Yesu sɔ yi gbe sa vɔn do ta nɔ agbetɔ nuvɔnmɛwo. (Rɔm 5:8) Kankandojitɔɔ, lɔnlɔn ci Yesu dasɛ nɔ mì yí sɔ yi gbe na do ta nɔ mì jenɔŋ nɔ mìwo domɛtɔ ɖekaɖeka. Ele ahan gan, eʒan hweɖewonu mɔ mìaɖonɔ ŋwi yi ji nɔ mìwoɖekiwo mɔ Yesu ku do ta nɔ mìwo nɔviwo can hannɛ. Lé mìatɛnŋ adasɛ Kristo lɔnlɔn hanci nɔ mìwo nɔvi ciwo yí nyi nuvɔnmɛwo shigbe mìwo hannɛ doɔ? Mína mìakpɔ emɔ amɛtɔn. Ŋkɔtɔ, mìatɛnŋ akeke bonu nɔ mìwo xlɔwo yi eju bu mɛ tɔ ciwo yí to akpo nɔ mì ji. (Rɔm 15:7; 2Kor 6:​12, 13) Amɛvetɔ, mìakpɔnɔ mìwoɖekiwo ji nywiɖe nɔ mìŋgbexonɔ nuxu ɖewo alo awa ŋɖe ciwo yí ave mɛbuwo nu o. (Rɔm 14:​13-15) Le vɔvɔnuɔ, nɔ mɛɖe je agɔ do mìɔ, mìasɔ ki kaba. (Lk 17:​3, 4; 23:34) Nɔ mìdo gbla sɛnsinɖe yí sran Yesu le emɔ cɛwo jiɔ, Yehowa akpɔtɔ asɔ fafa koɖo ɖekawawa yrakɔ hamɛ lɔ.

KPƆ VIDEO CI YÍ NYI NYƆKƆ DOJI GASHIAGAMƐ! KEŊ ANA ÐOŊCI NƆ ENYƆBIƆSE CIWO YÍ GBƆGBƆ:

• Lé Miki se le yiɖeki mɛ kudo yi hamɛ lɔ nu ci eva kakaɔ?

• Nyi yí na yi seselelanmɛwo vatrɔɔ?

• Lé Yesu kpɔwɛ kpedo Miki nu yí etrɔ ashi le yi susu nu doɔ? (Mk 14:38)

• Lé Elododo Wema 19:11 atɛnŋ akpedo mì nu, yí mìasɔ susu nywi kpɔnɔ mìwo kpena Kristotɔwo doɔ?