Hulda Wa Enu Ci Edro Mɔ Yeawa
NƆ ÈÐYI sa yi tɔmɛnyigban hwɛhwɛ Sangir Besar le Indonésie xwe ɖewo ke vayiɔ, àkpɔ nɔvinyɔnu amɛtɔn ɖekawo le axutu. Ci woɖenɔ kunu yí kpenɔdo amɛwo nu nɔ woamɔŋje Bibla mɛɔ, edɔ wojeshi wo ɖɛ nywiɖe le tɔdomɛnyigban lɔ ji. Vɔ wogbewanɔ nubu hɛnnɛ.
Sangir Besar tɔdomɛnyigban le tagbe nɔ Indonésie
Ŋkɔtɔɔ, woɖonɔ axu lɔ mɛ yí fɔnɔ kpewo ti le mɛ va axutu. Ekpe lɔwo ɖewo gangannɔ shigbe balɔn nɛ. Yi goduɔ, wovayi nɔnɔ nyinɔnɔ do ʒinkpinviwo ji yí asɔ ezun gban ekpe lɔwo hwlihwlihwli keke wogbehwenɔ wu kloʒin. Yi goduɔ, wolɔnɔ wo do rɔba tɔkawo mɛ yí fannɔ eskaliewo yí ahɛn wo yi wowo xwewo mɛ. Eyi wodonɔ ekpe lɔwo do godu ganganwo mɛ keŋ nɔ woatɛnŋ avado wo do ehun ganganwo mɛ. Wozannɔ wo yí sɔ donɔ emɔwo.
Hulda bɔbɔ ekpewo le axutu
Nɔvinyɔnu Hulda can le nɔvinyɔnu lɔwo mɛ. Ékpɔnɔ gamɛ yí wanɔ edɔ cɛ wu mɛkpɛtɛwo. Ézannɔ eho ci ekpɔnɔ gbeɖeka duu yí sɔ xwlenɔ enu ciwo yí ʒan wo le xomu lɔ mɛ. Vɔ ecɛyɛɔ, éwakɔ dɔ lɔ koɖo susu mɔ yeaxwle ŋɖeka hɛnnɛ, éji mɔ yeaxwle tablɛti keŋ axɔ JW Library® dɔwanu do ji. Hulda nya mɔ video koɖo nubu ciwo yí le dɔwanu lɔ mɛ akpedo ye nu yeagbeɖe kunu doji nywiɖe yí agbese Bibla mɛ nywiɖe doji.
Hulda wa edɔ gaxoxo amɛve nyidin ɖeka duu keke yí wa wleci ɖeka koɖo fan yí egban kpe keke eɖɔ ehun ɖeka. Eyi ékpɔ eho ci yí asun ni asɔ xwle tablɛti lɔ.
Hulda lé yi tablɛti do alɔmɛ
Hulda nu mɔ: “Ci ekpe lɔwo gbangban na yí enu cikɔ nɔŋ yí lanmɛ gbeveveɛŋ can ɔ, ŋŋlɔbe vevisese lɔwo blaŋ, ɖo tablɛti ci ŋxwle lɔ kpedo ŋnu yí anyi kunuɖeɖe lɔ vanyɔkɔ doji yí ŋgbedrakɔ bɔbɔwo do fafɛɖe.” Égbenu mɔ tablɛti lɔ kpedo ye nu kaka ci COVID dɔ̀bamɛ lɔ to, ɖo eka ji yí mìvawakɔ bɔbɔ koɖo kunuɖeɖedɔ lɔ le. Ejɔ ji nɔ mì mɔ Hulda tɛnŋ wa enu ci eɖo mɔ yeawa lɔ.
