Mɛ ciwo mɛ mìle le xexe yɛ mɛ nunɔ mɔ, enywi nyi vwin yí vwin nyi nywi. (Ezai 5:20) Ewa ŋshishi mɔ, amɛ sugbɔ wakɔ enu ciwo yí dejɔnɔ ji nɔ Yehowa ɖeeɖe o. Ŋɖeka ci wowanɔ yí nyi mɔ, ŋsuwo ɖeɖe alo nyɔnuwo ɖeɖe adɔnkɔ nɔnɔ gbɔ. Sukluviwo koɖo mɛbuwo ado to nɔ mìwo vi dru mɔ, wo le kplɔ yewo do awa yewo tɔ han. Ci nyɔɔ le ahan ɖe, lé míawɛ nɔ míwo viwo keke nɔ mɛɖe vayi nu nyɔ ŋnɔ han ɖe nɔ woɔ, woagbe keke asun jiɔ?

Míkpla Mawu Nyɔ lɔ míwo viwo nɔ woajeshi Yehowa sewo ɖɛ. (1 Ese Wema 18:3) Nunɔ nyɔ ci Bibla nu so vijinuwo nu nɔ ao viwo vivivi keke woavamɔŋje mɛ vɛ. Exwe ci woɖo koɖo nu ci mɛ woasun ji amɔŋje nyɔ yí ànu nɔ wo. (2 Ese Wema 6:7) Biɔ eoɖeki se mɔ: ‘Ŋkpla anyi viwo lé woalɔn amɛ do yí anyɔa? Ŋkpla wo enu ci yí taɖo woadonɔ nuwo nywiɖea? Ŋkpla wo lé wodalɔn yí mɛɖe atɔ alɔ fini wodeɖo atɔ alɔ nɔ woa? Anyi viwo nya lé woawɛ nɔ mɛɖe mɔ yeadasɛ amɛgbɔdɔndɔn fimu nɔ woa? Wonya lé woawɛ nɔ mɛɖe nu nɔ wo mɔ wo le wa nu ci Yehowa gbea? Nɔ wonya nyɔ cɛwo ɖɛɔ, wodavayi do ta nyɔwo mɛ o. (Elododo Wema 27:12; Ŋnunyatɔ 7:12) Nɔ míkplakpla nu míwo viwoɔ, anyi mínunuɔ nɔ Yehowa mɔ evi ciwo yɛna yewo jɔ ji nɔ yewo sugbɔ.—Ehajiji Wema 127:3.

MÍKPƆ VIDEO CI YÍ NYI CU AXWE CI YÍ ANƆ TE GOGWIÐE—MÍKPƆ MÍWO VIWO JI SO “ENUVWIN WAWA DO WO NU MƐ,” KEŊ AÐO NYƆBIƆSE CIWO MÌAKPƆ YƐ ŊCI:

• Nyi yí taɖo nuxu xoxo so vijinuwo nu gbɔnnɔnu nɔ vida koɖo vinɔ ɖekawoɔ?

• Nyi yí taɖo ajitɔ koɖo ajinɔwo ɖo “ahɛn wowo viwo yí a nana wo enukplamu koɖo ese ji nɔ̀nɔ nɔ Axwetɔ” lɔɔ?—Efezitɔwo 6:4

• Nyiwo Yehowa habɔbɔɔ wa yí asɔ do alɔ ajitɔ koɖo ajinɔwo yí woasun ji akpla nu wowo viwo so vijinuwo nuɔ?—w19.05 12, dakavi

• Nyi yí taɖo ele mɔ míakpɔnɔ vovo do míwo viwo nu akannɔ seŋ koɖo wo gbɔxwe nyɔ ganganwo avakɔ ɖɛɔ?