Bibla nukplaviwo ɖo ana yí wowo xɔse asɛnŋ gbɔxwe wowo nu akpe nɔ Mawu. (Ebre 11:6) Mìatɛnŋ azan Se vivi nɔ agbe lɔ sɔyi mavɔ! wema lɔ asɔ kpedo wo nu woawa cɛ. Kpukpui veviwo, enumɛɖeɖe, nyɔbiɔse koɖo video nywiwo sɔ kpe nɔ foto nyakpɔkpɔwo le Bibla kplakpla wema cɛ mɛ. Nɔ mìkpenɔdo nukplaviwo nu woɖonɔ Kristotɔwo nɔnɔmɛwo yí gbenyinɔ xlɔ koɖo Mawuɔ, ele shigbe mìsɔ enu ciwo ezo datɛnŋ abi sɔ cucuɔ xɔ nɛ.—1Kor 3:12-15.

Mɛɖewo kpɔɛni mɔ yɛagbɔnnu mɔ yewoanyi xlɔ koɖo Mawu, ɖo wodekpɔɛni o. Eyi taɖo ele mɔ mìakpedo wo nu woajeshi Yehowa ɖɛ yí akando ji.

MÍKPƆ VIDEO CI YÍ NYI ZAN “SE VIVI NƆ AGBE LƆ SƆYI MAVƆ!” WEMA LƆ ASƆ KPEDO AMƐWO NU WOAÐO XƆSE DO YEHOWA NU! KEŊ AÐO NYƆBIƆSE CIWO MÌAKPƆ YƐ ŊCI:

• Lé mìwɛ yí nya mɔ nɔvinyɔnu lɔ drado nywiɖe nɔ nukplakpla lɔɔ?

• Lé ezan nyɔbiɔse buwo nywiɖe yí sɔ kpedo nukplavi lɔ nu yí enu yi susu koɖo yi seselelanmɛwo so Ezai 41:10, 13 nuɔ?

• Edɔ ci video koɖo kpukpui lɔwo wa do nukplavi lɔ jiɔ?

Amɛ sugbɔ desenɔ tafɛn nyɔ lɔ gɔnmɛ o alo wodekpɔɛni mɔ enuvevi enyi Mawu na yewo o. (Gal 2:20) Eyi taɖo mìɖo akpedo wo nu woaɖo xɔse do Yesu tafɛn vɔnsa lɔ nu.

MÍKPƆ VIDEO CI YÍ NYI ZAN “SE VIVI NƆ AGBE LƆ SƆYI MAVƆ!” WEMA LƆ ASƆ KPEDO AMƐWO NU WOAÐO XƆSE DO YESU NU KEŊ AÐO NYƆBIƆSE CIWO MÌAKPƆ YƐ ŊCI:

• Lé mìwɛ yí nya mɔ nɔviŋsu lɔ drado nywiɖe nɔ nukplakpla lɔɔ?

• Lé ezan akpaxwe ci yí nyi “Kpɔ ŋcɛwo kpɔ” esɔ koɖo nukplavi lɔ yí sɔ kpedo nuɔ?

• Nyi yí taɖo ele veviɖe mɔ woado gbe ɖaɖa do ta nɔ nukplavi lɔɔ?