1, 2. Enyɔ ci yí amɛ sugbɔ biɔnɔ seɔ?

NYIGBAN hunhun le axu gɔnmɛ yí gban kɔxui ɖeka. Ŋsu ɖeka sɔ cu do amɛwo ji le cɔcixɔ ɖeka mɛ, édo akpa amɛwo nu yí wu amɛ sugbɔ. Kansɛdɔ̀ wu nyɔnu ɖeka, yí eku gbeɖe evi amatɔn ɖɛ.

² Nɔ afɔkuwo alo enubaɖa cɛ hanciwo jɔɔ, amɛ sugbɔ biɔnɔ se mɔ: “Nyi yí taɖoɔ?” Amɛ sugbɔ biɔnɔ se mɔ, nyi yí taɖo amɛxaxa koɖo efunkpekpe bɔ sugbɔ ahan le xexeɛ mɛ ma. Èbiɔ enyɔ cɛ hanci eoɖeki se kpɔa?

3, 4. (a) Enyɔ ciwo yí Xabakuku biɔ seɔ? (b) Lé Yehowa ɖo ŋci ni doɔ?

³ Mìkpla le Bibla mɛ mɔ, mɛ ciwo yí ɖo xɔse sɛnŋ do Mawu nu can biɔ enyɔ cɛ hanciwo se kpɔ. Le kpɔwɛ mɛ enyɔnuɖɛtɔ Xabakuku biɔ Yehowa se mɔ: “Nyi yí taɖo èna yí ŋkpɔkɔ enubaɖawawa tɔxuɔ? Yí nyi yí taɖo èna emɔ yí amɛjiʒinʒin liɔ? Nyi yí taɖo gugu koɖo tamɛsɛnnuwawa le ŋmɛ nɔŋ ɔ? Yí nyi yí taɖo aɖehwlɛnhwlɛn koɖo evuwawa bɔɔ?”​—Xabakuku 1:​3, nwt.

⁴ Le Xabakuku 2:​2, 3 mɛɔ, mìhlɛn mɔ Mawu na ɖoŋci nɔ Xabakuku nyɔbiɔsewo, yí ɖo gbe ni mɔ yeadra nɔnɔmɛ lɔ do. Yehowa lɔn agbetɔwo veviɖe. Bibla nu mɔ: “Élenɔ bu nɔ mí.” (1 Piɛ 5:​7, nwt) Le nyɔnɔnwi mɛɔ, efunkpekpe amɛwo tɔ venɔ Mawu wu mì. (Ezai 55:​8, 9) Ecɛ yɛɔ, na nɔ mìakije enyɔbiɔse cɛ mɛ, Nyi yí taɖo efunkpekpe bɔ le xexeɛ mɛ ahan ɔ?

5. Enyɔ ciwo yí mawunyɔkplamɛtɔ sugbɔ nunɔ so efunkpekpewo nuɔ? Nyi yí Bibla kpla mìɔ?

⁵ Pastɔwo, fadawo koɖo mawunyɔkplamɛtɔ ɖewo nunɔ mɔ, Mawu dro enyi mɔ amɛwo akpe fun. Mɛɖewo nunɔ mɔ, Mawu ŋwlɛn enushianu ci yí ajɔ do amɛ ji, keke je afɔkuwo can ji daɖɛ xoxoxo, yí mìdatɛnŋ amɔnŋje enu ci yí taɖo mɛ gbeɖe o. Mɛbuwo nunɔ mɔ agbetɔwo, keke je ɖevihwɛwo can ji, kunɔ keŋ atɛnŋ ayi nɔ Mawu gbɔ le jeŋkwimɛ. Vɔ denyi nyɔnɔnwi yɔ o. Yehowa dena enubaɖa jɔnɔ gbeɖe o. Bibla nu mɔ: “Mawu adodwi lɔ dawa enuvwin kpɔ o, yí Ŋsɛnwopleŋtɔ lɔ dawa enudɔndɔn gbeɖe o!”​—Job 34:​10, nwt.

6. Nyi yí taɖo amɛ sugbɔ donɔ hwɛ Mawu mɔ, eyi gbɔ yí xexeɛ mɛ funkpekpewo pleŋ soɔ?

⁶ Amɛ sugbɔ do hwɛ Mawu mɔ eyi gbɔ xexeɛ mɛ funkpekpewo pleŋ so, ɖo wobunɔ mɔ eyi kpakpa acɛ do xexeɛ ji. Vɔ shigbe lé mìkplɛ le Eta 3 tɔ lɔ mɛ hannɛɔ, xexe lɔ fyɔ teŋ yí nyi Satana Legba.

