HOLLANDE tɔ Spinoza ci yí nyi xexeɛmɛnunyatɔ ɖeka ŋwlɛ mɔ: “Ŋje agbla veviɖe mɔ ŋdako agbetɔ nuwanawo o, ŋdafan avin do ta nɔ wo alo agbe ŋwan nɔ wo o, vɔ mamɔŋje wo mɛ.” Ci ènyi nukplamɛtɔɔ, edɔ gangan enyi nɔ eo mɔ àje agbla amɔŋje ao sukluvi, ciwo mɛ Yehowa Kunuɖetɔwo le, susuwo, nɔnɔmɛ ciwo mɛ wole koɖo wowo jixɔsewo mɛ nɔ wo. Hweɖewonuɔ, sukluvi cɛwo tɛnŋ ku do nyɔ ɖewo nu gligaan shigbe enumalɔntɔwo wonyi hannɛ. Vɔ nɔ eze petii mɔ sukluvi lɔ sɛnsɛn alo agbenywinɔnɔ se jixɔsewo yí taɖo ewakɔ nu ahan ɔ, ele mɔ àbu wo kpɔ. Watch Tower Bible and Tract Society (ci yí nyi Yehowa Kunuɖetɔwo wemawowawadɔ jikpɔgbɛ) yí wa wemagbaja cɛ. Yí wowɛ koɖo susu mɔ yɛakpedo eo nu nɔ namɔŋje sukluvi ciwo yí nyi Kunuɖetɔwo nuwanawo gɔnmɛ nywiɖe. Mìkando ji mɔ àgbɔnji ahlin nywiɖe.

Mɛbuwo mawusɛnsɛn jixɔsewo mɛ mɔmɔŋje dedasɛ mɔ àwa do wo ji alo àlɔn do wo ji o, yí enyɔnunu nɔ amɛ denyi jimɛtrɔtrɔ nɔ amɛ o. Wemagbaja cɛ deʒinkɔ Kunuɖetɔwo sɛnsɛn susuwo do eo ji alo do ao sukluviwo ji o. Mìjikɔ kpoŋ mɔ mìanu gɔnmɛɖose koɖo jixɔse ciwo yí evida koɖo evinɔ ao sukluvi ɖewo tɔ kplakɔ wowo viwo nɔ eo, nɔ namɔŋje enu mɛ nɔ ɖevi ciwo yí nyi Kunuɖetɔwo keŋ awa dɔ koɖo wo fafɛɖe sɔwu. Nyɔnɔnwi yɔ, taŋfuin enu ciwo wokpla ɖeviɛwo koɖo enu ciwo wowanɔ dasɔ koɖo aotɔ gashiagamɛ o, ɖo ɖevi ɖekaɖeka kplakɔ lé azan ayexadohwɛnamɛnu yiŋtɔtɔ nywiɖe do.

Yehowa Kunuɖetɔwo jinɔ mɔ, yewo viwo le kpɔ nyɔna sugbɔ sugbɔ le wowo sukluyiyi mɛ, shigbe lé vida koɖo vinɔ sugbɔ jinɔ nɛ. Susu cɛ yí taɖo wokplanɔ wowo viwo mɔ wo le se tonu nɔ wowo cicawo. Ahanke ejɔnɔ ji nɔ Kunuɖetɔwo koɖo wowo viwo, nɔ cicawo se nu gɔnmɛ nɔ wo yí bunɔ wo nɛ.

Yehowa Kunuɖetɔwo nyi Kristotɔ ciwo wojeshi ɖɛ le xexeɛ pleŋ mɛ. Ele ahan gan, wodevasenɔ nu gɔnmɛ nɔ wo hweɖewonu o. Eyi taɖo enu ci mìɖoɖoɔ ŋkuvi yí nyi mɔ, wemagbaja cɛ akpedo eo nu namɔŋje ɖevi ciwo yí nyi ao sukluvi Kunuɖetɔwo nuwanawo mɛ nywiɖe wu. Vevitɔɔ, mìkpɔkɔ emɔ mɔ, le wana vevi ɖewo mɛɔ, àvamɔŋje enu ci yí taɖo woɖui mɔ yewoato akpo mɛ.