbe ŋsusɛnsɛnwo gugu, Gogi ci yí so Magogi mɛjijeje koɖo Harmagedɔn hwa lɔ nu ɖe, èvɔnnɔa? Èbiɔ nyɔ cɛwo eoɖeki se kpɔa: ‘Nɔ enujɔjɔ dovɔnvɔn cɛwo vatɔ jɔjɔ ɖe, natɛnŋ akpɔtɔ anɔ gbejia?’ Nɔ nyɔ cɛwo vakɔ susu mɛ nɔ eoɔ, Yesu nyɔ ci enu ci ji wocu nukplakpla nyɔta cɛ do, mɛ gbejegbeje akpedo eo nu. Yesu nu nɔ yi nukplaviwo mɔ: “Míwo jimɛ ŋgbe xa o. Mí a kan do Mawu ji.” (Ʒan 14:1) Nɔ mìɖo xɔse sɛnŋ ɔ, ana mìado ji le esɔ mɛ nɔ ŋɖeŋɖe gbejɔkɔ can.

2. Lé mìawɛ nɔ mìwo xɔse asɛnŋ ɔ, yí nyi mìakpɔ le nyɔta cɛ mɛɔ?

² Nɔ mìbu tamɛ kpɔ so lé mìdokɔ ji le tekpɔkpɔwo mɛ gbɛɔ, ana mìanya enu ci mìawa nɔ mìwo xɔse asɛnŋ. Nɔ mìwɛ ahan ɔ, mìakpɔ enu ciwo mɛ eʒan mɔ mìado ŋsɛn mìwo xɔse le. Nɔ mìdo ji le tetekpɔ ɖe mɛɔ, mìwo xɔse agbesɛnŋ kpi. Ecɛ akpedo mì nu mìado ji le tetekpɔ ciwo yí avava mɛ. Le nyɔta cɛ mɛɔ, mìagbeje enu amɛnɛ ciwo mɛ Yesu nukplaviwo to ciwo yí na wovakpɔɛ mɔ yewoʒan xɔse doji. Le yi goduɔ, mìakpɔ lé mìawɛ ado ji le cukaɖa ŋtɔ́ hanwo mɛ le egbɛ mɛ yí akpɔ lé ecɛ wawa atɛnŋ adra mì do ɖɛ nɔ nu ciwo yí avajɔ le sɔ mɛ.

3. Sɔgbe koɖo Matie 6:30, 33 ɖe, enyɔ vevi ci yí kudo xɔse nu yí Yesu na yi mɛ kɔ gbajɛɛɔ?

³ Enyɔ mɔ xomutatɔ ɖe aji mɔ yeana ŋɖuɖu, enudodo koɖo dɔnxu ye shiye koɖo ye viwo. De gashigamɛ yí ecɛ wawa anɔ fafɛɖe le hwenu sɛnŋ cɛwo mɛ o. Ejɔ yí edɔ dahɛn do mìwo kpena xɔsetɔ ɖewo yí ci wole  agbla jekɔ veviɖe can ɔ, alɔ dexotɔ ebu ɖe nɔ wo o. Eɖewo gbe edɔ ɖewo wawa, ɖo wodenyɔ nɔ Kristotɔwo o. Nɔ enu cɛ hanciwo jɔ do mì jiɔ, mìʒan xɔse sɛnŋ gbɔxwe yí akando ji mɔ Yehowa akpedo mì nu mìakpɔ mìwo xomumɛtɔwo ʒanwo gbɔ. Yesu na yi nukplaviwo mɔŋje enyɔ cɛ mɛ gbawlɛɛ le Mawu nyɔ ci enu le to ji mɛ. (Hlɛn Matie 6:30, 33.) Nɔ mìkando ji keŋkeŋ mɔ Yehowa dagbe mì ɖɛɔ, ana mìakpɔtɔ asɔ susu ɖo Yehowa sɛnsɛn ji. Nɔ mìkpɔ lé Yehowa kpɔkɔ mìwo ŋcilanmɛʒanwo gbɔ doɔ, mìate gogui doji yí mìwo xɔse asɛnŋ.