7, 8. Nyi yí taɖo efunkpekpewo bɔ le xexeɛ mɛ ahan ɔ?

⁷ Bibla nu nɔ mì mɔ, “xexe keŋkeŋ lɔ le gɔnmɛ nɔ enuvwinwatɔ lɔ ŋsɛn.” (1 Ʒan 5:19) Tamɛsɛnnuwatɔ koɖo xomɛvetɔ teŋ yí Satana, mɛ ci yí kpakpa acɛ do xexe lɔ ji nyi. É “kplɔ xexe lɔ keŋkeŋ toto emɔ vwin ji.” (Enyɔdasɛ 12:9) Amɛ sugbɔ srannɔ yi nuwanawo. Ecɛ nyi ɖeka le susu ciwo yí dɔ amɛbleble, amɛxaxa, koɖo tamɛsɛnnuwawawo bɔ le xexeɛ mɛ.

⁸ Susu buwo gbeli ci yí taɖo efunkpekpewo bɔ le xexeɛ mɛ. Ci Adamu koɖo Ɛva fɔn gu do Yehowa nuɔ, ena yí wowo jijimɛviwo ɖu nuvɔn cinɔ so wo gbɔ. Nuvɔn lɔ dɔ agbetɔwo na yí mɛbuwo kpenɔ fun. Wojinɔ  mɔ yewoanyi amɛ wu mɛbuwo. Wowanɔ vu, wowanɔ ahwa yí tafunɔ mɛbuwo do. (Ŋununyatɔ 4:1; 8:9) Hweɖewonuɔ, “hwenu koɖo enujɔjɔ maɖoŋdonuwo” nanɔ yí amɛwo kpenɔ fun. (Ŋununyatɔ 9:​11, nwt) Nɔ wole texwe vwin ɖe, le gaxoxo vwin mɛɔ, afɔku koɖo enuvwin buwo atɛnŋ ajɔ do wo ji.

9. Nyi yí taɖo mìatɛnŋ akando ji mɔ, susu nywi ɖe kokoko yí na Yehowa na emɔ efunkpekpewo kpɔtɔ liɔ?

⁹ Yehowa dehɛnnɔ efunkpekpewo va mì ji gbeɖe o. Denyi eyi mìado hwɛ ci yí ahwawawa, enubaɖabaɖawawa koɖo amɛtafutafu li o. Denyi Mawu gbɔ yí jɔjɔmɛfɔkuwo shigbe mɔ nyigbanhunhunhun, jihɔntui sɛnŋsɛnŋwo koɖo eshiɖɔgbanmɛwo sonɔ o. Vɔ àtɛnŋ abiɔ se mɔ, ‘Nɔ Yehowa nyi mɛ ci yí ɖo ŋsɛn wugan wu amɛshiamɛ le xexegbɛ lɔ mɛ ɖe, nyi yí taɖo dexe mɔ nɔ enudovɔnvɔnnamɛ ciwo yí jɔjɔɔ?’ Mìnya mɔ Mawu sɔnɔ eɖe le mɛ nɔ mì veviɖe, eyi taɖo susu nywi ɖe kokoko ŋci yí ena emɔ efunkpekpewo kpɔtɔ li.​—1 Ʒan 4:8.

10. Lé Satana do hwɛ Yehowa doɔ?

¹⁰ Le Edɛn kpa lɔ mɛɔ, Legba ble Adamu koɖo Ɛva. Satana do hwɛ Mawu mɔ yɛnyi Acɛkpatɔ vwin. Satana nu mɔ Mawu sɔ enunywi ɖeka wla do Adamu koɖo Ɛva. Satana ji mɔ wo le xɔɛ se mɔ ye cɛkpakpa anyɔ wu Yehowa tɔ, yí wodeʒan Mawu o.​—Gɔnmɛjeje 3:​2-5; kpɔ enumɛɖeɖe bu 27 tɔ.

11. Enyɔbiɔse ci yí ele mɔ mìakpɔ ɖoŋci nɔɔ?

¹¹ Adamu koɖo Ɛva fɔn gu do Yehowa nu yí gbe tonu sese ni. Wobui mɔ, yewoɖo acɛ yí asɔ gbeta yewoŋtɔwo kudo enywi koɖo vwin nu. Vɔ woble wowoɖekiwo.  Lé Yehowa atɛnŋ adasɛ mɔ susu egufɔntɔ lɔwo tɔ desɔgbe o, yí yenya enu ci yí nyɔ nɔ mì wuɔ?

