Mìwo takpekpeganwo vivinɔ nɔ mì keke. Nyi yí taɖoɔ? Le Izraɛliviwo hwenuɔ, wosugbɔ yí va bɔnɔ doju yí sɛnnɔ Yehowa. Le takpekpeganwo mɛ gbɛ hɛnnɛɔ, mìwo can mìsunɔgbɔ yí va bɔnɔ doju yí sɛnnɔ Yehowa. Eyi hweɖowonuɔ, mìyinɔ eka-eka texwe nɛniɖe alo kawivɔn-atɔn texwe nɛniɖe. Mawu nyɔ ciwo pleŋ mìsenɔ jɔnɔ ji nɔ mì sugbɔ. Ejunɔnɔ koɖo mìwo xlɔwo koɖo mìwo mɛwo can vivinɔ nɔ mì. Lé takpekpegan lɔwo jɔnɔ ji nɔ mì sugbɔ do dɔ mìdejinɔ mɔ, mìagɔnma va le azan ɖe ji le ŋkeke amɛtɔn lɔwo mɛ o.

Nɔ evajɔ yí mìabɔ doju ahan ɔ, de ŋciwo nɔviwo awa nɔ mì ɖekɛ mìale te kpɔ o. Vɔ mìɖo abunɔ ŋciwo mìwo can awa nɔ wo yí anyi mìlɔn wo kpɔ. (Galatitɔwo 6:10; Ebretɔwo 10:24, 25) Nɔ mìlɔn mɔ nɔviŋsu alo nɔvinyɔnu ɖe le va nɔ mì gbɔ le axomɛ, abi fi mìanɔ ɖekɛ yí mìlenɔ ɖɛɔ, anyi mìbubuɔ mɛbuwo tɔ kpɔ. (Filipitɔwo 2:3, 4) Nɔ mìyi takpekpeganwo ahan ɔ, mìdonɔ go mɛ ciwo mìdekpɔ kpɔ o yí tɔnɔ xlɔ nyinyi koɖo wo. Mìhɛn mìa mɔ gbɔxwe mìatɔ takpekpeɛ ji, nɔ mìgbɔnkɔ domɛ aɖu nu, alo nɔ mìkpaɔ, mìagbo sɔ mɛ ci mídejeshi ɖɛ o yí akan seŋ koɖi. (2 Korɛntitɔwo 6:13) Le takpekpeganwo mɛɔ, exlɔ ci mìatɔ nyinyi koɖo mɛɖe avasɛnŋ kpeŋkpeŋ yí ani tɛgbɛɛ dru! Ci yí gbenyɔ wu yí nyi mɔ, mɛ ciwo yí kpɔkɔ lé mìlɔnkɔ mìwonɔnɔwo do hɛn amɔ yewoabɔdo mì nu yí mìabɔ asɛn Yehowa.—Ӡan 13:35.

MÍKPƆ VIDEO CI YÍ NYI “LƆNLƆN DE KUNƆ GBEÐE O”! JUKƆNWO MƐ TAKPEKPEGANWO, KEŊ AÐO NYƆBIƆSE CIWO MÌAKPƆ YƐ ŊCI:

• Le jukɔnwo mɛ takpekpegan ciwo wowa le 2019 mɛ ɖe, lé wolɔn mɛ ciwo yí va doɔ?

• Lé Yehowa mɛwo lɔnnɔ wowonɔnɔwo yí egbe le ju nɔ wo nyi nukpacamɛ. Nyi yí taɖoɔ?

• Enu ciwo Kristotɔwo awa yí anyi wolɔn amɛ ciwo nu Edɔjikpɔha mɛ tɔwo xo nuxu soɔ?

• Lé lɔnlɔn ci han yí nɔviwo sɔ lɔn wowonɔnɔwo le Allemagne koɖo Corée du Sud jiŋ doɔ?

• Nyi mìaɖo koŋ mɔ mìawaɔ?