4-5. Nyi yí kpedo xomu ɖeka nu yí womi enu lolo kpɔ so lé woakpɔ wowo ʒanwo gbɔ nuɔ?

⁴ Kpɔ lé Yehowa kpedo xomu ɖeka nu le Venezuela hwenu wole tamɛ bukɔ kpɔ so lé woawɛ akpɔ wowo nuʒanʒanwo gbɔ. Sasaɔ, nyigban ɖeka le Castro xomu lɔ shi yí wodenɔ yí sɔ kpɔnɔ wowo ʒanwo gbɔ. Vɔ, flafinɔ ɖekawo hɛn cu yí va xɔ nyigban lɔ le wo shi koɖo akpasɛnsin. Miguel ci yí nyi xomu lɔ tatɔ nu mɔ: “Nyigban nyɛkuin ci mìhaya yí mìvadekɔ yɛ keŋ sɔ kpɔnɔ mìwo ʒanwo gbɔ. Ŋbiɔnɔ Yehowa gbeshiagbe mɔ yɛ le na enu ci yí ʒan mì le ŋkeke ɖeka ji duu.” Agbe lɔ gbɔnnu nɔ xomu cɛ sugbɔ. Vɔ ci Castro xomu lɔ kando mìwo Da amɛlɔntɔ lɔ ji keŋkeŋ mɔ yeakpɔ gbeshiagbe ʒanwo gbɔ nɔ yewoɔ, wodegɔnnɔ bɔbɔwo koɖo kunuɖegbe gbeɖe o. Wosɔ Mawu Fyɔɖuxu lɔ ɖo texwe ŋkɔtɔ le wowo gbe mɛ, yí Yehowa kpɔ wowo ʒanwo gbɔ nɔ wo.

⁵ Le cukaɖa ŋtɔ́wo pleŋ mɛɔ, Miguel koɖo ashiɛ Yurai, sɔ wowo susu keŋkeŋ ɖo lé Yehowa lekɔ bu nɔ wo do ji. Yehowa zan wowo kpena xɔsetɔwo yí wona ŋɖewo wo, égbekpedo Miguel nu yí ekpɔ edɔ kleŋ ɖe yí wanɔ. Evaje hweɖekanuɔ, Yehowa zan alɔjedɔwaxu lɔ yí ena wo ŋɖewo ciwo woʒan. Yehowa degbe wo ɖɛ gbeɖe o. Ecɛ wɛ yí wowo xɔse vasɛnŋ doji. Ci wowo vi nyɔnuvi xoxutɔ Yoselin xo nuxu so emɔ ŋtɔŋtɔ ɖe ci ji Yehowa kpedo wo nu le ɖegbɔɔ, énu mɔ: “Ci mìkpɔ lé Yehowa kpedo mì nuɔ, edo ŋsɛn mì sugbɔ. Yehowa nyi anyi xlɔ, yí ŋkando ji mɔ yɛakpekpeɛdo ŋnu tɛgbɛɛ.” Énu kpi mɔ: “Cukaɖa ciwo mɛ mìwo xomu lɔ to dra mì do ɖɛ nɔ cukaɖa sɛnŋ ciwo yí gbɔgbɔ.”