12, 13. (a) Nyi yí taɖo Yehowa dewu egufɔntɔ lɔwo le afɔdumɛɔ? (b) Nyi yí taɖo Yehowa tashi Satana yí ekpakɔ acɛ do xexe cɛ ji, yí gbena emɔ yí agbetɔwo kplɔkɔ wowoɖekiwoɔ?

¹² Yehowa dewu Adamu koɖo Ɛva le afɔdumɛ o. Étashi wo yí woji viwo. Yehowa na mɔnukpɔkpɔ Adamu koɖo Ɛva jijimɛviwo, nɔ woasɔ mɛ ci woji mɔ yɛanyi yewo cɛkpatɔ. Yehowa dro yí nyi mɔ amɛkpekpewo aɖɔ nyigban lɔ ji, yí avamɛ dandandan, nɔ Legba le ŋɖekpokpui wakɔ can.​—Gɔnmɛjeje 1:28; Ezai 55:​10, 11.

¹³ Satana do hwɛ Yehowa le ŋmɛ nɔ mawudɔla miliɔn nɛniɖe. (Job 38:7; Daniɛli 7:10) Eyi taɖo Yehowa na hwenu Satana nɔ adasɛ mɔ, enyɔsɔdoamɛnu yi tɔ lɔ nyi nyɔnɔnwi. Égbena hwenu agbetɔwo can mɔ wo le ɖo wowoŋtɔwo cɛkpakpa le Satana ŋsɛn mɛ, keŋ akpɔ mɔ yɛanyɔ nɔ wo Mawu kpedonu manɔmɛ ma.

14. Nyi ji yí exwe kotokun nɛniɖe ciwo yí vayi ɖo kpeɔ?

¹⁴ So exwe kotokun nɛniɖe ke, yí agbetɔwo dokɔ gbla mɔ yewoakplɔ yewoɖekiwo, vɔ dekpakpa wo o. Edasɛ mɔ Satana nyi ŋsukantɔ. Agbetɔwo ʒan Mawu kpedonu. Enyɔnuɖɛtɔ Ʒeremi nyɔ jɔ ci enu mɔ: “Oo Yehowa, ŋnya nywiɖe mɔ, agbetɔ mɔ dele yiŋtɔ lɔ mɛ o. Ŋsɛn dele agbetɔ shi yí akplɔ yiɖeki o.”​—Ʒeremi 10:​23, nwt.

15, 16. (a) Nyi yí taɖo Yehowa na emɔ yí efunkpekpe li na nɔ hwenu jinjin ahan ɔ? (b) Nyi yí taɖo Yehowa deɖenɔ cukaɖa ciwo yí Satana hɛnnɔ vɛ siɔ?

¹⁵ Nyi yí taɖo Yehowa na emɔ yí efunkpekpe li na  nɔ hwenu jinjin ahan ɔ? Nyi yí taɖo deɖo te enubaɖa ciwo yí jɔjɔɔ? Exɔ hwenu sugbɔ gbɔxwe yí evaze petii mɔ, Satana cɛkpakpa dekpe ŋɖe ji o. Agbetɔwo te acɛkpakpa vovovowo kpɔ, vɔ wodekpɔ ta ni o. Enyi nyɔnɔnwi mɔ wowa ŋkɔyiyi le jɔjɔmɛnununya koɖo mashinniɖaŋnunyawo mɛ, gan enumajɔmajɔwawa, wamɛnɔnyinyi, enubaɖabaɖawawa, koɖo ahwawawa gbevabɔ sugbɔ wu sa. Mìdatɛnŋ akplɔ mìwoɖekiwo Mawu manɔmɛ yí akpa mì o.

¹⁶ Ele ahan gan, Yehowa deɖenɔ cukaɖa ciwo yí Satana hɛnnɔ vɛ si o. Nɔ Mawu wɛni ahan ɔ, adasɛ mɔ énɔ godu nɔ Satana cɛkpakpa lɔ, Mawu datɛnŋ awa enu ahan gbeɖe o. Gbesɔ kpe niɔ, agbetɔwo axɔɛ se mɔ yewoatɛnŋ akplɔ yewoɖekiwo cuɖaka manɔmɛ. Vɔ ŋsu yɔ, Yehowa danɔ godu nɔ susu ŋtɔ́ gbeɖe o. Dekannɔ ŋsu gbeɖe o.​—Ebretɔwo 6:18.

17, 18. Nyi yí Yehowa awa so cukaɖa ciwo pleŋ Satana hɛn vɛ nuɔ?

