Moizi Se lɔ biɔ so ŋsu ci yí ji mɔ yeagbe ashiɛ shi mɔ yɛ le wa nɔnɔgbegbewema le ese nu. Ecɛ na yí asu koɖo ashiwo desonɔ kpoŋ agbe nɔnɔ o. Ele ahan gan, le Yesu hwenuɔ, sɛnsɛnŋkɔnɔtɔwo wɛ mɔ nɔnɔgbegbe va le fafɛɖe. Ŋsuwo atɛnŋ agbe wowo shiwo do ŋɖekpokpui ŋci. (nwtsty enumɛɖeɖe buwo kudo Mk 10:4, 11 nu) Yesu hɛn susu yi ji mɔ Yehowa yí ɖo alɔlele ɖɛ. (Mk 10:2-12) Asu koɖo ashi atrɔ “ŋcilan ɖeka” le ɖekawawa mɛ keke asɔyi. Enu kuɖeka ci ji yí woanɔ te do agbe nɔnɔ shigbe lé Matie nui hannɛ yí nyi “hashiwawa.”​—Mt 19:9; nwt.

Le egbɛmɛɔ, amɛ sugbɔ dekpɔnɔ alɔlele shigbe Yesu hannɛ o, vɔ wokpɔɛni shigbe Farizitɔwo hannɛ. Nɔ cukaɖawo fɛn aciɔ, xexeɛ mɛ tɔwo ɖe blɛ yí gbenɔ nɔnɔ. Vɔ asu koɖo ashi Kristotɔwo sɔnɔ wowo lɔlele gbeɖoɖowo mɔ wonyi enu vevi. Wojenɔ agbla yí zannɔ Bibla gɔnmɛɖosewo yí sɔ kpɔnɔ wowo cukaɖawo gbɔ. Nɔ èkpɔ video ci yí nyi Lɔnlɔn koɖo bubu na yí ɖekawawa nɔnɔ xomuwo mɛ ɖe gbɔɔ, na ɖoŋci nɔ enyɔbiɔse ciwo yí gbɔgbɔ:

• Lé àtɛnŋ awa do Elododo Wema 15:1 ji le ao lɔlele mɛɔ, yí nyi yí taɖo ele veviɖeɔ?

• Lé àtɛnŋ aze nɔ cukaɖawo nɔ èwa do Elododo Wema 19:11 jiɔ?

• Ci yí àbiɔ eoɖeki se mɔ ‘Mìagbe nɔnɔa?’ nɔ ao xomu jikɔ agban ɖe, enyɔbiɔse ciwo yí èɖo abiɔ eoɖeki seɔ?

• Lé àwɛ anyi asu nywi alo ashi nywi to wawa do Matie 7:12 ji mɛɔ?