6. Lé mìatɛnŋ ado ŋsɛn mìwo xɔse nɔ ehonyɔwo ɖekɔ fun nɔ mìɔ?

⁶ Ehonyɔwo ɖeɖeɛ fun nɔ eoa? Nɔ ahan yɔ nɛɔ, anyi defakɔ do eo ɖeeɖe o. Vɔ, nɔ ao cukaɖa lɔ gbele do ɖe can ɔ, àtɛnŋ azan hwenu ŋtɔ́ asɔ do ŋsɛn ao xɔse. Do gbe ɖaɖa yí ahlɛn Yesu nyɔ ciwo le Matie 6:25-34 mɛ keŋ abu tamɛ kpɔ so wo nu. Gbebu tamɛ so lé Yehowa lekɔ bu nɔ mɛ ciwo yí sɔ teokrasidɔwo ɖo texwe ŋkɔtɔ le egbɛ mɛ do. (1 Kor. 15:58) Ecɛ wawa ado ŋsɛn mì mìakando ji mɔ,  shigbe lé mìwo Da ci yí le jeŋkwi mɛ kpedo mɛbuwo nu le nɔnɔmɛ cɛ hanwo mɛ nɛɔ, ákpedo mìwo can nu hɛnnɛ. Énya enu ci yí wudo eo, yí gbenya lé akpɔ gbɔ nɔ eo do. Nɔ èkpɔ lé Yehowa kpedo eo nu le agbe mɛ doɔ, ao xɔse asɛnŋ yí ecɛ ana nado ji le cukaɖa sɛnŋ ciwo avava le ŋkɔ mɛ.—Xab. 3:17, 18.

7. Lé “aya sɛnŋ sɛnŋ” ɖeka do nukplavi lɔwo xɔse kpɔ shigbe lé Matie 8:23-26 nui nɛɔ?

⁷ Hwenu Yesu koɖo yi nukplaviwo le tɔjihun mɛ yí aya sɛnŋ ɖeka tɔ xoxoɔ, Yesu zan enujɔjɔ cɛ yí sɔ kpedo wo nu yí womɔŋje mɛ mɔ yewoɖo ado ŋsɛn yewo xɔse. (Hlɛn Matie 8:23-26.) Hwenu aya sɛnŋsɛnŋ lɔ xokɔ yí shi tɔ tɔjihun lɔ mɛ ɖoɖoɔ, Yesu yɛ voŋ ɖɛ fɛɛ yí le alɔn dɔnkɔ. Ci yi nukplaviwo vɔn yí fuin yí nu ni mɔ yɛ le kpedo yewo nuɔ, ébiɔ wo se koɖo xomɛfafa mɔ: “Nyi yí taɖo yí mí vɔnvɔn ahan ɔ, míwo ciwo yí nyi xɔse hwɛhwɛ ɖotɔnɔwo ɔ?” Nukplavi vɔnvɔntɔnɔ lɔwo ɖo anya mɔ Yehowa asun ji aglɔn ta nɔ yewo koɖo Yesu yí ŋɖe dawa yewo o. Èkpɔ lé mìatɛnŋ awa do nukplamu cɛ ji doa? Xɔse sɛnŋ atɛnŋ akpedo mì nu mìado ji le cukaɖa ɖekpokpui ci yí ale shigbe “aya sɛnŋ sɛnŋ” nɛ mɛ.

8-9. Nyi yí do Anel xɔse kpɔɔ, yí nyi yí kpedo nuɔ?

⁸ Mìakpɔ nɔvinyɔnu Anel ci yí nyi trɛnnɔ kpɔwɛ, éle Porto Rico. Éto dodokpɔ sɛnŋ ɖeka mɛ ci yí na yi xɔse vasɛnŋ doji. “Aya sɛnŋ sɛnŋ” yi tɔ yí nyi jihɔnshi gangan ɖeka ci woyɔnɔ mɔ Maria ci yí gban axwe ni le xwe 2017 mɛ. Sɔ ta niɔ, jihɔnshi lɔ na yí edɔ dahɛn ni. Anel nu mɔ: “Le hwenu sɛnŋsɛnŋ ŋtɔ́wo mɛɔ, ŋlonɔ nu kpɔ. Vɔ ci ŋkando Yehowa ji yí donɔ gbe ɖaɖa niɔ, enulolokpɔ lɔ dena ŋgbɔjɔ o.”