¹⁷ Yehowa atɛnŋ aɖe cukaɖa ciwo pleŋ yí egufɔnfɔn Satana koɖo agbetɔwo tɔ hɛn vɛ sia? Ɛɛ. Mawu atɛnŋ awa enushianu fafɛɖe. Yehowa nya hwecinu yí aɖo enyɔsɔdoamɛnu Satana tɔwo pleŋ nu. Le yi goduɔ átrɔ nyigban lɔ yí anyi paradiso, shigbe lé eɖui do nɛ. Amɛ ciwo pleŋ yí le “eŋwiɖoɖoyɔduwo mɛ” afɔn so ku. (Ʒan 5:​28, 29, nwt) Amɛwo dagbeble alo aku gbeɖe o. Yesu adra enu ciwo pleŋ yí Satana dahɛn do. Yehowa azan Yesu asɔ ‘dahɛn Legba dɔwawawo.’ (1 Ʒan 3:8) Mìdo akpe gangan nɔ Yehowa mɔ, égbɔn ji ɖɛ nɔ mì keke vana nɔ egbɛ, nɔ mìatɛnŋ ajeshi ɖɛ yí asɔ gbeta mɔ eyi mìji mɔ yɛanyi mìwo Cɛkpatɔ. (Hlɛn 2 Piɛ 3:​9, 10.) Nɔ mìle efun kpekɔ can ɔ, ékpenɔdo mì nu nɔ mìado ji.​—Ʒan 4:23; hlɛn 1 Korɛntitɔwo 10:13.

 ¹⁸ Yehowa deʒinnɔ mì ji mɔ mìwo le sɔ ye nɔ yeanyi mìwo Cɛkpatɔ dandandan o. Éna amɛɖekishinɔnɔblɔɖe agbetɔwo. Na mìakpɔ lé enunana cɛ le veviɖe do nɔ mì ɖa.

19. Enunana vevi ci yí Yehowa na mìɔ? Nyi yí taɖo mìɖo ado akpe do ta nɔ enunana lɔɔ?

¹⁹ Yehowa nunana vevi ci yí nyi amɛɖekishinɔnɔblɔɖe na yí mìto akpo nɔ elanwo. Jɔjɔmɛmɔdasɛnu yí na elanwo wanɔ nu, vɔ mìwo atɛnŋ asɔ gbeta kudo lé mìji mɔ mìanɔ agbe do nu, yí agbesɔ gbeta mɔ mìado jijɔ nɔ Yehowa alo mìdado jijɔ ni o. (Elododo Wema 30:24) Mìdele shigbe mashinniwo hannɛ o, ɖo enu ci wowa mashinniwo mɔ woawa ɖekɛ yí wowanɔ. Vɔ mìwo agbetɔwoɔ, ablɔɖe le mì shi yí mìasɔ gbeta so amɛ alɔkpa ci mìji mɔ mìanyi, mɛ ciwo yí anyi mìwo xlɔwo koɖo enu ciwo yí mìaji mɔ mìawa le agbe mɛ nu. Yehowa ji mɔ mìwo le se vivi nɔ agbe lɔ.

20, 21. Gbeta nywi ci yí àtɛnŋ asɔ gbɛɔ?

²⁰ Yehowa ji mɔ mìwo le lɔn ye. (Matie 22:​37, 38) Éle shigbe evida ci yí kpɔnɔ jijɔ, nɔ ése yí eviɛ nu ni so ji mɛ mɔ “Ŋlɔn eo,” yí denyi mɛɖe yí ʒin ji gbɔxwe enui nɛ. Yehowa na amɛɖekishinɔnɔblɔɖe mì, nɔ mìasɔ gbeta mɔ mìasin alo mìdasin o. Satana, Adamu koɖo Ɛva sɔ gbeta yí gbe Yehowa. Lé àzan amɛɖekishinɔnɔblɔɖe ao tɔ lɔ doɔ?

²¹ Zan amɛɖekishinɔnɔblɔɖe ao tɔ lɔ asɔ sɛn Yehowa. Amɛ miliɔn nɛniɖe sɔ gbeta mɔ, yewoado jijɔ nɔ Yehowa yí gbe Satana. (Elododo Wema 27:11) Nyi àtɛnŋ awa gbɛ, keŋ avanɔ Mawu xexe yoyu lɔ mɛ hwecinu yí avaɖe efunkpekpewo pleŋ siɔ? Eta ci yí akplɔɛdo ana ɖoŋci nɔ enyɔbiɔse cɛ.