DENYI wa wowa wemagbaja cɛ mɔ woagbeje Yehowa Kunuɖetɔwo jixɔsewo pleŋ mɛ kitokito o. Vɔ mìje agbla mɔ mìadre gɔnmɛɖose ɖewo ciwo yí Yehowa Kunuɖetɔwo xɔ se mɛ yí adasɛ xomu nuwana ciwo yí atɛnŋ awa dɔ do ao sukluvi ji, nɔ dalɔ alo nɔlɔ alo wo koɖo ve lɔwo nyi Kunuɖetɔwo.

Yehowa Kunuɖetɔwo lenɔ ŋkuvi do wowo viwo ŋkɔyiyi le gbɔngbɔnmɛ nu veviɖe. Eyi wokando ji mɔ ecɛ kpenɔdo wo nu woyinɔ ŋkɔ le nubuwo mɛ. Jixɔse lɔwo koɖo gɔnmɛɖose ciwo ji wozɔnnɔ do, na tajinu nɔnɔ wo shi le agbe mɛ yí wokpannɔŋkɔ gbeshiagbe cukaɖawo fafɛɖe. Gbesɔ kpe niɔ, jixɔse koɖo gɔnmɛɖose ŋtɔ́wo ɖo acucunɔ wo yí woajenɔ agbla anyi sukluvi ciwo yí donɔ vevi nu koɖo jumɛvi nywiwo le wowo gbe pleŋ mɛ.

Yehowa Kunuɖetɔwo jenɔ agbla mɔ yewoawa ŋci yí sɔgbe le agbe mɛ, eyi na wokpɔnɔ sukluyiyi mɔ enu gangan ɖeka. Wowo jiji yí nyi mɔ yewoawa dɔ koɖo mí lé yewoakpe ji do. Shigbe lé Yehowa Kunuɖetɔwo wɛni nɛɔ, woakpɔtɔ adokɔ ŋsɛn wowo viwo le wowo xwewo mɛ koɖo wowo sɛnsɛnwaxuwo le xexeɛ pleŋ mɛ, nɔ woawa wowo kpaxwe le enuwawa alɔlealɔmɛ cɛ mɛ.