⁹ Anel nu enubu ci yí gbekpedo nu edo ji le cukaɖa lɔ mɛ, eyi nyi tonusese. Énu mɔ: “Ci ŋwa do habɔbɔ lɔ mɔdasɛnamɛwo jiɔ, ékpedo ŋnu yí ŋkpɔtɔ le kpuu. Yehowa to nɔviŋsu koɖo nɔvinyɔnuwo ji yí kpedo ŋnu. Wodo ŋsɛnŋ yí naŋ enu ciwo wudoŋ.” Énu kpi mɔ: “Yehowa na enu sugbɔŋ sɔwu ciwo yí ŋbiɔɛ, yí anyi xɔse vasɛnŋ doji haan.”

10. Nyi àtɛnŋ awa nɔ èdo go “aya sɛnŋ sɛnŋ” ɖeɔ?

¹⁰ Eɔ ɖe nyi yí nyi “aya sɛnŋ sɛnŋ” aotɔɔ? Etɛnŋ nyi jɔjɔmɛfɔku ɖe yí na èkpekɔ fun, alo taŋfuin dɔ̀lele sɛnŋ ɖe ci yí na ègbɔjɔ sugbɔ yí nyi aotɔ. Ètɛnŋ lonɔ nu kpɔ hweɖewonu, vɔ ŋgbena nɔ ecɛ ana nami kankando Yehowa ji o. Te gogo Yehowa yí ado gbe ɖaɖa ni so ji mɛ. Bunɔ tamɛ kpɔ so lé Yehowa kpedo eo nu vayi nu, keŋ asɔ do ŋsɛn ao xɔse. (Eha. 77:11, 12) Àtɛnŋ akando ji mɔ Yehowa dagbe eo ɖɛ egbɛ alo le esɔ mɛ gbeɖe o.

11. Nyi yí taɖo mìɖo aɖui gligaan mɔ mìaɖonɔ to mɛ ciwo woɖo agbanleamɛjitɔxuwoɔ?

 ¹¹ Nubu ci yí atɛnŋ akpedo eo nu nado ji le cukaɖawo mɛɔ? Tonusese yɔ shigbe lé Anel nui nɛ. Tekpɔ akannɔdo mɛ ciwo ji Yehowa koɖo Yesu kando. Hweɖewonuɔ, mɛ ciwo yí woɖo agbanleamɛjitɔxuwo tɛnŋ na mɔdasɛnamɛ ɖe ci yí dajɔ ji nɔ eo o. Vɔ nɔ mìse tonuɔ, Yehowa acu shi nɔ mì. Mìkpla le Mawu Nyɔ lɔ koɖo enu ciwo yí jɔ do Mawu sɛntɔ egbejinɔtɔwo ji mɛ mɔ, tonusese hwlɛnnɔ amɛ gan. (Hun. 14:1-4; 2 Kro. 20:17) Bunɔ tamɛ kpɔ so kpɔwɛ ŋtɔ́wo nu. Nɔ èwɛni ahan ɔ, gbeta ci èsɔ mɔ yeawanɔ do mɔdasɛnamɛ habɔbɔ lɔ tɔwo ji asɛnŋ doji. (Ebre. 13:17) Enu ciwo mìkpɔ yɛ na mìnya mɔ susu ɖe deli ci yí taɖo mìavɔn nɔ efunkpekpe gangan ci yí ava le majinjinɖe mɛ o.—Elo. 3:25.

