Paki kpɛtɛ ci Yesu jiji aɖu dale shigbe kpɛtɛwo nɛ o. Ci yi ku gbɔgbɔ xɛɛɔ, éji mɔ yeaɖu Paki ŋɖuɖu lɔ koɖo apotru ye tɔwo. Eyi le Paki kpɛtɛkpɛtɛ lɔ ɖuɖu hwenuɔ, yeaɖo Axwetɔ Fiɛfiŋɖuɖu lɔ ci woawanɔ zeɖeka le xwe ɖeka mɛ. Eyi taɖo edɔ Piɛ koɖo Ӡan mɔ, wo le yi dra xɔɔ mɛ do daɖɛ. (Luiki 22:7-13; kpɔ foto ci yí le akpaa ji.) Enu cɛ ɖo ŋwi nɔ mì mɔ, mìɖo adrado ɖɛ nɔ Eŋwiɖoɖo ci mìawa le 27 mars ji. Hamɛwo awa toto nɔ mɛ ci yí axo Eŋwiɖoɖo nuxu lɔ, kpɔwɛŋɖuɖu lɔwo koɖo nubuwo. Ci enyi ahan can ɖe, nyi mɛɖekamɛɖeka awa yí adrado ɖɛ nɔ Eŋwiɖoɖo lɔɔ?

Tekpɔ nɔ eku ci Yesu ku ajeŋ nɔ eo doji. Hlɛn finiwo woanu mɔ wo le hlɛn nɔ Bibla lɔ le Eŋwiɖoɖoɔ hwenu yí abu tamɛ kpɔ so wo nu. Àkpɔ wo le Gbeje Enuŋwlɛŋwlɛ lɔwo mɛ Ŋkeŋke wemaa mɛ. Enu sugbɔ le megbenyawo B12-A, B12-B mɛ le Xexe Yeye gɔmɛɖeɖe mɛ yí àkpɔ. (Gbekpɔ Kristotɔwo gbenɔnɔ koɖo sumɔsumɔdɔ Bɔbɔ nukplawema avril 2020 tɔ.) Nɔ xomuwo hɛn ɔ, woaxo nuxu so enu ciwo yí taɖo tafɛnvɔnsa lɔ le veviɖe nu le sɛnsɛn xomumɛtɔ hwenu. Enyɔ ciwo nu woaxo nuxu so dru le Jutakpɔxɔ ɛntɛnɛti ji wemadadoxu ji alo Numekuku Ŋuti Mɔfiagbalẽ Na Yehowa Ðasefowo mɛ.

Yɔ amɛwo nɔ woava Eŋwiɖoɖo lɔ. Tekpɔ ayɔ amɛ sugbɔ nɔ Eŋwiɖoɖo lɔ lé àsun ji do. Yi eoɖeki mɛ kpɔ yí akpɔ mɛ ciwo ayɔ. Èhɛn ayɔ mɛ ci gbɔ ètrɔ yinɔ, mɛ ci èkplanɔ Bibla koɖo sa, amɛnyanyiwo koɖo ao mɛwo. Hamɛmɛshinshinwo ɖo atekpɔ ayɔ mɛ ciwo yí fa keŋkeŋ alo mɛ ciwo yí mi bɔbɔwo koɖo kunuɖegbe yiyi. Nɔ mɛ ci èjiji ayɔ lɔ dele míwo tɔxuɔ, yi jw.org ji keŋ akpɔ gamɛ koɖo fini wojiji awa Eŋwiɖoɖo lɔ le le fini ele. Hun jw.org yí akpɔ eji keŋ aӡin MIWO MÌNYIƆ?. Nɔ yɛhun ɖegbɔɔ, naӡin “Eŋwiɖoɖo” ji.

Nubu ciwo mìhɛn mìagbewa yí asɔ drado ɖɛɔ?