Ci mìgogokɔ xexe cɛ vɔvɔnuɔ, mìakpɔkɔ emɔ mɔ eju ci mɛ mìle avablukɔ yí vɔnvɔndonamɛnu xomɛvevetɔwo wawa koɖo ahwawo avasukɔgbɔ doji. (Enyɔ 6:4) Lé mìadra do daɖɛ nɔ cukaɖa ciwo mìavado go le sɔ mɛ doɔ?

• Dra do ɖɛ le gbɔngbɔnmɛ: Do jeshi Bibla gɔnmɛɖose koɖo Bibla xolɔlɔ ciwo yí donɔ ŋsɛn kankandoji ci èɖo do Yehowa koɖo yi habɔbɔ lɔ nu yí gbekpenɔdo eo nu yí dedonɔ nu ejunyɔ mɛ nu. (Elo 12:5; jr 125-126 mm. 23-24) Kakacɛ yí ele mɔ àdo ŋsɛn exlɔnyinyi ci yí le gblamɛ nɔ eo koɖo mɛ ciwo yí le hamɛ lɔ mɛ.—1 Piɛ 4:7, 8

• Dra do ɖɛ le ŋcilanmɛ: Ji fini àbe do koɖo ŋciwo àvaɖu daɖɛ le axwe lɔ mɛ. Gbesɔ kpe niɔ, ji fini àvato ashi le axwe lɔ mɛ daɖɛ. Trɔ akpɔ godu ci mɛ èsɔ enuvevi ciwo àvaʒan kaka do mɛ yí akpɔ mɔ wosɔgbe ma. Gbesɔ eho koɖo nubu ciwo yí aglɔn ta nɔ eo yí naci agbe do godu lɔ mɛ. Nya lé àwɛ ayɔ hamɛmɛshinshinwo yí agbekando ji mɔ wowo can nya lé woawɛ ayɔ ye.—Ezai 32:2; g17.5 3-7

Le afɔku lɔ hwenu: Kpɔtɔ adonɔ gbe ɖaɖa, akplanɔ nu, ayinɔ bɔbɔ yí agbewanɔ sumɔsumɔdɔ kpɛtɛ ciwo èwanɔ sasa. (Fili 1:10) Gbeyi lɛ ayi lɛ nɔ deʒan o. (Mt 10:16) Ma ŋɖuɖu koɖo nubu ciwo yí le eo shi koɖo amowo.—Rɔm 12:13.

MÍKPƆ VIDEO CI YÍ NYI ÈDRA DO ÐƐ NƆ AFƆKUWOA? KEŊ AÐO NYƆBIƆSE CIWO MÌAKPƆ YƐ ŊCI:

• Lé Yehowa atɛnŋ akpedo mì nu do le afɔku ɖe hwenuɔ?

• Nyiwo mìatɛnŋ awa yí asɔ dra do daɖɛɔ?

• Lé mìawɛ akpedo mɛ ciwo nu afɔku lɔ dahɛn nu leɔ?