12. Shigbe lé Luiki 18:1-8 nui nɛ ɖe, ekacaca ci yí le xɔse ɖoɖo koɖo ejidodo le enumajɔmajɔ mɛɔ?

¹² Yesu nya mɔ enumajɔmajɔ wawa atɛnŋ ado ye nukplaviwo xɔse kpɔ. Édo labalu ɖeka yí woŋwli do Luiki wema mɛ keŋ asɔ kpedo wo nu woado ji, nɔ wowakɔ enumajɔmajɔ koɖo wo. Yesu xo nuxu so kposhu ɖeka ci yí ɖeɖeɛ kuku nɔ kojoɖotɔ majɔmajɔtɔ ɖeka mɔ yi le so kojo jɔjɔɛ nɔ ye. Kposhu lɔ kando ji mɔ nɔ yekpɔtɔ dokɔ aya ni gbɛmɛgbɛmɛɔ, yɛalɔn akpedo ye nu. Nyɔnɔnwi nyaoɔ, kojoɖotɔ lɔ valɔn kpedo nu. Nyi mìkpla so mɛɔ? Yehowa denyi majɔmajɔtɔ o. Eyi taɖo Yesu nu mɔ: ‘Mawu dana woaɖo kojo jɔjɔɛ nɔ yi mɛ cancan ciwo yí le axwa dokɔ ɖɛɖɛ kede koɖo zan mɛ ba?’ (Hlɛn Luiki 18:1-8.) Le yi goduɔ, Yesu nu kpi mɔ: “Gayimɛ Amɛagbetɔ Vi lɔ a va ɔ, á gbe kpɔ xɔse [ŋtɔ́ han] le nyigban lɔ ji a?” Nɔ wowakɔ enumajɔmajɔ do mì nuɔ, mìɖo ado ʒinxo yí mìdana ta o. Nɔ mìwɛ ahan ɔ, mìadasɛ mɔ mìɖo xɔse sɛnŋ shigbe kposhu lɔ nɛ. Nɔ mìɖo xɔse ŋtɔ́ han ɔ, mìatɛnŋ akando ji mɔ nɔ ejinjin oo, nɔ eya oo, Yehowa akpedo mì nu. Mìɖo agbenya mɔ nɔ mìdonɔ gbe ɖaɖaɔ, ado ŋsɛn mì sugbɔ. Hweɖowonuɔ, Mawu tɛnŋ ɖo mìwo gbedodoɖawo ŋci le emɔ ci nu mìdebu kpɔ gbeɖe o.

13. Lé gbedodoɖa kpedo xomu ɖeka ci nu wowa numajɔmajɔ doɔ?

¹³ Kpɔ enu yí jɔ do nɔvinyɔnu Vero, ci yí so République Démocratique du Congo ji ɖa. Asuɔ desɛnnɔ Yehowa o; Vero koɖo asuɔ sɔ kpe nɔ wowo vi nyɔnuvi ci yí ɖo xwe 15 ɖo ashi hwenu sɔjawo gbɛbɔbɔ ɖeka va je wowo kɔxwi ji. Ci wole emɔ ji yikɔɔ, wovaje sɔjawo mɛ, woso mɔ nɔ wo yí do vɔnvɔn nɔ wo mɔ yewoawu wo. Ci Vero tɔ avin fanfan ɔ, eviɛ nyɔnuvi lɔ tɔ blibli keŋ dokɔ gbe ɖaɖa koɖo axwa yí yɔkɔ Yehowa ŋkɔ gbɛmɛgbɛmɛ. Hwenu eɖe gbɔɔ, sɔja lɔwo ga biɔɛ se mɔ:  “Cugbejɛvi, mi yí kpla eo gbedodoɖaɔ?” Éɖo ŋci mɔ, “Enɔnyɛ yɔ, ézannɔ kpɔwɛ gbedodoɖa ci yí le Matie 6:9-13 mɛ yí kplaŋ gbedodoɖa.” Sɔjawo ga lɔ nu mɔ, “Cugbejɛvi, eɔ koɖo ao jilawo míyi le fafa mɛ, Yehowa míwo Mawu le glɔn ta nɔ mí!”

