Amɛɖeɖeti le haa mɛ glɔnnɔ ta nɔ hamɛ lɔ, yí gbenyinɔ etodɔndɔn nɔ mɛ ci yí wa nuvɔn gan yí gbe mɔ yedatrɔ jimɛ o. (1 Korɛntitɔwo 5:6, 11) Nɔ mìlɔn eto ci Yehowa dɔnnɔ nuvɔnwatɔ lɔ yí wa nyɔ ciwo enuɔ, anyi mìlɔn Yehowa koɖo mɛ ci yí wa nuvɔn lɔ. Vɔ amɛɖeɖeti trɔ venɔ gbaza nɔ haa mɛ tɔwo, xomuɔ mɛ tɔwo, mɛ ciwo yí ɖo kojo koɖo nuvɔnwatɔ lɔ koɖo mɛbuwo. Ci nyɔɔ le ahan ɖe, lé awɛ anyi lɔnlɔn ɖoɖo nɔ Yehowa koɖo amɛ lɔɔ?

Nɔ mìanu nyɔnɔnwiɔ, mìlɔn Yehowa yí ji mɔ yi ŋkɔ ŋgbexo ɖyi o. (1 Piɛ 1:14-16) Mìgbelɔn mɛ ci woɖe ti le haa mɛ hɛnnɛ. Nɔ etodɔndɔn lɔ sɛnŋ alo gbɔnnu ɖeeɖe can ɔ, ‘mì xɔnɔ fafa ci yí tonɔ so etodɔndɔn lɔ mɛ.’ (Ebretɔwo 12:5, 6, 11) Nɔ mìdodoɔ gbɛ koɖo mɛ ci woɖe ti alo mɛ ci yí ɖe yiɖeki ti le haa mɛɔ, anyi mìnunuɔ mɔ eto ci Yehowa dɔn nɔ amɛ lɔ denyɔ o. Vɔ míɖo ŋwi mɔ, Yehowa dɔnnɔ to nɔ yi mɛwo “lé eje do.” (Ӡeremi 30:11, NWT) Nyɔnɔnwi enyi mɔ, mìaɖoɖoɔ ŋkuvi mìwo xomumɛtɔ ci woɖeti lɔ mɔ yɛatrɔgbɔ va mìwo Da ŋshishikunamɛtɔɔ gbɔ. Vɔ keŋ gbɔxwe hwenɔnu aɖoɔ, ele veviɖe mɔ mìaze ni shigbe lé Yehowa mɔ mìwo le wɛ nɛ yí akpɔtɔ awakɔ nu ciwo yí adɔ mìwo koɖo Yehowa xlɔ asɛnŋ kpeŋkpeŋ.—Ezai 1:16-18; 55:7.

MÍKPƆ VIDEO (SƐNI YƆ) CI YÍ NYI KPƆTƆ ALE GBEJI KOÐO XOMƐ, KEŊ AÐO NYƆBIƆSE CIWO YÍ GBƆGBƆ ŊCI:

• Gbazavi ci ajitɔ koɖo ajinɔwo senɔ nɔ wowo vi ɖe gbe mɔ yedagbesɛn Yehowaɔ?

• Lé haa mɛ tɔwo afa kɔn nɔ mɛ ciwo yí kpɔtɔ le gbeji nɔ Yehowaɔ?

• Bibla mɛ nujɔjɔ ci yí na mìnya mɔ mìɖo alɔn Yehowa wu mìwo xomumɛtɔwoɔ?

• Lé mìawɛ yí anyi mɔ Yehowa ve nɔ mì wu mìwo xomumɛtɔwoɔ?