SUSUMƐDƆ̀DAXU États-Unis tɔ wa numɛkuku so ajitɔ koɖo ajinɔ ciwo wokpɔ mɔ evihɛnhɛn mlɛ nɔ nywiɖe nu yí ŋwli do wema mɛ. Evi ciwo yí le wo shi ɖo exwe 21 nu le ji yí ewa mɔ, ɖevi “lɔwo pleŋ nyi amɛshinshin ciwo yí jenɔ agbla yí gbewa ɖaŋ trɔnɔ do nɔnɔmɛwo nu nywiɖe le xexeɛ mɛ.” Wobiɔ ajitɔ koɖo ajinɔ lɔwo se mɔ: ‘Sɔ kudo enutɔxukpɔkpɔ míwotɔ nu ɖe, enukplamunyɔ nywitɔ ci míatɛnŋ ana ajitɔ koɖo ajinɔ buwoɔ?’ Doŋci  ciwo amɛ sugbɔtɔ na yí nyi: ‘Mílɔn wo sugbɔ sugbɔ,’ ‘míhɛn wo le emɔ ci yí akpedo wo nu ji,’ ‘mímunɔ munu koɖo wo,’ ‘míkpla míwo viwo nɔ woanya vovototo ci yí le gblamɛ nɔ enywi koɖo vɔn,’ ‘mído bubu míwonɔnɔwo nu,’ ‘míɖo to wo nywiɖe,’ ‘mína emɔdasɛnamɛwo wo sɔwu mɔ míagbegbeɛ nyɔ nɔ wo,’ yí ‘míŋgbebiɔ ŋci yí wugan wo o.’

Ele ahan gan, nɔ woahɛn ɖeviwo yí woashin anyi mɛ ciwo yí jenɔ agbla wanɔ nu nywiɖe le agbe mɛɔ, denyi ajitɔ koɖo ajinɔwo ɖekɛ yí nyɔ cɛ kan o. Cicawo can wanɔ akpa vevi ɖe le mɛ. Suklu nukplamunyɔnatɔ bibi ɖeka do jeshi mɔ: “Sukluyiyi tajinu vevitɔ yí nyi mɔ woakpedo ajitɔ koɖo ajinɔwo nu nɔ woahɛn ɖeviwo woashin anyi amɛ ciwo ji woakando, amɛ ciwo yí ashin le susu mɛ, ŋcilan mɛ koɖo seselelanmɛ mɛ nywiɖe.”

Eyi taɖo tajinu ɖekɛŋmɛ yí le ajitɔ koɖo ajinɔ koɖo nukplamɛtɔwo shi. Tajinu lɔ yí nyi mɔ, woahɛn ɖeviwo nɔ woavanyi amɛshinshin ciwo yí wanɔ nu le  dredrenu, ase vivi nɔ agbe yí akpe ji anɔ mɛ ciwo mɛ wole.

Vɔ cukaɖawo vanɔ nɔ ajitɔ koɖo ajinɔwo dewakɔ nu alɔlelɔmɛ koɖo cicawo o. Le kpɔwɛ mɛ, jila ɖewo desɔnɔ ɖe le ekpla ciwo wonanɔ wowo viwo le suklu ji ɖeeɖe o; ebuwo tenɔkpɔ mɔ yewoawa hwlɛn koɖo cicawo. France nyɔjɔjɔwema ɖeka nu so nyɔ cɛ nu mɔ: “Degbenyi cica ɖekɛ ji agban le mɔ ana kpla ɖeviwo o. Ci lé ɖeviwo awɛ adin yí xanɔ wowo jilawoɔ, wogbejenɔ wowo sukluwemawo mɛ kpɔ hlɛnhlɛnhlɛn keŋ yí kpɔnɔ afɛnwo yí xonɔ nuxu tɔ lé cicawo kplakɔ nu do, yí donɔ hwɛ enukplakpla lɔkpa ciwo wozankɔ. Wodonɔ dɔmɛzi hɛnnɛ nɔ wowo vi lɔwo dewa dɔ le dodokpɔ ŋkɔtɔwo mɛ le suklu o.” Enuwana cɛwo atɛnŋ axɔ acɛ ci cicawo ɖo le wo shi.

Yehowa Kunuɖetɔwo kpɔɛ mɔ, nɔ jilawo wanɔ nu alɔlealɔmɛ koɖo cicawo, nɔ woje agbla yí sɔnɔ ɖe le wowo viwo sukluyiyi jiɔ, yɛado ɖeviɛwo ji sɔwu. Wonya mɔ, enuwawa alɔlealɔmɛ ahan le veviɖe, ɖo cicawo dɔ lɔ vagbɔnkɔnu doji.

Ci amɛwo nuwanawo kpɔnɔ ŋsɛn do sukluwo jiɔ, eyi dɔ cukaɖa ciwo yí le amɛwo mɛ dedɛnnɔ le suklu lɔwo o. Ci exwewo vayikɔɔ, cukaɖa ciwo yí le amɛwo mɛ vasɛnkɔŋ doji kabakaba. Ci wema ci yí nyi The New York Times dredreɛ lé enu lɔwo vale do le suklu ɖeka le États-Unis-ɔ, enu mɔ: “Sukluvi lɔwo dɔnnɔ alɔn le sukluxɔ mɛ, woŋwlɛnɔ nuwo do glinu le fini amɛwo tonɔ yí sɔ jinɔ nyɔ le wowonɔnɔwo nu, wogbanɔli sukluvi ciwo yí wanɔ dɔ. Nɔ mìanuiɔ, ɖeviwo pleŋ yí dodoɔ go cukaɖawo shigbe mɔ, ebulele nɔ vifinwo, ebulele nɔ jila ciwo yí wolé do gakpamɛ, koɖo tamɛ ci yí ganŋkiwo sɛnnɔ koɖo wo  nɛ. Sukluvi ɖeka le amatɔn mɛ han yí gɔnnɔ suklu ŋkeke ɖeshiaɖe.”

Enu ci yí gbenyina yí nyi mɔ, tamɛsɛnnuwanawo vasukɔgbɔ doji le sukluwo le xexeɛ keŋkeŋ mɛ. Ecudada koɖo ewitɔtɔ amɛ gashiagamɛ vaɖɔli evuwawa ciwo mɛ wodanɔ kɔn le hweɖewonu. Ahwawanuwo vabɔ, xomɛveve vasukɔgbɔ doji, ɖeviwo can wakɔ tamɛsɛnnuwo yí wodeshinnɔ gbɔxwe yí tɔnɔ ji o.

Ele mɛ mɔ, denyi ejuwo pleŋ mɛ yí enuwo nyina le ahan o. Vɔ cica sugbɔ le xexeɛ mɛ dodoɔ go cukaɖa ci nu woxo nuxu so le Flansewo nyɔjɔjɔ wema ci woyɔnɔ mɔ Le Point mɛ. Le wema lɔ mɛɔ, wonu mɔ: “Wodegbebunɔ cica o; acɛ ɖe degbele shi o.”

Amɛmabunu cɛ ci wowakɔ ɖaɖa egawo gbɔ nyi afɔku teŋ nɔ ɖeviwo pleŋ. Eyi taɖo Yehowa Kunuɖetɔwo tekpɔ yí sɔ tonusese koɖo shishiɖoɖo nɔ egawo kplanɔ wowo viwo. Wana nywi cɛwo degbebɔ le sukluxwewo gbɛ ahan o.