14. Nyi atɛnŋ ado mìwo xɔse kpɔɔ, yí nyi yí akpedo mì nu mìado jiɔ?

¹⁴ Enujɔjɔ cɛwo kpla mì mɔ mìdeɖo aŋlɔbe gbeɖe mɔ gbedodoɖa le veviɖe o. Vɔ nɔ wodeɖo ao gbedoɖawo ŋci le afɔdumɛ ɖe, nyi yí akpedo eo nu nakpɔtɔ ado jiɔ? Shigbe kposhu ci yí le Yesu labalu lɔ mɛ nɛɔ, kpɔtɔ adokɔ gbe ɖaɖa yí akando ji mɔ mìwo Mawu dagbe ye ɖɛ gbeɖe o. Áɖo ao gbedodoɖa ŋci le gamɛ koɖo emɔ nywitɔ ji dandandan. Kpɔtɔ aɖenɔ kuku nɔ Yehowa nɔ ana eo yi gbɔngbɔn kɔkɔɛ. (Fili. 4:13) Ðo ŋwi mɔ dajinjin o, Yehowa acu shi nɔ eo sugbɔ keke àŋlɔbe efun ɖekpokpui ci èkpe vayi. Ci Yehowa kpekɔdo eo nu yí èdokɔ ji le cukaɖawo mɛ yɛɔ, ao xɔse asɛnŋ doji yí àsun ji avado ji le tetekpɔ ciwo avava le sɔ mɛ mɛ.—1 Piɛ 1:6, 7.

15. Sɔ koɖo Matie 17:19, 20 ɖe, cukaɖa ci Yesu nukplaviwo do goɔ?

¹⁵ Yesu nu nɔ yi nukplaviwo mɔ xɔse akpedo wo nu woaɖu cukaɖawo ji. (Hlɛn Matie 17:19, 20.) Hweɖekanuɔ, wodetɛnŋ nya gbɔngbɔn vɔn ɖeka ti le mɛɖeka mɛ o, wotrɔgbɔ wɛni sa. Nyi yí taɖo ecɛ yɛ glo woɔ? Yesu ɖe mɛ mɔ woʒan xɔse doji. Énu nɔ wo mɔ nɔ woɖo xɔse sɛnŋ ɔ, woasun ji aɖu cukaɖa ciwo yí le shigbe eto ganganwo nɛ ji! Egbɛɔ, mìwo can mìtɛnŋ do go cukaɖawo yí awa nɔ mì shigbe wowugan mì nɛ.

16. Lé xɔse kpedo Geydi nu yí edo ji le enu ci yí jɔ do ji mɛɔ?

¹⁶ Kpɔ nɔvinyɔnu Geydi, ci yí so Guatemala kpɔwɛ ɖa. Ci wokpa le hamɛ bɔbɔ ɖeka yí je ŋkɔ nɔ axweɔ, wowu asuɔ Edi le mɔ ji. Lé xɔse Geydi tɔ kpedo nu edo ji le vevisese gangan ŋtɔ́ mɛɔ? Énu mɔ: “Gbedodoɖa kpedo ŋnu ŋsɔ anyi gbanwo da do Yehowa ji. Ena yí ŋkpɔ fafa le nyɛɖeki mɛ. Ŋkpɔ mɔ Yehowa to anyi xomu koɖo anyi xlɔwo ji le hamɛ lɔ mɛ keŋ le bu nɔŋ. Ci ŋwakɔ sugbɔ le Yehowa sumɔsumɔdɔ lɔ mɛɔ, ena anyi vevisese lɔ ɖe kpɔtɔ, ekpedo ŋnu ŋdegbelonɔ nu kpɔ sugbɔ so esɔ nu o. Ci ŋto nɔnɔmɛ cɛ mɛɔ, ŋkplɛ mɔ nɔ tetekpɔ ci ava ŋji le esɔ mɛ gbele do ɖe can ɔ, nasun ji ado ji le mɛ to Yehowa, Yesu koɖo habɔbɔ lɔ kpekpedonu mɛ.”

