Mìwa ɖaŋ zannɔ mìwo ŋsɛnwo, nɔ mìɖo tajinuwo nɔ mìwoɖekiwo le Yehowa sɛnsɛn mɛ. (1Kor 9:26) Tajinuwo ɖoɖo nɔ mìwoɖekiwo akpedo mì nu mìawa ɖaŋ azan gamɛ kankin ci yí kpɔtɔ gbɔxwe xexe cɛ avɔ. (Efe 5:15, 16) Le sɛnsɛn xomumɛtɔ míwo tɔ mɛɔ, míatɛnŋ akan seŋ so tajinu ciwo míasɛnŋ aɖo le sumɔsumɔxwe yoyu ci yí gbɔgbɔ mɛ. Mìŋwlɛ nyɔtawo do bɔbɔ nukplawema cɛ mɛ yí asɔ kpedo eo nu. Nyɔta lɔwo xo nuxu so tajinu vovovo ciwo àtɛnŋ ado gbe ɖa yí aɖo nɔ eoɖeki nu.—Ʒaki 1:5.

Le kpɔwɛ mɛ, xomu lɔ atɛnŋ awa dɔ doju yí akpedo mɛkuɖeka kpetii nu le xomuɔ mɛ yí avanyi gbeshiagbe mɔɖetɔa? Nɔ dekando ji mɔ yeavakpɔ gaxoxo ci woavabiɔ so eo shiɔ, kan seŋ koɖo mɔɖetɔ ciwo yí le nɔnɔmɛ ao tɔ hanci mɛ. (Elo 15:22) Taŋfuin, míatɛnŋ abiɔ nyɔ emɔɖetɔ ɖeka se le sɛnsɛn xomumɛtɔ míwo tɔ hwenu. Le yi goduɔ, ŋwlɛ toto vovovo ciwo yí atɛnŋ akpedo eo nu daɖɛ. Nɔ ènyi mɔɖetɔ vayiɔ, kpɔ mɔ nɔnɔmɛ ci mɛ èle atɛnŋ aɖe mɔ nɔ natrɔ atɔ ji ɖɛyɛ ma.

Mɛɖewo le míwo xomu lɔ mɛ yí atɛnŋ awa kpedonu mɔɖeɖedɔ na nɔ wleci ɖeka alo ciwo yí wu ahan a? Nɔ ŋsɛn dele eo shi ahan ɔ, èhɛn azan gaxoxo nyɛkuin nyɛkuin le kunuɖeɖedɔ lɔ mɛ ŋkeke ɖeka duu yí atɛnŋ awa kpedonu mɔɖeɖedɔ lɔ. Nɔ èwanɔ dɔ le hwɛshila lɔ pleŋ mɛ alo ènyi sukluvi yí detɛnŋ ɖenɔ kunu sugbɔ le kwɛshila lɔ dodomɛɔ, taŋfuin àtɛnŋ asɔ wleci ci mɛ àxɔ azan le alo wleci ci yí ɖo kwɛshila vɔvɔnu amatɔn keŋ asɔ wɛ. Ŋwlɛ hwenu èɖui mɔ yeawa kpedonu mɔɖeɖedɔ lɔ do azanwema ji yí agbeŋwlɛ toto ci ji àzɔn do yí awɛ daɖɛ.—Elo 21:5.

MÍKPƆ VIDEO CI YÍ NYI NYI EDƆNGBETƆ . . . EMƆÐETƆ KEŊ AÐO NYƆBIƆSE CƐ ŊCI:

• Yehowa lɔnnɔ mɛ ciwo wa vɔnsawo yí nyi emɔɖetɔwo yí gbelenɔ bu nɔ wo. Nyi ŋci mɛ nɔvinyɔnu Aamand to kpla mì so nyɔ cɛ nuɔ?