17. Nyi mìatɛnŋ awa nɔ mìle cukaɖa ɖe ci yí le shigbe eto nɛ mɛɔ?

¹⁷ Ao mɛ vevi ɖe ku nɔ eo yí èle vevi sekɔa? Ji gamɛ ahlɛnnɔ Bibla mɛ xolɔlɔ ciwo yí xo nuxu so mɛ ciwo wofɔn so ku nu. Ecɛ ado ŋsɛn ao xɔse do fɔnfɔnsoku  mɔkpɔkpɔ lɔ nu. Woɖe ao mɛ vevi ɖe ti yí ena èle vevi sekɔa? Kpla nu keŋ akando ji mɔ etodɔnnamɛ Yehowa tɔ nyɔnɔ gashiagamɛ. Nɔ cukaɖa ci mɛ ètokɔ gbele do ɖe can ɔ, kpɔɛ mɔ emɔ enyi yí hun nɔ ye nɔ yeado ŋsɛn ye xɔse. Nu ao jimɛnyɔwo pleŋ nɔ Yehowa. Ŋgbenɔ azɔge nɔ amowo o; ewaɖeɔ, kpɔtɔ atenɔ gogo nɔviŋsu koɖo nɔvinyɔnuwo. (Elo. 18:1) Wa edɔ ciwo yí akpedo eo nu nado ji, nɔ àwɛni koɖo ɖashi can. (Eha. 126:5, 6) Kpɔtɔ ayinɔ bɔbɔwo koɖo kunuɖegbe yí akpɔtɔ ahlɛnnɔ Bibla. Gbesɔ ta niɔ, kpɔtɔ asɔ susu ɖo shicu nywi ciwo Yehowa jikɔ ana eo le esɔ mɛ ji. Eyi nɔ èkpɔ lé Yehowa kpekɔdo eo nu doɔ, xɔse ci èɖo do nu asɛnkɔŋ doji.

18. Nɔ èkpɔɛ mɔ ye xɔse gble ɖe, nyi àtɛnŋ awaɔ?

¹⁸ Nɔ tetekpɔ ciwo mɛ èto vayi alo ciwo mɛ ètokɔ yɛ na yí ao xɔse gbleɔ, ŋgbegbɔjɔ o. Kpɔɛ mɔ yɛ nyi emɔ ɖeka ci yí hun nɔ yeado ŋsɛn ye xɔse. Do gbe ɖaɖa yí abiɔ enu ci han apotruwo biɔ, wonu mɔ: “Do xɔse xɔse ji nɔ mì.” (Luiki 17:5) Gbesɔ kpe niɔ, bu tamɛ kpɔ so kpɔwɛ ciwo nu mìxo nuxu so le nyɔta cɛ mɛ nu. Shigbe Miguel koɖo Yurai nɛɔ, ɖo ŋwi hwenu ciwo pleŋ mɛ Yehowa kpedo eo nu le. Shigbe Vero vi nyɔnuvi koɖo Anel nɛɔ, do gbe ɖaɖa veviɖe nɔ Yehowa, vevitɔ nɔ èle nɔnɔmɛ sɛnŋsɛnŋ ɖe mɛ. Shigbe Geydi nɛɔ, nya mɔ Yehowa tɛnŋ toto ao xomu alo ao xlɔwo ji yí ana kpekpedonu ci yí ʒan ye. Nɔ èlɔn yí Yehowa kpedo eo nu yí edo ji le cukaɖa ciwo mɛ ètokɔ le kakacɛ mɛɔ, ana àkando ji keŋkeŋ mɔ yɛakpedo ye nu yeado ji le cukaɖa ɖekpokpui ci yí ava le esɔ mɛ mɛ.

19. Kankandoji ci Yesu ɖoɔ, yí nyi ji àtɛnŋ akandoɔ?

¹⁹ Yesu kpedo yi nukplaviwo nu wokpɔɛ mɔ yewoɖo ana yewo xɔse asɛnŋ kpi. Vɔ ékando ji keŋkeŋ mɔ Yehowa akpedo wo nu yí woanɔ gbeji ado ji le tetekpɔ ciwo avava wo ji mɛ. (Ʒan 14:1; 16:33) Ékando ji mɔ xɔse sɛnŋ yí adɔ agbetɔ sugbɔsugbɔ lɔwo aci agbe le efunkpekpe gangan ci yí gbɔgbɔ mɛ. (Enyɔ. 7:9, 14) Ànɔ wo mɛa? Nɔ èzannɔ emɔ ɖekpokpui ci yí hun nɔ eo keŋ yí donɔ ŋsɛn ao xɔseɔ, Yehowa akpedo eo nu nanɔ wo mɛ!—Ebre. 10:39.